1, 2. (a) Ania ti nakatulong kenka nga agdesision nga agserbi iti Dios? (b) Ania dagiti saludsod a mabalintayo nga iyimtuod mainaig iti naespirituan a tawidtayo?

PINILI ti minilion ti nainsiriban a desision nga agserbi ken Jehova a Dios ken sisisinged a mangsurot kadagiti addang ni Jesu-Kristo. (Mat. 16:24; 1 Ped. 2:21) Saantay a tagtagilag-anen ti panangidedikartayo iti biagtayo iti Dios. Ti pilitayo ket saan a naibatay iti narabaw a pannakaammo iti sumagmamano a kasuratan, no di ket iti nauneg a panagadal iti Sao ti Dios. Gapuna, naammuantayo ti adu a makapabileg a detalye maipapan iti tawid nga ikari ni Jehova kadagidiay ‘manggun-od iti pannakaammo maipapan kenkuana ken iti daydiay imbaonna, ni Jesu-Kristo.’—Juan 17:3; Roma 12:2.

² Tapno agtalinaedtayo kas pudno a Kristiano, masapul a mangaramidtayo kadagiti desision a makaay-ayo iti nailangitan nga Amatayo. Usigen daytoy nga artikulo dagitoy a napapateg a saludsod: Ania ti tawidtayo? Kasano ti rumbeng a panangmatmattayo iti dayta? Kasanotayo a masigurado a matagikuatayo ti tawidtayo? Ania ti makatulong tapno makaaramidtayo kadagiti nainsiriban a desision?

3. Ania a tawid ti awatento dagiti (a) napulotan ken (b) “sabsabali a karnero”?

³ Adda laeng sumagmamano a bilang dagiti Kristiano a mangnamnama nga umawat iti “di agrupsa ken di natulawan ken di agkupas a tawid”—ti di magatadan a pribilehio a makipagturay ken Kristo idiay langit. (1 Ped. 1:3, 4) Masapul a “mayanak manen” dagitoy nga indibidual tapno matagikuada dayta a tawid. (Juan 3:1-3) Ania met ti tawid dagiti minilion a “sabsabali a karnero” ni Jesus a makitimtimpuyog kadagiti napulotan a pasurotna iti  pannakaikasaba ti naimbag a damag ti Pagarian ti Dios? (Juan 10:16) Awatendanto ti tawid a saan a pulos naawat da Adan ken Eva gapu iti panagbasolda—ti agnanayon a biag iti paraiso a daga nga awanen ti panagsagaba, ipapatay, ken panagleddaang. (Apoc. 21:1-4) Inkari ngarud ni Jesus iti managdakdakes a kaduana a nailansa iti kayo a pagtutuokan: “Pudno ibagak kenka ita nga aldaw, Makikaduakanto kaniak idiay Paraiso.”—Luc. 23:43.

4. Aniada a bendision ti agdama a tagtagiragsakentayo?

⁴ Uray itan, tagtagiragsakentayo ti sumagmamano nga aspeto ti tawidtayo. Gapu iti pammatitayo iti “subbot nga imbayad ni Kristo Jesus,” natalna ti riknatayo ken nasingedtayo iti Dios. (Roma 3:23-25) Nalawag kadatayo dagiti napapateg a kari a linaon ti Sao ti Dios. Karamantayo met iti maysa nga internasional a panagkakabsat a gubuayan ti aglaplapusanan a rag-o. Ken nagsayaat a pribilehio ti panagbalin a maysa a Saksi ni Jehova. Anian a yamantayo iti daytoy a tawidtayo!

5. Ania ti ikagkagumaan ni Satanas nga aramiden mainaig iti ili ti Dios, ken ania ti makatulong kadatayo nga agtakder a sititibker maibusor kadagiti pangallilawna?

⁵ Ngem tapno masaluadantayo ti nagsayaat a tawidtayo, masapul nga agtalinaedtayo a nasiput kadagiti taktika ni Satanas. Kankanayon a padasen ni Satanas nga impluensiaan ti ili ti Dios tapno makaaramidda iti desision a pakapukawan ti tawidda. (Num. 25:1-3, 9) Gapu ta ammo ni Satanas nga asidegen ti panagpatinggana, kasta unay ti panangikagumaanna a mangyaw-awan kadatayo. (Basaen ti Apocalipsis 12:12, 17.) Tapno ‘makapagtakdertayo a sititibker maibusor kadagiti pangallilaw ti Diablo,’ masapul nga agtultuloy a tagipatgentayo ti tawidtayo. (Efe. 6:11) Mainaig iti dayta, adda napapateg a leksion a maadaltayo ken Esau nga inauna nga anak ni Isaac.

6, 7. Asino ni Esau, ken ania ti agur-uray a tawidna?

