1. Kon bon komunikashon a yuda hopi pareha kasá?

UN RUMAN hòmber na Canada a bisa: “Mi ta preferá di ta den kompania di mi kasá en bes di ta huntu ku otro hende. Ora mi kompartí mi sintimentunan kuné, mi ta sinti mi muchu mas felis, i mi dolónan ta bira ménos.” Un esposo na Australia a skirbi: “Nos tin 11 aña kasá i nunka a pasa un dia ku mi no a papia ku mi kasá. Komo ku nos tin bon komunikashon ku otro, nos tin pleno konfiansa den otro i ta disfrutá di un matrimonio felis.” Un ruman muhé na Costa Rica a bisa: “E echo ku nos tin bon komunikashon ta benefisiá nos mashá: Nos tin un matrimonio felis; nos tin un mihó relashon ku Yehova; nos por resistí tentashon; nos a bira mas uní komo pareha i nos amor pa otro ta sigui krese.”

2. Menshoná algun kos ku por stroba bon komunikashon.

² Abo ku bo kasá tin bon komunikashon? Òf boso tin difikultat pa kòmbersá ku otro? Ta di komprondé ku de bes en kuando por surgi problema. Dikon? Pasobra boso tur dos ta imperfekto, i boso personalidat ta distinto. Por ta tambe ku boso no ta di e mesun kultura i ku boso a ser lantá den maneranan distinto. (Rom. 3:23) Es mas, boso kada un por tin boso propio estilo di komuniká. P’esei, ta ku bon motibu M. Gottman i Nan Silver, ekspertonan riba tereno di matrimonio, a bisa ku “pa bo por tin un matrimonio duradero, bo mester tin kurashi i determinashon i ta dispuesto pa adaptá.”

3. Kiko a yuda hopi pareha fortalesé nan matrimonio?

³ No tin duda, si bo ke tin un matrimonio eksitoso, bo tin ku traha duru. Pero e resultadonan ta bale la pena. Sí, parehanan ku ta stima otro por tin un matrimonio realmente felis. (Ekl. 9:9) Tuma por ehèmpel e matrimonio felis di Isak i Rebeka. (Gén. 24:67) Beibel ta mustra ku nan a sigui stima otro asta despues ku nan tabatin hopi aña kasá. Nos por bisa e mesun kos di hopi pareha awe. Kiko ta nan sekreto? Nan a siña ekspresá nan pensamentu-  i sintimentunan na otro na un manera onesto i tòg bondadoso. Loke ta yuda nan hasi esaki ta e echo ku nan ta kultivá i desplegá komprondementu, amor, rèspèt profundo i humildat. Sí, manera nos lo mira den e artíkulo akí, ora parehanan ta desplegá e kualidatnan akí, semper nan lo tin bon komunikashon.

4, 5. Kon komprondementu por yuda parehanan kasá komprondé otro mihó? Duna ehèmpel.

⁴ Proverbionan 16:20 ta bisa: “Esun ku paga tinu na e palabra lo haña bondat.” Esei ta sigur ora ta trata di matrimonio i bida di famia, pasobra e Palabra di Dios ta duna nos e sabiduria i komprondementu ku nos tin mester pa logra un matrimonio felis. (Lesa Proverbionan 24:3.) Por ehèmpel, Génesis 2:18 ta siña nos ku Dios a traha hende muhé komo komplemento di hende hòmber. Pues, nan no ta meskos i p’esei, nan manera di komuniká ta diferente. Mayoria di hende muhé gusta papia tokante nan sintimentunan, tokante hende i bida matrimonial. Hende muhé gusta pa nan kasá papia ku un tono lif i dushi ku nan pasobra esei ta un indikashon ku nan kasá ta stima nan. Di otro banda, hopi hende hòmber no ta gusta papia di nan sintimentunan; nan ta preferá di papia tokante sierto aktividat, problema i solushon. Ademas, nan ke pa nan kasá respetá nan.

