1, 2. Xi ndaayaʼ naroʼbaʼ nápanu casi testigu stiʼ Jiobá, ne ximodo runi sentirluʼ pur ndaayaʼ riʼ.

 STALE binni nabé riuulaʼdxiʼ guicaa ti premiu pur biʼniʼ xiixa nabé risaca. Casi cani ricaa Premio Nobel pur gucanecaʼ para bisaana de tinde chupa guidxi. Peru jma naroʼbaʼ ndaayaʼ nápanu purtiʼ cuseendaʼ Dios laanu para gacanenu binni chuʼ gaxha de laa.

² Laanu, ca testigu stiʼ Jiobá si nga nápanu ndaayaʼ riʼ. Dios ne Cristu nga cayuni mandar laanu para chuunu ra nuu binni ne gábinu laacaʼ gaca xhamígucaʼ Dios (2 Cor. 5:20). Riquiiñeʼ Jiobá laanu para ganda chuulaʼdxiʼ binni chuʼ gaxha de laabe, nga runi, millón de binni ni nuu lu jma de 235 guidxi roʼ maʼ guca xhamígucaʼ Dios ne cabézacaʼ guibánicaʼ sin gáticaʼ lu Guidxilayú riʼ (Tito 2:11). Cumu rucáʼ íquenu gúninu xhiiñanu de guidubi ladxidoʼno la? runi invitarnu cani cayati nisa «gueda gué nisa ni rudii enda nabani sin quixe gastiʼ» (Apoc. 22:17). Ne cumu nabé rusisácanu dxiiñaʼ bisaanané Jiobá laanu la? rúninu ni de guidubi ladxidoʼno ne ricá «ique nu guni nu ni jneza» (Tito 2:14). Yanna guidúʼyanu xiñee rudii gana binni chuʼ gaxha de Jiobá ora ruuyaʼ modo rucáʼ íquenu gúninu xhiiñaʼ Dios. Primeca modo zanda gacanenu laacabe nga ora gucheechenu diidxaʼ.

3. Xi rusihuinni ca diidxaʼ zeeda lu Isaías ra na runi Jiobá dxiiñaʼ né stale gana.

³ Isaías guníʼ xi guiráʼ chiguni gobiernu stiʼ Dios para binni guidxilayú. Ne lu Isaías 9:7 na zácani purtiʼ «Jiobá, Dios ni nandxóʼ [...] nga chiguni ni» né stale gana. Ca diidxaʼ riʼ rusihuínnicani pabiáʼ racalaʼdxiʼ Bixhózenu ni nuu guibáʼ gulá binni. Cumu cayúnibe dxiiñaʼ riʼ né stale gana la? rusihuínnini laaca naquiiñeʼ chuuláʼdxinu gucheechenu stiidxaʼ Reinu. Ora dede ndaaniʼ ladxidoʼno riale gacanenu binni gunibiáʼ Dios la? rusihuínninu cayuni Jiobá  dxiiñaʼ riʼ né stale gana. Yanna, ñee maʼ gudixhe íqueluʼ gúniluʼ biaʼ gándatiʼ para gucheecheluʼ ca diidxaʼ nacubi ne galán riʼ la? (1 Cor. 3:9.)

4. Xi ejemplu bisaana Jesús ora bicheeche diidxaʼ né stale gana.

⁴ Laaca zanda guiníʼ íqueluʼ ejemplu stiʼ Jesús, laa nabé bicaa ique gucheeche diidxaʼ ne qué nusaana de ñuni ni. Neca bicaalú binni laabe, bíʼnibe dxiiñaʼ que né stale gana dede dxi biiticabe laabe ndaaniʼ Guidxilayú riʼ (Juan 18:36, 37). Ne dxi jma mayaca guuticabe laabe, jmaruʼ si né gana gucanebe binni gunibiáʼ Jiobá.

