1. Jósʼin tjíobinyakao kʼa xíngiaa xi jechixan kʼianga kʼoasʼin fáonajmí.

JNGO ndsʼee xi Canadá tsʼe i kitso: “Ngisa mena nga je chjoónna batejnakoa tikʼoajinni nga kjaʼaíla chjota kjuíkonle. Ngisa tse kjoatsjoa sokóna xi kao je kʼoa tsa jme kjoa tjínna ngisa chókjoajinna”. Jngo ndsʼee xi ya Australia tsʼe i kitso: “Jetejngonajin nó nga tiyokoaijin xíngijin, kʼoa nikʼiajinla nga tsín chobanajmíjin. Ninʼiotʼaníjin xíngijin kʼoa lijme xi nikjaojinjin, nga̱ nʼio tíjna kjoabixannajin. Xi tíbasenkaonajin kuinga chobanajmíntsjaijin”. Kʼoa jngo tichjaa xi Costa Rica tsʼe i kitso: “Kʼianga chobanajmíjin ali tsa tondajin tibiyuijin kʼoati kjimachriantʼalaijin je Jeobá, alikui ya títsaoyaijin je che̱n xi satíobasen, kjimachriantʼasalaijin xíngijin kʼoa sa nʼio sa nʼio kjimatsjoachaijin xíngijin”.

2. Ánni nga ñʼai ma sakʼoasínile xi jechixan nga fáonajmí.

² Kuila tisui ji, kʼiatsa jechixain, a chjakaonajmíní je chjoónli kʼoa tsa xʼinli axo ñʼai mali. Toxá faʼatojin sakʼoani kjoa xi jechixan, nga̱ tojo chjotajéení, kjaʼaí kjaʼaí sʼín nga jngó jngó kʼoa likui tongósonsʼin koanjchínga (Rom. 3:23). Xi ijngosani, kjaʼaísʼin nchja̱najmí jngo chjoón kʼoa kjaʼaísʼin nchja̱najmí jngo xʼin. Je chjotachjine xi John M. Gottman ʼmi kʼoa kao xi Nan Silver ʼmi kʼoakitso nga nʼio machjén nga kʼoenele yaole xi jechixan tsa mele nga nda kjaonajmí kʼoa tsa mele nga tsínkʼia kuixoya kjoabixanle.

3. Jméni xi tjíobinyakao xi jechixan kʼianga nʼio tjíosatío kjoabixanle.

³ Kʼiatsa mele nga nda koatiokao xínkjín xi jechixan, machjénní nga kʼoenele yaole nga jngó jngó, kʼoa tsa kʼoasʼin nʼio tsjoa sa̱tíole. Je chjota xi tsjoake xínkjín koaan ndasʼin koatio ya yaniʼyale (Ecl. 9:9). Tikjaʼaitsjenlai jokji nda tsakatiokao xínkjín je Isaac kao Rebeca (Gén. 24:67). Ninga jetse nga tjíokao xínkjín, alijña kʼoatso Énle Niná tsa tsín  tikoantsjoakeni xínkjín. Kʼoa nʼio nkjín xíngiaa xi kʼoatisʼin nda tjío ndʼaibi. Jmé xi tjíobinyakao. Kuinga ngasin nganda bʼéyanajmíle xínkjín jotjío kon. Kʼoa kuinga kʼoasʼínni nga̱ sínkjínle kon, tjínle kjoatsjoacha, kjoaxkóntokon kʼoa kao kjoanangitokon. Tojosʼin jchaa xi fisani, kʼianga tjínle nga ño koya jebi nda fákaonajmí xínkjín.

4, 5. Kʼianga sínkjínle kon je xʼin kao je xi chjoón, jósʼin binyakao nga nda batiokao xínkjín. Jngola choa̱ tikʼéjnai.

