1, 2. Ba ga’ ni uw rogon e tha’ u thilin e gallabthir nge bitir? Mang e ba mo’maw’ ni ngar rin’ed yu ngiyal’?

 BOOR e bitir u Meriken e kan fithrad ni lunguy: “Faanra kam nang nra yim’ e gallabthir rom gabul, ma mang e ga baadag ni nga mog ngorow?” Yooren i yad e yog ni dabun ni nge weliy ngorow murung’agen e magawon rok ara boch ban’en nder puluw u wan’, ya baadag ni nge gaar ngorow: “Wenig ngomew” ma “Ri gimew ba t’uf rog.”​—For Parents Only, ni yoloy Shaunti Feldhahn nge Lisa Rice.

² Ba ga’ ni gubin e bitir nge gallabthir ni bay e t’ufeg u thilrad. Re n’ey e ban’en ni ga ra guy u thilin e piin ni yad ma pigpig ngak Got. Yugu aram rogon ma yu ngiyal’ e ma magawon rogon e numon u thilin e gallabthir nge bitir. Mang fan ni ma buch e re n’ey? Mang boch ban’en nib mo’maw’ ni nge weliy e gallabthir nge bitir u taabang? Ma mang e rayog ni nge ayuwegrad nge fel’ e numon u thilrad?

3. (a) Mang fan ni boor e tabinaw nib mo’maw’ rorad ni ngar nonad nib fel’ rogon? (b) Mang fan nib mom ko pi tabinaw u Israel kakrom ni ngar nonad u taabang?

³ Boor e tabinaw e ngiyal’ ney e ba mo’maw’ ngorad ni ngar pirieged ba ngiyal’ ni ngar nonad u taabang nib fel’ rogon. Machane, nap’an piyu Israel mab thil rogon e par ko par rodad e ngiyal’ ney. I yog Moses ngak e pi matam ko tabinaw nu Israel ni ngar filed e pi motochiyel rok Got ngak pi fakrad ni gaar: “Um filed ngak pi fakmed; um weliyed murung’agen ngorad ko ngiyal’ ni gimed bay u tabinaw nge ngiyal’ ni gimed be milekag, nge ngiyal’ ni gimed be toffan nge ngiyal’ ni gimed be maruwel.” (Deut. 6:6, 7) Bitir e ngiyal’ nem e ma par rok e matin u tabinaw ara ma un ngak e matam ko maruwel. Ere, ba ga’ e tayim nrayog ni ngar nonad e gallabthir rorad u taabang. Bochan e re n’ey mab mom ko gallabthir ni ngar nanged e pi n’en nib t’uf ko bitir rorad, nge  pi n’en ni yad baadag, nge rarogorad. Maku er rogon e piin bitir nib mom ni nge fel’ e tha’ u thilrad e gallabthir rorad.

4. Mang e ma mo’maw’nag ngak boch e tabinaw ni ngar nonad u taabang?

⁴ Ke thil rogon e par e ngiyal’ ney. Boch e nam e yima pi’ e bitir riy nga skul u nap’an ni ka yad bbitir. Boor e matam nge matin ni yad ma un ko maruwel. Ma nap’an ni yad bay u tabinaw mab ga’ ni yad ma mayel TV ara yad ma rin’ boch ban’en ko computer ara telefon. Boor e tabinaw nde fel’ e tha’ u thilin e gallabthir nge bitir riy ni bochan e darur nonad ngorad.

5, 6. Mang boch ban’en ni ke thilyeg boch e gallabthir ko par rorad ya nge yag nra chaggad e bitir rorad u taabang?

⁵ Mang boch e kanawo’ ni ga be lemnag nrayog ni ngam rin’ed chon e tabinaw rom boch ban’en riy u taabang? (Mu beeg e Efesus 5:15, 16.) Boch e tabinaw e kar dugliyed ni ngar lichnaged e tayim ko mayel TV ara ngan rin’ boch ban’en ko computer. Ma boch e kar dugliyed nra reb e rran ma bay taab yay ni kar abichgad u taabang. Nap’an e fol Bible ni tabinaw ma aram e ngiyal’ nib fel’ ni nge gay e gallabthir nge bitir rogon ni nge fel’ e tha’ u thilrad. Machane, gathi kemus e ngiyal’ nsusun e nge rin’ chon e tabinaw boch ban’en u taabang. Ya thingar ra gayed e tayim ni ngar nonad u taabang ni gubin e rran. Bod nu m’on ni nge yan e bitir nga skul u reb e rran ma rayog ni nga nog ban’en nra pi’ e athamgil nga laniyan’, ara ngan weliy e thin nu Bible ni fan ko rofen nem, ara ngan meybil u taabang. Pi n’ey e ra ayuwegrad.