5. Xi biʼniʼ Jesús pur ni bisiene ora bizeeteʼ ejemplu stiʼ yaga duʼgaʼ que.

⁵ Lu otoño stiʼ iza 32 bizeeteʼ Jesús ejemplu stiʼ ti hombre ni napa ti yaga duʼgaʼ lu layú stiʼ, peru qué huachuugube nin ti cuananaxhi luni lu chonna iza ni maʼ gudiʼdiʼ de zuhuaa ni. Ora biʼniʼ mandar hombre riʼ gusábacabe ni, gunabaʼ mozo stibe guiaana ni sti tiempu huiiniʼ para guchá abono ñee ni (biindaʼ Lucas 13:6-9). Neca maʼ napa iza de cucheeche Jesús diidxaʼ dxi bizeeteʼ ejemplu riʼ, caadxi si binni nga maʼ naca discípulo stibe dxi que. Peru lu ejemplu que bisiénebe caquiiñeʼ gúnibe dxiiñaʼ né gana, purtiʼ maʼ huaxiéʼ tiempu cayaadxaʼ para guuticabe laabe, biaʼ xhoopaʼ beeu si. Ngue runi, jma bicaa íquebe gúnibe dxiiñaʼ que guidxi Judea ne Perea. Ne dxi cayaadxaʼ xhupa xhonna gubidxa si para gátibe, biinabe pur ca judíu, purtiʼ qué ninacaʼ nucaadiágacaʼ laabe (Mat. 13:15, Luc. 19:41).

6. Xiñee jma naquiiñeʼ gucáʼ íquenu gucheechenu diidxaʼ né stale gana.

⁶ Cumu maʼ nabáninu lu ca últimu dxi riʼ la? jma naquiiñeʼ gucáʼ íquenu gucheechenu diidxaʼ né stale gana. Biblia na: «Ne dxi stiʼ ca rey que la? Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. Zunideni ne zunduuxeni guiráʼ ca reinu riʼ, ne laani ziaana ni ne qué ziuu dxi guiluxe ni» (Daniel 2:44). ¡Ti ndaayaʼ naroʼbaʼ nga nácanu testigu stiʼ Jiobá! Laasinu nga guidxi ni nuu lu Guidxilayú ni cayabi binni ximodo chigaca chaahuiʼ guiráʼ ca guendanagana nuu yanna riʼ. Cadi tan xadxí guníʼ ti periodista guirutiʼ qué zanda guicabi guendarinabadiidxaʼ riʼ: «Xiñee racaná ca binni nachaʼhuiʼ». Peru Biblia rabi laanu xiñee cayaca cani, ne dxiiñaʼ cudii Dios laanu casi xpinni Cristu nga chuunu ra nuu binni ni riuulaʼdxiʼ guiziidiʼ para gusiénenu cani laacaʼ. Nápanu razón para gúninu «xhiiña Señor ne stale gana» (Rom. 12:11). Zaguu Jiobá ndaayaʼ dxiiñaʼ cayúninu ne zanda gacanenu binni gunibiáʼ laabe ne gannaxhii laabe.

7, 8. Ximodo ndiʼ rusisácanu Jiobá ora rúninu xhiiñaʼ neca gácani nagana para laanu.

