1, 2. ¿Ima mana imawampis igualaq rurëyoqtaq kantsik Jehoväpa testïgunkuna y imanötaq sientikunki?

MËTSIKAQ nunakunam alläpa kushikuyan imatapis rurayanqampita premiunkuna entregariyaptin. Këllaman yarpärishun, wakinkunaqa alläpa kallpachakurmi yanapakuyashqa, chikinakoqkuna alli pasakïchö kawakuyänampaq, tsëmi pëkunata alläpa valoryoq Premio Nobel nishqanta entregayashqa. Peru noqantsiktaqa, tsë premiupitapis mas väleq rurëtam Diosnintsik qomarquntsik, y tsë precisaq rurëqa nunakuna Kamakoqninwan amishtayänampaq yanapakunqantsikmi.

² Jehoväpa testïgunkunaqa tsë mana imawampis igualaq rurëyoqmi kantsik. Dioswan Cristu mandamashqam nuna mayintsikta rogantsik Dioswan amishtayänampaq (2 Cor. 5:20). Nunakuna pëman witiyänampaqmi Jehovä noqantsikta utilisämantsik, tsënöpam waranqëpayan nunakuna 235 nacionkunapitapis maschö Jehoväwan amïgu këman chäyashqa y mana wanushpa kawakïta chaskiyänampaq kaqmampis markäkuyan (Tïtu 2:11). Shonqupita patsëmi nuna mayintsikta invitantsik ‘mana pagashpa cawatsicoq yacuta debaldilla upuyanampaq’ (Apoc. 22:17). Imawampis mana igualaq rurëta ruranqantsikpitam, “shonqupita patsë munarnin alli kaqta” ruranqantsikta nintsik (Tïtu 2:14, NM). Rikärishun shonqupita patsë munar ruranqantsik, nunakuna Jehoväman witiyänampaq imanö yanapakunqanta. Juknöpaqa, allikunata ruranqantsiktaqa rikätsikuntsik yachatsikurninmi.

3. Jehovä shonqupita patsë ruranqanqa, ¿imaman confiakunapaqtaq yanapamantsik?

³ Diospa gobiernunchö mandakur Jesus ruranampaq kaqtam Isaïas 9:7 textu kënö nir willakurqan: “Tröpakunata  pushaq Jehoväpa shonqupita patsë munëninmi këta ruranqa”. Kënö ninqankunam rikätsikun ciëluchö Teytantsik llapan nunakunata salvëta munanqanta. Shonqupita patsë imëkata ruranqanmi yanapamantsik noqantsikpis Gobiernumpita kushishqa yachatsikunapaq. Llapan nunakuna Diosta reqiyänanta alläpa munanqantsikqa Dios ruranqanta qatikanqantsiktam rikätsikun. Tsënö kaptinqa, ¿churakarqunkiku llapan puëdinqëkimannö alli willakïkunata yachatsikunëpaq? (1 Cor. 3:9.)

4. ¿Imatataq Jesus yachatsimarquntsik shonqupita patsë y mana jaqita yachatsikurnin?

⁴ Jina Jesusman pensari, pëqa shonqupita patsëmi y mana jaqitam Diospa kaqta rurarqan, y tsëmi alläpa alli ejemplu noqantsikpaq. Imëkata rurarnin michëkäyaptimpis, pëqa Diospita yachatsikïtaqa hasta wanunqankamayaqmi rurar sïguikarqanlla (Juan 18:36, 37). Wanunampaq ichikllana pishikaptinmi, Jehovä Diosta nunakuna reqiyänanrëkur, masraq yachatsikurqan.

