1, 2. ¿Ima allin ruwaypin Testigokuna llank’anchis? ¿Imaynan sientekunki chay llank’aypi yanapakusqaykiwan?

ASKHA runakunan allinkuna ruwasqankumanta hatunchasqa kanku huk premiota chaskispa. Chay premiotan wakinqa chaskinku iskay cheqninakuq llaqtata allipunachisqankumanta. Ichaqa chaykunamanta aswan allin kaqtan ñoqanchisqa ruwanchis: Runakunatan yanapanchis Kamaqninkuwan allipunakapuyta, chaytan Dios kamachiwarqanchis.

² Jehová Diospa testigonkunallan chay hina llank’aytaqa aparinchis. Diospa, Jesuspa kamachisqanmi runakunata nishanchis: “Dioswan allipunaychis”, nispa (2 Cor. 5:20). Jehová Diosmi ñoqanchiswan runakunata yanapashan payman asuykunankupaq. Chaymi 235 nacionkunapi hina waranqa-waranqanpi runakunaña Dioswan allipunakuspa wiñay kawsayta suyakushanku (Tito 2:11). Rawrashaq sonqowanmi runakunata nishanchis: “Kawsay unuta ukyay munaqqa mana qolqellawan ukyachun”, nispa (Apo. 22:17). Chay llank’ayta ancha chaninpaq qhawarisqanchisraykun ‘allin kaqkunata tukuy sonqo ruwaq’ llaqta kanchis (Tito 2:14). ¿Imaynatan chay hinata llank’asqanchis runakunata yanapanman Dioswan allipunakapunankupaq? Ñawpaqta rimasun predicayninchismanta.

3. ¿Imatan Jehová Dios maytapuni ruwayta munashan?

³ Isaías 9:7 texton willan Diospa Churin kamachikamuqtin allinkuna ruwananta. Chaytan ‘Tukuy-atiyniyoq Señor Diosqa [maytapuni munashan] ruwayta’. Arí, hanaq pachapi kamaqninchisqa maytapunin munan runakuna qespichiyta. Chayta yachasqanchismi ñoqanchistapas kallpachawananchis allin willaykunata rawrashaq sonqowan aparinapaq. Rawrashaq sonqowan runakunaman Diosmanta yachachispan Jehová  Diosta qatikusun. Qanri, ¿rawrashaq sonqowanchu allin willakuykunata aparinki? (1 Cor. 3:9.)

4. ¿Imaynatan Jesús rikuchirqan mana sayk’uspa rawrashaq sonqowan predicasqanta?

⁴ Jesuspas mana sayk’uspan rawrashaq sonqowan predicarqan. Askha runakunaña cheqnikuspa wañuchiyta munarqanku chaypas, payqa kawsanan p’unchaykaman rawrashaq sonqowan Diosta servirqan (Juan 18:36, 37). Hinaspapas wañuchinanku p’unchay qayllaykamusqanta yachaspan, payqa astawanraq predicarqan runakuna Diosta reqsinankupaq.

5. ¿Imatan Jesús ruwarqan higos sach’amanta rikch’anachiypi hina?

⁵ 32 wata para qallariy killapin, Jesusqa kinsa wata hunt’a mana ruruq sach’amanta rikch’anachiyta willarqan. Chaypin chakrayoq kamachirqan chay sach’ata wit’uspa horqopunankupaq, chakra cuidaqmi ichaqa valekurqan wanuwan churaqtin huk tiempota suyaykunanpaq (leey Lucas 13:6-9). Chay hinatan chay tiempopaqpas Jesusta uyarikuqkuna pisilla karqanku. Ichaqa rikch’anachiypi nisqan hina, soqta killa hinallaña kay Hallp’api kananpaq kashaqtinmi astawanraq Judea, Perea llaqtakunapi predicarqan. Wañupunanpaq pisillaña kashatintaq judiokuna ‘ninrinkuta roqt’uyachisqankumanta’ waqarqan (Mat. 13:15; Luc. 19:41).

6. ¿Imaraykun kallpachakunanchis astawan predicananchispaq?

