1, 2. Ki sintimentu mayor- i yunan tin pa otro generalmente, pero kiko sa ta difísil pa nan tin biaha?

“SI BO haña sa ku bo mayornan lo muri mañan, kiko ta e kos ku sigur lo bo ke bisa nan awe?” Nan a hasi e pregunta akí na sientos di mucha na Merka. Kasi tur e muchanan a bisa ku nan lo no ke papia tokante problema òf desakuerdo ku kisas nan tin ku nan mayornan. Mas bien, nan lo a bisa nan mayornan: “Pordoná mi pa tur e kosnan malu ku mi a hasi” i “mi stima boso masha hopi mes.”—Solamente pa Mayornan, di Shaunti Feldhahn i Lisa Rice.

² Generalmente, yunan stima nan mayornan, i mayornan stima nan yunan. Esaki ta e kaso spesialmente den famianan kristian. Tantu mayor komo yu ke tin un bon relashon ku otro. No opstante, tin biaha ta difísil pa nan komuniká ku otro. Kon bini? Kiko ta stroba mayor- i yunan di papia abiertamente tokante sierto tópikonan? Kiko mayornan i yunan tin ku hasi pa nan por komuniká mihó ku otro?

3. (a) Dikon hopi famia awe tin problema pa komuniká bon ku otro? (b) Dikon famianan na Israel di antigwedat no tabatin problema ku tempu pa komuniká ku otro?

³ Awendia, hopi famia tin difikultat pa haña sufisiente tempu pa komuniká ku otro. Ántes e situashon tabata otro. Wak por ehèmpel ki instrukshon Moises a duna mayornan israelita. El a bisa nan: “Siña [e palabranan di Dios] ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” (Deu. 6:6, 7) E tempu ayá, yunan tabata pasa henter dia  na kas huntu ku nan mama òf huntu ku nan tata den kampo òf na su trabou. Pues, mayor- i yunan tabata pasa hopi tempu huntu i tabatin hopi tempu pa papia ku otro. Asina ei, mayornan por a haña sa kiko ta deseo, nesesidat i personalidat di nan yunan. Di otro banda, yunan tambe tabatin sufisiente tempu pa siña konosé nan mayornan bon.

4. Dikon den hopi famia awe no tin bon komunikashon?

⁴ Awendia, hende su bida a kambia masha hopi mes. Den algun pais, muchanan ta kuminsá bai skol na un edat hopi chikitu, tin ora ku apénas dos aña di edat. Hopi tata i mama no ta traha na kas. I durante e tiki tempu ku e famia ta huntu ta difísil pa nan komuniká ku otro pasobra tur nan tempu ta bai na kòmpiuter, televishon i otro medionan di komunikashon elektróniko. Den hopi kaso, yu- i mayornan ta hiba nan propio bida; kasi nan no konosé otro mes, pasobra nan no ta ègt kòmbersá ku otro.

5, 6. Kon algun mayor a ‘kumpra’ mas tempu pa pasa ku nan yunan?

⁵ Kiko di abo? Bo por ‘kumpra,’ òf kita, tempu for di otro kosnan pa bo por pasa mas tempu ku bo famia? (Lesa Efesionan 5:15, 16; wak nota.) Algun famia a palabrá pa limitá wakmentu di televishon i uso di kòmpiuter. Otronan ta hasi esfuerso pa kome—sikiera un biaha pa dia—huntu. I e anochi di Adorashon Komo Famia tambe ta un bon oportunidat pa mayornan i yunan hala mas serka otro i papia tokante kosnan spiritual den un ambiente relahá. P’esei, si tur siman nos programá alrededor di ún ora pa komuniká, esei ta un bon komienso. Pero esei no ta sufisiente si nos ke tin bon komunikashon den nos famia. Pa logra esei, nos mester komuniká tur dia i regularmente ku otro. Promé ku e muchanan bai skol, animá nan, analisá e teksto di dia huntu òf hasi orashon ku nan. Esaki lo por yuda nan mashá durante dia.

