1. Edena dala ai herevahereva namonamo karana ese headava taudia ia durua?

 CANADA ai, tadikaka ta ia gwau: “Lau ura egu nega bada be egu adavana lau bamoa. Ai ruaosi ai noho neganai, lau moale bona lalohisihisi gaudia lau haheaukalaia diba.” Australia ai, headava tauna ta ia gwau: “Emai headava laganidia 11 lalonai, dina ta ta ibounai egu adavana ida lau herevahereva. Emai headava dainai ai lalohekwarahi lasi, badina dina ta ta ibounai ai ruaosi ai herevahereva namonamo.” Costa Rica ai, taihu ta ia gwau: “Herevahereva namonamo karana ese emai headava ia hanamoa sibona lasi, to ai ia durua Iehova kahirakahira ai lao, hahetoho amo ai ia gimaia, emai hetura karana ia hagoadaia, bona emai lalokau ia habadaia.”

2. Dahaka gaudia ese herevahereva namonamo karana idia hadikaia diba?

² Emui headava lalonai umui herevahereva hebou namonamo, a? Oibe, hekwakwanai idia vara diba badina headava lalonai goevadae lasi taudia rua idia noho, bona ta ta edia kastom bona famili edia kara be idauidau. (Roma 3:23) Ma danu, tau bona hahine edia herevahereva daladia be idauidau. Unai dainai, headava dekenai tahua gaukara idia karaia taudia, John M. Gottman bona Nan Silver idia gwau: “Namona be headava taudia idia gaukara goada, unai amo edia headava do ia noho daudau.”

3. Dahaka ese headava taudia momo idia durua edia headava ia goada totona?

³ Oibe, headava ia namo totona tau bona hahine be do idia hekwarahi. To, edia hekwarahi dainai edia headava do idia moalelaia. Idia lalokau heheni headava taudia ese edia headava maurina idia moalelaia momokani diba. (Had. 9:9) Isako bona Rebeka edia headava namona mani ita laloa. (Gen. 24:67) Ena be lagani daudau idia headava, to edia lalokau  be ia goada. Hari, headava taudia momo edia mauri be unai bamona. Dahaka ese idia ia durua? Mai momokani bona hemataurai ida ta ta dekenai edia hemami bona lalohadai idia gwauraia hedinarai. Unai idia karaia totona idia ese laloparara, lalokau, hemataurai bona manau idia hahedinaraia be namo. Inai stadi lalonai do ita itaia, headava lalonai unai kara namodia idia noho neganai, headava taudia idia herevahereva namonamo diba.

4, 5. Edena dala ai laloparara ese headava taudia ia durua, ta ta edia kara idia diba namonamo totona? Haheitalai gwauraia.

⁴ Aonega Herevadia 16:20 (NW) ia gwau: “Kara ta dekenai laloparara ia hahedinaraia tauna be namo do ia davaria, bona Iehova ia abidadama henia tauna be do ia moale.” Headava bona ruma bese maurina lalonai unai siri ena hereva be mai anina bada. (Aonega Herevadia 24:3 duahia.) Oibe, Baibel amo laloparara bona aonega ita abia. Hegeregere, Genese 2:18 ese ia hahedinaraia Dirava ese hahine ia karaia tau ia durua totona. Unai dainai hahine be tau amo ia idau, bona ena herevahereva dalana amo unai ia hedinarai. Oibe, hahine edia kara be idauidau, to nega momo idia ura edia hemami, turadia bona taunimanima ma haida idia herevalaia. Unai dainai, edia adavadia ese mai momokani bona lalokau ida idia hereva henia neganai, hahine idia mamia edia adavadia ese idia lalokau henidia. To, tatau momo be edia hemami idia herevalaia lasi, to idia ura gaukara idauidau, hekwakwanai bona hamaoromaoroa daladia idia herevalaia. Danu, idia ura edia adavadia ese do idia matauraidia.

