Paran ek zanfan, kominik avek lanmour

“Tou dimoun i devre pare pou ekoute, me pran letan avan koze, avan pran lakoler.”​—ZAK 1:19.

KI OU POU REPONN?

Akoz i enportan pour servi byen nou letan pour kominike?

Ki mannyer bann paran i kapab aplik Zak 1:19?

Ki mannyer bann zanfan i kapab aplik Zak 1:19?

1, 2. Ki santiman paran ek zanfan i normalman annan pour kanmarad, me ki serten difikilte zot souvan rankontre?

“SI OU ti aprann ki ou paran pe al mor demen, ki ou ti pou pli anvi dir zot ozordi?” Sa kestyon ti ganny demande avek plizyer santenn zanfan Leta-z-ini. Olye konsantre lo problenm oubyen dezakor ki ti kapab pe fatig zot, sa liv ki annan pour tit For Parents Only, ki’n ganny ekrir par Shaunti Feldhahn ek Lisa Rice i fer resorti ki apepre 95 poursan ti dir ki zot ti pou dir zot paran: “Eskiz mwan” e “Mon kontan ou en kantite.”

² Normalman, zanfan i kontan zot paran e paran i kontan zot zanfan. Sa i sirtou le ka dan bann fanmir Kretyen. Kantmenm paran ek zanfan i vreman anvi vin pli pros avek kanmarad, parfwa zot vwar li difisil pour kominike. Akoz paran ek zanfan i evite koz lo serten topik menm si zot annan en bon kominikasyon e koz fran avek kanmarad? Ki serten baryer ki anpes annan en bon kominikasyon? Ki mannyer zot kapab sirmont sa difikilte?

“SERVI BYEN” LETAN POUR KOMINIKE

3. (a) Akoz bon kominikasyon i en defi pour en kantite fanmir? (b) Akoz i pa ti en problenm pour bann fanmir Izraelit pas letan ansanm?

³ En kantite fanmir i vwar li difisil pour trouv sifizaman letan pour fer bann bon konversasyon. Sa pa’n touzour le ka. Moiz ti dir bann papa Izraelit: “Ou bezwen fer [parol Bondye] antre dan ou garson e koz lo la ler ou pe asize dan ou lakaz, ler ou pe marse lo semen, ler ou pe alonze e ler ou leve.” (Det. 6:6, 7) Zanfan ti pas letan swa avek zot manman kot lakour ouswa avek zot papa dan plantasyon oubyen son landrwa travay. Paran ek zanfan ti annan bokou letan pour pas ansanm e pour koze. I pour sa rezon ki i ti  posib pour bann paran Izraelit konn bezwen, dezir ek personnalite zot zanfan. Pareyman, i ti annan ase letan ek loportinite pour bann zanfan konn zot paran byen.

4. Akoz i difisil pour en fanmir ozordi annan en bon kominikasyon?

⁴ Pa i vreman diferan ozordi! Dan serten pei, bann zanfan i konmans al lekol byen boner, parfwa zot annan zis de-z-an. I annan en kantite papa ek manman ki travay lwen avek zot lakour. Sa ptigin letan ki paran ek zanfan i ansanm, souvan konpiter, televizyon oubyen lezot keksoz elektronik i anpes zot kominike. Dan bokou ka, zanfan ek paran i viv sakenn pour li, konmsi zot pa konn kanmarad. Apenn si zot fer en bon konversasyon.

5, 6. Ki mannyer serten paran i “servi byen” sa letan ki zot annan pour pas plis letan avek zot zanfan?

⁵ Eski ou kapab “servi byen” sa letan ki ou pase pour fer lezot keksoz pour pas plis letan avek ou fanmir? (Lir Efezyen 5:15, 16.) Serten fanmir i dakor pour limit lakantite letan ki zot pase pour get televizyon oubyen servi konpiter. Lezot i esey fer zefor pour pran omwen en repa ansanm sak zour. Pa laranzman ladorasyon fanmir i en bon loportinite pour paran ek zanfan vin pli pros avek kanmarad e pour diskit lo bann size spirityel trankilman ansanm! Si ou met dekote enn erdtan sak semenn pour ladorasyon fanmir sa i en bon konmansman, me pour arive annan bann bon konversasyon ou bezwen fer plis ki sa. Sanmenm sa rezon ou bezwen kominik plis e regilyerman. Avan ki ou zanfan i al lekol, dir li en keksoz ankourazan, diskit teks pour lazournen, oubyen priy ansanm avek li. Si ou fer sa, i kapab ki ou pou ed ou zanfan pas en pli bon lazournen.