⁶ Bay boch e gallabthir ni kar thilyeged rogon e par rorad ya nge yag nra rin’ed e bitir rorad boch ban’en u taabang. Laura * ni l’agruw e bitir ni fak e tal ko maruwel rok ya nge yag ni par ko bitir rok. I yog ni gaar: “Ra kakadbul ma gamad ma gurgur ni nggu warod nga skul nge maruwel. Ma nap’an ni gu ra sul nga tabinaw ma ke mol e bitir rog, ya en ni ma par rorow e ke rin’ urngin ban’en nib t’uf ni ngan rin’ ngorow u m’on ni ngar molow.” Nap’an ni tal Laura ko maruwel me lich e salpiy ni ma yib ko tabinaw rok. Machane, ke thamiy rok ni ke fel’ e tha’ u thilrad e bitir rok ya ke nang e n’en ni yow ma lemnag nge magawon rorow. Ki yog ni gaar: “Gu ma motoyil  ko n’en ni yow ma yog ko meybil rorow, ma gu ma pi’ e athamgil nga lanin’row, ma gu ma pow’iyrow, ma gu ma fil boch ban’en ngorow.”

7. Mang reb e magawon nib ga’ ni ma yog e gallabthir nge bitir ni bay u thilrad?

⁷ Tomuren ni kan fith boch ban’en ngak boch e bitir, me yog l’agruw ni’ nra yoloyew ba ken e babyor ni lungurow: “Reb e magawon nib ga’ ni ma yog e bitir ni bay ko gallabthir rorad e, ‘Darur motoyilgad.’” (For Parents Only) Ku aram e n’en ni ma yog e gallabthir ni ma rin’ pi fakrad. Ere, faanra nge fel’ e numon u thilin girdien e tabinaw, mab t’uf ni ngaur motoyilgad ngorad nib fel’ rogon.​—Mu beeg e James 1:19.

8. Uw rogon me yag ni nge motoyil e gallabthir ko bitir nib fel’ rogon?

⁸ Gimed e gallabthir, gimed ma motoyil ngak pi fakmed, fa? Rayog ni nge mo’maw’ e re n’ey ni faanra kam magar ko maruwel ni ka um rin’ ara de ga’ fan e n’en ni be yog e bitir rom u wan’um. Machane, dab mu pagtalin ni n’en nde ga’ fan u wan’um e aram e n’en nib ga’ fan u wan’ e bitir rom. Ra ngad “gurgad ko motoyil” ma be yip’ fan ni ngad motoyilgad ko n’en ni be yog e bitir rodad nge rogon ni be non. Rogon ni be non fakam, nge rogon ni be mithmith, nge rogon owchen e ra tamilangnag ngom e n’en nriyul’ ni bay u gum’irchaen. Kub ga’ fan ni ngan fith boch ban’en ngak. Be yog e Bible ni gaar: “Lem rok be’ e bod e ran ni bay u lan ba luwed nib toar, machane be’ nib tamilangan’ e rayog ni nge l’ing.” (Prov. 20:5) Ba t’uf ni ngam gonopiy rogon ni ngaum non ko bitir rom ya aram rogon ni ga ra nang e n’en ni be tafinaynag. Ba ga’ fan e re n’ey ko ngiyal’ ni ngam weliyew e bitir rom ban’en nib mo’maw’ ni ngam weliyew u taabang.