⁵ Britain ai, taihu ta ia gwau: “Egu adavana ia ura lasi egu lalohadai ia kamonai, to ia ura hekwakwanai ia hamaoromaoroa haraga. Lau moale lasi badina lau ura egu lalohekwarahi do ia kamonai bona egu hemami do ia lalopararalaia.” Headava tauna ta ia gwau: “Matamanai ai headava neganai, lau ura egu adavana ena hekwakwanai hamaoromaoroa haraga daladia lau tahua. To, gabeai lau laloparara egu adavana ia ura ena lalohadai lau kamonai sibona.” (Aon. 18:13; Iam. 1:19) Aonega tauna ese ena adavana ena hemami ia lalopararalaia, bona ena kara amo do ia hahedinaraia ena adavana ia lalokau henia. Danu, namona be tau ese ena adavana ia hamaoroa ia ese iena lalohadai bona hemami ia laloa bada. (1 Pet. 3:7) Danu, hahine ese ena adavana ena lalohadai ia lalopararalaia be namo. Tau bona hahine be Dirava ese ia henidia maduna idia lalopararalaia, laloa bada bona badinaia neganai, edia headava do idia moalelaia. Unai amo do idia gaukara hebou bona abia hidi maorodia idia karaia diba.

6, 7. (a) Edena dala ai Hadibaia Tauna 3:7 ese headava taudia ia durua diba, laloparara idia hahedinaraia totona? (b) Edena dala ai hahine ese aonega do ia hahedinaraia, bona tau ese dahaka ia karaia be namo?

⁶ Laloparara idia hahedinaraia headava taudia idia diba, ‘regerege lasi be mai ena nega bona herevahereva lasi danu be mai ena nega.’ (Had. 3:1, 7) Lagani 10 ia headava vadaeni taihu ta ia gwau: “Hari lau laloparara, nega haida gau haida lau herevalaia lasi be namo. Bema lau itaia egu adavana be moni gaukara o maduna ma haida dekenai ia bisi, nega ma ta lau abia hidi ia do lau hereva henia totona. Unai ese emai herevahereva karana ia hanamoa.” Aonega hahinena be mai gado namo ida ia hereva, badina ia diba ena hereva be “nega korikori ai” ia gwauraia neganai, ena adavana be mai moale ida do ia kamonai.​—⁠Aonega Herevadia 15:23 duahia.

⁷ Keristani tauna ese ena adavana do ia kamonai henia, bona sibona ena hemami ia gwauraia hedinarai danu be namo. Lagani 27 ia headava vadaeni elda ta ia gwau: “Egu adavana dekenai egu lalohadai lau gwauraia hedinarai karana lau do hanamoa noho.” Lagani 24 ia headava vadaeni tadikaka ta ia gwau: “Lau ura lasi egu hekwakwanai lau herevalaia, badina lau laloa, ‘Bema lau herevalaia lasi, do ia boio.’ To, hari lau laloparara egu hemami lau gwauraia hedinarai be kara namona. Bema lau mamia unai  lau karaia be auka, Dirava lau noia lau dekenai hereva maorodia do ia henia bona dala maorona ai do lau gwauraia. Unai murinai egu hereva lau hamatamaia.” Danu, idia herevahereva totona headava taudia ese nega maorona idia abia hidi be gau badana. Hegeregere, dina sirina o Baibel idia duahia hebou neganai, idia herevahereva diba.

8. Dahaka ese headava taudia ia durua diba, edia herevahereva karana idia hanamoa totona?

⁸ Headava taudia edia herevahereva karana ia namo totona, gau badana be Dirava ena lauma helaga totona idia guriguri, bona mai ura bada ida edia herevahereva karana idia hanamoa. Momokani, kara gunadia idia haidaua be auka. To, bema Iehova idia lalokau henia, idia ura ia idia hamoalea, bona edia headava idia laloa bada, vadaeni edia kara idia haidaua diba. Lagani 26 ia headava taihu ta ia gwau: “Lau bona egu adavana be Iehova ena lalohadai headava dekenai ai laloa bada, bona headava hapararaia lalohadaina ai abia lasi. Unai dainai, ai gaukara goada hekwakwanai hamaoromaoroa daladia ai herevalaia totona.” Headava taudia ese unai bamona badinaia karana idia hahedinaraia neganai, Dirava do idia hamoalea bona ia ese idia do ia hanamoa.​—⁠Sal. 127:1.

9, 10. Headava taudia edia lalokau ia goada totona, dahaka idia karaia be namo?