⁶ Serten paran in kapab fer serten sanzman dan zot lavi pour kapab pas plis letan avek zot zanfan. Par egzanp, Laura, * en manman ki annan de pti manrmay, ti kit en louvraz a plen tan  pour kapab fer sa. I ti dir: “Dan bomaten nou tou nou ti pe depese pour al travay oubyen lekol. Kan mon ti retourn kot lakour aswar, sa nennenn ti’n fini fer manrmay dormi. Lefet ki mon ti kit sa travay, nou ti bezwen viv avek mwens larzan, me mon santi ki mon konn pli byen problenm e sa ki pe pase dan lespri mon bann zanfan. Mon ekout sa ki zot dir dan lapriyer e mon kapab gid, ankouraz e ansenny zot.”

‘PARE POUR EKOUTE’

7. Ki konplent paran ek zanfan i fer?

⁷ Apre ki i ti entervyou en kantite zenn, loter sa liv For Parents Only ti remark en lot baryer ki anpes annan bon kominikasyon. Sa de ekriven i dir: “Premye keksoz ki sa bann zenn ti konplent konsernan zot paran ti, ‘Zot pa ekoute.’” Nou pa kapab blanm zis bann paran akoz zot osi zot souvan konplent ki zot zanfan pa ekoute. Pour gard sa bon kominikasyon, sak manm fanmir i bezwen vreman ekout kanmarad.​—Lir Zak 1:19.

8. Ki mannyer paran i kapab vreman ekout son zanfan?

⁸ Paran, eski ou vreman ekout ou zanfan? I kapab difisil pour fer sa sirtou ler ou fatige oubyen sa konversasyon pa paret enportan. Me petet sa ki pa paret enportan pour ou, i enportan pour ou zanfan. Kan nou dir ki en paran i “pare pou[r] ekoute” sa i vedir ki i pa zis enterese avek sa ki sa zanfan i dir me i bezwen osi enterese avek sa ki sa zanfan i santi. Ton lavwa ek zes ki sa zanfan i fer i kapab ed bann paran pour konpran pli byen ki mannyer sa zanfan i santi konsernan sa size ki i pe koz lo la. I osi enportan pour demann kestyon. “Panse en dimoun i parey delo dan en pwi profon, me sa enn ki annan bon zizman i kapab retir li.” (Prov. 20:5, Today’s English Version) Pour arive fer bann zanfan koz lo bann topik ki zot vwar difisil pour aborde i enportan ki paran i servi bon zizman ek disernman.

9. Akoz zanfan i devret ekout zot paran?

⁹ Zanfan eski ou obeir ou paran? Parol Bondye i dir: “Mon garson, ekout disiplin ou papa e pa abandonn lalwa ou manman.” (Prov. 1:8) Zanfan, pa oubliye, ou paran i kontan ou e i annan ou lentere aker, alor i saz pour ekout e obeir zot. (Efe. 6:1) I pli fasil pour obeir kan i annan en bon kominikasyon e ler ou konnen ki ou paran i kontan ou. Dir ou paran ki mannyer ou santi. Sa pou ed zot konpran ou. Byensir, ou osi ou devret esey konpran zot.

10. Ki nou aprann avek sa resi Labib lo Reabam?

¹⁰ Kot i konsern ekout konsey lezot zenn ki menm laz avek ou, fodre fer byen atansyon. Zot kapab dir ou sa ki ou anvi tande, me zot konsey pa pou ed ou ditou. Anfet, zot menm kapab fer ou ditor. Lefet ki zot napa lasazes ek leksperyans ki en dimoun ki pli aze i annan, laplipar zenn pa get keksoz lwen e akoz sa, zot pa konnen ki konsekans serten aksyon i kapab anmennen plitar. Mazin legzanp Reabam, garson Lerwa Salomon. Kan i ti vin lerwa Izrael, i ti pou’n saz si i ti swiv konsey bann zonm aze. O kontrer, i ti swiv konsey bann zenn ki i ti’n grandi avek. Alor i ti perdi sipor laplipar sitwayen son Rwayonm. (1 Rwa. 12:1-17) Olye imit move latitid Reabam, fer tou sa ki ou kapab pour gard en bon kominikasyon avek ou paran. Koz avek zot lo sa ki ou panse. Swiv konsey ki zot donn ou e aprann pour vin saz parey zot.​—Prov. 13:20.

