Amuyumye Cikwati Canu Kwiinda Mukubandika Kabotu
Amuyumye Cikwati Canu Kwiinda Mukubandika Kabotu
“Mbuli micelo yangolida mucisuwo cansiliva, mbwaabede majwi aambwa kuciindi ceelede.”—TUS. 25:11.
INO INGA MWAINGULA BUTI?
Mbuti kumvwisya mbokukonzya kupa kuti kube kubandika kubotu mucikwati?
Nkaambo nzi banabukwetene ncobeelede kutondezya bulemu kuli umwi amweenzinyina?
Mbuti kulicesya mbokukonzya kucijatikizya cikwati?
1. Mbuti kubandika kabotu mbokwabagwasya aabo bali muzikwati?
MUKWESU umwi ku Canada wakaamba kuti: “Inga ndasala buyo kuba abakaintu bangu kwiinda kuba amuntu uumbi. Nkaambo ciindi nondili abakaintu bangu, lukkomano lwangu lulayungizyika alimwi cilaubauba kulwana mapenzi aangu ciindi nondibandika ambabo.” Mulumi umwi ku Australia wakalemba kuti: “Mumyaka iili 11 njotwakkala mucikwati, taakwe buzuba bwakainda kakunyina kwaambauzyanya abakaintu bangu. Mebo abakaintu bangu kunyina citulibilisya kujatikizya cikwati cesu. Icapa kuti zyintu zibe boobu, nkubandika lyoonse.” Mucizyi umwi ku Costa Rica wakaamba kuti: “Kubandika kabotu kwayumya cikwati cesu, kwapa kuti tuswene kuli Jehova, kwatukwabilila kumasunko, kwatukamantanya alimwi kwapa kuti luyando lwesu lukomene.”
2. Ncinzi cikonzya kupa kuti bantu kabatabandiki kabotu?
2 Sena nywebo angomukwetene limwi mulakkomana kubandika kabotu, naa mujisi buyumuyumu kubandika kabotu? Masimpe, mulakonzya kuba abuyumuyumu, nkaambo cikwati ciswaanganya bantu bobilo batalondokede alimwi ibajisi bube azilengwa ziindene alimwi ibakakomezyegwa munzila ziindene. (Lom. 3:23) Kuyungizya waawo, banabukwetene inga kabaindene mbobabandika. Nkakaambo kaako basikuvwuntauzya zikwati ba John M. Gottman alimwi aba Nan Silver bakaamba kuti: “Kuyandika kuba sicamba, kuba amakanze alimwi akubeleka canguzu kutegwa banabukwetene bazumanane mucikwati cabo.”
3. Ncinzi cagwasya banabukwetene kuyumya cikwati cabo?
3 Kutegwa cikwati cizwidilile, kuyandika kubeleka canguzu kapati. Zyintu ziboola akaambo kakucita boobo zilabikkilizya alukkomano. Banabukwetene ibayandana balakonzya kukkomana ncobeni mubuumi bwabo. (Muk. 9:9) Atulange-lange cikwati caluyando ca Izaka a Rabeka. (Matl. 24:67) Nokuba kuti bakalikwetene kwaciindi cilamfwu, taakwe citondezya kuti bakaleka kuyandana. Oobo mbocibede akubanabukwetene banji mazuba aano. Ino ncinzi cibagwasya? Ciindi nobabandika angobakwetene limwi baiya kwaamba mizeezo yabo alimwi ambobalimvwa munzila yaluzyalo kwiinda mukutondezya kumvwisya, luyando, bulemu alimwi akulicesya. Mbubwenya mbotutiibone, kuti bube oobu buyandika kabuliko mucikwati, banabukwetene inga kababandika lyoonse.
AMUTONDEZYE KUMVWISYA
4, 5. Mbuti kumvwisya mbokukonzya kugwasya banabukwetene kutegwa kabeendelana? Amupe cikozyanyo.