5. Higus plantapaq yachatsikunqannö, ¿imatataq Jesus rurarqan?

⁵ Jesus yachatsikurninmi, 32 watachö, parlarqan juk nunapa higus plantan kima watapana mana wayunqampaq. Y tsë higuspa duëñunmi mandakurqan tsë plantata roqurir jitariyänampaq, peru sirweqninnam, wayunanta pensar, wanun jicharirnin juk tiempu shuyäriyänampaq mañakurqan (leyi Lücas 13:6-9). Tsë witsampaqqa, Jesus yachatsikunqanta wallkaq nunakunallaran chaskikushqa kayarqan. Peru igualatsikïninchö rikätsikunqannömi, wanunampaq joqta killakunallana pishikaptin, Judëachö y Perëachö nunakunata yachatsir masraq yanaparqan. Y wanunampaq juk ishkë junaqkunallana pishikaptinmi, ‘mana cäsucoq’ judïukunarëkur waqarqan (Mat. 13:15; Lüc. 19:4).

6. ¿Imanirtaq nunakunata yachatsinapaq masraq sinchikunantsik?

⁶ Ushakë chämunampaq ichikllana pishiptinmi, masraq sinchikunantsik yachatsikunapaq (leyi Daniel 2:41-45 *). ¡Imanö kushikïpaqmi Jehoväpa testïgun kanqantsikqa! Nunakunapa problëmankuna altsakänampaq willakïkuna puritseq markaqa noqantsikllam kantsik. Tsëllaraqmi juk periodista, “¿imanirtaq alli nunakunata mana allikuna pasan?” neq tapukïpa respuestan mana tarina kanqanta nirqan. Peru Diosnintsikqa, noqantsiktam churamarquntsik tsënö tapukïkunapa respuestankunata Bibliawan nunakunata musyatsinapaq. Mana “qeläcushpa” tsëta rurëtaqa puëdintsikmi (Rom. 12:11). Shonqupita patsë kushishqa yachatsikurqa y Diospa bendicionninwanqa mas atskaq nunakunatam yanapashun Jehoväta reqiyänampaq y kuyayänampaq.

7, 8. Imëkapa pasëkarnimpis, ¿imata ruranqantsiktaq Jehoväta alaban?

⁷ Apostul Pablu pasanqankunam rikätsikun, Diospita yachatsikurninqa itsa noqantsikpis mana punushpa y mallaqpis pasanantsikpaq kaqta (2 Cor. 6:5). Kë pasakunqankunam alleq rikätsikun precursorkuna imëkapa pasayanqanta; pëkunaqa ichik tiempullam trabajayan mantenikuyänampaq y Diospita yachatsikïta kawëninkunachö puntaman churayänampaq. Jina pensarishun misionërukunaman, pëkunaqa llapan tiempunkunawanmi juk nacionkunachö yachatsikuyan (Filip. 2:17). Jina anciänukunapis Jehoväpa üshakunata cuidayänanrëkurmi, höraqa hasta mikuyantsu o alleqllaqa punuyantsu. Jinamampis yarpäshun,  edäyashqa o mana alli saludyoq cristiänukunata, pëkunaqa imëkatam rurayan llapan reunionkunaman ëwayänampaq y yachatsikoq yarquyänampaqpis. Kë llapan cristiänukuna imëkapa pasëkarpis puëdiyanqanmannö Diosta sirwiyanqanta yarpanqantsikmi alläpa kushitsimantsik. Pëkuna rurayanqanta rikarmi wakin nunakuna espantakuyan.

⁸ Reino Unido nacionchö Boston Target, nishqan periödicuta leeq nunam tsë periödicuman cartakunqanchö kënö nirqan: “Nunakunaqa religion asuntupita manam imatapis musyëta munayannatsu [...]. ¿Iglesiachö pastorkunaqa imatataq rurayan? Manam Cristunötsu nunakunata asheq ëwayan [...]. Jehoväpa testïgunkunallatam rikä nuna mayinkunata rasumpa kuyayanqanta rikätsikuyanqanta, porqui pëkunallam nunakuna asheq yarquyan y rasumpa kaqta yachatsiyan”. Kë mana alli munduchö imëkapa pasëkarnimpis Diosta sirwinqantsikqa pëtam alaban (Rom. 12:1).