⁵ Un ruman muhé na Gran Bretaña a bisa: “Mi kasá ta preferá di bira solushoná un problema mesora en bes di sinta skucha mi. Esei ta frustrante, pasobra loke mi ke ta p’e skucha mi i komprondé pa mi.” Un esposo a skirbi: “Tempu ku nos tabata resien kasá, mi tabatin e tendensia di bula solushoná kualke problema ku mi kasá tabatin. Sinembargo, no a dura mashá ku mi a bin komprondé ku loke e tabata ke ta pa mi skuch’é.” (Pro. 18:13; Sant. 1:19) Un esposo ku komprondementu ta purba di komprondé loke su kasá ta sinti i ta trat’é di tal manera ku e esposa ta sinti ku e ta stim’é. E ta laga su esposa komprondé ku su pensamentu- i sintimentunan ta importante p’e. (1 Ped. 3:7) E esposa, na su turno, tambe ta purba di komprondé su esposo. Sí, ora tantu e esposo komo e esposa ta komprondé i ta hasi loke Yehova ta ferwagt di nan, nan lo traha huntu pa tuma desishonnan sabí i balansá i logra un matrimonio felis.

6, 7. (a) Kon e prinsipio na Eklesiástes 3:7 ta yuda parehanan kasá mustra komprondementu? (b) Kon un esposa por mustra komprondementu, i ki esfuerso un esposo mester hasi?

⁶ Un pareha ku komprondementu sa tambe ku tin “un tempu pa keda ketu i un tempu pa papia.” (Ekl. 3:1, 7) Un ruman muhé ku tin dies aña kasá a bisa: “Awor mi ta realisá ku tin biaha no ta oportuno pa papia di un asuntu. Sí, tin sierto asuntunan ku mi no ta atendé ku mi kasá ora e ta kansá di trabou òf okupá ku otro responsabilidatnan; mi ta laga nan pa un momento mas oportuno. E ora ei, nos por komuniká mihó.” Ademas, un esposa ku komprondementu ta papia na un manera kariñoso pasobra e sa ku si e usa palabranan bon skohí “na ora apropiá” su kasá ta apresiá esaki i ta skuch’é ku smak.—Lesa Proverbionan 25:11.

⁷ Pa un esposo kristian kumpli ku su papel, e tin ku skucha su kasá i hasi esfuerso pa ekspresá loke e ta sinti na un manera kla pa su esposa komprondé. Un ansiano ku tin 27 aña kasá a bisa: “Mi tin ku hasi esfuerso pa bisa mi kasá loke tin den mi kurason.” Un ruman hòmber ku tin 24 aña kasá a bisa: “Mi tin e tendensia di tene mi sintimentunan pa mi mes, pensando ku si mi no papia riba un asuntu ku ta molestiá mi, di mes lo e pasa. Pero mi a realisá ku si mi ekspresá mi sintimentunan, esei no ta nifiká ku mi ta débil. P’esei, ora mi tin problema pa ekspresá mi mes, mi ta resa pidi Yehova yuda mi haña e palabranan i e manera korekto pa ekspresá mi mes. Kaba, mi  ta hala un rosea profundo i kuminsá papia.” Ta importante tambe pa parehanan skohe e momento oportuno pa komuniká, kisas ora nan ta nan so, analisando e teksto di dia òf ora nan ta lesa Beibel huntu.

8. Kiko por yuda parehanan kasá kultivá e deseo pa mehorá nan komunikashon?

⁸ No ta fásil pa hende kambia nan manera di komuniká. P’esei, pa un esposo i esposa mehorá nan komunikashon, ta masha importante pa nan tin e deseo pa mehorá i pa nan hasi orashon pidi Yehova di su spiritu santu. Nan lo tin e deseo ei si nan ta stima Yehova, ke agrad’é i ta mira matrimonio komo algu sagrado. Un ruman muhé ku tin 26 aña kasá a skirbi: “Ami ku mi kasá ta tuma Yehova su punto di bista relashoná ku matrimonio masha na serio. P’esei, nos no ta pensa riba separashon mes. Mas bien, nos ta hasi mas esfuerso pa papia tokante nos problemanan i resolvé nan.” Dios ta keda kontentu ku parehanan ku di e manera ei ta demostrá lealtat i deboshon na dje, i e ta bendishoná nan abundantemente.—Sal. 127:1.

9, 10. Den ki maneranan práktiko un pareha por fortalesé nan amor pa otro?