⁶ Tukukuy p’unchaymi astawanña asuykamushan chaymi kallpachakunanchis astawan predicanapaq (leey Daniel 2:41-45). ¡Jehová Diospa testigon kayqa manan imawanpas tupanmanchu! Testigokunallan sasachakuykunaq tukukunanmanta sumaq willakuyta hallp’antinpi runakunaman apanchis. Kay p’unchaykunallan huk periodista nirqan: “¿Imaraykun allin runakunapaq kan sasachakuykuna? Chay tapuytan mana pipas kutichiyta atirqanchu”, nispa. Diosmi llapa cristianokunata kamachiwanchis llapa uyarikuy munaqkunaman chay tapukuykunata kutichinapaq. Chaymi “rawrashaq sonqowan” chay kamachikuyta hunt’ananchis (Rom. 12:11). Diospa yanapayninwan rawrashaq sonqowan predicasqanchismi runakunata yanapanqa Diosta reqsinankupaq munakunankupaqpas.

7, 8. ¿Imaynatan kallpachakusqanchis Diosta hatunchan?

⁷ Pabloqa Diosta servinanraykun ‘pisita puñurqan’ ‘yarqaytapas muchurqan’ (2 Cor. 6:5). Pay hinan kunanpas askha iñiqmasikuna tukuy imata ruwanku Diosta servinankurayku. Llank’anankuña kawsanankupaq chaypas askha precursorkunan predicacionta ñawpaqman churanku. Misionerokunapas anchatan kallpachakunku huk nacionkunapi runakunata yanapanankupaq (Filip. 2:17). Iñiq t’aqapi umallikunapas puñuyta mikhuyta muchusparaqmi Diospa ovejachankunata michinku. Hinaspapas kurak, onqosqa iñiqmasikunan kallpachakunku huñunakuykunaman rishanallankupaq predicacionman lloqsishanallankupaqpas. ¡Maytan kallpachawanchis chay iñiqmasikunaq kallpachakusqanku! Chayta rikuspan hawapi runakunapas reparanku Dios serviyta ancha chaninpaq qhawarisqanchista.

⁸ Reino Unido nacionpi lloqsimuq periodicon nirqan: “Runakunaqa manañan religionninkupi confiankuchu [ . . . ]. ¿Imatan iglesiakunapi pastorkuna ch’isiyaq ruwanku? Paykunaqa manan Cristo hinachu runakuna maskhaq rinku [ . . . ]. Yaqachus hina Jehová Diospa testigonkunalla runakunapi interesakuspa runakunata maskhamunku cheqaq kaqtapas yachachinku”, nispa. Kay tiempopi runakunaqa manan munankuchu hukkunarayku imatapas ruwayta. Testigokunan ichaqa kallpachakunchis runakunaman Diosmanta yachachinanchispaq  chaywantaqmi Diosta hatunchanchis (Rom. 12:1).

9. ¿Imatan ruwananchis rawrashaq sonqowan predicashanallapaq?

⁹ Ichaqa manapaschá ñawpaqpi hinañachu rawrashaq sonqowan Diosta servishanchis, ¿imatan ruwasunman chayta reparakuspa? Yuyaymanananchismi predicasqanchiswan Jehová Dios tukuy imaymana ruwasqanta (leey Romanos 10:13-15). Predicasqanchiswanmi runakuna Diospa sutinta iñiywan waqyakunqaku chaytaqmi paykunata qespichinqa. Chayta yachaymi kallpachawasun rawrashaq sonqowan allin ruwaykunata ruwananchispaq allin willakuykunata willananchispaqpas.

10. ¿Imaynapin allin kawsayninchis runakunata Diosman pusamun?

¹⁰ Ichaqa manan rawrashaq sonqowan predicaspallachu runakunataqa Diosman pusamusun. ¿Imatawanmi ruwana? Allin kawsayniyoq kasqanchistan qhawarichikunanchis. Chaymantan Pablo qelqarqan: “Manan pimanpas ima misk’anatapas churaykuchu, llank’ayniykumanta ama p’enqayta rimanankupaq”, nispa (2 Cor. 6:3). Sumaq rimayninchis sumaq kawsayninchismi yachachisqanchista sumaqyachin, chaymi runakunapas chayta rikuspa Dios yupaychayta allinpaq qhawarinku (Tito 2:10). Askha experienciakunan kan allin kawsasqanchista qhawarispa allin sonqoyoq runakuna Diosman asuykusqankumanta.