9. Shonqupita patsë munar yachatsikur sïguinapaq, ¿imataq yanapamäshun?

⁹ Peru ¿imataraq rurashwan yachatsikïnintsikchö qelanëkarninqa? Tsëpaqqa yanapamäshun, yachatsikur yanapakunqantsikwan Jehovä imëkata logrëkanqanman yarpachakunqantsikmi (leyi Romanus 10:13-15). Salvakuyanqaqa Diosman clamakoqkuna o Jehoväpa jutinta parlaqkunallam, peru nunakuna tsëta rurayänampaqqa yachatsinantsikran. Tsëta alleq entiendinqantsikmi yanapamäshun shonqupita patsë munar alli kaqta ruranapaq y Diospa alli willakïninta imëpis ganas gänaslla yachatsikur këkänapaq.

10. ¿Imanirtaq nintsik alli portakunqantsikqa nunakuna Diosman witiyänampaq yanapakunqanta?

¹⁰ Manam shonqupita patsë munar yachatsikunqantsikllatsu nunakunata Diosman witiyänampaq yanapanqa. Jina precisanmi portakïnintsik alli kanampis. Tsëpaq parlarmi apostul Pablu kënö nirqan: “Yachatsicuyanqäta mana despresyayänanpaqmi noqacunaqa pitapis ni imacho ofendiyäshaqtsu” (2 Cor. 6:3). Shumaq parlakunqantsik y alli portakunqantsikmi yachatsikïnintsikta  shumaqyätsin, tsëmi rikämaqnintsik nunakuna Jehoväman witita munariyan (Tïtu 2:10). Awmi, atska kutikunachömi wiyarquntsik alli portakunqantsikrëkur nunakuna Diosman witiyanqanta.

11. ¿Imanirtaq Diosman mañakïkur imanö portakïkanqantsikta alleq rikänantsik?

¹¹ Alli portakunqantsik Diosman witiyänampaq nunakunata yanapanqannöllam, mana alli portakunqantsikpis nunakunata Diospita karupätsinman. Tsëmi, trabäjuchö, wayintsikchö o escuëlachö këkarpis, yachatsikuqantsikmannö alli portakunantsik. Imapis mana alli kanqanta musyëkarna rurashqaqa, noqantsikpaq pasëpa mana allim kanman (Heb. 10:26, 27). Tsëman pensarmi Diosnintsikman mañakurirnin alleq rikänantsik imata rurëkanqantsikta y imanö kawëkanqantsikta. Kë munduchö nunakuna mas mana alli portakuyanqanta rikarmi, alli shonquyoq nunakuna mas claru rikäriyanqa “mana alli ruraq nunapita, alli ruraq nuna jukläya kanqanta, y Diosta mana sirweq nunapita Diosta sirweq jukläya kanqanta” (Mal. 3:18). Awmi, alli portakïnintsikqa alläpam precisan nunakuna Dioswan amishtayänampaq.

12-14. Pruëbakunachö alli tsarakunqantsik, ¿imanötaq wakin nunakunata yanapashqa? Willakaramï.