11. Kwa ki kapab arive si paran pa abordab?

¹¹ Paran si ou pa anvi ou zanfan i rod konsey avek zot bann kanmarad, ou  devret en dimoun abordab ki fasil pour koz avek. En ser adolesan ti ekrir: “Desito ki mon nonm non en garson, mon paran i mal alez. Sa i fer mwan mal alez osi e mon ezite pour kontinyen koz avek zot.” En lot ser ti ekrir: “En kantite zenn i anvi ganny konsey avek zot paran, me si zot paran pa pran zot o serye, sa bann zanfan pou al rod konsey kot en lot dimoun ki mwen eksperyanse.” Si ou pare pour ekout ou zanfan e konpran zot lo nenport topik ki zot anvi koz lo la, ou pou vwar ki zot pou alez pour eksprim zot santiman avek ou e zot pou pare pour swiv ou gidans.

“PRAN LETAN AVAN KOZE”

12. Ki mannyer reaksyon paran i kapab vin en lobstak pour kominik avek zot zanfan?

¹² Kan paran pa kontrol zot lemosyon e azir dan en fason negatif akoz sa ki zot zanfan in dir zot, sa osi i en baryer ki anpes annan en bon kominikasyon. I normal pour bann paran Kretyen anvi protez zot zanfan. Dan sa bann “dernyen zour” i annan bokou danze spirityel ek lezot ankor. (2 Tim. 3:1-5) Me, sa ki paran i konsider konman en proteksyon i pa neseserman le ka pour zot zanfan.

13. Akoz paran i bezwen veye ki zot pa taye pour eksprim zot lopinyon?

¹³ Bann paran ki saz pa taye pour eksprim zot lopinyon. I vre ki i pa touzour fasil pour reste trankil kan zanfan i dir ou en keksoz ki fer ou enkyet, me i enportan pour ekout atantivman avan reponn. Salomon, en lerwa byen saz ti ekrir: “Kan en dimoun pe reponn konsernan en size avan ki i’n ekoute, sa i en enbesilite lo son par e i en imilyasyon pour li.” (Prov. 18:13) Si ou reste kalm ou pou konn plis e ou zanfan pou kontinyen eksprim li. Pour kapab arive ed li ou bezwen tann tou sa ki i annan pour dir. I kapab koz “an bonnavini,” e sa i petet en siny ki i konfize. (Zob 6:1-3) Konman bann paran ki kontan ou zanfan, servi ou zorey pour konpran e ou lalang pour geri.

14. Akoz zanfan i bezwen pran letan avan koze?

¹⁴ Zanfan, ou osi ou bezwen “pran letan avan koze,” pa taye pour eksprim ou mekontantman kan ou paran i dir ou en keksoz, akoz devan Bondye se zot ki annan sa responsabilite pour elve ou. (Prov. 22:6) I kapab ki zot in eksperyans sa menm sityasyon ki ou pe fer fas avek. Deplis, zot regret fot ki zot in fer ler zot ti ankor zenn e vreman anvi protez ou pour ki ou pa komet menm lerer. Alor, pa konsider ou paran konman ou opozan, me konman ou zanmi, pa konsider li konman ou lennmi me konman ou konseye. (Lir Proverb 1:5. *) “Respekte [ou] papa ek [ou] manman” e montre zot ki ou kontan zot parey zot kontan ou. Sa pou fer li pli fasil pour zot ‘elve ou dan en ledikasyon ek lenstriksyon Senyer.’​—Efe. 6:2, 4.