4 Lugwalo lwa Tusimpi 16:20 lwaamba kuti: ‘Ooyo uumvwisya makani ulajana coolwe, ayooyo uusyoma Jehova uli acoolwe.’ Aaya makani ngamasimpe kujatikizya cikwati alimwi abuumi bwamumukwasyi. (Amubale Tusimpi 24:3.) Kasensa kakumvwisya alimwi abusongo ikainda zyoonse ndi Jwi lya Leza. Lugwalo lwa Matalikilo 2:18 lutwaambila kuti Leza wakalenga mukaintu kutegwa abe sikugwasyilizya mwaalumi. Mukuli ngwajisi mukaintu ulabonwa munzila njabandika amulumaakwe. Mubwini bantu baliindene, pele kanji-kanji bamakaintu balayanda kubandika kujatikizya mbobalimvwa, bantu alimwi azilongwe. Balakkomana kubandika cakulikwaya nkaambo kucita boobo cibapa kulimvwa kuti balayandwa. Kulubazu lumwi, bamaalumi banji tabayandi kwaamba mbobalimvwa alimwi kanji-kanji balalangilwa kubandika zyintu zicitika, mapenzi alimwi ambobakonzya kwaamana. Alimwi bamaalumi bayanda kulemekwa.
5 Mucizyi umwi ku Britain wakaamba kuti: “Balumi bangu balayanda kumana mapenzi cakufwambaana muciindi cakuswiilila mbondilimvwa.” Mucizyi ooyu wakapandulula kuti eeci cilakonzya kutyompya kapati, nkaambo ncayanda buyo walo, muntu uuswiilila akubikkila maano mbwalimvwa. Mulumi wakalemba kuti: “Ciindi notwakakwatana abakaintu bangu, ndakajisi cilengwa cakuyanda kumanizya mapenzi ngobakajisi cakufwambaana. Nokuba boobo, kakutanainda ciindi ndakazyiba kuti ncobakali kuyanda kapati nkubaswiilila.” (Tus. 18:13; Jak. 1:19) Mulumi uumvwisya ulabikkila maano mbwalimvwa mukaakwe alimwi ulasola kubandika anguwe munzila yeelede. Aciindi nciconya eeco, ulasola kumutondezya kuti nzyaamba alimwi ambwalimvwa zilayandika kapati kulinguwe. (1 Pe. 3:7) Mpoonya awalo mukaintu ulasoleka kumvwisya nzyaamba mulumaakwe. Ciindi mulumi amukaintu nobamvwisya, kulumba ncaacita mweenzinyina, alimwi akuzuzikizya mikuli yabo yamu Magwalo, kukamantana kwabo kulakkomanisya kapati. Kuyungizya waawo, balakonzya kubelekela antoomwe mukusala alimwi akucita zyintu nzyobasala cabusongo.
6, 7. (a) Mbuti njiisyo iijanika mulugwalo lwa Mukambausi 3:7 mboikonzya kugwasya banabukwetene kutondezya kumvwisya? (b) Mbuti mukaintu mbwakonzya kutondezya bupampu, alimwi ino mulumi weelede kusoleka kucita nzi?
6 Alimwi banabukwetene ibamvwisya balizyi kuti kuli “ciindi cakuumuna aciindi cakwaamba.” (Muk. 3:1, 7) Mucizyi uuli mucikwati lino kwamyaka iili 10, waamba kuti: “Lino ndilizyi kuti kuli ziindi zimwi nokuteeleli kubandika twaambo tumwi. Ikuti balumi bangu kabajisi bubi kubeleka mulimo naa mikuli iimwi, ndilaleka kuti kwiinde ciindi cisyoonto kanditanabandika ambabo makani amwi. Eeci cipa kuti katubandika munzila iili kabotu.” Bamakaintu ibalaabupampu abalo balaambaula munzila iili kabotu, kabazyi kuti majwi aasalwa kabotu alimwi “aambwa kuciindi ceelede” mabotu alimwi alakonzya kulumbwa.—Amubale Tusimpi 25:11.
7 Mulumi Munakristo weelede kucita lubazu lwakwe kutali buyo kwiinda mukuswiilila nzyobaamba bakaintu bakwe pele kwiinda mukusoleka kwaambaula abakaintu bakwe kujatikizya mbwalimvwa munzila iilimvwisya. Imwaalu uuli mucikwati kwamyaka iili 27, waamba kuti: “Ndeelede kwiiya kwaambila bakaintu bangu zili mumoyo.” Mukwesu uuli mucikwati kwamyaka iili 24, waamba kuti: “Ndilasisa kwaamba zyintu zimwi, kandiyeeya kuti, ‘Izyintu eezyi zilakonzya kumana kakunyina kuzibandika.’ Pele lino ndazyiba kuti kwaamba mbondilimvwa tacaambi kuti tandili musankwa. Ciindi nondijana buyumuyumu ikwaamba mbondilimvwa, ndilapaila kutegwa ndibelesye majwi mabotu alimwi akwaamba munzila iili kabotu. Kumane ndilaswa ciya akutalika kwaambaula.” Icimwi cikonzya kugwasya mbukkale buli kabotu, ambweni ciindi banabukwetene nobalingaula lugwalo lwabuzuba oobo naa nobabala Bbaibbele antoomwe.
