1, 2. Nguliphi lilungelo boFakazi BaJehova labanalo, futsi utiva njani ngalo?

BANTFU labanyenti bakutsatsa njengeligugu kutfola umklomelo wekuphumelela entfweni letsite. Sibonelo saloko kutsi labanye batfole Umklomelo Wemnyaka ngesizatfu sekutsi basebente ngenshisekelo kute baletse kuthula emkhatsini wemacembu langevani nobe lehlukene. Kodvwa kuligugu kakhulu kutfunywa nguNkulunkulu sibe ngemancusa nobe titfunywa tekusita bantfu babe nebuhlobo lobunekuthula neMdali wabo.

² Njengobe siboFakazi BaJehova, ngitsi kuphela lesinalelo lungelo. Ngekucondziswa nguNkulunkulu naKhristu, sincenga bantfu kutsi ‘babuyisane naNkulunkulu.’ (2 Khor. 5:20) Sisetjentiswa nguJehova kute sisondzete bantfu kuye. Nguleyondlela leyente kutsi tigidzi tebantfu emaveni langetulu kwa-235 basitwe kutsi bajabulele buhlobo lobuhle naNkulunkulu futsi babe nelitsemba lekutfola kuphila lokuphakadze. (Thit. 2:11) Ngenshisekelo lesuka etinhlitiyweni, simema ‘lowo lofuna emanti ekuphila, kutsi awanatse mahhala.’ (Semb. 22:17) Ngesizatfu sekutsi siyawujabulela lomsebenti loligugu futsi siwenta ngekutimisela, singabitwa ngekutsi sibantfu ‘labanenshisekelo yekwenta imisebenti lemihle.’ (Thit. 2:14) Nyalo, asesibone kutsi inshisekelo yetfu yekwenta imisebenti lemihle isisita njani kutsi sisondzete bantfu kuJehova. Lenye indlela yekwenta loko, ngumsebenti wetfu wekushumayela.

3. “Inshisekelo yaSimakadze” isicinisekisa ngani?

³ Umbhalo wa-Isaya 9:7 nawukhuluma ngaloko lokutawentiwa kubusa kweNdvodzana yaNkulunkulu, utsi: “Inshisekelo yaSimakadze longuSomandla iyawukwenta loko.” Lawo mavi agcizelela sifiso saBabe wetfu wasezulwini sekusindzisa bantfu. Sibonelo saJehova senshisekelo sikhombisa ngalokucacile kutsi umsebenti wetfu lesiwunikwe nguNkulunkulu wekuba bamemeteli beMbuso kufanele siwusekele ngenhlitiyo yonkhe, ngekutimisela  nangenshisekelo. Sifiso setfu lesikhulu sekusita bantfu bati Nkulunkulu siveta inshisekelo yaJehova. Ngako-ke, njengobe sitisebenti letikanye naNkulunkulu, sitimisele yini kwenta konkhe lokusemandleni etfu kute simemetele tindzaba letimnandzi?—1 Khor. 3:9.

4. Jesu wasibeka njani sibonelo sekukhutsatela ngenshisekelo emsebentini wekushumayela?

⁴ Cabanga nangenshisekelo yaJesu. Wabeka sibonelo lesihle sekukhutsatela ngenshisekelo emsebentini wekushumayela. Ngisho nobe abephikiswa kakhulu, wachubeka anenshisekelo emsebentini wekushumayela kwaze kwaba sekupheleni kwekuphila kwakhe emhlabeni. (Joh. 18:36, 37) Njengobe sikhatsi sekunikela ngekuphila kwakhe besisondzela, kwakhula kutimisela kwaJesu kutsi asite bantfu bati Jehova.

