1. Aappariit attaveqaqatigiilluartarneq qanoq iluaqutigisimavaat?

QATANNGUT angut Canadamiu ima oqarpoq: “Nuliara allanit tamanit ilagerusunneruara.” Qatanngut taanna nangilluni oqarpoq nuliaminik peqateqarnermigut misigisat nuannersut nuannernerusutut misigisarlugit pissutsillu artornartut naammagalugit atoruminarnerutittarlugit. Uiusoq Australiamiu ima allappoq: “Ukiuni aqqanilinni katisimanitsinni nuliara ullut tamarluinnaasa oqaloqatiginngitsoorsinnaaneq ajorpara.” Taanna oqarpoq attaveqaqatigiilluartarneq tatigeqatigiilluinnarnissaminnut aappariinnerminnillu nakussatsitsinissaminnut iluaqutigisimallugu. Qatanngut arnaq Costa Ricamiu allappoq attaveqaqatigiilluartarneq uinilu pilluarlutik aappariinnissaminnut iluaqutigisimallugu. Ima nangippoq: “Attaveqaqatigiilluartarnikkut Jehovamut qaninnerulerpugut, ussernartunut imminut illersorpugut, aappariittut ataasioqatigiinnerulerpugut asanninnerpullu ineriartortipparput.”

2. Sooq attaveqaqatigiilluarniartuarneq aappariinnut ajornakusoorsinnaava?

² Aappariittut attaveqaqatigiilluartarpisi? Soorunami attaveqaqatigiinnerput ilaannikkut ajornaatsuinnaaneq ajorpoq. Marluullusi naammalluinnanngitsuullusilu assigiinngitsunik pissuseqarpusi. (Rom 3:23) Imaassinnaavoq assigiinngitsunik kultureqartusi imaluunniit assigiinngitsumik perorsarneqarsimasusi. Taamaattumik assigiinngitsumik attaveqaqatigeeriaaseqarsinnaavusi. Aappariinnermik misissueqqissaartartut John M. Gottman aamma Nan Silver pissutissaqarluarlutik oqarput aappariinnermi “nikallujuinneq, aalajangersimalluinnarsinnaaneq naleqqussarsinnaanerlu” pisariaqartut. Taakku oqarput aappariit attaveqaqatigiilluartuarnissap aappariittuarnissallu tamaviaarutiginissaannut piumassuseqartariaqartut.

3. Katisimasut aappariilluartuarnissaminnut suna iluaqutigisimavaat?

³ Aappariilluartuarniarneq imaannaanngitsuugaluartoq pilluangaarnermik kinguneqartarpoq. Katisimasut asaqatigiittut ilumut pilluangaarsinnaapput. (Oqal 9:9) Nuliariit  asaqatigiittut Iisaaq Rebekkalu eqqarsaatigikkit. (1 Mos 24:67) Biibilimi ersersinneqarpoq ukiorpassuarni katisimareernikuugaluarlutik asaqatigiittuartut. Ullumikkut katisimasut amerlasuut aamma aappariilluartuarsinnaasimapput. Suna iluaqutigisimavaat? Eqqarsaatitik misigissutsitillu unneqqarissumik inussiarnersumillu oqaloqatigiissutiginissaat ilikkarsimavaat. Paasisimasaqassuseqarnermik, asanninnermik, ataqqinninnermik maniguunnermillu ersersitsisarput. Maanna aappariit attaveqaqatigiilluarumallutik pissuserineqartussat taakku qanoq iluaqutigisinnaaneraat sammissavarput.

4, 5. Aappariit katisimasut paaseqatigiinnissaminnut paasisimasaqassuseqarneq qanoq iluaqutigisinnaavaat? Assersuuteqarit.