⁴ Proverbios 16:20 itso: “Je xi tísínkjínle kon tʼatsʼe jngo kjoa ndasʼin kʼoéjna”. Je Énle Niná binyakao xi jechixan nga sʼele kjoachjine kʼoa nga sínkjínle kon jmeni xi machjénle nga jngó jngó ánni nga nda batiokaosíni xínkjín (tʼexkiai Proverbios 24:3). Tobʼelañá, Génesis 2:18 kʼoatso nga kui xá kisindani Niná je chjoón kʼianga tojngo koa̱n kao xʼinle. Jebi kui xi tsonile nga tsín tongóson sʼin síkjaʼaitsjen nga jngó jngó kʼoa kuinga ma síjngotʼasínile xínkjín jme xi machjénle nga jao. Me ngatsʼi je yánchjín nga nʼio tsjoake nga bʼéyanajmí jotjío kon, nchja̱ni xi tʼatsʼe miyole kʼoa kao xi bexkon. Nʼio bechjí nga chjakaonajmí nga̱ kʼoasʼin beni nga tsjoacha. Kʼoa me ngatsʼi je xi xʼin nga tsín kʼoatso jotjío kon, ngisa kui nchja̱ni tʼatsʼe jmeni xi sʼín, tʼatsʼe jngo kjoa kʼoa josʼin sʼe̱ndajin kʼoa tsamaije̱ kui nchja̱ni tʼatsʼe xá kʼoa tsa tʼatsʼe kjoasʼetsaojin. Xi ijngosani, kui xi mele nga kataʼyaxkón.

⁵ Jngo tichjaa xi ya Gran Bretaña tsʼe i kitso: “Je xʼinna kui xi mele nga sasa kʼoakuitsoni josʼin sʼe̱ndajin jmeni xi tixinle ʼndele nga tokjuinrʼoélana. Kʼoa jebi alikui nda bʼé tokoan nga̱ sakʼoa tokui xi mena nga katanrʼoéna kʼoa nga katamajinle jotjín tokoan”. Jngo ndsʼee xi i̱ kitso: “Kʼianga sʼa chixainjin kui xi mena nga ngotjo kʼoendajinña je kjoa xi sʼele chjoónna. Tonga ndi̱toon koanchoyana nga tokuini xi mele nga kjuinrʼoele” (Prov. 18:13; Sant. 1:19). Jngo xʼin xi sínkjínle kon kuenta sʼín josʼin síkjaʼaitsjen je chjoónle kʼoa bakóle nga tsjoake. Kʼoa kʼoasʼin bakónile chjoónle nga mandosinle (1 Ped. 3:7). Kʼoa je chjoón kʼoati bʼasje nganʼio nga sínkjínle kon josʼin síkjaʼaitsjen je xʼinle. Kʼianga sítjoson nga jao jmeni xi tso je Niná nʼio ndasʼin batiokao xínkjín kʼoa tsa jmeni xi mele sʼin bákjao jko̱ nga jao, kʼoa kui kjoéjin jmeni xi koasenkao.

6, 7. 1) Jósʼin kuinyakao kjoafaʼaitsjen xi faʼaitʼa Eclesiastés 3:7 xi jechixan. 2) Jósʼin koako nga sínkjínle kon jngo chjoón, kʼoa jmé xi tjínnele sʼin je xʼin.

⁶ Je xi sínkjínle kon kʼoati be nga tjín “nichxin nga jyó biyoaa kʼoa [tjín] nichxin nga nokjoaa” (Ecl. 3:1, 7). Jngo tichjaa xi jete nó nga chixan i kitso: “Jeʼbe ndʼaibi nga sakʼoa likui nda bichómani kʼianga jme xi bixoán. Kʼiatsa nʼio tse xá tjínle xʼinna tosa tokoyakaola kʼiatsa jme xi xínle. Kʼoa nga kʼoasʼian ngisa nda chobanajmíjin”. Je chjoón xi sínkjínle kon énsin énnda fákao xʼinle, nga̱ bení nga je én xi nda tso, “xi kʼiakjoan nokjoa nga machjén”, nʼio chjíle (tʼexkiai Proverbios 25:11).

⁷ Kʼianga sitjoson jme xi síjéle Niná, je xi chjotale Cristo ma ali tsa tokjuinrʼoéjinle chjoónle, tjínnele nga kʼoati kuitsole jotjín kon. Jngo ndsʼee xi chjotajchínga sʼin tíjna, xi jekanñato nó nga chixan, kitso: “Ñʼai mana nga kʼoaxinle chjoónna jotjín tokoán”. Kʼoa ijngo ndsʼee xi jekanño nó nga chixan kʼoatso nga likui tsjoake nga bʼéyanajmí jotjín kon nga bee nga tokjoaʼato, tonga itso: “Sʼani tiʼbe nga tsínkui xi tsonile tsa tsín nʼiojian kʼiatsa kʼoaxían jotjín tokoan. Kʼianga ñʼai mana nga kʼoaxinle chjoónna jotjín tokoán, jé Jeobá bʼetsʼoale nga katabasenkaona ánni nga koa̱nsínina josʼin kjoakoa. Kʼoa xijema, kjenjta kjoanla kʼoa kʼiaa nchja”. Kʼoati nda  nga kʼia kjaonajmí kʼianga toje tjío, tobʼelañá, kʼianga bʼéxkia Examinando kʼoa tsa Biblia.