⁹ Amor, “e laso perfekto di union,” ta e kualidat di mas importante den un matrimonio. (Kol. 3:14) Amor berdadero ta oumentá, segun ku e pareha ta pasa den tempu bon i malu huntu. Sí, segun ku tempu ta pasa, nan ta bira mihó amigu i ta disfrutá mas di otro su kompania. Loke ta fortalesé un matrimonio no ta kosnan grandi—manera nos ta mira i tende via medionan di komunikashon. Mas bien, ta trata di kosnan ku por parse chikitu pero ku tin hopi balor. Nan ta entre otro, un brasa, un palabra òf gesto di kariño, un smail amoroso òf djis e echo ku un pareha ta puntra otro sinseramente, “Kon a bai awe?” Sí, e kosnan chikitu akí por hasi un gran diferensia den un matrimonio. Un esposo ku ta felismente kasá pa 19 aña kaba a bisa ku e ku su kasá ta bèl òf manda mensahe pa otro durante dia “djis pa sa kon ta bai ku otro.”

¹⁰ Ora parehanan ta stima otro, nan ta hasi esfuerso tambe pa sigui siña konosé otro. (Flp. 2:4) Anto mas nan konosé otro, mas nan ta stima otro apesar di nan debilidatnan. Pues, no tin límite pa amor den un matrimonio felis; segun ku tempu ta pasa, e ta sigui bira mas i mas fuerte. Esei na su turno ta fortalesé un matrimonio. P’esei, si bo ta kasá, puntra bo mes: ‘Kon bon mi konosé mi kasá? Mi sa kon e ta pensa i sinti tokante sierto asuntunan? Kuantu mi ta pensa  riba dje, kisas reflekshonando riba e kualidatnan ku a atraé mi na dje na prinsipio?’

11. Dikon rèspèt ta di vital importansia pa un matrimonio felis? Ilustrá.

¹¹ Ni e matrimonionan di mas felis no ta perfekto. Pues, por sosodé ku un pareha no ta di akuerdo ku otro riba sierto asuntu. Abraham ku Sara ta un ehèmpel di esaki. (Gén. 21:9-11) No opstante, nan diferensia di opinion, no a debilitá nan matrimonio. Dikon nò? Pasobra nan a trata otro ku dignidat i rèspèt. Abraham, por ehèmpel, tabata usa e ekspreshon “pa fabor” ora e tabata papia ku Sara. (Gén. 12:11, 13) Sara, na su turno, tabata obedesé Abraham i tabata yam’é “señor.” (1 Ped. 3:6) Ora un pareha no ta respetá otro, por lo general esaki ta bisto na e manera ku nan ta papia ku otro òf nan tono di bos. (Pro. 12:18) I si no tin rèspèt, e matrimonio ta den peliger.—Lesa Santiago 3:7-10, 17, 18.

12. Dikon parehanan resien kasá tin ku hasi èkstra esfuerso pa papia na un manera respetuoso ku otro?

¹² Parehanan resien kasá mester hasi èkstra esfuerso pa papia na un manera bondadoso i respetuoso ku otro. Di e manera ei, nan ta krea un ambiente den kua nan por komuniká libremente i onestamente ku otro. Segun un esposo, “aunke e promé añanan di matrimonio ta dushi, tin biaha nan por ta difísil tambe. E situashon por bira basta ferfelu ora abo ku bo esposa no ta komprondé otro su sintimentu-, kustumber- i nesesidatnan. Pero loke por yuda hopi ta si boso tur dos tin un sentido di humor, ta personanan rasonabel, ta konfia den Yehova i ta desplegá kualidatnan importante manera humildat i pasenshi.” Eseinan lo yuda sigur!

13. Dikon humildat ta masha importante pa logra un matrimonio felis?

¹³ Bon komunikashon den matrimonio ta manera un riu ku ta flui suavemente den un hardin. Pa esei por sigui asina, ta masha importante pa tur dos persona ta ‘humilde.’ (1 Ped. 3:8) Un ruman hòmber ku tin 11 aña kasá a bisa ku “humildat ta e mihó remedi pa solushoná problema pasobra e ta motivá bo pa pidi ‘despensa.’” Un ansiano ku tin 20 aña felismente kasá a bisa: “Tin biaha e palabra ‘despensa’ tin mas efekto ku e palabranan ‘mi stima bo.’” El a sigui bisa: “Un kos ku sigur ta yuda ami ku  mi kasá demostrá humildat ta orashon. Ora nos ta hasi orashon huntu, esaki ta yuda nos kòrda ku nos tur dos ta imperfekto i kon Yehova a demostrá bondat inmeresí na nos. E rekordatorionan akí ta yuda nos mira kosnan desde e perspektiva korekto.”