⁴ “Arlaannik paasisimannittup paasissavaa tamatuma ajunngitsortai suunersut.” (Uss 16:20, NW) Aappariinnitsinni pilluarniassagatta Guutip oqaatsini aqqutigalugu paasisimasaqassusermik ilisimasaqassusermillu tunivaatigut. (Ussatit 24:3 atuaruk). Assersuutigalugu Mosesimik allakkat siulliit 2:18-imi allassimavoq Guutip arnaq angut assilinagu taassumunngali tulluartunngorlugu pinngortikkaa. Tamanna pissutigalugu arnaq angummit allaanerusumik attaveqaqatigeeriaaseqartarpoq. Arnat amerlanerit misigissutsitik inuillu allat pillugit oqalunnissaq nuannarisarpaat. Arnat asannittumik unneqqarissumillu attaveqaqatigineqarnertik asaneqartutut misigilissutigisarpaat. Angutilli amerlasuut misigissutsitik pillugit oqalunnissaq ajornakusoornerutittarpaat, akerlianilli sammisartakkatik, ajornartorsiutitik aaqqiissutaasinnaasullu oqaloqatigiissutiginissaat nuannarinerusarpaat. Angutit aamma ataqqineqarusupput.

⁵ Qatanngut arnaq Tuluit Nunaanneersoq ima oqarpoq: “Uima uannut tusarnaarnissaminngarnit ajornartorsiutit aaqqipallakkusunnerusarpai.” Nangilluni oqarpoq uiminit tusarnaarneqarusukkami paasineqarusullunilu taamaattarnera isumatsassutigisarlugu. Uiusoq ima allappoq: “Katerlaajulluta nuliama ajornartorsiutaanut suugaluartunulluunniit piaarnerpaamik aaqqiissutissarsiortarnikuuvunga.” Sivitsunngitsorli paasivaa nuliami tusarnaarneqarnissani taamaallaat kissaatigigaa. (Uss 18:13; Jaak 1:19) Uiusup paasisimasaqassuseqartup nuliami misigissusii nalunngilai asaneqartutullu misigilersinniartarlugu. Nuliaminut ersersittarpaa taassuma eqqarsaatai misigissusiilu pingaartillugit. (1 Petr 3:7) Nuliap paasisimasaqassuseqartup uimi eqqarsartariaasia paasiniartuartarpaa. Uiusup nuliaasullu Guutip piumasaqaataanik eqqortitsiniartuarnertik aappariinnerminni pillualissutigissallugulu silatusaartumik aalajangiisarnissamut suleqatigiillualissutigissavaat.

6, 7. (a) Aappariit Oqaluussisartup oqaasii 3:7 paasisimasaqassuseqalernissaminnut qanoq iluaqutigisinnaavaat? (b) Nuliaasoq uiminut oqalukkaangami qanoq paasisimasaqassuseqarsinnaava, aamma uiusoq qanoq iliuuseqarniartariaqarpa?

⁶ Aappariit paasisimasaqassuseqartut ‘nipangersimaffissaqarlunilu oqaluffissaqartoq’ nalunngilaat. (Oqal 3:1, 7) Qatanngut arnaq ukiuni qulini katisimasimasoq allappoq ilikkarsimallugu qaqugukkut uini pissutsit aalajangersimasut pillugit oqaloqatigisassanerlugu. Uini suliffimmini allanulluunniit tunngatillugu akisussaaffeqarnini pissutigalugu suliassaqangaatsiaraangat oqaloqatiginiarlugu ulapippallaarunnaarnissaanut utaqqisarpoq. Tamatuma kingunerisaanik attaveqaqatigiinnerat pitsaanerujussuanngorpoq. Nuliaasoq uiminut inussiarnersumik ‘piffissaasukkullu’ oqaluttaruni uiata tusarnaarusunnerulissavaa. — Ussatit 15:23 atuaruk.

⁷ Uiusoq kristumiu nuliaminut tusarnaaginnarani misigissutsini pillugit nuliani oqaluttuunniarlugu sapinngisaminik iliuuseqartarpoq. Utoqqaanertaq ukiuni 27-ni katisimasimasoq ima oqaluttuarpoq: “Uummammiukka nuliannut oqaluttuariniarlugit tamaviaartariaqartarpunga.” Qatanngut angut ukiuni 24-ni katisimasimasoq oqaluttuarpoq ajornartorsiutit oqaluuserinissaat ajornakusoortittarlugu. Misigisarpoq oqaluuserinngikkaangamigit ajornartorsiutaajunnaartartut. Imali nangippoq: “Paasivara misigissutsinik ersersitsisarneq sanngiissutaanngitsoq. Misigissutsimma oqaasinngortinnissaat sulissutigilerakku oqaatsit eqqortut atornissaanut eqqortumillu oqaloriaaseqarnissannut ikioqqullunga qinusarpunga. Taava itisuumik ilummut anersaariarlunga  oqalulertarpunga.” Aappariit piffissaqqissumi, immaqa kisimiitsillutik ullormut allassimaffimmik imaluunniit Biibilimik atuaqatigiissutissamik eqqartueqatigiikkaangamik, oqaloqatigiittarnissaat pingaaruteqarpoq.

