1, 2. O le ā le faaeaga tautele ua maua e Molimau a Ieova, ma o le ā sou faalogona i lenā faaeaga?

E LAGONA e tagata le faatāuaina o i latou, pe a maua se faailoga taualoa mai i a latou galuega. E faaaloalogia nisi pe afai sa fesoasoani i ni atunuu e maua le nofo filemu. Peitaʻi, e sili atu ona tāua le faaeaga o le auina atu e le Atua, e fesoasoani i tagata e maua se faiā lelei ma ia.

² E na o Molimau a Ieova e mauaina lenā faaeaga tautele. O loo taʻitaʻia e Ieova ma Keriso i tatou, e fesoasoani i tagata ina ia “toe lelei ma le Atua.” (2 Kori. 5:20) Ua faaaogā e Ieova i tatou e taʻitaʻia mai tagata iā te ia. E faitau miliona i latou o loo iai i atunuu e silia ma le 235, ua avea ma uō a le Atua ma maua le faamoemoe o le ola e faavavau. (Tito 2:11) E tatou te maelega i le galuega talaʻi, ma valaaulia “so o se tasi e manaʻo i ai” e aʻoaʻoina le upu moni. (Faaa. 22:17) Ua taʻua i le Tito 2:14, e tatou te “maelega i galuega lelei.” O lona uiga e tatou te fiafia e faia le finagalo o Ieova ma faia le mea sili e tatou te mafaia. O le a tatou iloiloina pe faapefea i le uiga maelega, ona fesoasoani e aʻoaʻoina isi e faatatau iā Ieova. O se tasi o auala, o le galuega talaʻi.

3. O le ā le faamautinoaga ua tatou maua ona o le “maelega o Ieova”?

³ E faasino atu le maelega i se faanaunauga malosi e faia se gaoioiga. Ua faapea mai le Isaia 9:7 o le a avea le Alo o le Atua ma Tupu, ma e tele galuega lelei o le a ia faia mo tagata. E mafai ona faataunuuina na mea uma ona o le “maelega o Ieova o ʻau.” O lea, ua faamautinoa mai ai e finagalo  Ieova e faasaoina tagata. E tatau la ona tatou maelega i le galuega talaʻi, auā o Ieova o le Atua maelega. I le galulue faatasi ai ma le Atua, po o e faia le mea sili e te mafaia e talaʻia ai le tala lelei?​—1 Kori. 3:9.

4. Aiseā ua avea ai Iesu ma faaaʻoaʻoga sili o lē na tumau maelega i lana faiva?

⁴ E toʻatele i latou sa tetee iā Iesu ma taumafai e fasiotia o ia. E ui i lea, sa avea o ia ma faaaʻoaʻoga sili o lē na tumau maelega seʻia oo ina faaiʻuina lana faiva. (Ioa. 18:36, 37) Na atili faamalosia Iesu e aʻoaʻoina tagata e faatatau iā Ieova, ina ua ia iloa e lē o toe umi ona faapuapuagatia lea o ia ma maliu ai.

5. O ā vala e talitutusa ai Iesu ma le galue vine i le talafaatusa?

⁵ I le 32 T.A., na taʻua ai e Iesu le talafaatusa e faatatau i se tamāloa na iai le laau o le mati i lona togāvine, peitaʻi e leʻi fua mai. Ina ua mavae tausaga e tolu, na ia faatonuina ai le tagata galue vine e tātuu le laau. Peitaʻi, na toe talosaga le tagata galue vine, e toe tuu atu se taimi seʻia tuu i ai le faalelei eleele ina ia fua mai ai. (Faitau le Luka 13:6-9.) Ina ua fetalai Iesu i na upu, e toʻaitiiti le ʻausoo sa iai. Na naunau Iesu e galue mamafa a o leʻi maliu. O lea, e pe ā ma le ono masina na ia talaʻi ai ma le maelega i Iutaia ma Perea. A o lata i le taimi e maliu ai Iesu, na matuā faanoanoa o ia ona e leʻi taliaina e le toʻatele lana feʻau.​—Mata. 13:15; Luka 19:41.