⁹ Headava lalonai lalokau be “hatamonaia gauna hereadaena.” (Kol. 3:14) Lagani idia hanaia lalonai, headava taudia be hekwakwanai idia haheaukalaia bona gau namodia idia moalelaia hebou, unai dainai idia huanai ia noho lalokau korikorina ia goada ia lao. Idia be tura namodia ai idia lao bona edia hebamo karana idia moalelaia. Edia headava ia goada noho totona gau badadia haida sibona idia karaia lasi, to gau maragidia idia karaia hebou. Hegeregere, tau ese ena adavana ia rosia, hanamoa hereva ia gwauraia, ia totona kara namona ta ia karaia, ia kiri henia, eiava ia nanadaia, ‘hari emu dina be edena bamona?’ Unai gau maragidia ese edia headava maurina ia hanamoa bada. Lagani 19 idia headava vadaeni tau bona hahine ta, be dina ibounai idia rini heheni bona teks mesiji idia siaia. Tau ia gwau: “Ta ta ai laloa dainai unai bamona ai karaia.”

¹⁰ Tau bona hahine be idia lalokau heheni dainai, idia ura ta ta edia kara do idia dibaia noho. (Fili. 2:4) Ena be idia be goevadae lasi, to ta ta edia kara idia diba dainai, edia lalokau ia goada ia lao. Headava namona be lagani idia hanaia lalonai  ia goada diba. Unai dainai, bema oi headava vadaeni, sibona oi nanadaia: ‘Egu adavana ena kara lau diba namonamo, a? Idia vara gaudia dekenai iena hemami bona lalohadai lau lalopararalaia, a? Egu adavana lau ura henia matamaia neganai, ia dekenai lau itaia kara namodia lau laloa noho, a?’

11. Dahaka dainai headava lalonai hemataurai be gau badana? Haheitalai gwauraia.

¹¹ Ena be headava taudia haida idia moale, to nega haida idia lalotamona lasi. Hegeregere, Aberahamo bona Sara be gau haida dekenai idia lalotamona lasi. (Gen. 21:9-11) To, unai gaudia dainai idia parara lasi. Dahaka dainai? Badina idia be ta ta idia matauraia. Hegeregere, Aberahamo be mai hemataurai ida Sara ia noia gau ta do ia karaia. (Gen. 12:11, 13) Sara danu ese Aberahamo ia kamonai henia bona ia gwauraia, “Lohiabada.” (1 Pet. 3:6) Bema tau bona hahine be ta ta idia matauraia lasi, edia herevahereva dalana bona gadona regena amo unai do ia hedinarai. (Aon. 12:18) Bema unai hekwakwanai idia hamaoromaoroa lasi, edia headava do ia dika diba.​—⁠Iamesi 3:7-10, 17, 18 duahia.

12. Dahaka dainai headava matamata taudia idia gaukara goada be namo mai hemataurai ida idia herevahereva totona?

¹² Namona be headava matamata taudia idia gaukara goada, mai manau bona hemataurai ida ta ta idia hereva henia totona. Headava tauna ta ia gwau, ia bona ena adavana edia headava lagani ginigunadia idia moalelaia, to nega haida lalohisihisi ia vara danu. Hegeregere, idia be ta ta edia hemami, kara bona ura gaudia idia dibaia noho dainai, nega haida idia lalotamona lasi. To, edia hetura karana ia namo ia lao badina lalohadai maorona idia abia bona idia moale hebou. Danu, ia gwau mai anina bada gauna be idia manau, haheauka bona Iehova idia abidadama henia. Ita ibounai dekenai unai be sisiba namona!

13. Dahaka dainai headava lalonai manau karana be mai anina bada?

¹³ Headava lalonai herevahereva namonamo karana be, uma ta lalonai metairametaira ia aru lao sinavai maragina ta bamona. Tau bona hahine be “lalomanau” karana idia hahedinaraia neganai, edia herevahereva karana be do ia namo. (1 Pet. 3:8) Lagani 11 ia headava tadikaka ta ia gwau: “Manau karana ese headava  taudia ia durua edia hekwakwanai idia hamaoromaoroa totona, badina bema idia manau sori herevana idia gwauraia be auka lasi.” Lagani 20 ia headava elda ta ia gwau: “Nega haida sori herevana ese ‘Oi lau lalokau henia’ herevana ia hereaia.” Ma ia gwau: “Manau karana hahedinaraia totona guriguri be mai anina bada. Lau bona egu adavana be Iehova ai guriguri henia hebou neganai, ai laloatao ai be goevadae lasi taudia bona Iehova ena hebogahisi ai abia be namo. Unai ese lau ia durua emai hekwakwanai lau hamaoromaoroa totona.”