8. Jméni xi kuinyakao xi jechixan kʼianga ngisa nda kjaonajmí.

⁸ Je xi jechixan machjénní nga katabʼétsʼoale je Niná nga jngó jngó kʼoa nga katafákaonajmí xínkjín. Kjoaixiní, kʼianga nikʼéjnaa jmeni xi jenganá sakʼoa ñʼai maná. Tonga je xi tsjoake je Jeobá síjéle nganʼiotsjele kʼoa chjí bekon kjoabixanle. Tsa tsjoake je Jeobá sindayajin yaole nga jngó jngó kʼianga ngisa nda kjaonajmí. Jngo tichjaa xi jekanjaon nó nga chixan i kitso: “Je xʼinna kʼoa kao an kui kuenta nʼiaijin josʼin síkjaʼaitsjen Jeobá xi tʼatsʼe kjoabixan kʼoa nikuijinla nikjaʼaitsjainjin tsa kuinyaxínlaijin xíngijin. Kʼianga jngo kjoa sʼenajin, bʼenelaijin yaonajin nga bʼendajinjin kʼoa chobanajmíníjin”. Kʼianga kixi fitʼale je Niná nʼio nda batio kʼoa sʼele kjoanichikontʼain (Sal. 127:1).

9, 10. Jméni xi koa̱n sʼin xi jechixan nga ngisasa nʼio katamatsjoake xínkjín.

⁹ Je xi nʼio basenkao xi jechixan kui kjoatsjoacha, nga̱ kui “xi nda bʼékjaoná, kʼoa síjngoná” (Col. 3:14). Kʼianga ñaki kixi male xínkjín xi jechixan kʼoa nga ya tjíokao xínkjín tojme xi faʼatojin ngisa matsjoakesa xínkjín. Mamiyosale xínkjín kʼoa ngisa mamesale nga batiokao xínkjín. Kʼianga ʼya xi kʼoasʼin batio, ali tsa tosʼajin choa kjoatsjoacha bakóle xínkjín tojo ma tsa jngo pelíkula. Nkjín koya jmeni xi sʼín, tsakui nichxin tsoa̱kjá xínkjín, naskátso én kjoakao xínkjín, kuijnokao xínkjín kʼoa tsamaije̱ i̱ kuitsole xínkjín: “Jmé xi kanʼiai ndʼaibi”. Ninga tochoa jme xi kuitsole xínkjín xi jechixan tse kjoanda sʼe̱le. Jngo ndsʼee kʼoa kao chjoónle xi jexjaʼaonño nó nga chixan kʼoa xi nʼio nda tjíokao xínkjín nchjaale teléfono kʼoa síkasénle mensaje xínkjín. Je ndsʼee itso: “Kui kʼoanʼianijin nga jchaijin jme xi tísʼín xi ijngo”.

¹⁰ Kʼianga tjínle kjoatsjoacha xi jechixan tikui binyakaoni nga ngisasa nda bexkon xínkjín (Filip. 2:4). Ngisa matsjoake xínkjín kʼoa nʼio sʼejna kjoabixanle ninga chjotajée kitje̱nni. Je xi nda tjíokao xínkjín alikui toya tje̱n batio, tosa ngisasa nda batiokao xínkjín nga tífaʼato nó. Kʼiatsa jechixain, koaan chjónangilai yaoli: “A ñaki nda ʼbexkoan je chjoónna kʼoa tsa je xʼinna. A ʼbeña jotjín kon kʼoa jmeni xi síkjaʼaitsjen. A sikjaʼaitsjen  kjitʼaña je xʼinna kʼoa tsa je chjoónna, tobʼelañá, jméni xi nʼio koantsjoake̱ josʼín kʼianga sʼa tsaʼyaijin xíngijin”.

11. Ánni nga nʼio machjénsíni nga koakole kjoaxkóntokon xínkjín xi jechixan. Jngola choa̱ tʼejnai.

