1. Couma enn bon communication finn aide bann mariage?

 ENN frere dan Canada ti dire: “Mo ti pou prefere passe le temps avek mo madame plutot ki avek n’importe kisannla. Tou bonheur ki ena dan la vie augmenté ek tou la peine diminué par la moitié kan mo partage sa avek li.” Enn mari en Australie ti ecrire: “Sa faire 11 an ki nou ensam, mo pa laisse enn jour passé sans ki mo koz ar mo madame. Nou toulé-deux nou pena okenn doute ou-soit okenn tracas concernant nou mariage. Enn raison principal pou sa, c’est parski souvent ena enn bon communication entre nou.” Enn soeur dan Costa Rica ti dire: “Enn bon communication pa finn zis faire nou mariage vinn pli solide; sa finn aussi faire nou vinn pli proche ar Jéhovah, sa finn protege nou kont bann tentation, finn faire nou uni couma enn couple, ek finn faire nou l’amour grandi.”

2. Ki bann kitsoz kapav empeche enn bon communication?

² Eski ou ek ou conjoint content pou gagne bann bon conversation, ou-soit eski zot trouve sa difficile? Nou comprend ki kapav ena bann situation difficile parski deux dimoune ki’nn marié, zot imparfait, zot ena different personnalité ek zot culture ek fason ki zot inn elevé aussi different. (Rom. 3:23) En plus, li possible ki enn couple ena different fason pou communiké. C’est pou sa raison-la ki John M. Gottman ek Nan Silver, ki faire bann recherche lor la vie mariage, dire: “Sa demann courage, determination ek capacité pou adapté ar bann situation ek faire ki la vie mariage duré.”

3. Ki finn aide bann couple pou faire zot mariage vinn pli solide?

³ Oui, pou ki enn mariage reussi, bizin faire bann grand zeffort. Mais en retour, sa pou faire nou vrai-mem heureux. Bann conjoint ki content zot camarade kapav vive heureux ensam. (Eccl. 9:9) Prend l’exemple mariage Isaac ek Rébecca, ki ti enn mariage heureux. (Gen. 24:67) Mem si zot ti marié depuis longtemps, nanyé pa montré ki  zot l’affection pou zot camarade ti’nn diminué. Beaucoup couple zordi aussi pareil. Ki zot secret? Zot finn aprann pou dire vrai-mem seki zot pensé ek seki zot ressenti, mais zot faire sa avek bonté. Ek en mem temps, zot developpe ek zot manifesté bann qualité couma enn bon jugement, l’amour, enn profond respé, ek l’humilité. Couma nou pou trouvé asterla, kan sa bann qualité important-la forme partie dan enn mariage, li toujours facile pou communiké.

4, 5. Couma enn bon jugement kapav aide enn couple pou comprend sakenn so camarade pli bien? Donne bann l’exemple.

⁴ Proverbes 16:20 dire: “Enn kikenn ki montré enn bon jugement dan enn situation pou trouve seki bon.” Sa bann parole-la bien vrai en seki concerne mariage ek la vie famille. (Lire Proverbes 24:3.) Pli bon livre ki kapav faire nou gagne enn bon jugement ek sagesse c’est Parole Bondié. Genèse 2:18 dire nou ki Bondié ti faire enn femme couma enn kikenn ki al bien ar enn zom. Sa vedir ki li different ar enn zom. C’est a cause sa ki fason ki enn zom ek enn femme communiké, li pa pareil. Bien sur, bann dimoune different, mais en general, bann madame content koz lor zot bann sentiment, lor bann dimoune ek lor bann camarade. Zot content kan koz ar zot avek tendresse ek kan ena bann conversation profond, parski sa rassure zot ki lezot content zot. Parkont, beaucoup zom pa trop content koz lor zot sentiment. Zot pli content koz lor bann activité, lor bann probleme ek bann solution. Ek bann zom content gagne respé lezot.