¹² Corintu markachö cristiänukunaman cartakunqanchömi apostul Pablu willakurqan, imëka sufrimientukunapa pasanqanta, maqayanqanta y hasta carcelarätsiyanqanta (leyi 2 Corintius 6:4, 5). Tsënö pruëbakunapa pasar alli tsarakunqantsikqa rikamaqnintsikkunatam yanapanqa rasumpa kaqta chaskikuyänampaq. Këllaman pensarishun. Qepa watakunallataran Angola nacionpa juk markanchö Jehoväpa testïgunkunata chikeqninkuna ushakätsita munayarqan. Tsëpaqqa ishkë bautizadu Testïgukunatam y reunionkunaman ëwaq 30 nunakunatam juntapuriyarqan, y nïkurnam imanö maqayanqanta rikäyänampaq tsë markachö nunakunata qayatsiyämurqan. Ni wamrakuna ni warmikunapis mana escapayarqantsu, pasëpa yawaryäyanqanyaqmi maqayarqan. Tsëtaqa rurayarqan nunakunata mantsakätsirmi, tsënöpa Jehoväpa testïgunkuna yachatsikuyanqanta mana chaskikuyänampaq. Peru tsëta rikëkarpis nunakunaqa, ¡Jehoväpa testïgunkunatam Bibliapita yachatsiyänampaq mañakuyarqan! Tsëpita patsëqa Diospa Gobiernumpita yachatsikïqa masmi mirarqan y Diosqa allipam bendicirqan.

¹³ Kë pasakunqanmi rikätsimantsik, Biblia ninqankunata cumplinqantsikqa wakinkunatapis Diospita yachakuyänampaq alläpa yanapanqanta. Itsa Pedru y wakin apostulkuna alli tsarakuyanqanqa atskaqta yanaparqan Dioswan amishtayänampaq (Hëch. 5:17-29). Noqantsikpis alli kaqllata rurar tsarakushqaqa, itsa familiantsik, trabajaq o estudiaq mayintsikkuna rasumpa kaq yachatsikïta chaskikuriyanqa.

¹⁴ Imë höra karpis cristiänu mayintsikkunaqa qatikachashqam këkäyan. Këllaman yarpärishun, Armenia nacionchömi 40 cristiänukunapitapis mas carcelchö këkäyan, y itsa shamoq killakunachöqa mastaraq prësuyanqa. Eritrea nacionchönam 55 cristiänu mayintsikkuna carcelchö këkäyan, y wakinkunapaqa edadninkuna 60 watapitapis masnam. Corea del Sur nacionchönam, casi 700 cristiänukunanö creenciankunarëkur carcelchö këkäyan. Kë nacionchöqa casi 60 watakunapanam tsë problëmayoq kayan. Jehoväta mañakushun kë qatikachashqa cristiänu mayintsikkuna alli tsarakuyänampaq y tsënöpa Jehovä alabashqa kanampaq y alli shonquyoq nunakuna rasumpa kaq adoracionman yëkuyänampaq (Sal. 76:8-10).

15. Honradu kanqantsik nunakuna Diosta reqiyänampaq yanapanqampita willakaramï.

¹⁵ Honradu kanqantsikpis wakinkuna rasumpa kaqta yachakuyänampaq yanapanmi (leyi 2 Corintius 6:4, 7). Juk pasakunqanta rikärishun. Cärruwan ëwëkar juk pani pasäjinta paguëta munëkaptinmi, juk reqinqan warmi, “qamqa amänullatam ëwanki ama paguëtsu” nirqan. Y tsë paninam kënö nir contestarqan: “Amänullata ëwarnimpis pasäjïtaqa paganämi”. Tsëpitanam tsë warmiqa cärrupita bajariptin, choferqa panita kënö nir tapurirqan: “¿Jehoväpa testïgunku kanki?”. Paninam, “awmi” nirir, kënö tapurirqan: “¿Imanirtaq tsëta tapumanki?”. Tsë nunanam kënö nirqan: “Näqa tsë warmita ninqëkitam wiyarqö, y noqaqa musyämi Jehoväpa testïgunkunaqa mana  ulikoq o llullakoq y honradu kayanqëkita”. Tsëpita atska killakuna pasanqanchömi, reunionchö kë paniman juk nuna witirir kënö nirqan: “¿Yarpämankiku? Noqaqa pasaji asuntupita parlanqëki nunam kä. Y honradu kanqëkita rikashqa karmi, Jehoväpa testïgunkunawan Bibliata estudianäpaq churakarqä”. Rikanqantsiknömi, alli portakunqantsik y honradu kanqantsikqa nunakunata rikätsin confiakïpaq cristiänu kanqantsikta.