⁷ Cani bizaaca apóstol Pablu rusihuínnicani nabé biʼniʼ huantarbe stale guendanagana dxi bicheeche diidxaʼ: gulee xcaandabe ne guyuu dxi qué ñobe (2 Cor. 6:5). Ca diidxaʼ riʼ rusihuínnicani guiráʼ ni ridiʼdiʼ tuuxa ora maʼ cayuni xhiiñaʼ Dios, ne zándaca rusietenaláʼdxini laanu ca precursor, laacaʼ rúnicaʼ dxiiñaʼ para gápacaʼ ni guibaninecaʼ, peru ribeecaʼ tiempu para gucheechecaʼ diidxaʼ purtiʼ risaca ni para laacaʼ. Laaca zanda guiníʼ íquenu ca misioneru, cani riquiiñeʼ xquendanabani para gacané binni de sti guidxi roʼ (Filip. 2:17). Yanna, xi zanda guininu de ca binnigola ni ridiʼdiʼ hora gó ne hora gasi purtiʼ cá íquecaʼ gacanecaʼ ca dendxuʼ stiʼ Jiobá yaʼ. Ne laaca nuu xpinni Cristu ni maʼ nagola o ni huará ni runi stipa para ganda cheʼ ca guendaridagulisaa stinu ne gucheeche diidxaʼ. Ora ridúʼyanu runi ca xpinni Dios riʼ dxiiñaʼ neca cayácani nagana para laacaʼ, rucaani laanu gúninu zaqueca. Ne ora guʼyaʼ binni ejemplu stícabe, rudii cuenta pabiáʼ risaca para laanu gucheechenu diidxaʼ.

⁸ Lu ti carta ni biree lu periódicu Boston Target, de Lincolnshire (Reino Unido), guníʼ ti hombre sicaríʼ: «Maʼ huaxiéʼ runi cré  binni religión stiʼ [...]. Xi cayuni ca pastor stiʼ ca yuʼduʼ ca pue. Rihuínnica cadi canayúbicabe binni casi biʼniʼ Cristu [...]. Ruluíʼ ca testigu stiʼ Jiobá si nga cani dxandíʼ rizaalaʼdxiʼ binni, purtiʼ riyúbicaʼ laacabe ne ribeecaʼ tiempu para chigucheechecaʼ diidxaʼ». Ndaaniʼ Guidxilayú riʼ jma cá ique binni guni ni riuulaʼdxiʼ si, peru laanu jma rúninu stipa para gucheechenu diidxaʼ ne zacá rusisácanu Jiobá (Rom. 12:1).

9. Xi zucaa laanu gucheechenu diidxaʼ né stale gana.

⁹ Yanna, xi caquiiñeʼ gúninu pa ruluíʼ maʼ qué riuuláʼdxinu gucheechenu diidxaʼ yaʼ. Galán guiníʼ íquenu xi guiráʼ cabeendú Jiobá pur dxiiñaʼ ni cayúninu (biindaʼ Romanos 10:13-15). Para ganda guilá binni, naquiiñeʼ gápacaʼ fe Jiobá ne iquiiñecaʼ lá Dios, peru qué zanda gúnicabe ni pa qué gucheechenu diidxaʼ. Ora maʼ biénenu ni bizéʼtenu riʼ, zucaani laanu guicá íquenu gúninu xhiiñaʼ Dios jneza ne gucheechenu ca diidxaʼ nacubi ne galán stiʼ Reinu né stale gana.

10. Xiñee riuulaʼdxiʼ binni chuʼ gaxha de Jiobá ora ruuyaʼ nabáninu jneza.

¹⁰ Neca gucheechenu diidxaʼ né stale gana, cadi ngasi nga ni caquiiñeʼ para ganda chuulaʼdxiʼ binni guidxiña Dios. Nuu sti cosa ni caquiiñeʼ gúninu: guibáninu casi naquiiñeʼ guibani ti xpinni Cristu. Ne bisihuinni Pablu pabiáʼ risácani ora guníʼ ca diidxaʼ riʼ: «Runi du xhiiña du jneza sin uchéʼ né du irutiʼ, ti qué gapa ca xi pur iníʼ ca laadu nin ni canayuí du» (2 Cor. 6:3). Modo rininu ne modo nabáninu rusihuínnicani pabiáʼ sicarú guiráʼ ni rizíʼdinu lu Biblia, ne rucaani binni chuulaʼdxiʼ guni adorar Jiobá (Tito 2:10). Nga runi, stale biaje runadiáganu riuulaʼdxiʼ binni guiziidiʼ de Dios ora ruuyaʼ modo zinándanu ejemplu stiʼ Cristu.