5. Yini Jesu layenta levumelana nemfanekiso wakhe wesihlahla semkhiwa?

⁵ Nasi sibonelo: Ngasekupheleni kwa-32 C.E., Jesu wenta umfanekiso wendvodza lebeyinesihlahla semkhiwa engadzeni yayo, lekwaphela iminyaka lemitsatfu singatseli titselo. Sisebenti sayo satsi nasitjelwa kutsi sisigece lesihlahla, sacela kuniketwa sikhatsi sekutsi sisivundzise. (Fundza Lukha 13:6-9.) Bebambalwa bafundzi lebekungatsiwa batitselo temsebenti waJesu wekushumayela. Kodvwa njengobe kuvetiwe kulomfanekiso walesisebenti, Jesu wasebentisa lesikhatsi lesincane lebesisele—lebesicishe sibe tinyanga letisitfupha—kute atfutfukise umsebenti wekushumayela eJudiya nasePhereya. Emalangeni lambalwa ngembikwekufa kwakhe, Jesu wabakhalela bantfu besive sakubo ngobe ‘tindlebe tabo betiva’ kodvwa bangenti.—Mat. 13:15; Luk. 19:41.

6. Yini lokufanele isente sitfutfukise umsebenti wetfu wekushumayela?

⁶ Nasicabanga ngekutsi sesingene kangakanani emalangeni ekugcina, akudzingeki yini kutsi sitfutfukise imetamo yetfu yekushumayela? (Fundza Danyela 2:41-45.) Kulilungelo lelikhulu kuba boFakazi BaJehova. Ngitsi kuphela emhlabeni lesiniketa bantfu litsemba lesisombululo labangasetsemba setinkinga temhlaba. Intsatseli yeliphephandzaba yatsi umbuto lotsi “Yini lebangela kutsi kwenteke tintfo letimbi kubantfu labalungile?” ute imphendvulo. Kungumsebenti wetfu njengemaKhristu kucoca nebantfu labafisa kulalela ngetimphendvulo letiseBhayibhelini temibuto lefanana naleyo. Sinato tonkhe tizatfu ‘tekuvutsa emoyeni’ njengobe senta umsebenti lesiwunikwe nguNkulunkulu. (Rom. 12:11) Ngesibusiso saNkulunkulu, inshisekelo yetfu kulomsebenti webuvangeli ingabasita labanye kutsi bati futsi batsandze Jehova.

7, 8. Umoya wekutinikela umdvumisa njani Jehova?

⁷ Njengobe lokuhlangenwe nako kwemphostoli Pawula kukhombisa, umsebenti wetfu wekushumayela ungaphumela ekutseni ‘sicwashe’ ebusuku futsi ngaletinye tikhatsi ‘silale ngendlala.’ (2 Khor. 6:5) Lamavi asenta sikubone kahle kutinikela futsi angase asente sicabange ngemahlahlandlela lenta umsebenti wekushumayela ute kucala ekuphileni kwawo abe futsi atinakekela endzabeni yemali. Cabanga futsi nangetitfunywa telivangeli letikhutsele ‘letititfulula njengemnikelo walokunatfwako’ kute tisite bantfu kulamanye emave. (Fil. 2:17, NW.) Kutsiwani ngalabadzala belibandla labasebenta matima baze bangadli nobe bangalali kute banakekele timvu taJehova? Siphindze sibe nalasebakhulile nalabagulako labenta lokusemandleni abo kute babe khona emihlanganweni yebuKhristu nasensimini. Tinhlitiyo tetfu tigcwala kubonga nasicabanga ngato tonkhe letinceku taNkulunkulu letitinikele. Imetamo lenjalo iyawutsintsa umbono walabanye ngemsebenti wetfu wekushumayela.

⁸ Encwadzini layibhalela liphephandzaba iLincolnshire Boston Target, lase-United Kingdom, lomunye umfundzi walo longasiye Fakazi watsi: “Bantfu abasatetsembi tinkholo . . . Labafundisi bemasontfo basuke  bahleli lilanga lonkhe bentani? Bona abahambi njengaKhristu kute bahlangane nebantfu . . . Kuphela kwenkholo lebonakala inendzaba nebantfu, boFakazi BaJehova, bona labahambako, bahlangane nebantfu futsi bawente ngebucotfo umsebenti wekushumayela liciniso.” Kulelive leligcwele umoya wekutinaka wena, kutinikela kwetfu kunendzima lenkhulu ekudvumiseni Nkulunkulu Jehova.—Rom. 12:1.

