1, 2. Tama sina bona natudia edia hemami ta ta dekenai be edena bamona, to nega haida ia auka dahaka idia karaia totona?

 UNITED STATES ai, buka ta lalonai inai henanadai be natudia handred momo dekenai idia henia: “Bema oi kamonai emu tama sina be kerukeru do idia mase, hari dina idia dekenai dahaka do oi gwauraia?” Natudia 95 pesen bamona idia gwau idia ese idia bona edia tama sina huanai ia noho hekwakwanai do idia laloa lasi, to do idia gwau: “Lau sori” bona “Oi lau lalokau henia bada.”​—⁠For Parents Only, Shaunti Feldhahn bona Lisa Rice ese idia torea.

² Ita diba natudia be edia tama sina idia lalokau henidia, bona tama sina ese edia natudia idia lalokau henidia. Keristani famili lalonai unai bamona lalokau ia noho. Ena be tama sina bona natudia idia ura idia herevahereva hebou namonamo, to nega haida unai bamona idia karaia be auka. Dahaka dainai unai ia vara? Dahaka dainai tama sina ese natudia dekenai mai anina bada gaudia haida idia herevalaia be auka? Dahaka ese tama sina bona natudia ia durua diba edia herevahereva hebou karana idia hanamoa totona?

3. (a) Dahaka dainai famili momo lalonai herevahereva namonamo karana be mai ena hekwarahi? (b) Dahaka dainai guna Israela ai tama sina bona natudia idia herevahereva be auka lasi?

³ Hari, famili momo idia davaria idia be nega lasi mai anina bada gaudia idia herevalaia totona. Guna be unai bamona lasi. Mose ese Israela tamadia ia sisiba henia, ia gwau: “Umui emui natudia dekenai inai Taravatu do umui hadibaia goada, ruma dekenai umui noho neganai, bona dala dekenai umui raka neganai. Bona umui hekure noho, o umui gaukara noho neganai, inai Taravatudia do umui herevalaia.” (Deu. 6:6, 7) Natudia be nega momo edia sinana ida ruma ai idia noho, eiava edia tamana ida uma gabu o iena  gaukara gabuna idia lao. Unai dainai, nega bada ia noho natudia bona tama sina idia herevahereva totona. Unai dala ai, tama sina ese natudia edia ura gaudia, edia lalohekwarahi gaudia, bona kara idia diba namonamo. Unai hegeregerena, natudia danu be edia tama sina idia diba namonamo.

4. Dahaka dainai hari famili momo idia herevahereva lasi?

⁴ To, hari mauri be idau! Tano haida ai natudia be idia do maragi, reana edia mauri lagani be 2 neganai, sikuli dekenai idia lao. Tama sina be moni gaukara idia lao dainai, nega momo ruma ai idia noho lasi. Bona tama sina bona natudia be ruma ai idia noho neganai, nega momo TV, kompiuta, mobael fon bona unai bamona gaudia ese edia herevahereva dalana idia koua. Famili momo lalodiai, tama sina bona natudia be idau taudia bamona, badina idia herevahereva hebou lasi.

5, 6. Tama sina haida be dahaka idia karaia edia natudia idia bamoa totona?

⁵ Emu famili ida gau haida umui karaia hebou totona, emu ‘nega oi gaukaralaia namonamo’ daladia haida oi laloa, a? (Efeso 5:15, 16 duahia.) Famili haida be idia lalotamona, TV itaia o kompiuta gaukaralaia negana do idia hakwadogia. Famili haida be idia lalotamona, dina tamona lalonai nega tamona idia aniani hebou totona. Ruma bese ena tomadiho danu be nega namona, tama sina bona natudia be ta ta idia diba namonamo, bona Baibel idia stadilaia hebou! Wiki ta ta ai hora ta lalonai unai idia karaia be namo, to mai anina bada gaudia herevalaia dalana kehoa totona, dina ta ta ai idia herevahereva hebou be namo. Natudia be sikuli idia do lao lasi neganai, idia dekenai hagoadaia herevana ta oi gwauraia, dina ena siri umui herevalaia, eiava umui guriguri hebou. Unai ese edia dina do ia hanamoa.