6. Aiseā e tatau ai ona faateleina so tatou sao i le faiva?

⁶ A o tatou lata atu i le iʻuga, e tatau ona faateleina so tatou sao i le faiva. (Faitau le Tanielu 2:41-45.) O se faaeaga le avea o i tatou ma Molimau a Ieova. E na o i tatou ua mafai ona faailoa atu i tagata le auala e foʻia ai faafitauli. Na taʻua e se tusitala o se nusipepa, e faigatā ona iloa le māfuaaga e tutupu ai mea leaga i tagata lelei. Peitaʻi o loo faailoa mai i le Tusi Paia le māfuaaga, ma o lo tatou tiute o ni Kerisiano le faailoa atu i isi o lenā manatu. A o tatou faia le galuega a Ieova, e tatau ona tatou “maelega i la le agaga.” (Roma 12:11) E faamanuia e Ieova la tatou galuega, a o tatou fesoasoani i tagata e iloa Ieova ma alolofa iā te ia.

7, 8. E faapefea ona faamamaluina Ieova, pe a tatou faaalia le agaga faataulaga?

⁷ O loo taʻua i le 2 Korinito 6:5 le tele o faafitauli sa feagai ma Paulo a o auai i le talaʻiga, e pei o le ʻlē moe i le pō, ma le leai o ni meaʻai i nisi taimi.’ E faapena tulaga o loo feagai ma o tatou uso ma tuafāfine i le faiva. E faatāua e paeonia la latou faiva, ae i le taimi e tasi e latou te manaʻomia ni galuega e tausia ai i latou. O loo galulue mamafa misionare e fesoasoani i isi atunuu. (Fili. 2:17) E faataulaga foʻi e toeaina o latou taimi, ina ia tausia ai mamoe a Ieova. O i latou ua loa le soifua ma ē ua maua i maʻi o le tino, e faia a latou taumafaiga e auai ai i sauniga ma le talaʻiga. O se faalaeiauga le mātauina o le agaga faataulaga o loo faaalia e nei auauna a Ieova. E oo lava i tagata o le lalolagi, e latou te mātauina lo tatou faatāuaina o le talaʻiga.

⁸ Na tusi se tagata i se tasi o nusipepa i le United Kingdom e faapea: ʻE lē o toe maufaatuatuaina e tagata lotu i  aso nei. E lē iloa po o ā galuega a taʻitaʻi lotu o loo fai. E latou te lē asiasi i tagata e pei ona faia e Iesu. E na o Molimau a Ieova e manatu mamafa i tagata. E latou te asiasi i tagata, ma talaʻi atu le upu moni.’ O loo tatou ola ma soifua i se lalolagi manatu faapito. Peitaʻi e faamamaluina Ieova, pe a tatou lotomalilie e faataulaga o tatou taimi ma le malosi e talaʻi ai.​—Roma 12:1.

9. O le ā e fesoasoani iā i tatou e maelega ai pea i galuega lelei?

⁹ Ae faapefea pe afai ua mou atu lo tatou maelega sa iai? E tatau ona tatou taulaʻi i iʻuga lelei o le galuega ua tofia i tatou e Ieova e fai. (Faitau le Roma 10:13-15.) Ina ia faasaoina tagata, e tatau ona latou faatuatua iā Ieova ma valaau i lona suafa. O lea, e tatau ai ona tatou talaʻi atu iā i latou. O le iloaina o lenā vala, e uunaʻia ai i tatou e maelega pea mo galuega lelei, ma faia le mea sili e talaʻia ai le tala lelei.

10. E faapefea i a tatou amioga lelei ona tosina mai ai tagata iā Ieova?

¹⁰ O se isi vala e tatou te fesoasoani ai i tagata ina ia aʻoaʻoina e faatatau i le Atua, o a tatou amioga lelei faa-Kerisiano. I le 2 Korinito 6:3, na taʻua ai e Paulo le māfuaaga e tāua ai amioga lelei: “Ua matou lē faia se mea e tausuai ai, ina ia aua neʻi taʻuleagaina la matou faiva.” E masani ona talilelei mai tagata, pe a latou mātauina a tatou amioga lelei, faapea le auala e tatou te tautatala ai. O le iʻuga, e ono tosina mai ai isi i le tapuaʻiga moni.​—Tito 2:10.