9. Mang fan nsusun e nge fol e piin bitir ko gallabthir rorad?

⁹ Gimed e bitir, gimed ma fol ko gallabthir romed, fa? Be yog e Thin rok Got ni gaar: “Fakag, mu telim ko tin ni be machibnag e chitamam ngom, ma ga uthum e lim ko tin ni be yog e chitinam.” (Prov. 1:8) Dab mu pagtalin ni gab t’uf rok e gallabthir rom, ma yow ba baadag boch ban’en nra yib angin ngom. Ere, gab gonop ni faan ga ra motoyil mag fol rorow. (Efe. 6:1) Faanra ba fel’ e numon u thilmed e gallabthir rom, ma ga manang ni gab t’uf rorow, ma ra mom ni ngam fol rorow. Ere, mu weliy e tafinay rom ngorow, ya re n’ey e ra ayuwegrow ni ngar nangew e n’en ni ga be lemnag. Mag gay rogon ni ngam nang fan lanin’row.

10. Mang e gad ra fil ko n’en ni buch rok Rehoboam?

¹⁰ Ga ma fol ko fonow ni ma pi’ e pi taab yangar rom, fa? Faanra ga ma rin’, ma ngam kol ayuw. Ya dabisiy nib fel’ e fonow rorad u wan’um, machane sana dabi ayuwegem. Bin riyul’ riy, e rayog ni nge magawonnagem. Piin fel’ yangaren e de gaman e gonop rorad ni bod rogon e piin ni kar piilalgad. Yooren e fel’ yangaren e darur lemnaged ko mang e ra buch rorad ko gabul nge langlath ni bochan e pi n’en ni kar dugliyed ni ngar rin’ed. Am lemnag e n’en ni buch rok Rehoboam ni fak Solomon ni Pilung. Nap’an ni mang pilung nu Israel ma susun ni nge fol ko fonow ni ma pi’ e piin piilal. Machane, n’en ni rin’ e fol ko fonow ni pi’ boch e pagel ni yad ma puruy’ ni kar ilalgad u taabang ndariy e gonop rorad. Ma n’en ni buch e ke togopluw e girdi’ ni immoy u tan e gagiyeg rok ngak. (1 Ki. 12:1-17) Dab mu bod Rehoboam. Mu weliy ko gallabthir rom e n’en ni ga be lemnag. Mu fol ko fonow rorow mag fil ban’en ko gonop rorow.​—Prov. 13:20.

11. Mang e rayog ni nge buch ni faanra ba mo’maw’ ni ngan non ngak e gallabthir?

¹¹ Gimed e gallabthir, gimed baadag ni nge yib pi fakmed ngomed u nap’an ni ke yib e magawon ngorad ko bin ni nga ranod ngak boch e taab yangar rorad? Faanra arrogon, ma ngam momnaged ngorad ni ngar nonad ngomed. Reb e rugod e yog ni gubin ngiyal’ nra weliy murung’agen reb e pagel ngak e gallabthir rok, ma yow ma rus. Re n’ey e ma n’igin ni nge magagawon ngorow ma  dab ki puf rogon ni nge weliy e n’en ni bay u laniyan’. Ku bay reb e walag ni ppin ni yoloy ni gaar: “Boor e fel’ yangaren ni yad baadag ni nge pi’ e gallabthir rorad e fonow ngorad, machane faanra dabi dag e gallabthir rorad nib ga’ fan e n’en ni be weliy pi fakrad u wan’rad, ma ra yan fapi bitir ngak be’ ni ngar weliyed e magawon rorad ngak ni yugu aram rogon nde gaman e gonop rok.” Ere, mmotoyil ngak fakam ya nge yag nim nang e n’en ni bay u laniyan’ ni yugu demtrug e n’en ni baadag ni nge weliy ngom. Ya faan ga ra rin’ ni aram rogon, ma ra pufpuf rogon ni nge non ngom, ma ra mom ni nge fol ko fonow ni ga ra pi’ ngak.

12. Uw rogon ma n’en nra rin’ e gallabthir e ra mo’maw’nag ko bitir ni nge weliy e n’en ni bay u laniyan’?

¹² N’en nra rin’ e gallabthir u nap’an nra non pi fakrad ngorad e rayog ni nge mo’maw’nag ko fapi bitir ni ngar weliyed lanin’rad. Rayog ni nge m’ug ni ke puwan’ e gallabthir ko n’en ni be weliy e bitir rok ngak. Gad manang ni gad bay ko tin tomuren e rran ni boor e magawon nrayog ni nge mada’nag e bitir, ere bay rogon ni nge magafan’ e gallabthir u rogon ni ngar ayuweged pi fakrad. (2 Tim. 3:1-5) Machane, rayog nib thil rogon e n’en ni ma lemnag e gallabthir ko n’en ni ma lemnag e bitir, ma yu ngiyal’ e ma lemnag e bitir nde gaman e puf rogon ni ma pi’ e gallabthir ngorad.