11. Xiñee naquiiñeʼ guiníʼ íquenu ne guni orarnu para gánnanu xi riníʼ ique binni ora ruuyaʼ modo nabáninu.

¹¹ Dxandíʼ riuulaʼdxiʼ binni guiziidiʼ ni cá lu Biblia ora ruuyaʼ nabáninu modo na Dios,  peru pa qué gúninu ni jneza la? qué liica ziuuláʼdxicabe gúnicabe ni. Nga runi, pa cayúninu dxiiñaʼ, pa nuunu ralídxinu o ra scuela, rúninu stipa para cadi gúninu xiixa ni gucaa binni guiníʼ cadi jneza nabáninu ne modo cayúninu xhiiñaʼ Dios. Pa «nanna nu xii nga jneza, peru uyubi nu uchéʼ nu la?» zaxélenu de Jiobá ne maʼ que zaca xhamígube laanu (Heb. 10:26, 27). Ni bizéʼtenu riʼ naquiiñeʼ gucaani laanu guni orarnu ti gudiʼnu cuenta xi cayúninu ne xi rucaʼnu binni guiníʼ ique ora ruuyaʼ modo nabáninu. Ra zidiʼdiʼ dxi, jma zinitilú modo nabani binni guidxilayú, peru ca binni ni riníʼ ique jneza «dxandipeʼ [zuuyacaʼ] tuu nga runi ni jneza ne tuu nga runi ni qué iquiiñeʼ, tuu nga runi ni na Dios ne ni qué huayuni ni nabe» (Mal. 3:18). Ora ruuyaʼ binni nabáninu jneza, rucaani laa chuulaʼdxiʼ gaca xhamigu Dios.

12-14. Xi runi binni ora ruuyaʼ qué rixélenu de Dios neca cadídinu ra nagana. Bizeeteʼ ti ejemplu.

¹² Lu guiropa carta ni bicaa Pablu ra nuu ca xpinni Cristu de Corinto, bizeetebe guzanándacabe laabe, ca guendanagana gudíʼdibe, modo guluucabe palu laabe ne dxi biseguyoocabe laabe (biindaʼ 2 Corintios 6:4, 5). Ora runi huantarnu neca cayuninácabe laanu pur fe stinu, rucaani binni ni guʼyaʼ laanu chuulaʼdxiʼ guiziidiʼ de Dios. Guzéʼtenu ti ejemplu. Raca chupa chonna iza, gucalaʼdxiʼ ca xhenemígunu nunduuxecaʼ guiráʼ ca testigu stiʼ Jiobá ni nabeza ti guidxi huiiniʼ ni nuu Angola. Guluucabe leʼ chupa Testigu ni maʼ guyuunisa ne treinta binni ni ridagulisaané laacabe, de raqué bitagulisaacabe ca binni de guidxi que para gúʼyacaʼ modo caguíñecabe ca binni que né chicote neca qué guzaabicaʼ gastiʼ, dede cayáxhacabe rini ládicaʼ. Nin ca gunaa ne ca baʼduhuiiniʼ qué nilá dxi que, purtiʼ racaláʼdxicabe guchíbicabe ca binni de guidxi que para cadi gucaadiágacaʼ ca testigu stiʼ Jiobá. Peru biiyaʼ si ca vecinu que ni guca, ¡stale de laacaʼ gunábacaʼ chiguundané ca Testigu laacaʼ Biblia! Dede dxi que jmaruʼ si né gana bireeche diidxaʼ lugar que, ngue runi bidale binni ni biziidiʼ de Jiobá ne gucuaa ca Testigu que stale ndaayaʼ.

¹³ Ejemplu riʼ rusihuinni ti cosa: ora qué rixélenu de ca principiu stiʼ Biblia neca cadídinu ra nagana, rucaani binni chuulaʼdxiʼ guiziidiʼ de Dios. ¡Nanna panda binni guca xhamigu Dios ora bíʼyacaʼ pabiáʼ nadxibalú guca Pedru ne xcaadxi apóstol! (Hech. 5:17-29.) Zacaca nga yanna, ora ruuyaʼ cani runinenu dxiiñaʼ, cani rinenu scuela o ca binnilídxinu qué rixélenu de Dios neca nuu tu cucaalú laanu, zándaca gucaani laacaʼ guiziidicaʼ de Dios.