⁶ Algun mayor a logra hasi kambio den  nan programa pa nan por pasa mas tempu ku nan yunan. Laura, * por ehèmpel, un mama di dos yu chikitu, a stòp di traha fultaim pa e motibu ei. El a bisa: “Mainta nos tabata sali kas purá purá pa bai trabou òf skol. I ora mi yega kas atardi lat, e baby-sitter a pone mi yunan drumi kaba. Debí ku mi a stòp di traha fultaim nos tin ménos entrada, pero awor mi ta na altura di tur loke ta preokupá mi yunan i di loke nan ta pensa. Mi ta skucha kiko nan ta bisa den orashon, mi ta guia nan, enkurashá nan i siña nan.”

7. Kiko ta un keho ku mayoria di yu i mayor tin?

⁷ Despues di a entrevistá hopi mucha, e outornan di e buki Solamente pa Mayornan a konstatá un otro opstákulo pa komunikashon. Nan a bisa: “E keho ku mayoria di e muchanan tabatin ta ku nan mayornan no ta skucha nan.” Pero no ta yunan so tin e keho ei. Hopi bes, mayornan tambe ta bisa e mesun kos tokante nan yunan. Pues, si nos ke tin bon komunikashon den famia, miembronan di famia mester skucha otro ku atenshon.—Lesa Santiago 1:19.

8. Kiko mayornan mester hasi si nan realmente ke skucha nan yunan?

⁸ Mayornan, boso realmente ta skucha boso yunan? Kisas no ta fásil pa hasi esaki ora bo ta kansá òf ora nan ke papia tokante algu ku, segun bo, no ta dje importante ei. Pero loke pa bo por parse di poko importansia por ta masha importante pa bo yu. Un mayor ku ta “kla pa skucha” ta presta atenshon no solamente na loke su yu ta bisa sino tambe na e manera ku e yu ta papia. Dikon? Pasobra tono di bos, gesto i ekspreshon di kara por yuda bo komprondé kiko bo yu ta pensa. Ta importante tambe pa hasi pregunta. Beibel ta bisa: “Plan den kurason di un hende ta manera awa hundu, ma un hende di komprondementu ta saka esaki afó.” (Pro. 20:5) Komprondementu i disernimentu ta nesesario spesialmente ora un mayor ta papia ku su yu tokante un tópiko delikado.

9. Dikon yunan mester obedesé nan mayornan?

⁹ Yunan, boso ta obedesé boso mayornan? E Palabra di Dios ta bisa: “Mi yu, tende e instrukshon di bo tata, i no bandoná e siñansa di bo mama.” (Pro. 1:8) Kòrda, boso mayornan ta stima boso i ke lo mihó pa boso, pues ta bon pa skucha i obedesé nan. (Efe. 6:1) Hopi bes, ora tin bon komunikashon entre mayor i yu i e yu ta konsiente ku su mayornan ta stim’é, ta mas fásil p’e ta obediente. P’esei, laga bo mayornan sa kiko bo ta pensa di sierto kosnan. Esaki lo yuda nan komprondé bo mihó. I ta klaru ku bo tambe mester hasi esfuerso pa komprondé nan.

10. Kiko nos ta siña for di e relato bíbliko di Rehoboam?

¹⁰ Hóben, abo sa sigui konseho di bo pareunan? Si ta asina, tene kuidou! Podisé nan ta bisa bo nèt loke bo tin gana di tende, pero kisas nan konseho lo no yuda bo. De echo, e por asta perhudiká bo. Mayoria di hóben falta e sabiduria i eksperensia ku hende grandi tin, p’esei kisas nan no por mira mas aleu i diserní e konsekuensianan di sierto pasonan ku nan dal. Bo ta kòrda kiko a pasa ku Rehoboam, yu hòmber di Rei Sálomon? Ora el a bira rei di Israel, en bes di a aktua sabí i sigui konseho di e hòmbernan di mas edat, el a sigui e mal konseho di e hóbennan ku el a lanta huntu kuné. Esei a pon’é pèrdè apoyo di mayoria di hende den su reino. (1 Rei. 12:1-17) No hasi mesun fout ku Rehoboam. Hasi esfuerso pa e liña di komunikashon entre abo i bo mayornan keda habrí. Laga nan sa kiko bo ta pensa i sinti. Sigui nan konseho i siña for di nan.—Pro. 13:20.