8. Ino nkukulwaizyigwa kumbi kuli nkobajisi banabukwetene Banakristo ikupa kuti cikwati cabo cizwidilile?
8 Iciyandika kapati kumulumi alimwi akumukaintu mupailo alimwi aluyandisisyo lwakuyanda kucizyiba kubandika kabotu. Masimpe ngakuti, cilakonzya kukatazya kucinca mbotwakali kwaambaula kaindi. Pele kuti banabukwetene kabamuyanda Jehova, akulomba muuya wakwe alimwi akubona cikwati cabo kuti cilisetekene, banoojisi cintu cibakulwaizya calo bantu banji ncobatajisi. Mukaintu iwakwetwe kwamyaka iili 26, wakalemba kuti: “Mebo abalumi bangu cikwati cesu tucibona mbwacibona Jehova kuti cilayandika kapati, aboobo tatuyeeyi kwaandana. Eeci cipa kuti katubeleka canguzu kumana mapenzi kwiinda mukwaabandika.” Kusyomeka alimwi akubelekela Leza cakulyaaba kuli boobu kulamukkomanisya Leza alimwi kuletela zilongezyo zinji.—Int. 127:1.
AMUKOMENE MUKUTONDEZYANYA LUYANDO
9, 10. Muunzila nzi banabukwetene mobakonzya kuyumya caanzyo cabo caluyando?
9 Luyando, “caanzyo calukamantano cilondokede,” mbube buyandika kapati mucikwati. (Kol. 3:14) Luyando lwini-lwini lulakomena ciindi banabukwetene basyomeka nobazumanana kukkala antoomwe, ciindi nobakkomene anobajisi buyumuyumu. Cilongwe cabo cilayuma kapati alimwi balakkomana kuba antoomwe. Zikwati zili boobu zilazwidilila ikutali akaambo kazyintu zibotu zisyoonto nzyobacita, mbuli mbozitondezyegwa mucipekupeku, pele akaambo katuntu tusyoonto-syoonto tunji ntobacitilana, tuntu mbuli kwaanzyanya kwiinda mukukumbatana, majwi mabotu, kumwetamweta, naa kwaanzya mweenzinyina kuzwa ansi aamoyo kuti “mwalibizya buti?” Ootu tuntu tusyoonto-syoonto tulakonzya kuyumya cikwati. Banabukwetene bamwi ibakwetene kwamyaka iili 19 lino, balatuminana fooni naa kulembelana tugwalo twaafooni. Kujatikizya ncacitila boobu mulumi waamba kuti, “kutegwa ndizyibe kuti naa zyintu zibeendela buti.”
10 Luyando alwalo lulabakulwaizya banabukwetene kuzumanana kuzyibana kabotu. (Flp. 2:4) Aboobo, kuzyibana kuli boobu kupa kuti luyando luyumizyigwe nokuba kuti tabalondokede. Cikwati cizwidilila cilazumanana kukomena akuyuma mukuya kwaciindi. Ikuti naa mulikwete naa kukwatwa, amulibuzye kuti: ‘Ino ndimuzyi kabotu buti ngotukwetene limwi? Sena ndilizyi mbwalimvwa naa mbwayeeya mutwaambo? Sena kanji-kanji ndilamuyeeya ngotukwetene limwi, alimwi akuyeeya bube bwakwe bubotu ibwakapa kuti mebo andibotele ciindi cakusaanguna?’
