1. Ov, kwambamb kuwamp kwadinga kwa ukwash mutapu ik mu uruw uvud?

MUKADIVAR umwing wa mu Canada walonda anch: “Nifanyidin kusutish chisu ni mukajam kupandakanamu ni muntu mukwau, musangar wawonsu mu mwom ukat kupandakan ni kusansan kwawonsu kukat kukep anch nidi nend.” Ikundj umwing udia mu Australie wafunda anch: “Mu mivu 11 yitwashakama pamwing, kwikil dichuku ap dimwing diasuta pakad kwambamb ni mukajam. Am ni ndiy twadingap ni yakamish ap wom piur pa ukash wa uruw wetu. Kwambamb kwa usey ni kwa chisu ni chisu kukat kukasikesh uruw.” Nambaz umwing udia mu Costa Rica walonda anch: “Kwambamb kuwamp kwakasikesha nakash uruw wetu; ni kwasala anch twikala piswimp ni Yehova, kwatulama ku yoziu, kwatuteka mu umwing, ni kwakudisha rukat retu.”

2. Ov, yom ik yikutwisha kurish nich kwambamb kuwamp?

² Ov, ey ni mukajey ukweting mambamb mawamp, ap chikasikening kwambamb yom yiwamp? Pakwez, kupwitijan kukutwish kwikalaku, mulong uruw utekining pamwing antu aad akad kuwanyin akweta untu kushalijan, yaku yimekeshina mashakamin ma ndond yapaminau ap mutapu wayililau. (Rom 3:23) Chikwau kand, ambay a uruw akutwish kwikal ni mitapu kushalijan ya kwambamb. Chawiy chasala anch mwin kukimbijol umwing wa milong ya uruw John M. Gottman nenday Nan Silver alondin anch: “Chifanyidin kwikal nich mushiku, kwikasikesh, ni kwikal ni manangu mulong wa kulam urund wa machuku mavud.”

3. Ov, chom ik chayikwasha ambay a uruw chakwel akasikesha uruw wau?

³ Chifanyidin kusal usu nakash chakwel uruw wikala uwamp. Pakwez mu yibudikin mudi kand musangar wakad kwisikej. Ambay a uruw ikatina umwing ni mukwau akutwish chakin kusanger mwom wau pamwing. (Mul. 9:9) Shinshikin bil uruw wa rukat wa Isak nenday Rebeka. (Dis. 24:67) Ap pashakamau pamwing mudi  ikundj ni mband, kwikil chom chamekesha anch urund wau wakepa. Chitwishikin kulond mwamu piur pa ambay a uruw nlel. Ov, mulong wak? Mulong ileja mutapu wa kupan yitongijok ni yovil kudi umwing ni mukwau nich kashinsh, nawamp, mu kukudish ni kumekesh ronganyin, rukat, kalimish kapandakena, ni kwikepish. Mudi mutufanyidina kuman katat, anch mikadil yiney yimeken mu uruw, kwambamb kukwikal kuwamp.

4, 5. Ov, mutapu ik chikutwisha chovu kuyikwash ambay a uruw chakwel ovijana umwing ni mukwau? Let yilakej.

⁴ Jinswir 16:20 jilejen anch: “Mwin kutesh ku dizu ukutan kuwap.” Chinech chidi chakin kamu kwambatan nich uruw ni mwom wa dijuku. (Tang Jinswir 24:3.) Musul uwamp nakash wa chovu ni wa manangu udi Dizu dia Nzamb. Disambishil 2:18 ditulejin anch Nzamb wamutanga mband chakwel amukwasha ikundj, kadingap chilik chimwing ni ndiy. Mudimu wend wamekana mu mutapu wend wa kwambamb. Chakin kamu, antu ashalijadin, pakwez amband asotining kwisamb piur pa yovil yau, piur pa antu, ni pa urund. Awiy akat kusanger kwambamb kwa chirungul ni kwa urund, mulong kukat kuyikasikesh anch ayikatin. Ku mutambu ukwau, amakundj avud kakatap kwisambin nakash pa yovil yau ni asotining kwisambin pa mijikit, pa milong ni pa mutapu wa kupwish milong yau ni amakundj asotining kuyilimish.