¹⁴ Guiráʼ ladu nuu xpinni Cristu ni canazanándacabe laa. Casi ndaaniʼ guidxi Armenia, yanna riʼ nuseguyoocabe biaʼ cuarenta Testigu, purtiʼ qué ninacaʼ ñecaʼ lu guerra, ne zándaca zuseguyoorúcabe stale de laacaʼ lu ca beeu zeeda ca. Ndaaniʼ guidxi Eritrea nuseguyoocabe 55 xpinni Jiobá, nuu de laacaʼ nápacaʼ jma de 60 iza. Guidxi Corea del Sur nuseguyoocabe biaʼ gadxe gayuaa Testigu pur fe sticaʼ, ne maʼ bisaa sesenta iza de cayuninácabe laacaʼ guidxi riʼ. Xi zanda gúninu pur ca xpinni Dios ni canazanándacabe laacaʼ ndaaniʼ stale guidxi yaʼ. Zanda guinábanu Jiobá gacané ca Testigu riʼ para cadi gucheecaʼ ti gusisácacaʼ laabe ne gacaneni xcaadxi binni chuulaʼdxiʼ gaca Testigu (Sal. 76:8-10).

15. Bizeeteʼ ti ejemplu ni gusihuinni riuulaʼdxiʼ binni guiziidiʼ de Dios ora ruuyaʼ rúninu ni jneza.

¹⁵ Laaca riuulaʼdxiʼ binni guiziidiʼ de Jiobá ora ruuyaʼ rúninu ni jneza lu guiráʼ cosa (biindaʼ 2 Corintios 6:6). Guzéʼtenu ni bizaaca ti gunaa xpinni Cristu. Ora cusábabe bueltu ndaaniʼ ti máquina stiʼ ti autobús para guicaabe boletu stibe, bidxiña ti gunaa ni runibiáʼ laabe ne gudxi laabe cadi quíxebe purtiʼ cadi zitu chebe. Óraque bisiénebe gunaa que cadi jneza nga chebe ndaaniʼ carru que sin quíxebe, neca cadi zitu ra chiguiétebe. Biete si gunaa que de ndaaniʼ autobús que, gunabadiidxaʼ chofer que xpinni Cristu riʼ: «Ñee testigu stiʼ Jiobá lii la?». Laabe bicábibe: «Testigu naa, xiñee yaʼ».  Chofer que bicabi: «Binadiagaʼ ni gúdxiluʼ gunaa ni biete ca, ne nannaʼ ca Testigu si nga ca binni ni qué rusiguii ne rúnicaʼ ni jneza guiráʼ ora». Gudiʼdiʼ si chupa chonna beeu, bidxiña ti hombre gunaa Testigu que ndaaniʼ yoo stiʼ Reinu ne gudxi laabe: «Ñee rietenaláʼdxiluʼ naa la? Naa nga chofer ni guniʼné lii ndaaniʼ autobús que. Ora biiyaʼ ni bíʼniluʼ que, gunabaʼ guʼndané ca Testigu naa Biblia». Ora ruuyaʼ binni rúninu ni jneza lu guiráʼ cosa, rucaani laa guni cré ni rusíʼdinu ora rucheechenu diidxaʼ.

16. 1) Xi zazaaca pa qué guidxiichinu nagueenda, pa gannaxhiinu binni ne pa gácanu nachaʼhuiʼ. 2) Bizeeteʼ ti ejemplu ni rusihuinni xi runi ca xaíque stiʼ caadxi yuʼduʼ.