KAMULEMEKANA
11. Nkaambo nzi bulemu ncobuyandika kutegwa cikwati cizwidilile? Amupe cikozyanyo.
11 Nokuba kuti banabukwetene inga kabakkomene, cikwati cabo tacilondokede, alimwi buya nobaba banabukwetene bayandana talili lyoonse nobazuminana muzyintu zyoonse. Ba Abrahamu a Sara talili lyoonse nobakali kuzuminana muzyintu. (Matl. 21:9-11) Nokuba boobo, kutazuminana muzyintu tiikwakapa kuti baleke kumvwana. Nkaambo nzi? Bakali kulemekana kapati. Mucikozyanyo, Abrahamu wakali kwaambila Sara kuti: ‘Akaka.’ (Matl. 12:11, 13) Awalo Sara wakali kumumvwida Abrahamu alimwi wakali kumubona kuti ‘ngusimalelaakwe.’ (Matl. 18:12) Ikuti banabukwetene kabatalemekani, kanji-kanji eeci cilalibonya muŋambawido yabo naa ijwi mbolimvwika. (Tus. 12:18) Ikuti kaambo keni ikaleta penzi tiibakabandika, cikwati cabo cilakonzya kuba muntenda.—Amubale Jakobo 3:7-10, 17, 18.
12. Nkaambo nzi banabukwetene bapya ncobeelede kubeleka canguzu kutegwa kabalemekana muŋambawido?
12 Banabukwetene bapya beelede kubeleka canguzu kutegwa kababandika munzila yabulongwe alimwi yabulemu, calo cikonzya kupa kuti kabaambauzyanya cakulikwaya alimwi kuzwa ansi aamoyo. Mulumi umwi wakaamba kuti: “Nokuba kuti myaka yakusaanguna mucikwati ilakkomanisya, zimwi ziindi ilakonzya kutyompya. Ciindi nomuyanda kuzyiba mukaintu wanu mbwalimvwa, zyintu nzyayandisya alimwi azyintu nzyayandika—alimwi awalo kumuzyiba kabotu nywebo—zyintu zilakonzya kukatazya. Pele zyintu zilakonzya kumweendela kabotu ikuti nyoonse nyobilo kamuzilanga kabotu zyintu, kamusangalizya, alimwi kamujisi bube bugwasya mbuli kulicesya, kukkazyika moyo alimwi akusyoma muli Jehova.” Aaya masimpe!
AMUTONDEZYE KULICESYA KWINI-KWINI
13. Nkaambo nzi kulicesya ncokuyandika kapati kutegwa mucikwati mube lukkomano?
13 Kwaambauzyanya kabotu mucikwati kuli mbuli meenda mukalonga aakunka asyoonto-syoonto alimwi caluumuno mugaadeni. ‘Kulicesya’ kulayandika kutegwa kwaambauzyanya kabotu kuzumanane mucikwati. (1 Pe. 3:8) Mukwesu umwi uukwete lino kwamyaka iili 11, waamba kuti: “Kulicesya njenzila mfwaafwi yakumanizya mazwanga nkaambo kukulwaizya kwaamba kuti, ‘Amundijatile.’” Mwaalu uukkomene mucikwati kwamyaka iili 20 lino, waamba kuti: “Zimwi ziindi majwi aakuti ‘Amundijatile’ alayandika kapati kwiinda majwi aakuti ‘ndilakuyanda.’” Wakayungizya akwaamba kuti: “Nzila imwi iigwasya kutegwa katulicesya, mupailo. Mebo abakaintu bangu notupaila antoomwe, tulayeezyegwa luzyalo lwa Leza alimwi akuti tatulondokede. Ciyeekezyo eeci cilandigwasya kucita zyintu munzila yeelede.”
14. Mbuti kulisumpula mbokukonzya kunyonganya cikwati?
14 Kulubazu lumwi, kulisumpula takumani mazwanga. Kupa kuti kubandika kukatazye nkaambo takukulwaizyi kulilekelela. Muciindi cakwaamba cakulibombya kuti, “Akaka amundijatile; ndalubizya,” muntu uulisumpula ulajana cilitamizyo. Muciindi cakuzumina kuti walubizya, walo waamba buyo bubi buli mumweenzinyina. Ciindi naabisizyigwa, muciindi cakuyandaula luumuno, walo ulanyema, ambweni akupilusya kabelesya majwi mabi naa kutayanda buya kwaambaula amuntu. (Muk. 7:9) Masimpe, kulisumpula kulakonzya kunyonganya cikwati. Cili kabotu kuyeeya kuti “Leza ulabakazya ibalisumpula, pele ulabafwida luzyalo aabo ibalicesya.”—Jak. 4:6.
15. Amupandulule kubelesya njiisyo iijanika mulugwalo lwa Baefeso 4:26, 27 mbokukonzya kugwasya banabukwetene kumana mazwanga aakonzya kubako akati kabo?