“PRAN LETAN . . . AVAN PRAN LAKOLER”

15. Kwa ki pou ed nou pa perdi pasyans e ankoler avek bann dimoun ki nou kontan?

¹⁵ Souvan nou pa pran pasyans avek bann dimoun ki nou kontan. ‘Pour bann sen ki reste dan Kolos, ek bann frer fidel Kris,’ zapot Pol ti ekrir: “Bann mari, kontan zot madanm e pa tret zot dir [oubyen “pran lakoler avek zot,” NW]. Bann paran, pa bezwen provok zot zanfan, sa i kapab dekouraz zot.” (Kol. 1:1, 2; 3:19, 21) Pol ti ankouraz bann Efezyen: “Debaras zot avek tou move santiman, tou iritasyon, tou lakoler. Fer disparet tou kriye ek lensilt.” (Efe. 4:31) Si bann  paran i devlop bann laspe fri lespri parey pasyans, ladouser ek kontrol lo zot lekor, sa pou ed zot reste kalm menm kan zot anba presyon.​—Gal. 5:22, 23.

16. Ki mannyer Zezi ti reprimann son bann zapot e akoz sa ti remarkab?

¹⁶ Annou pran legzanp Zezi. Zis mazin sa presyon ki i ti santi sa zour swar kan i ti pe pran son dernyen repa avek son bann zapot. Zezi ti konnen ki dan detrwa erdtan ankor i ti pou sibir en lanmor martir. Pour ki non son Papa i ganny sanktifye e imen i ganny delivre, tousala ti depan lo son fidelite. Pourtan, i ti pandan sa repa ki bann zapot ti “konmans diskite antre zot lekel parmi zot ki ti pou ganny konsidere pli enportan.” Zezi pa ti kriye oubyen pran lakoler avek zot. O kontrer, avek ladouser, i ti rezonn avek zot. Zezi ti rapel zot ki zot ti’n reste fidel avek li pandan bann moman difisil. Kantmenm Satan ti demande pour sakouy zot parey dible, Zezi ti eksprim konfidans ki zot ti pou reste fidel. I ti menm fer en lalyans avek zot.​—Lik 22:24-32.

17. Kwa ki pou ed zanfan reste kalm?

¹⁷ Bann zanfan osi i bezwen reste kalm. Sirtou kan zot ariv laz adolesan zot kapab ganny sa lenpresyon ki zot paran pe donn zot gidans akoz zot napa konfyans dan zot. Kantmenm parler ou kapab santi koumsa, pa oubliye ki ou paran i enterese avek ou e kontan ou. Si ou pare pour ekout zot e korpere, zot pou respekte ou e konsider ou konman en dimoun responsab. Sa bon latitid pou permet zot donn ou plis liberte dan serten domenn dan lavi. Annan kontrol lo nou lekor i mars ansanm avek lasazes. En proverb saz i dir: “En dimoun bet i tir tou son lakoler, me sa enn ki saz i kontrol li ziska lafen.”​—Prov. 29:11.

18. Ki mannyer lanmour i ede pour annan en bon kominikasyon?

¹⁸ Alor, paran ek zanfan, pa dekouraze si kominikasyon dan fanmir i pa parey ou ti pou kontan i ete. Kontinyen fer zefor e kontinyen mars dan laverite. (3 Zan 4) Dan nouvo lemonn kot tou dimoun pou parfe zot pou kapab kominik dan en fason parfe. Tou dimoun pou konpran kanmarad e personn pa pou pran lakoler. Me pour lemoman, nou tou nou fer keksoz ki nou regrete apre. Pa ezite alor pour demann leskiz. Touzour pare pour pardonnen. “Reste ini dan lanmour.” (Kol. 2:2) Lanmour i pwisan. ‘Lanmour i pasyan, e i bon. I pa pran lakoler, e i pa gard rankin. Lanmour i pardonn tou, i krwar tou, i esper tou, i siport tou.’ (1 Kor. 13:4-7) Kontinyen devlop lanmour, pour ki i annan en bon kominikasyon, an retour sa pou anmenn lazwa dan fanmir e louanz pour Zeova.

[Not anba lo paz]

[Kestyon]

[Portre lo paz 19]

[Portre lo paz 20]

Pa les distraksyon ek sa dezir pour izol ou lekor anpes ou annan sa bon kominikasyon dan fanmir

[Portre lo paz 23]

Eski ou ekout ou zanfan atantivman?