16. a) ¿Imanirtaq pacienciakoq, kuyakoq y alli kanqantsik nunakunata yanapan Diosman witiyänampaq? b) Willakaramï pastorkuna hermänu mayinkunata imata rurayanqanta.

¹⁶ Jina pacienciakoq, kuyakoq y alli karnimpis yanapakuntsikmi Jehovä Diosman mas nunakuna witiyänampaq. Tsënö kanqantsikta rikämaqnintsikkunachöqa, itsa Jehoväpita, munënin ima kanqampita y markampita musyëta munaq nunakuna këkäyan. Rasumpa cristiänukuna imanö kanqantsik y alli portakunqantsikmi claru rikätsikun Diosta rasumpa sirwinqantsikta y ardëlla cristiänutukoqkunapita jukläya kanqantsikta. Iglesiakunachö mëtsikaq pastorkunaqa, hermänunkunata qellëninkunata jorqaparmi alläpa ricuyäkuyan, chaniyoq cärrukunata y wayikunatam rantiyan o rurayan, hasta allqunkunapaqpis chaniyoq wayikunatam ruratsiyan. Rasun kaqchöqa, “Cristupa qateqninmi kä” neqkunaqa manam ni ichikllapis debaldillaqa yachatsikuyantsu (Mat. 10:8). Unë Israel markapa uli sacerdötinkunanömi “yachatsikuyanqampita” cobrakuyan, peru tsëpitapis mas llakikïpaq y piñakïpaqqa, ¡Biblia ninqannö mana yachatsikuyanqanmi! (Miq. 3:11.) Tsënö portakuyanqanqa manam ichikllapis nunakunata yanapantsu Dioswan amishtayänampaq.

17, 18. a) Dios munanqannö portakur, ¿imanötaq pëta alabantsik? b) ¿Imataq yanapamantsik alli kaqllata rurar sïguinantsikpaq?

¹⁷ Tsënö kaptimpis, rasumpa kaq yachatsikïkuna y alli kaq rurëkunaqa nunakunapa shonqunkunayaqmi chärin. Juk precursor wayin wayin yachatsikïkaptinmi juk edäyashqa viuda warmi Diospa yachatsikïninta wiyakïta munarqantsu. Kë warmim precursorta kënö nirqan: “Punköta tocakamunqëki höram cocïnächö këkaq föcuta trukanäpaq juk escalëraman subishqa këkarqö”. Tsënam precursorqa kënö nirqa: “Tsëqa alläpa peligrösum, manam japallëkillaqa rurankimantsu”. Tsënö nirirnam, precursorqa föcuta cambiarapur ëwakurqan. Tsë warmipa ollqu wamram precursor ruranqanta musyarirmi alläpa kushikurqan y agradecikunampaq asheq ëwarqan, y tiempuwanqa Bibliapita yachakunampaqpis awnikurirqanmi.

¹⁸ ¿Imanirtaq allikunata ruranëkipaq churakarqunki? Tsëtaqa itsa rurëta munanki, shonqupita patsë Diospita yachatsikurnin y Jehovä munanqannö imëkatapis rurarqa, pëta alabanqantsikta y nuna mayintsikkuna salvakuyänampaq yanapanqantsikta musyarnin (leyi 1 Corintius 10:31-33). Shonqupita patsë alli kaqta rurarqa, Diospa alli willakïninta willakurqa y alli portakurqa, rikätsikuntsik Jehoväta y nuna mayintsikta alläpa kuyanqantsiktam (Mat. 22:37-39). Kanan witsan shonqupita patsë alli kaqta rurarninqa alläpa kushikïtam tarishun. Jinamampis alläpa markäkïwanmi shuyaräshun, llapan nunakuna Kamakoqnintsik Jehovällata respetarnin adorayänan junaq chämunanta.