8. Aappariit attaveqaqatigiittarnerminnik pitsanngorsaarusussuseqalernissaminnut suna iluaqutigisinnaavaat?

⁸ Attaveqaqatigeeriaatsimik allanngortitsineq aappariinnut ajornakusoorsinnaavoq. Uiusoq nuliaasorlu Guutip anersaavanik tuneqqullutik qinusariaqarput attaveqaqatigeeriaatsiminnillu pitsanngorsaanissaminnut piumassuseqartariaqarlutik. Jehovamik asannikkunik, taassumannga iluarisaajuarusukkunik aappariinnermillu illernartuutitsigunik taamaaliornissaminnut piumassuseqarsinnaapput. Qatanngut arnaq ukiuni 26-ni katisimasimasoq ima allappoq: “Uigalu Jehovap aappariinnermik isiginnittaasia pingaartittorujussuuarput, taamaattumillu averusernissaq eqqarsaatiginngisaannarparput. Taamaattumillu oqaloqatigiittarnitsigut ajornartorsiutitsinnik aaqqiinissarput pimoorunnerusarparput.” Aappariit taakkutulli Guutimut aalajaatsuusut taassuminnga pilluartitsisarlutillu taassumannga pilluaqquneqartarput. — Tuss 127:1.

9, 10. Aappariit asaqatigiinnerminnik ineriartortitsiumallutik susinnaappat?

⁹ Katisimanermi asaqatigiinneq pingaaruteqarnerpaavoq. Biibilimi allassimavoq asanninneq tassaasoq “ataasiussutsip qilerutaa naammalluinnartoq”. (Kol 3:14, NW) Aappariit ukiut ingerlanerini aamma nuannersunik artornartunillu aqqusaagaqareeraangamik asanninnerat piviusoq ineriartulertarpoq, tamannalu qanimut ikinngutigiilissutigisarlugulu peqatigiittarnerminnik nuannarinninnerulissutigisarpaat. Isiginnaagassiani takusartakkatsitut annertuutigut imminnut iliuuseqarfigisarnermikkuunngitsoq annikitsutigulli imminnut iliuuseqarfigisarnermikkut aappariinnerminnik nakussatsitsisinnaapput. Taakku tassaasinnaapput eqissineq, asannippaluttumik oqaaseqalaarneq, ajunngisaarneq asannippaluttumillu qungujunneq ullulluunniit qanoq ingerlasimaneranik aperineq. Taakku annikippasissinnaapput aappariinnermulli sunniuteqangaarsinnaapput. Aappariit ukiuni 19-ini pilluarlutik katisimasimasut eqqaavaat ‘qanoq innerlutik paasiniarniaannarlugu’ ullut tamaasa imminnut sianerfigisarlutik allaffigisarlutilluunniit.

¹⁰ Uiusoq nuliaasorlu asaqatigiikkunik imminnut ilinniarniartuassapput. (Fil 2:4) Marluullutik sanngiissuteqartaraluarlutik imminnut ilinniarniartuarunik asanninnerat nakussatsinneqassallunilu ineriartulissaaq. Aappariinnermi pilluarneq piffissap ingerlanerani nakussatsinneqartarpoq. Aappaqaruit imminut ima aperigit: ‘Uiga imaluunniit nuliara qanoq nalunngitsigaara? Misigissusii eqqarsartariaasialu paasisinnaavakka? Uima nuliamaluunniit  pissusii taassuminnga kajungerinnilissutigisakka eqqarsaatigikulasarpakka?’