¹¹ Ninga nʼio nda tjíokao xínkjín xi jechixan kʼoati chjotajée. Ningalani tsjoake xínkjín sakʼoa likui ngóson sʼin síkjaʼaitsjen. Kʼoakoan je Abrahán kao Sara (Gén. 21:9-11). Tonga alikui kui tsakʼétʼale kjoabixanle. Ánni. Kuinga tsabexkón xínkjín. Tobʼelañá, je Abrahán, “sijéle kjoanda” kitsole je Sara (Gén. 12:11, 13). Kʼoa je Sara kisitjoson kʼoa “naina” kitsole Abrahán (Gén. 18:12). Kʼianga tsín bakóle kjoaxkóntokon xínkjín xi jechixan yaa nroani nga nʼio fákao xínkjín (Prov. 12:18). Kʼiatsa tsín kʼoendajin je kjoale, alikui ndasʼin sʼe̱jna je kjoabixanle (tʼexkiai Santiago 3:7-10, 17, 18).

12. Ánni nga nʼio kʼoenesínile yaole je xi chriansʼa chixan kʼianga kao kjoaxkóntokon kjoakaonajmíni xínkjín.

¹² Je xi ngisa nʼio kʼoenele yaole nga koakole kjoanda kao kjoaxkóntokon xínkjín jéní xi chriansʼa chixan. Machjénní nga katabásjaile josʼin kjoakaonajmí xínkjín kʼoa nga ñaki kʼoatjín jmeni xi kuitsole xínkjín. Jngo xʼin xi i̱ kitso: “Ninga nʼio tse kjoatsjoa tje̱nkao nga sʼa jngo jao nó tjínle nga kabixaan, sakʼoa majtiná kao xíngiaa. Kʼiaa saʼnda nda biyokoaa xíngiaa kʼianga jeʼyaa jotjín kon je chjoónná, josʼin ngale kʼoa jmeni xi machjénle kʼoa nga kʼoati jebená tsanda je. Tonga je xi basenkaoná kuinga chosonnilee jme xi nʼia, nga nangitokon maa, nga tsjoakjoa maa, nga sʼená kjoatsejta kʼoa nga je Jeobá ninʼiotʼaa yaoná”. Ñaki kʼoatjín jokitso.

13. Ánni nga nʼio machjénsíni kjoanangitokon kʼianga ndasʼin koatiokao xínkjín xi jechixan.

¹³ Je xi jechixan tokʼiaa nga koa̱nle kjoakaonajmí xínkjín kʼiatsa “indanangi” tjío kjoafaʼaitsjenle (1 Ped. 3:8). Jngo ndsʼee xi jetejngo nó chixan itso: “Kʼianga tjínná kjoanangitokon sasa bʼendajinñá je kjoaná nga̱ kui basenkaoná nga nijé kjoanichatʼa”. Kʼoa jngo ndsʼee  xi chjotajchínga sʼin tíjna, xi jekan nó nga chixan, i kitso: “Sakʼoa ngisa machjén nga tichatʼanái bixoán tikʼoajinni nga tsjoakele kuixoán. Je xi basenkaoná nga sʼená kjoanangitokon kui kjoabʼetsʼoa. Kʼianga bʼetsʼoalaijin Jeobá nga joaijin kui fiya kjoafaʼaitsjennajin nga chjotajée maijin kʼoa nga tíbakónajin kjoanda je Niná”. Xíngiaa jebi kui xi basenkao nga ngisa nangitokon ma kʼianga male bʼéndajin kjoale.

14. Jósʼin batio xi jechixan kʼiatsa kjoangʼakon tjínle.

¹⁴ Tonga tsa ngʼatokoán alikui nda biyokoaa xíngiaa. Likui ma chobanajmiá, nga̱ tsín tso tokoán nga nijé kjoanichatʼa. Je chjota xi ngʼakon, ʼndele nga “tichatʼanái” kuitso, tosa tokjaʼaí tso. Kʼoa ʼndele nga kʼoakuitso nga je kasʼele jée, tojé xi ijngo bánele. Kʼoa ʼndele nga kʼoendajin kjoale, tosa tomajtile kʼoa saʼnda kui síchjén én xi ai tíjna, kʼoa tsamaije̱ likui tinchja̱nile xi ijngo (Ecl. 7:9). Je kjoangʼakon alikui nda síkatío xi jechixan. Si̱kjaʼaitsjeen nga je “Niná bʼejnatajale xi ngʼakon, [tonga] tsjoále kjoanda je xi indajinkon” (Sant. 4:6).