11. Kiko por sosodé ora mayornan no ta aserkabel?

 ¹¹ Mayornan, si boso ke pa boso yunan buska konseho serka boso en bes di bai serka nan pareunan, sòru pa boso ta aserkabel i fásil pa papia kuné. Un ruman muhé tiner a skirbi: “Si mi mester djis menshoná nòmber di un mucha hòmber, mesora mi mayornan ta bira aribabou. Nan ta laga mi sinti mi inkómodo i mi no ta haña gana di papia nada mas.” Un otro ruman muhé hóben a skirbi: “Hopi tiner ke pa nan mayornan duna nan konseho. Pero si nan mayornan no ta tuma nan na serio, nan ta preferá di aserká otro hende ku sí ta hasi esei, asta si ta trata di hende ku no tin masha eksperensia.” P’esei, mayornan, sea dispuesto pa skucha i komprondé boso yunan, sin importá riba ki tópiko nan ke papia; probablemente nan lo sinti nan kómodo pa papia ku bo i lo ta dispuesto pa sigui bo konseho.

12. Kon mayornan por stroba nan yunan di komuniká ku nan?

¹² Un otro kos ku por stroba komunikashon ta e manera ku mayornan ta reakshoná ora nan yunan konta nan algu. Sí, si mayornan ta reakshoná negativo òf muchu emoshonal, nan ta stroba nan yunan di komuniká ku nan. Ta di komprondé ku mayornan kristian ke protehá nan yunan durante e “último dianan” akí ku ta yen di peliger. (2 Tim. 3:1-5) No opstante, loke pa mayornan ta protekshon yunan por eksperensiá komo kitamentu di nan libertat.

13. Dikon no ta bon pa mayornan duna nan opinion muchu lihé?

¹³ Ta bon pa mayornan no duna nan opinion muchu lihé. Ta bèrdat ku tin biaha ta difísil pa keda ketu ora bo yu ta konta bo algu preokupante. Pero ta importante pa bo skucha bon promé ku bo kontestá. Sálomon, kende tabata un rei sabí, a skirbi: “Esun ku respondé promé ku e skucha, esei ta bobedat i bèrgwensa p’e.” (Pro. 18:13) Si bo keda trankil, lo bo haña sa mas i bo yu lo sigui papia. Kisas e ora ei, for di e ‘palabranan deskontrolá’ di bo yu, bo ta saka afó ku e ta desesperá. (Yòb 6:1-3) Pa bo por yuda bo yu, bo mester haña un kuadro kompleto di e asuntu. P’esei, komo mayor amoroso, usa bo orea pa haña komprondementu i bo lenga pa kura.

14. Dikon yunan mester ta slo pa papia?

¹⁴ Yunan, boso tambe mester ta “slo pa papia”; no bula rechasá mesora loke boso mayornan ta bisa, pasobra ta Dios a duna nan e responsabilidat di eduká boso. (Pro. 22:6) Kisas nan tambe a yega di eksperensiá e mesun kosnan ku boso ta eksperensiando awor. Es mas, podisé nan ta lamentá e erornan ku nan a kometé tempu ku nan tabata yòn i no ke pa boso kometé e mesun erornan. P’esei, mira bo mayornan komo amigu i no komo enemigu. Nan ke yuda bo; nan no ke hasi bo daño. (Lesa Proverbionan 1:5.) “Onra bo tata i bo mama,” i mustra nan ku bo ta stima nan meskos ku nan ta stima bo. Ora bo ta hasi esei, ta bira mas fásil pa nan lanta bo ‘den e disiplina di Yehova i inkulká su manera di pensa den bo.’—Efe. 6:2, 4.