⁵ Enn soeur en Grande-Bretagne dire: “Au lieu ki mo mari ecoute moi, li content reglé bann probleme bien vite. Parfois sa vrai-mem agace moi, parski tou seki mo envie c’est enn kikenn ki ecoute moi avek bonté ek ki comprend moi.” Enn mari raconté: “Kan mo madame ek moi nou ti fek marié, mo ti ena tendance pou rod vite enn solution pou n’importe ki probleme li ti ena. Selman, bien vite mo ti aprann ki, seki mo madame ti vrai-mem bizin c’est enn kikenn ki ecoute li.” (Prov. 18:13; Jacq. 1:19) Enn mari ki ena enn bon jugement prend compte bann sentiment so madame ek essaye prend sa en consideration kan li koz ar so madame. En mem temps, li rassure so madame ki so bann pensée ek so bann sentiment ena l’importance pou li. (1 Pierre 3:7) En retour, madame-la essaye comprend fason pensé so mari. Kan enn mari ek so femme comprend, apprecié ek rempli responsabilité ki zot ena dapré la Bible, zot ena enn joli la vie mariage. En plus, zot kapav travail ensam pou prend bann bon decision.

6, 7. (a) Dan ki fason principe ki trouve dan Ecclésiaste 3:7 kapav aide bann conjoint pou ena enn bon jugement? (b) Couma enn madame kapav montré ki li ena enn bon jugement, ek ki zeffort enn mari bizin faire?

⁶ Enn couple ki ena enn bon jugement koné aussi ki ena “enn le temps pou reste trankil ek enn le temps pou kozé.” (Eccl. 3:1, 7) Enn soeur ki marié depuis dix an dire: “Asterla mo realisé ki parfois ena bann moment kot li pa approprié pou koz certain sujet. Si mo mari debordé ar travail ou-soit ar lezot responsabilité, mo laisse enn tigit le temps passé avant mo koz certain kitsoz. Lerla, nou conversation vinn beaucoup pli facile.” Bann madame ki ena enn bon jugement aussi koz dan enn fason gentil, zot conscient ki kan zot bien choisir zot parole ek ‘dire sa dan bon moment,’ sa faire plaisir zot mari.​—Lire Proverbes 25:11.

⁷ Enn mari bizin faire so part pa zis kan li ecoute so madame mais aussi kan li faire zeffort pou exprime bien so prop sentiment. Enn ancien ki’nn marié depuis 27 an dire: “Mo bizin faire enn grand zeffort pou dire mo madame seki ena dan fond mo leker.” Enn frere ki marié depuis 24 an dire: “Mo pa dire seki mo ressenti parski mo pensé ki ‘si mo pa dire nanyé, probleme-la pou allé par li-mem.’ Pourtant, mo finn rann-moi compte ki li pa enn faiblesse si mo exprime mo bann sentiment. Kan mo gagne difficulté pou dire seki mo pensé, mo prié pou trouve bann mot ki bizin ek bon fason pou dire sa. Apré, mo  prend enn bon respiration ek mo commence kozé.” Seki kapav aussi aide enn couple c’est kan zot choisir enn bon moment pou kozé, kitfois kan zot tousel pendant ki zot pé faire texte du jour ou-soit zot pé lire la Bible ensam.

8. Pou faire zot mariage reussi, ki motivation bann couple Chretien ena en plus?

⁸ Seki bien important pou enn mari ek enn femme toulé-deux, c’est la priere ek enn grand desir pou ameliore fason ki zot communiké. Pena doute ki li kapav bien difficile pou change bann vié l’habitude. Mais kan enn couple content Jéhovah, demann Li so l’esprit saint ek considere zot mariage couma sacré, zot ena enn motivation ki beaucoup pena. Enn madame ki ena 26 an ti ecrire: “Pou mo mari ek moi, fason pensé Jéhovah lor mariage bien serieux, alors nou pa mem pense separation. Sa faire nou travail pli dur pou reglé nou bann probleme kan nou koz sa ensam.” Sa qualité fidelité ek l’attachement pou Bondié-la faire Li plaisir ek faire enn couple gagne So benediction.​—Ps. 127:1.

9, 10. Dan ki fason pratik enn couple kapav faire so l’amour vinn pli solide?