9. Yini lengasikhutsata kutsi sihlale sinenshisekelo yekwenta imisebenti lemihle nasishumayela?

⁹ Yini lesingayenta nasibona shengatsi inshisekelo yetfu yekushumayela iyancipha? Kungasisita kucabanga ngaloko Jehova lakwentako ngemsebenti wekushumayela. (Fundza Roma 10:13-15.) Bantfu bangasindziswa nababita libito laJehova ngekukholwa, kodvwa angeke bakhone kukwenta loko nangabe singashumayeli kubo. Nasikucaphela loku kutawusikhutsata kutsi sihlale sinenshisekelo yekwenta imisebenti lemihle futsi sitimisele kumemetela tindzaba letimnandzi teMbuso.

10. Kungashiwo ngani kutsi kutiphatsa kwetfu lokuhle kudvonsela bantfu kuJehova?

¹⁰ Ngisho nobe kuba nenshisekelo kubalulekile ekushumayeleni, kodvwa nakukodvwa angeke kubadvonse bantfu kutsi basondzele kuNkulunkulu. Incenye yesibili yemisebenti lekhombisa inshisekelo ledvonsela bantfu kuNkulunkulu, kutiphatsa lokuhle kwebuKhristu. Pawula wagcizelela kubaluleka kwekutiphatsa kwetfu nakabhala atsi: “Kute lesimbekele sikhubekiso endleleni, kuze kutsi kubete liphutsa lelitfolakala emsebentini wetfu.” (2 Khor. 6:3) Inkhulumo yetfu lehlantekile nekutiphatsa kwetfu lokuhle kuyayihlobisa imfundziso yaNkulunkulu, kwente bantfu bakutsandze kukhonta Jehova. (Thit. 2:10) Ecinisweni, sivame kuva imiphumela lemihle kubantfu labacotfo nababona kutiphatsa kwetfu kwebuKhristu.

11. Yini lokufanele isente siyicabangele ngemthantazo imiphumela yekutiphatsa kwetfu?

¹¹ Siyati kutsi tento tetfu tingabangela kutsi  bantfu bente lokuhle, kodvwa kungenteka nekutsi tibabangele bente lokubi. Ngako-ke ngisho nobe sisemsebentini, sisekhaya nobe sisesikolweni, setama kutibalekela tintfo letitawenta bantfu bawusole umsebenti wetfu wekushumayela nekutiphatsa kwetfu. Nangabe senta sono ngemabomu, imiphumela yako ingaba mibi kakhulu kitsi. (Heb. 10:26, 27) Kucabanga ngaloko, kufanele kusente sikucabangele ngemthantazo loko lesikwentako nekutsi kuphila kwetfu kubatjelani labanye. Njengobe timiso tekutiphatsa kulelive tihhohloka, bantfu labacotfo ‘batawubona kahle umehluko emkhatsini . . . walabo labakhonta Nkulunkulu nalabo labangamkhonti.’ (Mal. 3:18) Kuyacaca kutsi kutiphatsa kwetfu lokuhle kwebuKhristu kunendzima lebalulekile ekwenteni bantfu babuyisane naNkulunkulu.

12-14. Indlela lesibeketelela ngayo kuvivinywa kwekukholwa kwetfu iwutsintsa njani umbono walabanye ngemsebenti wetfu wekushumayela? Niketa sibonelo.