⁶ Tama sina haida be edia mauri dalana idia haidaua, unai amo nega bada be edia natudia idia bamoa diba. Hegeregere, Laura a be ena ful-taim moni gaukara ia rakatania, unai amo ena natuna maragidia rua ia bamoa diba. Ia gwau: “Daba ai, ai ibounai be gaukara bona sikuli  dainai ruma ai rakatania haraga. Hanuaboi ai ruma dekenai lau giroa lou neganai, egu natudia idia mahuta, badina beibi-sita hahinena ese idia ia hamahutaia vadaeni. Egu moni gaukara lau rakatania dainai, moni dalanai ai dabu, to lau mamia hari egu natudia edia hekwakwanai lau diba bona idia lau durua diba. Edia guriguri ai idia gwauraia gaudia lau kamonai bona idia lau durua, hagoadaia bona hadibaia diba.”

7. Natudia bona tama sina be dahaka dainai idia maumau?

⁷ Buka ladana, For Parents Only idia torea taudia ese natudia momo idia intaviu henia murinai, idia gwau: “Natudia momo idia maumau, idia gwau edia tama sina be ‘idia kamonai lasi.’” To, tama sina danu idia maumau, idia gwau natudia danu be idia kamonai lasi. Idia herevahereva namonamo totona, famili taudia idia kamonai heheni namonamo be gau badana.​—⁠Iamesi 1:19 duahia.

8. Edena dala ai tama sina ese edia natudia idia kamonai henia namonamo diba?

⁸ Tama sina e, emui natudia idia hereva neganai umui kamonai namonamo, a? Reana nega haida oi hesiku o oi laloa natudia ese idia herevalaia gauna be anina lasi. Ena be oi laloa ia be anina lasi, to natudia dekenai unai be mai anina bada. Oi “kamonai haraga” ena anina be, emu natuna ena hereva oi kamonai sibona lasi, to ena hereva ia gwauraia dalana oi itaia danu. Emu natuna ena gado regena bona vairana ena toana ese ena hemami do ia hahedinaraia. Danu, henanadai karana be mai anina bada. Baibel ia gwau: “Taunimanima edia laloa gaudia be hunia, ranu dobuna bamona, to mai ena diba bada tauna ese, unai laloa gaudia ia davaria diba.” (Aon. 20:5) Emui natudia ida mai anina bada gaudia umui herevalaia neganai, aonega bona laloparara umui hahedinaraia be gau badana. Unai amo natudia be edia lalona ai idia noho gaudia do idia gwauraia hedinarai.

9. Dahaka dainai natudia ese tama sina idia kamonai henia be namo?

⁹ Natudia e, emui tama sina umui kamonai henia, a? Baibel ia gwau: “Lauegu natuna e, oiemu tamana bona sinana, edia hadibaia hereva do oi kamonai henia.” (Aon. 1:8) Namona be oi laloatao: Emu tama sina ese oi idia lalokau henia bona emu namo idia laloa bada, unai dainai aonega karana be edia sisiba do oi kamonai bona badinaia. (Efe. 6:1) Bema oi bona emu tama sina huanai herevahereva namonamo karana ia noho, bona oi diba idia be oi idia lalokau henia, edia sisiba do oi badinaia be auka lasi. Unai dainai, namona be idia dekenai emu hemami oi gwauraia hedinarai. Unai ese idia do ia durua emu hemami idia lalopararalaia totona. To danu, oi ese edia hemami oi lalopararalaia be namo.

10. Rehoboama ena haheitalai amo dahaka ita dibaia?

¹⁰ Emu mauri lagani tamona taudia amo sisiba oi abia neganai, oi naria namonamo be gau badana. Reana edia sisiba oi ura henia, to oi do idia durua lasi bona oi badinaia neganai dika oi davaria diba. Natudia be do matamata dainai, idia laloparara lasi hari idia karaia abia hidi ta ese gabeai dika ia havaraia diba. King Solomona ena natuna Rehoboama ena sivarai mani ita laloa. Ia be Israela ena king ai ia lao neganai, aonega karana be ia ese tau badadia edia sisiba ia kamonai be namo. To, ia ese ena mauri lagani tamona taudia edia sisiba dikana ia abia dae. Unai dainai, Israela taudia momo idia ura lasi ia henunai do idia noho. (1 Kin. 12:1-17) Namo lasi Rehoboama ena haheitalai dikana oi tohotohoa. To, namona be oi hekwarahi emu tama sina ida oi herevahereva totona. Emu lalohadai be emu tama sina dekenai oi gwauraia. Edia sisiba oi badinaia neganai, namo do oi davaria bona edia aonega herevadia amo gau momo do oi dibaia.​—⁠Aon. 13:20.