14. Kon orguyo por afektá un matrimonio?

¹⁴ Di otro banda, orguyo ta un karakterístika ku ta stroba parehanan di komuniká bon i resolvé nan problemanan. Dikon? Pasobra un persona orguyoso no tin e kurashi ni e deseo pa pidi despensa. En bes di humildemente pidi despensa òf bisa “pordoná mi, por fabor,” un persona asina ta bini ku èksküs pa hustifiká su mes. En bes di demostrá kurashi i rekonosé su fayonan, e ta buska fout serka e otro persona. Ora e sintié ofendí, e no ta buska pas; e ta rabia i kisas ta reakshoná ku palabranan skèrpi òf ta keda sin papia ku su kasá. (Ekl. 7:9) Sí, orguyo por kaba ku un matrimonio. Ta bon pa nos kòrda tambe ku ‘Dios ta oponé hende orguyoso, pero ta duna bondat inmeresí na hende humilde.’—Sant. 4:6.

15. Splika kon Efesionan 4:26 i 27 por yuda un pareha kasá resolvé problemanan ku por surgi den nan matrimonio.

¹⁵ Klaru ku ta un bobedat pa pensa ku nunka nos lo manifestá un aktitut orguyoso. P’esei, ora esei sosodé, nos mester rekonosé esaki i trata kuné mesora. Pablo a bisa su kompañeronan kristian: “No laga solo baha miéntras ku ainda boso ta rabiá; no duna Diabel un chèns ku boso.” (Efe. 4:26, 27) Si nos no kumpli ku e konseho akí, nos por haña nos ku problema innesesario. Un ruman muhé a lamentá: “Tabatin biaha ku ami ku mi kasá no a apliká Efesionan 4:26 i 27. E anochinan ei mi a drumi mas malu ku nunka!” Ta muchu mas mihó pa papia mesora riba un asuntu ku e meta pa logra pas, no ta bèrdat? Ta klaru ku tin biaha parehanan kasá tin ku duna otro un poko tempu pa kalma promé ku nan papia riba sierto problema. Ademas, ta bon pa nan pidi Yehova yuda nan desplegá e aktitut korekto. Esaki ta enserá un aktitut humilde ku lo yuda nan enfoká riba e problema i no riba nan sintimentunan pasobra esei lo hasi e situashon pió.—Lesa Kolosensenan 3:12, 13.

16. Kon humildat por yuda un pareha kasá balorá e puntonan fuerte di otro?

¹⁶ Humildat i modestia ta yuda un persona kasá enfoká riba e puntonan fuerte di su kasá. Tuma por ehèmpel e kaso di un esposa ku tin sierto talento ku e ta usa na benefisio di su famia. Si su esposo ta humilde i modesto, lo e no sinti ku e mester ta mihó ku su esposa den tur kos. Al kontrario, e ta animá su esposa pa sigui usa su talentonan. Asina, e esposo ta demostrá ku e ta balorá i stima su esposa. (Pro. 31:10, 28; Efe. 5:28, 29) Un esposa modesto i humilde, na su turno, no ta broma ku su abilidatnan ni menospresiá su kasá pasobra e no ta mes ábil kuné. Al fin i al kabo, nan dos ta “ún karni,” i si ún ta sufri e otro tambe ta sufri.—Mat. 19:4, 5.

17. Kiko por yuda parehanan kasá awe logra un matrimonio felis ku ta duna onor na Dios?

¹⁷ Sin duda bo ke pa bo matrimonio ta manera esun di Abraham ku Sara i di Isak ku Rebeka: un matrimonio realmente felis, duradero i ku ta duna onor na Yehova. Si ta asina, mira matrimonio manera Dios ta mir’é. Akudí na su Palabra pa bo haña sabiduria i komprondementu. Kultivá amor berdadero, “e vlam” di Yehova. (Kant. 8:6) Kon bo por hasi esei? Balorá e puntonan fuerte di bo kasá. Hasi esfuerso pa bo ta humilde. Trata bo kasá ku rèspèt. Si bo hasi e kosnan akí, bo matrimonio lo hasi tantu abo komo bo Tata selestial felis. (Pro. 27:11) I e ora ei, bo por tin e mesun sintimentunan ku un ruman hòmber ku tin 27 aña kasá, kende a skirbi: “Mi no por imaginá mi un bida sin mi kasá. Tur dia nos matrimonio ta bira mas i mas fuerte. Esaki ta resultado di nos amor pa Yehova i di e echo ku ami ku mi kasá ta komuniká regularmente ku otro.”