13. Mang fan ndabi gur e gallabthir ngar welthingad u nap’an ni be non pi fakrad ngorad?

¹³ Thingar dabi gur e gallabthir ngar welthingad u nap’an ni be weliy pi fakrad ban’en ngorad. Riyul’ nib mo’maw’ ni nge dab mog ban’en u nap’an ni ke yog fakam ban’en nra kirebnag lanin’um. Machane, ba ga’ fan ni ngam motoyil nib fel’ rogon u m’on ni nga mog ban’en. I yog Solomon ni Pilung ni ir be’ nib gonop ni gaar: “Mmotoyil u m’on ni ngam non. Ya ra danga’ ma gur be’ ni ga ba pinat ma ga ra reg ku be’.” (Pro. 18:13, BT) Ere, faanra dab mu gur ngam welthin mag motoyil nib fel’ rogon, ma rayog ni ngam nang fan ‘rogon e thin rok’ fakam. (Job 6:1-3) Faanra ke tamilangan’um ko n’en ni ke buch rok fakam, ma aram e rayog ni ngam ayuweg. Gimed e gallabthir, mmotoyilgad ko n’en ni be yog pi fakmed ngomed, mi gimed guy rogon ni ngam nanged fan e pi n’en ni yad be weliy ya nge yag ni mogned ban’en ngorad nra ayuwegrad.

14. Mang fan ndabi gur e bitir ngar welthingad?

¹⁴ Gimed e bitir, dab um ‘gurgad ngaum welthingad.’ Dab mu paged talin ni ke pi’ Got mat’awun e gallabthir romed ni ngar fonownaged gimed, ere dab mu gurgad ngam puwan’gad ni bochan e n’en ni ka rogned ngomed. (Pro. 22:6) Dabisiy ni taareb rogon e magawon ni ur mada’naged ko magawon ni gimed be mada’nag e chiney. Maku, dubrad ni ngam rin’ed e pi n’en nib kireb ni ur rin’ed kafram. Gallabthir romed e yad e fager romed, ma gathi toogor. Yad baadag ni ngar ayuweged gimed, gathi ngar gafgownaged gimed. (Mu beeg e Proverbs 1:5.) Mu ‘liyorgad ko chitamangimed nge chitiningmed,’ mi gimed dag ngorad ni yad ba t’uf romed ni bod rogon ni gimed ba t’uf rorad. Faan gimed ra rin’ ni aram rogon ma ra mom ngorad ni ngar llowan’aged gimed nrogon ni baadag Jehovah.​—Efe. 6:2, 4.

15. Mang e ra ayuwegdad ni ngad gum’an’gad u puluwon e piin ni yad ba t’uf rodad?

¹⁵ Gathi gubin ngiyal’ ma gad ma gum’an’ u puluwon e piin ni yad ba t’uf rodad. I yog apostal Paul ngak e pi Kristiano nu Kolose ni gaar: “Piin ni pumoon, nge t’uf romed pi leengimed, ma dab um gelniged e thin ngorad. Ma gimed e gallibthir e yugu dabi pag rogon e puwan’ ni nguum tiyed ngak pi fakmed ngam k’aringed e damumuw ngorad, ya ri mulan’rad.” (Kol. 1:1, 2; 3:19, 21) Ki yog Paul ngak e girdi’ nu Efesus ni gaar: “Mu n’iged fan u wun’med urngin ban’en nib kireb ni ke aw nga lanin’med, nge tin ni kam dabuyed rok be’, ma dab ku um damumuwgad. Dab ku um tolulgad ngak be’ u fithik’ e damumuw  ara umogned e thin nib kireb ngak be’!” (Efe. 4:31) Faan gad ra gay rogon ni nge m’ug wom’engin gelngin Got nib thothup rodad ni bod rogon e gum’an’, nge sobut’an’, nge t’ar laniyan’, ma ra mom ni ngad pared nib gapas lanin’dad ngki mada’ ko ngiyal’ ni gad be mochuch.​—Gal. 5:22, 23.