15. Kʼoalasi jósʼin koasenkao Efesios 4:26, 27 nga kʼoendajin kjoale xi jechixan.

¹⁵ Kʼianga kjoa sʼele xi jechixan koaan kjitʼanangi kʼoendajin ʼndele nga kjoangʼakon sikinjele. Je pastro Pablo i kitsole je chjotale Cristo xi tsakatio ngasʼa: “Ali jtijin mano jo saʼnda nga kantjai tsʼuí. Ni bʼaiʼndejinlao na̱i” (Efes. 4:26, 27). Jmé xi ma kʼianga tsín fitje̱nngi jotso Énle Niná xi jechixan. Jngo tichjaa xi i̱ kitso: “Sakʼoa likui mangíntjenngijin jotso Efesios 4:26, 27 kʼoa saʼnda tsín nda sʼefe”. Ngisa nda nga kjoan bʼendajiaan je kjoa xi sʼená ánni nga nyʼán biyosíñá. Tonga sakʼoa machjén nga chóyakao ngotjoá ánni nga katafaʼajenkjoanlani kjoajtiná. Kʼoati machjén nga kʼoétsʼoalee je Jeobá nga katabasenkaoná nga katasʼená kjoanangitokon. Kui xi koasenkaoná nga tosa kui kʼoéndajiaan jme kjoa xi kasʼe kʼoa nga tsínkui kjuinñá jotjío tokoán (tʼexkiai Efesios 4:32).

16. Jósʼin koasenkao je kjoanangitokon xi jechixan nga kui skótsenle jmeni xi nda sʼín nga jngó jngó.

¹⁶ Je kjoanangitokon kui xi binyakao xi jechixan nga bechjí jmeni xi nda sʼín nga jngó jngó. Tobʼelañá, tsakui nichxin jngo chjoón jebe josʼín nga nda koatio je xi tjío yaniʼyale. Kʼoa tsa tjínle kjoanangitokon je xʼinle alikuijin koanjtile, tosajin tosi tonda tsjoánganʼiole nga kʼoakatasʼín. Kʼoasʼin koakoni nga tsjoake kʼoa nga bechjí je chjoónle (Prov. 31:10, 28; Efes. 5:28, 29). Kʼoa je chjoón xi tjínle kjoanangitokon alikui tokui kʼoasjengʼani yaole jmeni xi sʼín kʼoa toʼi̱natjín sikʼéjna je xʼinle, nga̱ jetojngo yao mani nga jao kʼoa jmeni xi síkiʼaon xi ijngo, síkiʼaon nga jao (Mat. 19:4, 5).

17. Jósʼin nga nda koatiokao xínkjín je ndsʼee xi jechixan kʼoa nga je Jeobá kʼoasjengʼa kjoabixanle.

¹⁷ Kuijin xi meno nga je Jeobá katabʼasjengʼa je kjoabixanno, nga tsjoa sʼe̱no kʼoa nga tsínkʼia kuixoya kjoabixanno, tojosʼin tsakatio je Abrahán kao Sara kʼoa kao Isaac kao Rebeca. Kʼiatsa meno nga kʼoasʼin kuiyo tjínnele kʼoasʼin jchatokon kjoabixanno josʼin bekon je Jeobá. Chótʼayao je Biblia ánni nga sʼe̱sínino kjoachjine kʼoa koa̱nnkjínsíni tokon. Katasʼeno kjoatsjoacha kʼoa chjí jchatokon xíngio (Cant. de Cant. 8:6). Tʼenelao yaono nga katasʼeno kjoanangitokon kao kjoaxkóntokon. Kʼiatsa kʼoasʼiaon ngayeje jebi, ngisa nda kuiyo kʼoa kjoáyatsjoaño ni̱ma̱le je Nʼainá xi tíjna ngʼajmi (Prov. 27:11). Tsakui nichxin kʼoati sʼe̱ tokon jotjín kon jngo ndsʼee xi jekanñato nó nga chixan xi i̱ kitso: “Alikuijin kʼoakoa̱nna tsa toʼan koatejna tsa tsín chjoónna. Je kjoabixannajin sa nʼio sa nʼio tísʼejna nga nyaon nyaon. Kui kʼoakjimani nga tsjoachaijin je Jeobá kʼoa nga kjitʼa chobanajmíjin”.