¹² Ngesikhatsi abhalela baseKhorinte, Pawula waveta kutsi wabeketelela kuhlushwa, bulukhuni, kushaywa nekufakwa ejele. (Fundza 2 Khorinte 6:4, 5.) Nasibhekene nekuvivinywa kwekukholwa, kukhutsatela kwetfu kungabasita bantfu labasibonako kutsi bemukele liciniso. Asesibekise: Eminyakeni lendlulile, kwentiwa imetamo yekucedza boFakazi BaJehova kulenye indzawo yase-Angola. BoFakazi lababili lababhajatisiwe nalabanye bantfu labangu-30 labebete emihlanganweni yetfu baboshwa. Baphikisi babashaya baze baphuma ingati futsi bekubitwe bantfu baleyondzawo kutsi batewubukela. Kwashaywa ngisho nalabasikati nebantfwana. Inhloso bekukutsi kwetfuswe bantfu kute kungabi khona lofuna kulalela boFakazi BaJehova. Kodvwa kwatsi ngemuva kwaloko kushaywa, bantfu labanyenti bakulommango beta kuboFakazi futsi bacela tifundvo teliBhayibheli tasekhaya. Ngemuva kwaloko, umsebenti wekushumayela ngeMbuso wachubekela embili, kwaba nekwandza lokukhulu netibusiso letinyenti.

¹³ Lesibonelo sikhombisa umphumela lomkhulu loba khona nasima sicine etimisweni teliBhayibheli. Singacabanga kutsi baba bangakhi bantfu lababuyisana naNkulunkulu nababona sibindzi saPhetro nalabanye baphostoli. (Imis. 5:17-29) Esimeni setfu, bantfu lesifundza nabo esikolweni, lesisebenta nabo nobe emalunga emndeni wetfu bangase bafune kulalela nababona kutsi siyakumela lokulungile.

¹⁴ Labanye bazalwane betfu bayaphikiswa ngaletinye tikhatsi. Nasi sibonelo: E-Armenia bazalwane labacishe babe ngu-40 baboshiwe ngesizatfu sekutsi abatingeneli tepolitiki, futsi kungenteka kuboshwe labanyenti njengobe tinyanga tichubeka. E-Eritrea, tinceku taJehova letingu-55 tiboshiwe, letinye tato tineminyaka lengetulu kwa-60 budzala. ENingizimu Korea, boFakazi labangaba ngu-700 baboshelwe kukholwa kwabo. Lesimo sesichubeke iminyaka lengu-60. Asichubeke sithantazela kutsi kwetsembeka kwebazalwane betfu njengobe baphikiswa emaveni lehlukehlukene kutawudvumisa Nkulunkulu futsi kusite bantfu labatsandza kulunga kutsi bemukele kukhonta kweliciniso.—Hla. 76:8-10.

15. Niketa sibonelo sekutsi kuphila ngekwetsembeka kungabenta njani bantfu badvonseleke ecinisweni.

¹⁵ Kuphila kwetfu ngekwetsembeka kungase kwente bantfu basondzele ecinisweni. (Fundza 2 Khorinte 6:4, 7.) Cabanga nganasi sibonelo: Lomunye dzadze abefaka imali emshinini wemathikithi ebhasini ngesikhatsi umngani wakhe amtjela kutsi kute sidzingo sekubhadala ngobe usheshe wehla. Lodzadze wachaza kutsi kufanele ulibhadale lithikithi ngisho nobe usheshe wehla. Ngemuva kwaloko, lomngani wakhe wehla ebhasini. Lomshayeli webhasi wabuta lodzadze kutsi: “UnguFakazi waJehova yini?” Lodzadze waphendvula watsi: “Yebo, yini lekwenta ubute?” Lomshayeli watsi: “Nginivile nikhuluma ngekubhadala lithikithi lebhasi futsi ngiyati kutsi boFakazi BaJehova bayalibhadala nekutsi tonkhe tintfo batenta ngekwetsembeka.” Ngemuva kwetinyanga letimbalwa, lenye indvodza yeta kulodzadze  esifundvweni yatsi: “Uyangati mine? Ngingulomshayeli webhasi lowakhuluma nawe mayelana nekubhadala lithikithi lebhasi. Kubona kutiphatsa kwakho kwangenta ngakhetsa kucala kutadisha liBhayibheli naboFakazi BaJehova.” Kwatiwa njengebantfu labetsembekile kusenta sifanele kuba tisebenti letetsembekile.