⁹ L’amour, c’est enn qualité ki pli important dan enn mariage parski li “enn kitsoz parfait ki soude nou tou ensam.” (Col. 3:14) Enn vrai l’amour grandi a mesure ki enn couple fidele vive ensam ek konn bann la joie ek bann difficulté. Zot vinn encore pli proche ek content compagnie sakenn so camarade. Bann mariage coumsa vinn pli fort, pa zis a cause deux-trois grand action, couma nou trouvé dan la gazette, television, Internet, mais grace a plusieurs ti kitsoz​—zot maye zot camarade, zot dire enn ti mot gentil, enn ti geste ki montré zot l’amour, enn sourire, ou-soit avek sincerité zot demandé “couma to’nn passe to la journée?” Sa bann ti kitsoz-la kapav faire enn grand difference dan enn mariage. Enn couple ki heureux dan zot mariage depuis 19 an, telephone ou-soit envoye enn ti message sakenn so camarade pendant la journée. Mari-la dire c’est “zis pou koné si tou pé passe bien.”

¹⁰ L’amour pousse aussi enn couple pou contigne aprann konn sakenn so camarade. (Phil. 2:4) En retour, sa connaissance-la faire zot l’amour vinn encore pli fort malgré zot bann defaut. Enn mariage heureux pa reste touletan pareil mais li vinn pli solide ek pli fort avek le temps. Alors, si ou marié, demann-ou-mem: ‘Ki quantité mo konn mo conjoint? Eski mo konn so bann sentiment ek so bann pensée lor different sujet? Eski souvent mo pense mo conjoint, kitfois lor  bann qualité ki ti attire moi ar li premier fois?’

11. Kifer respé c’est enn qualité bien important pou reussi enn mariage? Donne enn l’exemple.

¹¹ Mem bann mariage ki bien heureux zot pa bann mariage parfait ek enn couple ki content sakenn so camarade pa touletan ena mem fason pensé. Abraham ek Sara pa ti touletan daccord entre zot. (Gen. 21:9-11) Selman, zot difference pa ti crée enn division entre zot. Kifer? Parski zot ti traite sakenn so camarade avek dignité ek respé. Par exemple, Abraham ti dire “s’il te plait” kan li ti koz avek Sara. (Gen. 12:11, 13) De lot coté, Sara ti obeir Abraham ek ti considere li couma so “seigneur.” (Gen. 18:12) Kan enn couple pena respé sakenn pou so camarade, souvent nou trouve sa par fason ki zot kozé entre zot ek par ton zot la voix. (Prov. 12:18) Si zot pa reglé sa probleme ki pé faire zot mank respé pou zot camarade-la, kitfois zot mariage kapav cassé.​—Lire Jacques 3:7-10, 17, 18.

12. Kifer bann ki fek marié bizin surtout faire zeffort pou koz avek respé?

¹² Bann ki fek marié bizin surtout faire beaucoup zeffort pou koz avek gentillesse ek respé sakenn ar so camarade. Lerla sa pou crée enn l’atmosphere kot zot pou kapav communiké dan enn fason franc ek honnete. Enn mari dire: “Mem si bann premier l’année mariage agreable, parfois sa kapav aussi difficile. Pendant sa periode-la, ou pé essaye adapté ar bann sentiment ou madame, so bann l’habitude ek seki li bizin​—ek li aussi, li faire pareil​—mais kitfois pa touletan ki tou pou passe bien. Selman, sa pou aide ou beaucoup si ou raisonnable, ou pa prend tou kitsoz serieux, ek ou ena bann qualité couma l’humilité, patience, ek confiance en Jéhovah.” Sa mari-la ena raison, pa vrai?

13. Kifer l’humilité bien important pou enn mariage marche bien?

¹³ Enn bon communication dan mariage li pareil couma enn ti la riviere ki pé coulé ek pé traverse doucement enn jardin. “L’humilité” c’est enn qualité bien important pou ki sa ti la riviere-la contigne coulé. (1 Pierre 3:8) Enn frere ki’nn marié depuis 11 an dire: “L’humilité faire ou reglé enn probleme pli vite parski sa pousse ou pou dire, ‘Excuse moi.’” Enn ancien ki heureux dan  so mariage depuis 20 an dire: “Parfois li pli important pou dire ‘Excuse moi,’ ki, ‘Mo content toi.’” Li ajouté: “Enn moyen pli facile pou nou ena l’humilité c’est la priere. Kan mo madame ek moi nou prié Jéhovah ensam, sa rappel nou ki nou imparfait ek ki nou bizin faveur Bondié, faveur ki personne pa merité. Sa rappel-la aide moi pou trouve kitsoz dan enn bon fason.”