11. Aiseā e tatau ai ona tatou mafaufau lelei i aafiaga o a tatou amioga, ma avea ma mataupu o a tatou tatalo?

¹¹ Po o fea lava e tatou te iai, o le auala  e tatou te amioaʻi ai, e mafai ona uunaʻia ai tagata e aʻoaʻoina e faatatau iā Ieova. E mou atu la tatou faiā ma Ieova, pe a “faia pea le agasala ma le loto i ai.” (Epe. 10:26, 27) O lea, e tatau ona tatou mafaufau lelei i aafiaga o isi ona o a tatou amioga, ma ia avea ma mataupu o a tatou tatalo. A o faateteleina pea le amioleaga, e faigofie ona ʻiloa le eseesega o lē o loo auauna i le Atua, ma lē e lē o auauna iā te ia.’ (Mala. 3:18) O lea, e fesoasoani a tatou amioga faa-Kerisiano i tagata e toe maua ai se leleiga ma le Atua.

12-14. E faapefea i lo tatou tutumau e ui i teteega, ona aafia ai le vaaiga a isi i le upu moni? Aumai ni faaaʻoaʻoga.

¹² I lana tusi lona lua i Korinito, na taʻua ai e Paulo na oo puapuaga iā te ia, sasaina ma faafalepuipuiina ona o lana faiva. (Faitau le 2 Korinito 6:4, 5.) Atonu e talia e nisi le upu moni, pe a mātauina lo tatou tutumau e ui i teteega. I tausaga ua mavae, na taumafai ai nisi e tafiesea Molimau a Ieova uma i se tasi vaipanoa o Angola. Na sasaina faamoʻamoʻa Molimau a Ieova e toʻalua, faapea tagata fiafia e toʻa 30, lea e aofia ai fafine ma tamaiti. Na faamalosia tagata o le nuu e vāai i nei sauāga, e faamataʻu ai i latou ina ia aua neʻi toe taliaina Molimau a Ieova. Peitaʻi, o le toʻatele o nei tagata na talosaga atu i uso mo ni a latou suʻesuʻega faale-Tusi Paia. Mulimuli ane, na faaauau pea le galuega talaʻi, toʻatele tagata na taliaina le upu moni, ma maua e uso le tele o faamanuiaga.

¹³ E ono filifili tagata e talia le upu moni, pe a latou mātauina lo tatou lototetele i taimi o tofotofoga. E aofia ai ē tatou te aʻoʻoga ma faigaluega faatasi, faapea foʻi o tatou tauaiga. Atonu na uunaʻia isi tagata e avea ma uō a le Atua, ona o le lototetele o Peteru ma isi aposetolo.​—Galu. 5:17-29.

¹⁴ O loo iai lava o tatou uso o loo feagai ma sauāga. Pe tusa ma le 40 uso i Armenia ua faafalepuipuiina ona o le lē auai i vaegaʻau, ma o le a faatupulaʻia pea lenā fuainumera. E toʻa 55 i latou ua faafalepuipuiina i Eritrea, ma o nisi o i latou ua silia ma le 60 tausaga o latou soifua. Pe ā ma le 700 uso ua faafalepuipuiina i Korea i Saute ona o le lē auai i vaegaʻau, ma e 60 tausaga o faaauau pea lenā tulaga. Ia faaauau pea ona tatou tatalo mo nei uso faamaoni. Ia avea a latou faaaʻoaʻoga lelei ma itu e faamamaluina ai Ieova, ma fesoasoani i isi e talia le upu moni.​—Sala. 76:8-10.