16. Yini leyenta kubeketela, lutsandvo nemusa kutitsintse tinhlitiyo tebantfu? Niketa sibonelo.

¹⁶ Siphindze sibe nendzima lebalulekile yekudvonsela bantfu kuJehova nasikhombisa kubeketela, lutsandvo nemusa. Labanye labasibonako bangase bafise kufundza ngaJehova, ngetinjongo takhe nangebantfu bakhe. Simo sengcondvo nekutiphatsa kwemaKhristu eliciniso, kwehluke kakhulu nakucatsaniswa nekubukisa ngekutinikela kuNkulunkulu kwalabo labatentisako ekumkhonteni. Labanye baholi benkholo basebentisa imali yemihlambi yabo kute banjinge bayisebentisele kutsenga tindlu netimoto letidulile—lomunye waze watsenga indlu yenja lenemshini lokhipha umoya lobandzako. Kuliciniso kutsi bantfu labanyenti labatsi babalandzeli baKhristu abakatimiseli ‘kupha ngesihle.’ (Mat. 10:8) Esikhundleni saloko, njengebaphristi labangakalungi baka-Israyeli wasendvulo, “bayatsengwa kuze bachaze bahumushe nemtsetfo”—futsi lokunyenti labakufundzisako akukasekelwa emibhalweni. (Mik. 3:11) Kutiphatsa lokunjalo kwekutentisa akubenti bantfu babuyisane naNkulunkulu.

17, 18. (a) Simdvumisa njani Jehova nasilingisa bunjalo bakhe ekuphileni kwetfu? (b) Yini lekukhutsata kutsi uchubeke wenta imisebenti lemihle?

¹⁷ Ngakulolunye luhlangotsi, bantfu batsintseka tinhlitiyo nabeva timfundziso letiliciniso tebuKhristu futsi babona netento letinhle letentelwa bomakhelwane. Nasi sibonelo: Ngesikhatsi lelinye lihlahlandlela lishumayela emtini ngemuti, lacoshwa ngumfelokati losakhulile. Lomfelokati watsi ngesikhatsi lelihlahlandlela linconcotsa emnyango, yena abegibele esitebhisini kute alungise lilambu lagezi lasekhishini. Lelihlahlandlela latsi: “Akukaphephi kutsi wente loko uwedvwa.” Lelihlahlandlela lase liyamlungisela lelilambu ngemuva kwaloko lahamba. Ngesikhatsi indvodzana yalomfelokati iva ngalokwenteka, yatsintseka kakhulu yaze yetama kutfola lomzalwane ifuna kumbonga. Ekugcineni, lendvodzana yasemukela sifundvo seliBhayibheli.

¹⁸ Yini lekwenta utimisele kuchubeka wenta imisebenti lemihle? Kungenteka ubangelwa kwati kutsi nasikhombisa inshisekelo ngemsebenti wetfu wekushumayela futsi senta tintfo letivumelana nentsandvo yaNkulunkulu, sisuke sidvumisa Jehova futsi singabasita labanye basindziswe. (Fundza 1 Khorinte 10:31-33.) Inshisekelo yekwenta imisebenti lemihle ekushumayeleni nekutiphatsa ngendlela yaNkulunkulu, ivela ngekuba nesifiso lesijulile sekukhombisa lutsandvo ngaNkulunkulu nangalabanye bantfu. (Mat. 22:37-39) Nangabe sinenshisekelo yekwenta imisebenti lemihle, sitawutfola sibusiso lesikhulu sekujabula nekwenetiseka. Ngetulu kwaloko, singabuka embili esikhatsini lapho bonkhe bantfu batawukhombisa inshisekelo ekukhonteni kweliciniso kute kudvunyiswe uMdali wetfu, Jehova.