15. Kiko por yuda nos mustra pasenshi i no rabia ku nos sernan kerí?

¹⁵ Tin ora, nos no tin pasenshi ku esnan ku nos ta stima. Apòstel Pablo a skirbi ‘e rumannan na Kolósas,’ kendenan tabata ‘santu i fiel den union ku Kristu:’ “Esposonan, sigui stima boso esposa i no rabia amargamente ku nan.” “Tatanan, no iritá boso yunan pa nan no desanimá.” (Kol. 1:1, 2; 3:19, 21) El a urgi e efesionan: “Kita tur tipo di amargura malisioso, rabia, furia, gritamentu i papiamentu di kos ofensivo  for di boso.” (Efe. 4:31) Si nos ta hasi esfuerso pa demostrá pasenshi, suavedat i dominio propio—ku ta aspektonan di e fruta di spiritu—ta mas fásil pa nos keda kalmu asta ora nos ta bou di tenshon.—Gal. 5:22, 23.

16. Kon Hesus a korigí su disipelnan, i dikon esaki tabata algu remarkabel?

¹⁶ Tuma Hesus komo ehèmpel. Bo por imaginá bo bou di kuantu tenshon e tabata durante e último sena ku su apòstelnan? E tabata sa ku denter di algun ora lo el a muri un morto lento i doloroso. Ademas, santifikashon di e nòmber di su Tata i salbashon di humanidat tabata dependé di su fieldat. I komo si fuera esei no tabata basta, durante e mesun sena ei, su apòstelnan a kuminsá ‘diskutí tokante kua di nan tabata esun di mas grandi.’ Hesus no a grita nan ni papia malu ku nan. Mas bien, el a rasoná ku nan na un manera kalmu. El a kòrda nan ku nan a apoy’é durante su momentonan difísil. I el a ekspresá su konfiansa ku nan lo a keda fiel apesar di e pruebanan ku Satanas lo a bini kuné. El a asta sera un pakto ku nan.—Luk. 22:24-32.

17. Kiko lo yuda yunan keda kalmu?

¹⁷ Yunan tambe mester siña keda kalmu. Foral ora nan ta tiner, nan no gusta pa nan mayornan duna nan guia; segun nan, esei ta un muestra di falta di konfiansa. Aunke esei tin biaha por ta asina, komo yu, bo tin ku komprondé ku bo mayornan ta interesá den bo asuntunan pasobra nan stima bo. P’esei, keda kalmu, skucha di bo mayornan i kooperá ku nan; lo bo gana nan rèspèt i konfiansa. Esei por pone ku nan ta duna bo mas libertat pa hasi sierto kosnan. Kòrda ku Beibel ta mustra ku un persona ku ta ehersé dominio propio ta sabí. E ta bisa: “Un bobo ta duna rienda suelta na su rabia, ma un sabí ta wanta esaki aden.”—Pro. 29:11.

18. Kon amor por kontribuí na bon komunikashon?

¹⁸ P’esei, kerido mayornan i yunan, no desanimá si boso komunikashon no ta manera boso ta deseá. Sigui traha pa mehorá esaki, i sigui kana den e bèrdat. (3 Huan 4) Den e mundu nobo, nos lo ta perfekto. Ta e tempu ei, nos lo por komuniká perfektamente ku otro, sin ningun malkomprondementu i desakuerdo. Pero aworakí, nos tur ta hasi kosnan ku nos ta lamentá despues. Pues, no tarda pa pidi despensa. Pordoná otro libremente. Sea “armoniosamente uní den amor,” pasobra amor tin poder. (Kol. 2:2) ‘Amor tin pasenshi i ta bondadoso. E no ta rabia lihé. E no ta kòrda e malu ku hende a hasié. E ta wanta tur kos, kere tur kos, spera tur kos i soportá tur kos.’ (1 Kor. 13:4-7) Sigui kultivá amor, i dia pa dia boso komunikashon lo bira mihó. Esaki lo hasi boso famia felis i duna alabansa na Yehova.