11. ¿Imaraykun Diosmanta mañakuspa yuyaymanananchis imayna kawsasqanchispi?

¹¹ Imaynan allin kawsayninchis runakunata Diosman pusamun, chay hinatan mana allin kawsayninchispas Diosmanta runakunata karunchanqa. Chaymi wasipi, llank’anapi otaq escuelapi kaspapas runakuna Diosman asuykunankupaq hina kawsananchis. Yachashaspa imapipas huchallikusunman  chayqa, Jehová Diosmantan wiñaypaq karunchakapusunman (Heb. 10:26, 27). Chaymi Diosmanta mañakuspa yuyaymanananchis imayna kawsasqanchispi, imaynata runakunawan qhawarichikusqanchispipas. Kay pachapi runakunaqa aswan millaymanmi tukupushanku, chaymi sumaq sonqo runakunaqa reparanqaku “allin runaq millay runaq imaynachus kasqanta, pichus [Diosta] serviq, pitaqchus [Diosta] mana serviq kasqantapas” (Mal. 3:18). Arí, allin kawsasqanchismi runakunata yanapanqa Dioswan allipunakapunankupaq.

12-14. ¿Imaynapin iñiyninchispi qaqata sayasqanchista qhawarispa hukkunapas iñipunkuman?

¹² Corinto llaqtapi cristianokunaman carta qelqasqanpin Pablo willarqan ñak’ariykunapi, sasachakuykunapi tarikusqanta, maqasqa, carcelpi wisqasqa kasqantapas (leey 2 Corintios 6:4, 5). Chay hinakunapi tarikuspa iñiyninchispi qaqata sayasqanchista rikuspan runakunaqa Bibliamanta yachayta munankuman. Chaypaq Angola nacionpi sucedesqanmanta yachasun. Ñawpaq watakunapin huk llaqtapi huk t’aqa runakuna Testigokunata chinkachiyta munarqanku. Chaymi huk kuti iskay Testigokunata, huñunakuyman riq 30 runakunatawan muyuykurqanku. Llaqtapi llapa runakunata huñuruspataq paykunaq ñawpaqenpi soq’aykurqanku yawar phawanankama, manan warmikunata wawakunatapas khuyapayarqankuchu. Chaytaqa ruwarqanku Jehová Diospa testigonkunata mana uyarinankupaqmi. ¡Ichaqa chayta rikuspan astawan askha runakuna Testigokunawan Biblia estudiayta qallarirqanku! Chaymantapachan astawan predicakurqan, iñiqkuna yapakurqan, bendicionkunatapas chaskikurqanku.

¹³ Chaymi rikuchin iñiyninchispi qaqata sayay may allinpuni kasqanta. Chhaynatapaschá ñawpaq tiempopipas Pedrota huk apostolkunatapas iñiyninkupi qaqata sayasqankuta rikuspa wakin runakuna Diosman asuykapurqanku (Hech. 5:17-29). Ñoqanchispas iñiyninchispi qaqata sayasun chayqa, familianchis, llank’aqmasinchiskuna otaq estudiaqmasinchiskunan Diospi iñipunqaku.

¹⁴ Kunanpas askha iñiqmasinchiskunan qatiykachasqa kashanku. Armenia nacionpin 40 iñiqmasinchiskuna carcelpi kashanku cuartelman mana riy munasqankurayku, yaqapaschá qhepa killakunamanqa huk iñiqmasikunatapas carcelman apanqaku. Eritrea nacionpipas 55 iñiqmasikunan carcelpi kashanku, wakinqa 60 watayoq hinan kanku. Corea del Sur nacionpipas 700 Testigokunan carcelpi kashanku Diospi iñisqankurayku. Chay nacionpiqa 60 wata hinañan chay sasachakuypi kashanku. Chhayna sasachakuypi tarikuq iñiqkunapaq Diosmanta mañakusun, payta yupaychanankupaq hina iñiyninkupi qaqata sayanankupaq, chayta qhawarispa hukkunapas Diospi iñipunankupaq (Sal. 76:8-10).

15. ¿Imaynapin yachanchis honrado kasqanchis runakunata Diosman pusamusqanta?