⁶ Agarup 4,000 a tawenen ti napalabas, naipasngay dagiti singin nga annak da Isaac ken Rebecca—da Esau ken Jacob. Bayat ti idadakkelda, nagduma ti kababalin ken paggugustoda nga aramiden. “Ni Esau nagbalin a maysa a lalaki nga ammona ti aganup, lalaki ti tay-ak,” idinto ta “ni Jacob [ket] maysa a lalaki nga awan pakababalawanna, agnanaed kadagiti tolda.” (Gen. 25:27) Sigun iti managipatarus iti Biblia a ni Robert Alter, ti Hebreo a sao a naipatarus nga “awan pakababalawanna” kaipapananna ti “kinatarnaw wenno kinainosente.”

⁷ Idi agtawenen da Esau ken Jacob iti 15, natay ti loloda a ni Abraham, ngem nagtalinaed ti kari ni Jehova ken Abraham. Idi agangay, inulit dayta ni Jehova ken Isaac. Imbagana nga amin dagiti nasion iti daga bendisionandanto ti bagbagida babaen ti bin-i ni Abraham. (Basaen ti Genesis 26:3-5.) Impalgak dayta a kari a ti Mesias—ti matalek a “bin-i” iti Genesis 3:15—ket agtaud iti kaputotan ni Abraham. Kas inauna nga anak ni Isaac, adda legal a kalintegan ni Esau iti dayta a kari. Anian a nagsayaat a tawid ti agur-uray ken Esau! Ngem tinagipategna kadi dayta?

8, 9. (a) Ania ti pinili ni Esau mainaig iti tawidna? (b) Tawtawen kalpasanna, ania ti nabigbig ni Esau mainaig iti pilina, ken ania ti reaksionna?

⁸ Maysa nga aldaw a simmangpet ni Esau manipud iti tay-ak, nakitana a “mangpabpaburek ni Jacob iti gisado.” “Darasem, pangngaasim,” kinuna ni Esau, “ikkannak ti sangkatilmon iti nalabaga—ti nalabaga dita, ta nabannogak!” Insungbat ni Jacob: “Ilakom kaniak, umuna iti amin, ti kalintegam kas inauna!” Ania ti pinili ni Esau? Sidudursok nga insungbatna: “Ania ti pagimbagan kaniak ti kalintegan iti pannakayanak?” Wen, mas pinili ni Esau ti sangamalukong a gisado ngem iti kalinteganna kas inauna! Tapno agbalin a legal ti saritaanda, impilit ni  Jacob: “Agsapataka kaniak umuna iti amin!” Saan a nagpangadua ni Esau a nangisuko iti kalinteganna kas inauna. Kalpasanna, “ni Jacob nangted ken Esau iti tinapay ken gisado a lentehas, ket isu nangan ken imminum. Kalpasanna timmakder ket napanen. Gapuna inumsi ni Esau ti kalintegan iti pannakayanak.”—Gen. 25:29-34.

⁹ Tawtawen kalpasanna, idi marikna ni Isaac a dandanin matay, sinigurado ni Rebecca a ni Jacob ti umawat iti kalintegan ti pannakayanak nga inlako kenkuana ni Esau. Nabigbig ni Esau idi agangay a minamaag ti pilina, ket impakaasina ken Isaac: “Bendisionannak, uray siak met, amak! . . . Saannak kadi nga inteddaan iti bendision?” Idi imbaga ni Isaac a saannan a maibabawi ti bendision nga insawangna ken Jacob, “impigsa ni Esau ti timekna ket nagsangit.”—Gen. 27:30-38.

10. Ania ti panangmatmat ni Jehova kada Esau ken Jacob, ken apay?

¹⁰ Aniada nga aspeto ti kababalin ni Esau ti makitatayo iti salaysay? Impakitana a napatpateg kenkuana ti nainlasagan a tarigagayna ngem iti masanguanan a bendision nga agur-uray kenkuana kas paset ti tawidna. Saan nga impateg ni Esau ti kalinteganna iti pannakayanak ken nabatad a saanna nga ay-ayaten ti Dios. Dina met pinampanunot no anianto ti epekto ti tignayna kadagiti kaputotanna. Iti sabali a bangir, impateg unay ni Jacob ti tawidna. Kas pagarigan, nagtulnog ni Jacob iti bilin dagiti nagannakna maipapan iti panagpili iti asawa. (Gen. 27:46–28:3) Gapu ta sidadaan nga aganus ken agsakripisio kas panagtulnogna, nabendisionan nga agbalin nga inapo ti Mesias. Ania ti panangmatmat ti Dios kada Esau ken Jacob? Kinuna ni Jehova babaen ken propeta Malakias: “Inayatko ni Jacob, ket ginurak ni Esau.”—Mal. 1:2, 3.