14. Couma l’orgueil kapav affecté enn mariage?

¹⁴ L’orgueil parkont, pa aide nou pou faire la paix. Li faire communication difficile parski li empeche nou ena desir ek courage pou demann excuse. Au lieu ki sa dimoune orgueilleux-la dire: “Mo’nn faire enn erreur, s’il te plait pardonne moi,” li rod bann pretexte. Li pena courage pou reconette enn defaut, au contraire, li attire l’attention lor defaut lot dimoune-la. Kan enn dimoune inn blesse li, au lieu ki li rod faire la paix, li senti-li offensé ek li tire vengeance par bann parole bien dur ou-soit li pa koz ditou. (Eccl. 7:9) Oui, l’orgueil kapav detruire enn mariage. Li bon nou rappel ki “Bondié kont bann ki ena l’orgueil, mais Li donne so faveur ki nou pa merité, bann ki ena l’humilité.”​—Jacq. 4:6.

15. Expliké couma kan enn couple applik Éphésiens 4:26, 27, sa aide zot pou reglé bann probleme ki kapav arrivé entre zot.

¹⁵ Kan enn couple gagne probleme, fodé pa zot montré-zot orgueilleux, mais zot bizin reglé zot probleme desuite. Paul ti dire bann Chretien dan so lepok: “Pa laisse soleil couché alors ki zot encore en colere, ek pa donne Satan okenn l’occasion.” (Éph. 4:26, 27) Si nou pa suive conseil ki ena dan Parole Bondié, sa kapav faire nou gagne bann tracas inutile. Enn soeur dire: “Parfois inn arrivé ki mo mari ek moi pa finn applik Éphésiens 4:26, 27, lerla mo finn passe bann pli mauvais la nuit dan mo la vie!” Alors, li beaucoup pli bon pou reglé bann probleme desuite avek l’objectif pou faire la paix! Bien sur, kitfois bann conjoint pou bizin donne sakenn so camarade enn tipé le temps pou li calmé-li. Li bon aussi ki nou prié Jéhovah pou ena enn bon l’attitude. Sa implik ki nou ena l’humilité, parski sa pou aide nou fixé nou l’esprit lor probleme-la, pa lor nou-mem, sinon nou pou faire situation-la vinn pli grave.​—Lire Colossiens 3:12, 13.

16. Couma l’humilité kapav aide enn couple pou ena enn bon attitude lor capacité ki sakenn ena?

¹⁶ L’humilité ek modestie aide enn dimoune marié pou fixé so l’esprit lor bann point fort ki so conjoint ena. Anou prend enn l’exemple: Li possible ki enn madame ena bann capacité ki li servi pou bien-etre so famille. Si so mari humble ek modeste, li pa pou ena l’impression ki so madame pé menace so l’autorité. Au contraire, si li encourage li pou servi so bann talent, li pou montré ki so madame ena enn grand valeur pou li, ek ki li content li. (Prov. 31:10, 28; Éph. 5:28, 29) De lot coté, enn madame ki humble ek modeste pa pou vante so bann capacité ou-soit meprise so mari. Apré tou, toulé-deux, zot “enn sel la chair” ek si enn kitsoz blesse enn, sa pou blesse lot-la aussi.​—Mat. 19:4, 5.

17. Ki kapav faire enn mariage heureux ek donne l’honneur Bondié?

¹⁷ Pena doute ki ou envie ou mariage pareil couma mariage Abraham ek Sara ou-soit Isaac ek Rébecca​—enn mariage ki vrai-mem heureux, ki dure longtemps ek ki donne l’honneur Jéhovah. Si oui, ena mem fason pensée ki Bondié lor mariage. Etudié so Parole pou ou gagne enn bon jugement ek sagesse. Kan ou reflechi lor bann qualité ki ou conjoint ena, sa faire ou developpe enn vrai l’amour ki pareil couma “la flamme Yah.” (Chant de S. 8:6) Travail dur pou developpe l’humilité. Traite ou conjoint avek respé. Si ou faire sa bann kitsoz-la, ou pou heureux dan ou mariage ek sa pou faire plaisir ou Papa ki dan le ciel. (Prov. 27:11) Oui, kitfois ou pou ena mem sentiment ki sa mari ki finn marié depuis 27 an-la. Li ti dire: “Mo pa kapav mazinn mo la vie sans mo madame. Chaque jour ki passé, nou mariage vinn pli solide, parski nou content Jéhovah ek ena enn bon communication entre nou.”