¹⁵ Honrado kasqanchispas runakunatan Diosman pusamunman (leey 2 Corintios 6:4, 7). Huk kutinmi huk iñiqmasi carropi viajashaspa huk maquinaman qolqeta churasharqan pasajenta pagananpaq. Hinan huk reqsisqan warmi nirqan: ‘Amaña pagaychu, kaychallatamá viajanki riki’, nispa. Chaymi iñiqmasinchis nirqan huk cuadrallataña viajanman chaypas pagananpuni kasqanta. Chay qhepamanmi chay warmi carromanta urayapurqan. Hinan chay carro manejaq iñiqmasinchista tapurqan: “¿Testigochu kanki?”, nispa. Iñiqmasinchistaq nirqan: “Arí, Testigon kani. ¿Imaraykutaq tapuwashankiri?”, nispa. Runataq nirqan: “Uyarisharqanin urayapuq warmiman nisqaykita, ñoqaqa yachanin Jehová Diospa testigonkunaqa honrado runakuna kasqankuta”,  nispa. Askha killakuna qhepamanmi iñiqmasinchisman huñunakuypi huk runa asuykuspa tapurqan: “¿Reqsiwashankichu? Pasaje pagaymanta qanwan rimaq chofermi kashani. Honrada kasqaykita qhawarispan Testigokunawan kunan Bibliata estudiashani”, nispa. Kaypi rikusqanchis hina, honrado kasqanchista qhawarispan runakuna ñoqanchispi confianqaku.

16. ¿Imaraykun pacienciayoq kay, allin runa kay, munakuq kasqanchis ima runakunata Diosman pusamun?

¹⁶ Chaymantapas pacienciayoq kay, allin runa kay, munakuq kasqanchis iman runakunata Diosman pusamunqa. Yaqapaschá qhawawaqninchis runakuna yachayta munashanku Jehová Diosmanta, ruway munasqanmanta, llaqtanmantapas. Religionkunapi pastorkunan ichaqa cheqaq cristianokunamanta hukniray kanku. Paykunaqa hawallankupin sumaq kanku, runakunatan engañanku qolqenkutapas ch’utinku. Wakinmi chay qolqewan sumaq wasikunata carrokunata rantikunku, alqonkupaq imaraqmi sumaq wasikunata ruwachipunku. Manapunin runakunaraykuqa imatapas gratislla ruwayta munankuchu (Mat. 10:8). Paykunaqa ñawpa Israel llaqtapi mana kasukuq sacerdotekuna hinan “qolqerayku yachachinku”, manataqmi Bibliaq nisqanman hinachu yachachinku (Miq. 3:11). Chay runakunaqa ruwasqankuwanmi runakunata astawan Diosmanta karunchanku.

17, 18. a) ¿Imaynapin ñoqanchispi allinkuna kasqanwan Diosta hatunchasunman? b) ¿Iman kallpachawanchis allinkunata ruwashanallapaq?

¹⁷ Cheqaq yachachisqanchista, hukkunapaq allinkuna ruwasqanchistawan qhawarispan runakuna Diosman asuykunkuman. Huk kutinmi huk precusor huk wasita takaykuqtin chaypi tiyaq kuraq viuda mana uyariyta munarqanchu, nirqanmi: “Escalera pataman seqaruspan cocinaypi focota cambiayta munasharqani”, nispa. Hinan iñiqmasinchis nirqan: “Chaytaqa manan sapallaykiqa ruwanaykichu”, nispa. Hinaspan pay kikin chay focota cambiapurqan. Chayta yacharuspan chay viudaq wawan anchata admirakurqan, chaymi iñiqmasinchisman tariparuspa agradecekurqan, qhepamantaq Biblia estudiayta qallarirqan.

¹⁸ Rawrashaq sonqowan predicaspa, Diospa munasqanman hina imatapas ruwaspaqa Jehová Diostan hatunchanchis, runakunatataqmi yanapanchis qespichisqa kanankupaq, chaykunata yachasqanchismi kallpachawanchis allinkunata ruwashanallapaq (leey 1 Corintios 10:31-33). Chaypin rikuchinchis Jehová Diostapas runamasinchistapas munakusqanchista (Mat. 22:37-39). Sichus rawrashaq sonqowan allinkunata ruwasun chayqa, kunanmantapachan ancha kusikuy kawsayta tarisun. Qhepamantaq llapanchis rawrashaq sonqowan kamaqninchis Diosta hatunchasun.