11. Sooq ataqqeqatigiinneq aappariinnermi taama pingaaruteqartigaa? Assersuuteqarit.

¹¹ Allaat aappariit pilluarnerpaat aappariinnerat naammalluinnanngitsuuvoq. Aappariit ilaannikkut isumaqatigiinngittarsinnaasarput. Aaperaat Saralu ilaannikkut isumaqatigiinneq ajorput. (1 Mos 21:9-11) Tamannali aappariinnerannik sanngiillisitsinngilaq. Sooq? Imminnut ataqqinnittumik pisaramik. Assersuutigalugu Aaperaat Saramut tamatigut inussiarnersumik oqaluttarpoq. (1 Mos 12:11, 13) Sarallu Aaperaat naalappaa ‘naalakkatullu’ isigalugu. (1 Mos 18:12) Akerlianik aappariit sakkortuumik oqaluuttartut aapparmut ataqqinninnginnerminnik ersersitsisarput. (Uss 12:18) Aappariit imminnut ataqqinngikkaangata aappariinnerat qajannarsisarpoq. — Jaaku 3:7-10, 17, 18 atuakkit.

12. Sooq katernaat imminnut ataqqinnittumik oqaluuttarnissartik sapinngisamik sulissutigisariaqarpaat?

¹² Katernaat inussiarnersumik ataqqinnittumillu oqaluuttarnissartik sapinngisamik sulissutigisariaqarpaat. Taamaaliortarpata unneqqarissumik attaveqaqatigiissinnaanerat ajornannginnerulissaaq. Uiusoq oqaluttuarpoq katerngaajullutik marluullutik aapparmik misigissusii, ileqqui pisariaqartitaalu paasisinnaasimanagit. Ilaannikkut tamanna isumatsassutigisarpaat. Taamaakkaluartorli ingasaassinianngitsuunermikkut ikasartarnermikkullu ikinngutigiillualersimapput. Nangilluni oqarpoq maniguuttuunissaq, utaqqisinnaassuseqarnissaq Jehovamillu tatiginninnissaq pingaaruteqartut. Tamanna ilumoorluinnarpoq!

13. Sooq maniguunneq aappariinnermi pingaaruteqarluinnarpa?

¹³ Aappariit inussiarnersumik eqqissisimasumillu attaveqaqatigiissinnaajumallutik ‘maniguuttariaqarput’. (1 Petr 3:8, NW) Qatanngut angut ukiuni aqqanilinni katisimasimasoq oqarpoq aappariit maniguunneq, utoqqatsernissamut kajumississutigisaramikku, ajornartorsiutiminnik aaqqiinissaminnut iluaqutigisaraat. Utoqqaanertaq ukiuni 20-ni pilluarluni katisimasimasoq ima oqarpoq: “Ilaannikkut oqaaseq ‘utoqqatserpunga’ oqaatsimit ‘asavakkit’-mit pingaaruteqarnerusarpoq.” Aappariittut maniguuttuujumalluni qinusarnissap pingaaruteqassusia ima oqarluni nassuiarpaa:   “Nuliaralu Jehovamut qinunikkut saaffiginnikkaangatta naammalluinnanngitsuunerput Guutillu ajunngisaarnera pisassarinngisaraluaq pillugit eqqaasinneqartarpugut.” Tamanna imminnut ajornartorsiutiminnullu eqqortumik isiginnittaaseqarnissaminnut iluaqutigisarpaat.

14. Makitaneq aappariinnermut qanoq sunniuteqarsinnaava?

¹⁴ Akerlianik makitaneq aappariit attaveqaqatigiinnerannut ajornartorsiutinillu aaqqiisarnissaannut ajornakusoornerulersitsisarpoq. Inuk makitasooq ima oqarnissaminut piumassuseqarnanilu sapiissuseqanngilaq: “Utoqqatserpunga. Isumakkeerfigisinnaavinga?” Inuk taamaattoq utoqqatsissutissarsiortarpoq imaluunniit kukkussutini nassuerutiginagu aapparminik pisuutitsisarpoq. Inuk makitasooq ajuallatsinneqaraangami eqqisseqateqalerniarneq ajorpoq. Sakkortuumik oqalulertarpoq imaluunniit oqaaseqarusukkunnaavittarluni. (Oqal 7:9) Aap, makitaneq aappariinnermik aseruisinnaavoq. Guutip makitasuut akerartortarai ‘maniguuttulli ajunngissusermik pisassarinngisaraluamik tunisarai’ eqqaamassallugu pingaaruteqarpoq. — Jaak 4:6, NW.