¹⁶ Ora ruuyaʼ binni qué ridxiichinu nagueenda, rannaxhiinu stobi ne rácanu nachaʼhuiʼ, racaneni laacaʼ chuuláʼdxicaʼ guiziidicaʼ de Jiobá, gánnacaʼ xi naguixhe íquebe gúnibe ne gunibiaʼcaʼ xquídxibe. Modo nabani cani dxandíʼ xpinni Cristu rusisácani Dios ne maʼ gadxé ni né modo nabani caadxi de ca xaíque yuʼduʼ, purtiʼ laacaʼ rusihuínnicaʼ nacháʼhuicaʼ para si quítecaʼ binni. Nuu de laacaʼ maʼ gúcacaʼ ricu purtiʼ rusiguiicaʼ ca xpínnicaʼ para gáxhacaʼ bueltu laacabe ne riquiiñecaʼ ni para sicaʼ yoo galán ne carru ni jma nacubi, tobi de laacabe dede bicuí ti yoo huiiniʼ ni napa aire acondicionadu para biʼcuʼ stiʼ. Stale de cani na zinanda Cristu qué liica ridiʼdiʼ ndaaniʼ íquecaʼ gusiidicaʼ pa qué chuʼ tu quixe laacaʼ (Mat. 10:8). Rúnicabe casi biʼniʼ cani ruzaaquiʼ guʼxhuʼ ni qué nuzuubaʼ diidxaʼ guyuu guidxi Israel dxiqué, «riáxacaʼ para gusiidicaʼ», ne qué rusiidicaʼ ni zeeda lu Biblia (Miq. 3:11). Cumu cadi jneza modo nabánicabe la? qué randa racanécabe binni chuʼ gaxha de Dios.

17, 18. 1) Ximodo rusisácanu Jiobá ora rusihuínninu ca guenda sicarú stibe. 2) Xiñee maʼ gudixhe íqueluʼ gúniluʼ xhiiñaʼ Dios né stale gana.

¹⁷ Laaca ziuulaʼdxiʼ binni gaca xhamigu Dios ora guʼyaʼ rusíʼdinu ni dxandíʼ ne rácanu nachaʼhuiʼ né ca vecinu stinu. Ti biaje guladxi ti viuda ni maʼ nagola ti precursor ora bixhidxináʼ ra puertaʼ lídxibe. Gúdxibe precursor que dxíʼbabe lu ti escalera ne nuube guchaabe ti foco ndaaniʼ guzina stibe ora guxidxi timbre que. Óraque gudxi Testigu que laabe: «Cadi jneza diʼ gacalaʼdxuʼ guʼnuʼ nga stúbiluʼ». Óraque bichaa precursor que foco stibe ne biree zeʼ. Ora gunna xiiñiʼ viuda riʼ xi guca, nabé bidxagayaa ne yeyúbibe Testigu que para gudiibe xquíxepeʼ laa. Gudiʼdiʼ si tiempu, dede gunabaʼ xiiñiʼ gunaa riʼ guʼndanécabe laa Biblia.

¹⁸ Xiñee maʼ gudixhe íqueluʼ gúniluʼ xhiiñaʼ Dios né stale gana. Zándaca purtiʼ zusisácaluʼ Jiobá ne zacaneluʼ xcaadxi binni guilá ora gucáʼ íqueluʼ gucheecheluʼ diidxaʼ ne gúniluʼ ca cosa ca modo riuuláʼdxibe (biindaʼ 1 Corintios 10:31-33). Pa gucáʼ íquenu gucheechenu diidxaʼ né gana ne guibáninu casi ti xpinni Cristu, zusihuínninu dxandíʼ nadxiinu Dios ne nadxiinu binni (Mat. 22:37-39). Pa gucáʼ íquenu gúninu xhiiñaʼ Dios la? zabáninu nayecheʼ ne zadxátipa ladxidoʼno. Ne zanda cuézanu guidxiña dxi guni adorar guiráʼ binni Jiobá, Dios ni bizáʼ guiráʼ cosa ne gusisácacaʼ laabe.