15. Aumai se faaaʻoaʻoga e faaalia ai le aafiaga o lo tatou faamaoni i isi.

¹⁵ Ua iloga Molimau a Ieova i le faamaoni. O lenā uiga e mafai ona tosina mai ai tagata i le upu moni. (Faitau le Eperu 13:18.) O se faataʻitaʻiga, a o faimalaga se tuafafine i le pasi, na faapea atu se tasi o ana uō e aua le totogiina lona pasese, auā e puupuu le faigāmalaga. Na faapea atu le tuafafine e tatau lava ona totogi le pasese. Na fesili le ave pasi i le tuafafine po o ia o se Molimau a Ieova. Na ia tali atu ioe, ma faapea atu i le avepasi pe aiseā ua fesili ai. Na taʻua e le avepasi sa ia lagona atu le la talanoaga ma lana uō, ma e na te iloa ua na o se vaega o tagata o loo faaalia le faamaoni, ma e aofia ai ma Molimau a Ieova. I ni nai masina mulimuli ane, na toe feiloaʻi ai le tamāloa ma le tuafafine  i le sauniga. Na faailoa atu e le tamāloa i le tuafafine o ia le avepasi. Na ia filifili e faia sana suʻesuʻega ma Molimau a Ieova, ona o le faamaoni o le tuafafine. E maufaatuatuaina e tagata le tala lelei o loo tatou talaʻia, pe a tatou faamaoni.

16. (i) Aiseā e tāua ai ona tatou faaalia le faapalepale, alofa ma le agalelei? (ii) Aumai se faaaʻoaʻoga o gaoioiga o loo faia e taʻitaʻi lotu.

¹⁶ Pe a tatou faaalia le faapalepale, alofa ma le agalelei, atonu o le a uunaʻia ai isi ina ia aʻoaʻoina e faatatau iā Ieova, ana fuafuaga ma ona tagata. E faaalia e Kerisiano moni uiga ma amioga e faamamaluina ai Ieova. E iai taʻitaʻi lotu e faafoliga mai e lelei o latou uiga ma amioga. Peitaʻi, e talapepelo ma faaaogā tupe a le ʻaulotu e faatau ai fale ma taavale taugatā. O se tasi faifeʻau na ia fausia se tamaʻi fale e ʻea mālūlū mo lana taʻifau. Ua pei i latou o ositaulaga faimea piʻopiʻo i Isaraelu. O le tele o a latou aʻoaʻoga e pepelo. E latou te lē usitaʻia le poloaʻiga a Iesu ina ia “avatu fua.” (Mata. 10:8; Mika 3:11) O a latou amioga ma uiga faaalia, e lē mafai ai ona latou fesoasoani i tagata ina ia maua se leleiga ma le Atua.

17, 18. (i) E faapefea ona faamamaluina Ieova i a tatou amioga? (ii) Aiseā e tatau ai ona e maelega pea i galuega lelei?

¹⁷ Peitaʻi, e mananaʻo tagata e maua se faiā lelei ma le Atua, pe a malamalama o loo tatou aʻoaʻoina le upu moni, ma feagai ma o tatou tuaoi i se auala agalelei. O se faaaʻoaʻoga, na faaalia le lē fiafia o se tinā matua i se uso paeonia sa talaʻi atu iā te ia. Na taʻua e le tinā, e oo atu le talaʻiga o loo tū i se apefaʻi ma taumafai e sui le matāuila o le molī o le umukuka. Na faapea atu le uso, e lē o saogalemu lana gaoioiga o loo fai. O lea, na ia suia ai le matāuila ona toe faaauau lea o le talaʻiga. Na taumafai le tama tama a le loomatua e saʻilia le uso, e faafetai i ai i le gaoioiga agalelei sa ia faia. E leʻi umi ae ia taliaina se suʻesuʻega faale-Tusi Paia.

¹⁸ Aiseā e tatau ai ona e maelega pea i galuega lelei? Pe a e maelega i le faiva ma faaalia amioga lelei, o le a e faamamaluina ai Ieova ma fesoasoani i isi ina ia faasaoina. (Faitau le 1 Korinito 10:31-33.) E faaalia ai foʻi le moni o lo tatou alofa mo Ieova faapea isi. (Mata. 22:37-39) O lea, pe a tatou maelega mo galuega lelei, e tatou te maua le fiafia moni ma le faamalieina. E tatou te tulimataʻia foʻi le taimi e tapuaʻi faatasi uma ai tagata iā Ieova o Lē na foafoaina mea, ma faamamaluina o ia.