⁵ Nambaz umwing udia mu Grande-Bretagne walonda anch: “Nfumwam usotining kupwish milong swa pa ndond pa kwintesh bil, chinech chikutwish kwingovish kuyip chakin kamu, anch yawonsu nisotina yidi kwau ‘chay ni rukat.’” Ikundj umwing wafunda anch: “Pa chisu twatijana ni mukajam, nasota bil kupwish swa mulong wawonsu wadinga ni kumushiken. Kupwa, namana anch, ndiy wasota chakin kamu kwikal ni muntu umuteshina.” (Jinsw. 18:13; Jak. 1:19) Ikundj ukweta ronganyin ukat kuteshang yovil ya mukajend ni kupakish kusal yom kwambatan ni yovil yend. Pinipa, ndiy ukez kumekesh anch yitongijok ni yovil yend yidi ya usey kudi ndiy. (1 Pita 3:7) Kupwa, upakishin kutesh chitongijok chend. Anch ikundj ni mband atesh kurumburik, asanger, ni awanyish midimu yau yilejanau mu Mukand wa Nzamb, uumwing wau udi chom chimwing cha ufun. Chikwau kand, akutwish kusal pamwing mu kukwat mipak yisikena ni ya manangu.

6, 7. (a) Ov, mutapu ik chiyikwashina chany chidia mu Mulej 3:7 ambay a uruw chakwel amekesha chovu? (b) Ov, mutapu ik ukatay mband kumekesh anch ukwet manangu, ni usu ik ufanyidinay ikundj kusal?

⁶ Ambay a uruw akweta chovu ij kand anch kudi “chisu chimwing cha kunenet, kudi chisu chikwau cha kulond.” (Mul. 3:1, 7) Nambaz umwing wasal mivu dikum mu uruw walonda anch: “Katat nij anch kudi yisu yimwing yakad kufanyin kulond chom kampand, anch nfumwam ukwet mudimu ap yisend yikwau, nikat kuchingelang chakwel chisu chikemp chisuta kurutu kwa kumulej yom. Mudi chibudikin mambamb metu mading mawamp nakash.” Amband akweta chovu alondining nich ranaken, ij anch dizu diwamp “dikat kulondau pa chisu chiburedinau” didi dia usey ni disangareshina.—Tang Jinswir 25:11.

⁷ Ikundj mwin Kristu ufanyidin kusal mudimu wend mu kutesh yilondinay mukajend ni mu kwikasikesh kumekesh yovil yend patok. Mukurump umwing wasala mu uruw mivu 27 walonda anch: “Nifanyidin kwikasikesh chakwel nisambisha kumulej mukajam yidia mu muchim wam.” Mukadivar wasala mivu 24 mu uruw walonda anch: “Nikutwish kudiosh yom mu manangu, ‘anch nilondinap mulong winou, nikez kuuvuramen.’ Kupwa namana anch chidiap chijingidij cha kuziy anch namekesh yovil yam. Pinikata kwikasikesh chakwel nilonda, nikat kulembil chakwel nitana mazu mawamp ni mutapu uwamp wa kumalond. Kupwa napim bil kurutu kwa kusambish kulond.” Ndond yiwamp yidi kand ya ukwash, pamwing ap anch ambay a uruw aad ashinshikidin ayinau  verse wa dichuku ap atangin Bibil pamwing.

8. Mulong wa kutwish uruw wau, chom ik chasalau ambay amwing in Kristu?

⁸ Cha usey nakash kudi ikundj ni mband chidi malembil ni rusot rikash ra kwambamb nawamp. Cha kashinsh chidi anch chiswapelap kukarumun yaku ya pasak. Pakwez anch ambay a uruw amukatin Yehova, akat kwit spiritu wend, ni akat kuman uumwing wau mudi chom chimwing chitumbila, asadin yom yiburedinau antu avud kusal. Mband umwing ukweta mivu 26 wafunda anch: “Am ni nfumwam tukwatining chitongijok cha uruw nich usey nakash, tukwetap ap chitongijok chimwing cha kwiyauril. Chinech chasala anch tusala usu wa kupwish milong kusutil ku kwisamb pamwing.” Kushinshaman kwinoku ni kwipan kudi Nzamb kumusangareshin Nzamb ni kuletining yiyukish yivud.—Kus. 127:1.

9, 10. Ov, mutapu ik ukutwishau ambay a uruw kukasikesh rukat rau?

⁹ Rukat, “mwoj wa kukukasany mu umwing uwanyidina,” chidi chom chimwing cha usey nakash mu uruw. (Kol. 3:14) Rukat rakin riyil mu kukul pakatau ambay a uruw ashinshamena kushakam pamwing, mu musangar ni mu mar. Akutwish kwikal ap arund a piswimp ni kusanger urund wa umwing ni mukwau. Uruw mudi winou aukasikeshin, kangal kusu kusutil ku yisal yimwing yijim-yijim, mudi mukatau kulejan mu ma jurnal bwat, pakwez akat kumakasikesh kusutil ku tuyom tukemp nakash twakad kuchind mudi—kubwikatijan, dizu diwamp, chisal chiwamp, kusip nend, ap kumwipul nich muchim umwing anch “ov, wasutishang muten nchik?” Tuyom tukemp-tukemp mwamu tukutwish kukasikesh uruw. Ambay amwing a uruw ashakama mu chisambu mu uruw mu mivu 19 akat kwambamb ku telefon ap kufundilijan mazu umwing ni mukwau pa dichuku. Ikundj walonda anch: “Chading mulong wa kwijik anch ulankin.”