14. Edena dala ai hekokoroku karana ese headava ia hadikaia diba?

¹⁴ Headava lalonai, hekokoroku karana ese herevahereva namonamo karana bona hekwakwanai hamaoromaoroa dalana ia koua. Ia hekokoroku tauna ese herevahereva karana ia hadikaia, badina sori herevana ia gwauraia be auka. Ia ese ekskius momo do ia gwauraia, badina ia ura lasi ia gwau, “Lau sori, mani egu dika oi gwauatao.” Ena kerere ia gwauraia hedinarai lasi, to ia ese kerere be ena adavana dekenai ia atoa. Danu, ia badu neganai ia ura lasi maino ia karaia, to mai badu ida ia hereva o dina haida lalonai ena adavana ia hereva henia lasi. (Had. 7:9) Oibe, hekokoroku karana ese headava ia hadikaia diba. Namona be ita laloatao, “Dirava ese hekokoroku taudia ia inai henia, to manau taudia dekenai hebogahisi hereadaena ia henia.”​—⁠Iam. 4:6.

15. Edena dala ai Efeso 4:26, 27 ese headava taudia ia durua diba hekwakwanai idia hamaoromaoroa totona?

¹⁵ Bema tau bona hahine idia lalotamona lasi, namona be mai manau ida idia gaukara goada edia hekwakwanai idia hamaoromaoroa totona. Paulo ese Keristani taudia ia hamaoroa: “Dina ia do diho lasi neganai, emui badu ia ore be namo. Danu, namo lasi Diabolo ena dala umui kehoa.” (Efe. 4:26, 27) Baibel ena sisiba idia badinaia lasi neganai, lalometau do ia vara. Taihu ta ia gwau, “Nega haida lau bona egu adavana ese Efeso 4:26, 27 ena hereva ai badinaia lasi. Unai dainai hanuaboi momo lau mahuta namonamo lasi.” Namona be hekwakwanai idia hamaoromaoroa haraga bona maino idia karaia! Momokani, tau bona hahine ese ta ta dekenai nega idia henia be namo edia badu ia ore totona. To, namona be Iehova idia noia idia do ia durua, idia manau totona. Unai amo ta ta sibona edia hemami idia laloa lasi, to hekwakwanai hamaoromaoroa dalana idia tahua.​—⁠Kolose 3:12, 13 duahia.

16. Edena dala ai manau karana ese headava taudia ia durua, ta ta edia kara namodia idia laloa bada totona?

¹⁶ Manau karana ese headava taudia ia durua, ta ta edia kara namodia idia laloa bada totona. Hegeregere, reana hahine be gaukara ta karaia dalana ia diba namonamo, bona unai ia karaia ena famili ia durua totona. Bema tau be ia manau, ena adavana do ia koua lasi, to do ia hagoadaia unai gaukara ia karaia noho totona. Unai amo ia hahedinaraia, ia ese ena adavana ia lalokau henia bona laloa bada. (Aon. 31:10, 28; Efe. 5:28, 29) Danu, namona be hahine ia manau bona ena diba dainai ia hekokoroku lasi, eiava ena adavana ia hevasehalaia lasi. Badina idia ruaosi be “tauanina tamona,” bona unai bamona idia karaia neganai ta ta idia hahisia diba.​—⁠Mat. 19:4, 5.

17. Dahaka ese headava taudia ia durua diba headava idia moalelaia, bona Iehova idia hanamoa totona?

¹⁷ Oi ura Aberahamo bona Sara o Isako bona Rebeka bamona, emu headava do ia noho daudau, do oi moalelaia bona Iehova do ia hanamoa, ani? Unai dainai, namona be Dirava ena lalohadai headava dekenai oi badinaia. Baibel lalonai laloparara bona aonega oi tahua. Ta ta emui kara namodia umui laloa bada, unai amo emui lalokau be do ia goada. (Sol. 8:6) Danu, umui gaukara goada manau karana umui hahedinaraia bona ta ta umui matauraia. Unai umui karaia neganai, emui headava do umui moalelaia bona emui guba Tamana do ia moale. (Aon. 27:11) Lagani 27 ia headava tauna ta ia gwau: “Bema egu adavana ia noho lasi, egu mauri do lau moalelaia lasi. Dina ta ta ai emai headava be ia goada ia lao, badina Iehova ai lalokau henia bona nega ibounai ai herevahereva.”