15 Masimpe ngakuti, taciluzi kuyeeya kuti muntu takonzyi kulisumpula. Ikuti kulisumpula kwatalika kulibonya, tweelede kufwambaana kubweza ntaamu. Paulo wakaambila Banakristonyina kuti: “Mutabbizyi zuba kamunyemede pe, mutamupi coolwe Diabolosi.” (Ef. 4:26, 27) Kwaalilwa kutobela ncolyaamba Jwi lya Leza kulakonzya kuleta mapenzi. Mucizyi umwi wakaamba kuti: “Zimwi ziindi mebo abalumi bangu tatutobeli ncolwaamba lugwalo lwa Baefeso 4:26, 27. Icitobela ncakuti tatooni kabotu masiku.” Eelo kaka ncibotu kwaabandika makani cakufwambaana kamujisi makanze aakumanizya mazwanga! Nokuba boobo, banabukwetene beelede kupana ciindi cisyoonto kutegwa myoyo yabo ikkalikane. Alimwi cileelela kupailila lugwasyo kuzwa kuli Jehova kutegwa katuyeeya munzila iili kabotu. Eeci cilabikkilizya akuba amuuya wakulicesya, walo uuyakumugwasya kubikkila maano kupenzi kutali kulindinywe nobeni, ikuti tiimwacita oobo zyintu inga zyaindila kubija.—Amubale Bakolose 3:12, 13.
16. Mbuti kulicesya mbokukonzya kugwasya banabukwetene kuzibona munzila iili kabotu zyintu nzyacita kabotu ooyo ngobakwetene limwi?
16 Kulicesya alimwi akulibombya kulagwasya kumuntu uukwete naa uukwetwe kubikkila maano kuzyintu nzyacita kabotu ngobakwetene limwi. Mucikozyanyo: Mukaintu ulakonzya kuti kajisi luzyibo lumwi lwaalubazu ndwabelesya kutegwa mukwasyi ugwasyigwe. Ikuti mulumaakwe kalicesya akulibombya, takonzyi kulimvwa kuti ulaindwa amukaintu, pele uyakumukulwaizya kubelesya luzyibo lwakwe, kwiinda mukucita boobo ulatondezya kuti ulamubikkila maano alimwi ulamuyanda. (Tus. 31:10, 28; Ef. 5:28, 29) Kulubazu lumwi, akaambo kazyintu nzyacita kabotu, mukaintu uulicesya alimwi uulibombya takalisumpuli naa kunyansya mulumaakwe. Kayi bobilo aaba “mubili omwe,” alimwi buya citakkomanisyi umwi inga tiicamukkomanisya awalo mweenzinyina.—Mt. 19:4, 5.
17. Ncinzi cikonzya kugwasya banabukwetene mazuba aano kukkomana alimwi akutembaula Leza?
17 Cakutadooneka muyanda kuti cikwati canu cibe mbuli ca Abrahamu a Sara naa ca Izaka a Rabeka—calukkomano, cikkalilila, alimwi cipa kuti Jehova atembaulwe. Ikuti mbomuyanda oobo, amukakatile kunzila iitondezya mbwacibona cikwati Leza. Amulangile ku Jwi lyakwe kutegwa mube akumvwisya alimwi abusongo. Amubikkile maano kubube bubotu mbwajisi ooyo ngomukwetene limwi kutegwa luyando lwanu lukomene. (Lwi. 8:6) Amubeleke canguzu kutegwa kamulicesya. Amumulemeke ngomukwetene limwi. Ikuti mwazicita zyintu eezyi, cikwati canu ciyakumupa kukkomana alimwi akukkomanisya Uso wanu wakujulu. (Tus. 27:11) Masimpe, mulakonzya kulimvwa mbubwenya mbwaakalimvwa mulumi uukwete lino kwamyaka iili 27, iwakalemba kuti: “Ccita naa inga ndapona buti kakunyina bakaintu bangu. Cikwati cesu ciyaabuyuma buzuba aabuzuba. Cili boobo akaambo kakuti tulamuyanda Jehova alimwi tulabandika lyoonse.”
[Mibuzyo yaciiyo]
[Cifwanikiso icili apeeji 14]
[Zifwanikiso izili apeeji 16]
Tuntu tusyoonto-syoonto tulakonzya kuyumya cikwati
[Cifwanikiso icili apeeji 17]
Amuzumanane kubandika kabotu mucikwati canu