11. (a) Kas Kristiano, kasanotayo a magunggonaan iti salaysay maipapan ken Esau? (b) Idi tinukoy ni Pablo ti inaramid ni Esau, apay a dinakamatna ti pannakiabig?

¹¹ Napateg kadi kadagiti Kristiano ita ti kunaen ti Biblia maipapan ken Esau? Wen. Binallaagan ni apostol Pablo dagiti padana a Kristiano nga agannadda nga “awan koma ti mannakiabig wenno uray asinoman a saan a mangtagipateg iti sagrado a bambanag, a kas ken Esau, nga impadawatna dagiti kalinteganna kas inauna a kasukat ti maysa a pannangan.” (Heb. 12:16) Agaplikar pay laeng kadagiti Kristiano dayta a pakdaar. Masapul a taginayonentayo ti panangipategtayo iti sagrado a bambanag tapno malabanantayo dagiti nainlasagan a tarigagay ket saantay a mapukaw ti naespirituan a tawidtayo. Ngem apay a dinakamat ni Pablo ti pannakiabig idi tinukoyna ti inaramid ni Esau? Agsipud ta no agtignaytayo kas ken Esau a tumuloktayo iti nainlasagan a tartarigagaytayo, nalakatayo a makaaramid iti basol, kas ti  pannakiabig. Gapu iti dayta, mabalin a mapukawtayo ti tawidtayo.

12. (a) Kasano a sulsulisogen ni Satanas ti tunggal maysa kadatayo? (b) Mangted iti pagarigan iti Kasuratan a makatulong no maipasangotayo iti sulisog.

¹² Kas ad-adipen ni Jehova, ikagumaantay a liklikan dagiti situasion a mangsulisog kadatayo nga agaramid iti immoralidad. Imbes ketdi, ikararagtayo ken Jehova a Dios a tulongannatay a saan a tumulok iti sulisog. (Mat. 6:13) Ngem kanayon nga ikagkagumaan ni Satanas a dadaelen ti espiritualidadtayo bayat nga itultuloytay ti agbalin a natarnaw iti daytoy dakes a lubong. (Efe. 6:12) Kas dios daytoy dakes a sistema ti bambanag, ammo ti Diablo no kasano a gundawayan dagiti imperpekto a tarigagaytayo babaen ti panangaramatna kadagiti sulisog a kadawyan iti imperpekto a tao. (1 Cor. 10:8, 13) Kas pagarigan, ipapanmo a maipaspasangoka iti sulisog nga agaramid iti immoral. Ania ti aramidem? Agbalinka kadi a kas ken Esau, a sidadaras a timmulok iti sulisog? Wenno labanam ti sulisog ken adaywam, kas iti inaramid ni Jose nga anak ni Jacob idi sinulisog ti asawa ni Potifar?—Basaen ti Genesis 39:10-12.

13. (a) Iti kaaldawantayo, kasano nga agtigtignay ti adu a kas ken Jose, ngem kasano met nga agtigtignay ti dadduma kas ken Esau? (b) Ania ti masapul nga aramidentayo tapno saantay a makapagtignay a kas ken Esau?

¹³ Adu a kakabsattayo ti naipasango kadagiti sulisog ket masapul nga agpilida no tuladenda ti inaramid ni Esau wenno ni Jose. Nainsiriban a nagtignay ti kaaduan ket naparagsakda ti puso ni Jehova. (Prov. 27:11) Ngem nagtignay a kas ken Esau ti dadduma idi naipasangoda iti sulisog, ket nagpeggad ti naespirituan a tawidda. Kinapudnona, adu ti matubtubngar ken mailaklaksid iti tinawen gapu iti seksual nga immoralidad. Napateg ngarud nga isaganatayo itan ti pusotayo—sakbay a maipasangotayo kadagiti kasasaad a mangsubok iti kinatarnawtayo! (Sal. 78:8) Adda dua nga addang a mabalintay nga aramiden tapno masarangettayo ti sulisog ken makaaramidtayo iti nainsiriban a desision inton agangay.