11. Dahaka do ia vara bema tama sina be natudia ese idia herevalaia gaudia idia kamonai namonamo?

¹¹ Tama sina e, bema umui ura lasi emui  natudia be edia turadia amo sisiba idia tahua, namona be emui kara amo umui hahedinaraia umui ura edia hereva umui kamonai. Matamata taihu ta ia gwau: “Bema mero ta ena ladana lau gwauraia, egu tama sina idia laloa momo. Unai dainai, lau gari bona lau ura lasi ma hereva haida lau gwauraia.” Taihu matamata ma ta ia gwau: “Matamata taudia momo idia ura edia tama sina amo sisiba idia abia. To, bema tama sina be natudia edia lalohadai idia kamonai lasi, idia be ma haida amo heduru do idia tahua. Reana edia uru tamona taudia amo heduru do idia tahua.” Bema idia herevalaia gaudia oi kamonai namonamo, do idia ura edia lalohadai idia gwauraia bona emu sisiba idia abia dae.

12. Edena dala ai tama sina edia kara ese natudia ida edia herevahereva karana ia koua diba?

¹² Herevahereva karana ia koua gauna ta be, natudia be gau ta idia herevalaia neganai tama sina idia badu haraga bona idia hereva auka. Ita laloparara “dina gabediai” dika momo idia vara dainai, Keristani tama sina idia ura edia natudia idia gimaia. (2 Tim. 3:1-5) To, nega ibounai unai idia karaia neganai, natudia idia mamia tama sina be edia ura gaudia idia koua momo.

13. Dahaka dainai tama sina idia badu haraga lasi be namo?

¹³ Aonega karana be tama sina ese edia lalohadai do idia gwauraia haraga lasi. Momokani, bema natudia idia lalohisihisi dainai, mai badu ida oi idia hereva henia, oi ura idia do oi gwau henia. To, gau badana be edia hereva oi kamonai namonamo guna. Aonega tauna King Solomona, ia gwau: “Hereva do oi kamonai guna, gabeai do oi haere. Bema oi haere haraga, oi be kavakava, bona hemarai do oi davaria.” (Aon. 18:13) Bema oi badu haraga lasi, emu natuna be ena hemami korikori do ia gwauraia bena reana ia badu ena badina do oi lalopararalaia. (Iobu 6:1-3) Tama sina e, emui natudia umui lalokau henia dainai, namona be edia hereva umui kamonai namonamo, unai amo heduru maorona umui henia diba.

14. Dahaka dainai natudia idia hereva haraga lasi be namo?

¹⁴ Natudia e, emui tama sina idia hereva neganai, umui “hereva haraga lasi” be namo. Badina Dirava ese tama sina dekenai maduna ia henia, umui idia hadibaia totona. (Aon. 22:6) Reana idia matamata neganai, idia danu be umui davaria hekwakwanai idia davaria. Guna idia karaia kerere dainai idia lalohisihisi, unai dainai oi idia gimaia, badina idia ura lasi oi be unai kerere oi karaia danu. Emui tama sina be emui turadia, idia be emui inai taudia lasi, bona idia ura umui idia durua. (Aonega Herevadia 1:5 duahia.) Natudia e, emui ‘tamana bona sinana umui matauraia’ bona umui hahedinaraia idia umui lalokau henia, idia ese umui idia lalokau henia bamona. Unai umui karaia neganai, idia ese ‘Iehova ena matahakani bona sisiba amo umui idia hadibaia’ be auka lasi.​—⁠Efe. 6:2, 4.