¹⁰ Rukat rikat kuyibachik kand ambay a uruw chakwel adandamena kwilej umwing ni mukwau. (Fil. 2:4) Kupwa, ronganyin riner rikat kukudish rukat rau ni kurikasikesh nakash chikalap nchik kuburen kuwanyin kwau. Uruw uwamp udingap wakad kuya kurutu pakwez ukat kudandamen kuwamp ni kwikal ukash dichuku ni dichuku. Chawiy lel anch udi ngatan iyipula bil amwiney anch: ‘Ov, nimwij kamu nawamp mbay nam wa uruw? Ov, niteshin kamu kurumburik kwa yovil ni yitongijok yend pa milong yiney? Ov, mutapu ik nitongina piur pa mbay nam wa uruw, nitongin pamwing ap pa ngikadil yansangaresha kudi ndiy pa kusambish?’

11. Ov, mulong wak kalimish kadi ka usey mulong wa kutwish uruw? Let chilakej.

¹¹ Ap uruw ukweta musangar nakash udingap mu umwing uwanyidina, ni ambay a uruw akatijadina kakatap kwovijan chisu chawonsu. Aburaham nenday Sara kadingap nikovijan chisu chawonsu umwing ni mukwau. (Dis. 21:9-11) Pakwez, kupwitijan kwau kwakangeshap urund wau bwat. Mulong wak? Akwatijana umwing ni mukwau nich usey ni kalimish. Chilakej, Aburaham wamuleja Sara anch “nakwilembil amboku.” (Dis. 12:11, 13) Sara ndiy wamuziyila Aburaham ni wamutazuka anch “nfumwam.” (Dis. 18:12) Anch ambay a uruw aburen kalimish umwing ni mukwau, chinech chikat kumekan mu mazu mau ap mu mutapu wau wa kulond. (Jinsw. 12:18) Anch kakatap kwambamb piur pa milong ya usey, uruw wau ukutwish kushiken ku kusheshik.—Tang Jakobu 3:7-10, 17, 18.

12. Ov, mulong wak antu atijadina katat afanyidin kusal usu chakwel akudisha mazu ma kalimish?

¹² Antu adiokila kamu pa kwatijan afanyidin kusal usu chakwel asambisha kulond mazu mawamp ni kalimish kudi umwing ni mukwau, ni kwambamb kuwamp ni kwa kashinsh. Ikundj umwing uvurikin anch: “Mivu ya kusambish ya uruw yikutwish kulet pamwing ap runeng pa ndond pa kwikal ya musangar. Piumena yovil, yaku ni maswir ma mukajey—ni ndiy waman yovil, yaku ni maswir mey—kwovijan kukutwish kwikal kukash! Pakwez, ukutwish kwovijanany nawamp anch ukwetany yitongijok yiwamp, chovil cha masip, ni mikadil ya kwikepish, kushimpish muchim, ni kumuchingejin Yehova.” Chidi chakin mud ik!

13. Ov, mulong wak kwikepish kudi kwa usey nakash mulong wa uruw uwamp ni wa musangar?

¹³ Kwambamb kuwamp mu uruw kudi mudi kawit kasutina nawamp ni mu chisambu mu chir. Kwikal “in kwitudish” kudi kwa usey nakash mu kusal anch kawit kinak kasuta nawamp. (1 Pita 3:8) Mukadivar umwing wasala mivu 11 mu uruw walonda anch: “Kwikepish kukat kusal anch chiswapala kupwish milong mulong kukat kukubachik ku kulond anch, ‘nlikishinaku.’” Mukurump umwing wasala mivu 20 nich musangar mu uruw, walonda anch: “Yisu yimwing kulond anch ‘nlikishinaku’ kudi kwa usey kupandakenamu kulond anch ‘nikukatin.’” Ndiy  walonda kand anch: “Chom chimwing chiletina swa kwikepish chidi malembil. Anch am ni mukajam twamusejin Yehova pamwing, tukat kuvurik anch tudi akad kuwanyin ni ranaken ra Nzamb. Kuvurik yom yiney kukat kwinkwash chakwel nishinshikina yom mu mutapu uwamp.”