14. Ania a salsaludsod ti makatulong kadatayo a ‘marurod iti dakes’ ken ‘kumpet iti naimbag’?

¹⁴ Ti umuna nga addang isu ti panangpanunot iti pagbanagan dagiti tignaytayo. Naun-uneg ti panangipategtayo iti naespirituan a tawidtayo no nauneg ti ayattayo ken Jehova, ti Gubuayan dayta a tawid. No ay-ayatentayo ti maysa a tao, siempre ditay kayat a masaktan. Imbes ketdi, ikagumaantayo a paragsaken. Nasayaat ngarud a panunotentayo ti epekto kadatayo ken iti sabsabali no tumuloktayo iti narugit a nainlasagan a tarigagaytayo. Isaludsodtayo iti bagitayo: ‘Ania ngata ti epekto ti inaagum a tignayko iti relasionko ken Jehova? Anianto ngata ti epektona iti pamiliak ti dakes a tignayko? Anianto ngata ti epekto dayta kadagiti kakabsat iti kongregasion? Addanto ngata maitibkol?’ (Fil. 1:10) Mabalin met nga isaludsodtayo: ‘Ipalubosko kadi nga agsagabaak gapu laeng iti apagkanito a ragsak? Kayatko kadi ti maipada ken Esau, a sipapaitakto nga agsangit inton mabigbigko ti dakes nga inaramidko?’ (Heb. 12:17) Ti panangpanunot iti kakasta a saludsod matulongannatayo a ‘marurod iti dakes’ ken ‘kumpet iti naimbag.’ (Roma 12:9) Ti koma ayattayo ken Jehova ti nangnangruna a mangtignay kadatayo a mangpetpet iti tawidtayo.—Sal. 73:28.

15. Ania ti mangpabileg iti naespirituan a depensatayo a mangsaranget kadagiti sulisog a mamagpeggad iti espiritualidadtayo?

¹⁵ Ti maikadua nga addang ket ti panagsagana a mangsaranget iti sulisog. Adu a probision ti impaay ni Jehova tapno makapagsaganatayo a mangsaranget kadagiti sulisog a mamagpeggad iti espiritualidadtayo. Ramanen dagita ti panagadal iti Biblia, Nakristianuan a gimgimong, ministerio, ken  panagkararag. (1 Cor. 15:58) Tunggal yebkastayo ken Jehova ti linaon ti pusotayo ken tunggal makiramantayo iti ministerio, pabpabilgentayo ti bagitayo a mangsaranget kadagiti sulisog. (Basaen ti 1 Timoteo 6:12, 19.) No itultuloytayo nga aramiden dagitoy, tumibker ti depensatayo a mangsaranget iti sulisog. (Gal. 6:7) Naitampok daytoy iti maikadua a kapitulo ti Proverbio.

16, 17. Kasanotayo a makagun-od iti abilidad a mangaramid kadagiti nainsiriban a desision?

¹⁶ Paregtaennatayo ti Proverbio kapitulo 2 a gumun-od iti sirib ken pannakabael nga agpanunot. Makatulong dagitoy a kualidad tapno maikeddengtayo ti umiso ken di umiso ken makontroltayo dagiti tarigagaytayo imbes a tumuloktayo kadagita. Ngem agballigitayo laeng a mangaramid iti dayta no situtuloktayo nga agregget. Kuna ti Biblia: “Anakko, no awatemto ti sasaok ket idulinmo kenka dagiti bukodko a bilin, tapno ti sirib ipangagmo babaen ti lapayagmo, iti kasta mapagannayasmo ta pusom iti panangilasin; mainayon pay, no agpukkawka maipaay iti mismo a pannakaawat ket iyesngawmo ti timekmo maipaay iti mismo a panangilasin, no itultuloymo a sapulen dayta kas iti pirak, ken kas kadagiti nalmeng a gameng itultuloymo a biroken dayta, iti kasta maawatamto ti panagbuteng ken Jehova, ket masarakamto ti mismo a pannakaammo iti Dios. Ta ni met laeng Jehova mangted iti sirib; manipud ngiwatna adda pannakaammo ken panangilasin.”—Prov. 2:1-6.

¹⁷ Nalawag ngarud nga agballigitayo a gumun-od iti abilidad a kasapulan iti panangaramid kadagiti nainsiriban a desision no yaplikartayo dagiti dinakamat ti Proverbio. Masarangettayo dagiti sulisog no bay-antayo a ti sasao ni Jehova ti mangsukog iti makin-uneg a kinataotayo, no di agressat nga ikararagtayo ti panangiwanwan ti Dios, ken no itultuloytayo a sapulen ti pannakaammo ti Dios a kas ‘tay agbirbiroktayo iti nalmeng a gameng.

18. Ania koma ti determinasionmo, ken apay?

¹⁸ Mangipapaay ni Jehova iti pannakaammo, pannakaawat, panangilasin, ken sirib kadagidiay mangikagumaan a mangbirok kadagita. No ad-adda a sapulen ken usarentayo dagita, ad-adda met a sumingedtayo ken Jehova. Dayta a nasinged a relasiontayo iti Dios ti agserbi a salaknibtayo no maipasangotayo iti sulisog. Ti yaadanitayo ken Jehova ken ti panagbutengtayo kenkuana ti mangsalaknib kadatayo nga agaramid iti dakes. (Sal. 25:14; Sant. 4:8) Ti pannakigayyemtayo ken Jehova ken ti panangyaplikartayo iti sirib nga ipapaayna ti mangtignay kadatayo nga agtultuloy a mangaramid kadagiti desision a mangparagsak iti puso ni Jehova ken mangsalaknib iti tawidtayo.