16. Uw rogon ni yal’uweg Jesus pi gachalpen? Mang fan ni gad ra gin nga rogon e ngongol rok Jesus?

¹⁶ Piin gallabthir, am lemnaged e n’en ni rin’ Jesus. Mu lemnaged gelngin e magafan’ ni tay u nap’an e yay ni tomur e abich nra ted pi gachalpen u taabang. Manang ni dabki n’uw nap’an min li’ nge yim’ nib sowath e yam’ nra tay mab gel e amith riy. Manang nib t’uf ni nge par nib yul’yul’ ya nge yag ni ngan thothupnag fithingan e Chitamangin me yag e yafas ngak urngin e girdi’. Nap’an ni yad be abich pi gachalpen u taabang me tabab pi gachalpen ko maluagthin ko mini’ arorad e nge tolang u fithik’rad. Machane, de damumuw Jesus ngorad fe puwan’ ngorad. Ya i yal’uwegrad u fithik’ e gapas me puguran ngorad e yul’yul’ ni ur ted u fithik’ e pi gafgow ni i yib ngorad. Miki yog ngorad nrayog ni ngar pared ni yad ba yul’yul’ ni yugu aram rogon nra skengnagrad Satan. Ki micheg ngorad ni yad ra un ngak ko gagiyeg u tharmiy ni yad boch e pilung.​—Luke 22:24-32.

17. Mang e ra ayuweg e bitir ni ngar t’ared lanin’rad?

¹⁷ Mus ko piin bitir mab t’uf ni ngaur t’ared lanin’rad. Faanra gur reb e fel’ yangaren ma dabisiy ni dabum e fonow ni be pi’ e gallabthir rom ngom, ya rayog ni ga be lemnag nder pagan’row ngom. Machane, dab mu pagtalin ni be magafan’row ngom ni bochan e gab t’uf rorow. Ere, faan ga ra motoyil ngorow nib fel’ rogon mag fol ko fonow rorow, ma yow ra tay fam me pagan’row ngom. Ma aram e rayog ni ngar piew e puf rogon ngom ni ngam rin’ boch ban’en. Be yog e Bible ni be’ ni ma t’ar laniyan’ e ir be’ nib gonop. Be gaar: “Girdi’ nib manan’ e der ma mithag e damumuw rok, ma girdi’ nib sul laniyan’ ngak e yad ma k’adan’ ngar pired nga daken e damumuw rorad.”​—Pro. 29:11, BT.

18. Uw rogon nra ayuweg e t’ufeg chon e tabinaw ni nge fel’ e numon u thilrad?

¹⁸ Ere gimed e gallabthir nge bitir, dabi mulan’med ni bochan e de fel’ e numon u thilmed. Mu gayed rogon nge fel’ e numon u thilmed ni aram e ngam folgad ko pi fonow ni bay u lan e Thin rok Got. (3 John 4) Ra taw ko bin beech e m’ag ma dakuriy e magawon ko numon u thiliy. Machane, chiney e rayog ni ngad pirieged e magawon. Ere, ngaum gurgad nga u mogned e, “Wenig ngom.” Maku reb e ngaum n’aged fan e kireb ni ke rin’ be’ ngomed mi gimed “chichir nga taabang u fithik’ e t’ufeg.” (Kol. 2:2) Bay gelngin e t’ufeg. Ma ra ayuwegdad ni ngad daged e gum’an’ nge sumunguy. T’ufeg e ma ayuwegdad ni nge par nib gapas lanin’dad ma gad n’ag fan e kireb ni ke rin’ be’ ngodad. “Be’ nib t’uf Got rok nge girdi’ e dabiyog ni nge pag ir ndab ki michan’, ma dab ki l’agan’, ma dab ki gum’an’.” (1 Kor. 13:4-7) Ere, faanra ud daged e t’ufeg ma ra fel’ rogon e numon u lan e tabinaw rodad. Re n’ey e ra k’aringem ni ngam felfelan’ ma ga pining e sorok ngak Jehovah.