14. Ov, chibud chikutwish kuyipish uruw mutapu ik?

¹⁴ Pakwez, chibud chikutwishap kupwish mulong. Chikat kukangesh kwambamb mulong chikat kudiosh rusot ni mushiku wa kulikishin. Pa ndond pa kulond nich kwitudish anch, “Nlikishinaku amboku,” chibud chikat kumubachik muntu ku kwiyingish. Pa ndond pa kwitiyij uyimp wend, ndiy umen uyimp wa muntu mukwau. Anch wov ujim, pa ndond pa kukimb chisambu, ndiy ukat kwiyingish, pamwing ap nich mazu mayimp ap ku kuninet zoong. (Mul. 7:9) Mwaning, chibud chikutwish kuyipish uruw. Chiwapidil kuvurik anch “Nzamb ukat kuyipompat in kwibaz, pakwez ukat kuyanaken in kwitudish.”—Jak. 4:6.

15. Rumburil mutapu kukutwisha kusadil chany chidia mu Efes 4:26, 27 kuyikwash ambay a uruw chakwel apwisha kupwitijan kulankina pakach pau.

¹⁵ Chakin kamu, chikutwish kwikal cha usup kutongijokin anch chibud chikezap kwikalaku. Tufanyidin kwitiyij anch chikutwish kwikalaku ni kurish nich swa. Paul wayileja ambay nend in Kristu anch: “Kangal wajingany nich ujim dichuku diakabuj. Kangal wamushilany Sakudimban chisu.” (Efes 4:26, 27) Kukangany kutesh Dizu dia Nzamb kukutwish kulet mar ma chamwamu. Nambaz umwing winana anch: “Chisu chimwing, am ni nfumwam twasadilap Efes 4:26, 27, mudi chibudikin nakanganya kulal nawamp uchuku wakabuj!” Chiwapin mudi ik kwisambin milong kurutu nich rutong ra kwovijan! Pakwez, ambay a uruw aswiridin kwitekin umwing ni mukwau chisu cha kuninet. Chiwapidil kand kumwit Yehova ukwash chakwel twikala nich yitongijok yiwamp. Chinech chitin kwikal nich muchim wa kwikepish, ukeza kukukwash chakwel ushinshikina pa mulong, pakad kwishinshikin amwiney, ni kusal anch upandikesha milong.—Tang Kolosay 3:12, 13.

16. Ov, mutapu ik ukutwisha kwikepish kuyikwash ambay a uruw kuman ukaliweny wau mu mutapu uwamp?

¹⁶ Kwikepish ni kwitudish kukat kumukwash mbay wa uruw chakwel ashinshikina pa ukaliweny wa mbay nend wa uruw. Chilakej: Mband ukutwish kwikal nich ukaliweny wa pakampwil ukutwishay kusadil mulong wa kupan ukwash ku dijuku. Anch nfumwend udi mwin kwikepish ni kwitudish, ndiy kakezap kov kuyip mulong wendendiy pakwez ukez kumukasikesh chakwel asadila ukaliweny wend, ni kumekesh anch umukwatin nich usey ni umukatishin. (Jinsw. 31:10, 28; Efes 5:28, 29) Pa chisu chawiy chimwing, mband wikepishina ni witudishina kakezap kumekesh patok ukaliweny wend ap kumuswingish nfumwend. Pakwez, awonsu aad adi “mujimbu umwing,” ni chimovishina umwing kuyip chikumovish kand mukwau.—Mat. 19:4, 5.

17. Ov, chom ik chikutwisha nlel kukwash uruw chakwel wikala nich musangar ni kumushiman Nzamb?

¹⁷ Chimeken chakin kamu anch usotin anch uruw wey wikala mudi wa Aburaham nenday Sara ap wa Isak nenday Rebeka—wa musangar wakin, ulabina, ni ukata kumushiman Yehova. Anch chidi mwamu, lamat ku chitongijok cha Nzamb piur pa uruw. Kimb chovu ni manangu. Kudish rukat rakin—‘kasu ka Yah’—mu kutongijokin nawamp piur pa mbay ney wa uruw. (Muminy 8:6) Ikasikesha chakwel ukudisha kwikepish. Musadila mbay ney nich kalimish. Anch wasal mwamu, uruw wey ukez kukusangaresh ni kumusangaresh Tatukwey wa mwiur. (Jinsw. 27:11) Chikwau kand, yovil yey yikutwish kwikal mudi ya ikundj ukweta mivu 27, wafunda anch: “Nikutwishap kutongijok mutapu wela kwikal mwom pakad mukajam. Uruw wetu udandamedin kwikal ukash dichuku ni dichuku. Chinech chidi mulong wa rukat retu ra Yehova ni kwambamb pakad kujing umwing ni mukwau.”