15. Dahaka ese ita do ia durua, ita haheauka bona badu haraga lasi totona?

¹⁵ Nega momo iseda lalokau taudia dekenai haheauka ita hahedinaraia be auka. Aposetolo Paulo be Kolose Keristani taudia ia tore henia, ia gwau: “Umui tatau e, emui hahine do umui lalokau henia noho bona idia dekenai do umui badu dikadika lasi. . . . Umui tamadia e, emui natudia do umui habadua lasi, dika idia lalohisihisi.” (Kol. 1:1, 2; 3:19, 21) Danu, Paulo ese Efeso tadikaka ia hamaorodia: “Namona be inai heheni karana, badu, badu dikadika, boiboi badabada, hadikaia herevadia, bona dika gaudia ibounai danu, umui dadaraia.” (Efe. 4:31) Dirava ena lauma ena huahua hegeregere, boga-auka, manau, bona sibona biagua karana ita hahedinaraia be namo. Badina unai ese ita do ia durua hekwakwanai idia vara neganai, ita badu haraga lasi.​—⁠Gal. 5:22, 23.

16. Edena dala ai Iesu ese ena aposetolo taudia ia sisiba henidia, bona dahaka dainai unai be kara hereadaena?

 ¹⁶ Namona be tama sina ese Iesu ena haheitalai idia laloa. Iena hanuaboi ginigabena ai ena aposetolo taudia ida ia aniani hebou neganai, ia lalohisihisi bada. Ia diba hora haida murinai, hisihisi bada do ia davaria bona do ia mase. Ia diba bema Dirava ia badinaia ela bona dokona, ena Tamana ena ladana do ia hahelagaia bona taunimanima ibounai edia hahemauri dalana do ia karaia. To idia aniani lalonai, aposetolo taudia “huanai hepapahuahu badana ia vara, daika be bada.” Iesu be idia ia lolo henia o gwau henia lasi. To, mai manau ida ia sisiba henidia. Iesu ese idia ia hamaoroa, hahetoho ia davaria negadiai, idia be ia idia rakatania lasi. Bona ena be Satani ia ura idia be witi bamona ia hapararaia, to Iesu ia diba idia be mai abidadama ida do idia gini goada noho. Danu, idia ida kontraka ta ia karaia.​—⁠Luka 22:24-32.

17. Dahaka ese natudia do idia durua idia badu haraga lasi totona?

¹⁷ Natudia danu idia haheauka bona idia badu haraga lasi be namo. Edia mauri lagani be 13 ia lao 19 neganai, idia ura lasi tama sina edia sisiba idia kamonai, badina idia mamia tama sina ese idia abidadama henidia lasi. Ena be unai oi mamia, to namona be oi laloparara tama sina ese oi idia laloa momo, badina oi idia lalokau henia. Bema mai manau ida oi kamonai henidia bona edia sisiba oi abia dae, oi do idia matauraia bona abidadama henia. Unai bamona oi karaia neganai, oi dekenai gwaumaoro do idia henia gau haida oi karaia totona. Baibel ese ia hahedinaraia, sibona eda kara ita biagua be aonega karana. Ia gwau: “Kavakava tauna ese iena badu ia hedinaraia noho, to aonega tauna ese sibona ena badu ia koua, ia haheauka noho.”​—⁠Aon. 29:11.

18. Edena dala ai herevahereva namonamo karana dekenai, lalokau be mai anina bada?

¹⁸ Tama sina bona natudia e, bema emui famili lalonai herevahereva karana be ia namo momokani lasi, umui lalomanoka lasi. Emui herevahereva dalana umui hanamoa noho, bona hereva momokani umui badinaia noho. (3 Ioa. 4) Tanobada matamatana ai, goevadae taudia edia herevahereva karana be do ia namo herea. To hari inai negai, ita ibounai be eda hereva haida dainai gabeai ita lalohisihisi. Unai dainai, namona be sori herevana ita gwauraia haraga bona ita gwauatao heheni. ‘Lalokau ese ita ia hatamonaia’ be namo. (Kol. 2:2) Oibe, lalokau be mai ena siahu. Baibel ia gwau: ‘Lalokau be ia boga-auka, bona ia hebogahisi. Lalokau be ia badu haraga lasi. Bona ia be ta ena kerere ia laloatao noho lasi. Lalokau be gau ibounai dekenai ia gini goada, gau ibounai ia abidadama henia, gau ibounai lalonai mai ena helaro, bona gau ibounai ia haheaukalaia.’ (1 Kor. 13:4-7) Oibe, lalokau umui hahedinaraia noho neganai, emui herevahereva karana do ia namo. Emui famili maurina do umui moalelaia bona Iehova ena ladana do umui hanamoa.