15. Aappariit ajornartorsiutiminnik aaqqiiniarnerminni Efesosimiut 4:26, 27 qanoq iluaqutigisinnaavaat?

¹⁵ Aappariit isumaqatigiinngissuteqaraangamik makitanatik ajornartorsiummik aaqqiipallannissartik sulissutigisariaqarpaat. Paulusip kristumioqatini ima allaffigai: “Seqineq tarrisinaveersiuk narrutsassimanissinni. Diaavululu inissaqarteqinasiuk.” (Ef 4:26, 27) Aappariit siunnersuummik tamatuminnga Guutip oqaasianeersumik maleruaannginnerat qanoq kinguneqarsinnaava? Qatanngut arnaq ima nassuiaavoq: “Tamatuminnga maleruaannginneq sinnarlorujussuarnermik kinguneqartarpoq!” Ajornartorsiummik piaartumik eqqissisimasumillu aaqqiinissaq ajunnginnerujussuuvoq. Soorunami aappariit ajornartorsiummut pissutaasup oqaloqatigiissutigilinnginnerani eqqissisimanerulernissaminnut imminnut piffissaqartittariaqarput. Maniguunnerulernissaminnut Jehovamut qinunikkut aamma ikioqqusariaqarput. Tamanna aappaasup misigissusiinik eqqarsaatiginninnerulissutigiinnarnagu ajornartorsiummik aaqqiinissamik pingaartitsinerulissutigissavaat. — Kolossemiut 3:12, 13 atuakkit.

16. Katisimasut aapparmi pikkoriffiinik nukittuffiinillu pingaartitsinerulernissaminnut maniguunneq qanoq iluaqutigisinnaavaat?

¹⁶ Katisimasut aapparmi pikkoriffiinik nukittuffiinillu pingaartitsinerulernissaminnut maniguunneq iluaqutigisinnaavaat. Assersuutigalugu imaassinnaavoq nuliaasoq ilaqutariinnut iluaqutaasumik pikkoriffeqartoq. Uiusoq maniguuttoq sunut tamanut tunngatillugu nuliaminit pikkorinnerusutut misigissanngilaq, akerlianilli nuliani pikkoriffimminik atorluaanissaanut kajumissaassavaa. Uiusup taamatut iliornermigut ersersissavaa nuliani asallugulu pingaartillugu. (Uss 31:10, 28; Ef 5:28, 29) Nuliaasup maniguuttup uini pingaakujuutigissanngilaa, imaluunniit pineqartumut namminermisut pikkoritsiginnginnera illaruaatigissanngilaa. Marluullutik ‘uiniunertik ataaseq’ pissutigalugu taamatut makitanertik aliatsaatigisinnaavaat. — Matt 19:4, 5.

17. Aappariinnerup pilluarnartuutinnissaanut Guutimullu ataqqinaataanissaanut suut iluaqutaasarpat?

¹⁷ Qularnanngitsumik aappariinnissinni Aaperaap Sarallu imaluunniit Iisaap Rebekkallu aappariinnerattut inoorusuppusi. Aappariinnersi pilluarnartuutikkusupparsi, ataavartuutikkusupparsi Jehovamullu ataqqinaataatikkusupparsi. Taamaattumik aappariinneq pillugu Guutitut isiginnittaaseqaritsi. Taassuma oqaasiani paasisimasaqassuseq noqqaassutigisiuk. Asaqatigiinnersi ineriartortikkumallugu aappassi pikkoriffii pingaartissigit. (Erin 8:6) Maniguunniartuaritsi. Aapparsi ataqqinnittumik pisarsiuk. Tamakku sulissutigisarussigit aappariinnersi ilissinnut nuannaarutaallunilu Ataatatsinnut qilammiusumut nuannaarutaassaaq. (Uss 27:11) Qatanngut angut ukiuni 27-ni katisimasimasoq ima oqarpoq: “Nuliara peqatiginagu inuunissara takorloorsinnaanngilara. Jehovamik asanninnerput attaveqaqatigiittuarnerpullu pissutigalugit aappariinnerput ullut tamaasa nakussatsinneqartuartarpoq.” Ilissi taakkutulli aappariinnersi nakussatsissinnaavarsi!