1, 2. (a) Ki ti aide ou pou prend decision pou servi Bondié? (b) Ki bann question nou pou examiné dan sa lartik-la concernant nou l’heritage spirituel?

 PLUSIEURS million parmi nou finn prend enn bon decision pou servi Jéhovah ek pou imite l’exemple Jésus Christ. (Mat. 16:24; 1 Pierre 2:21) Decision ki nou ti prend pou voué nou la vie ar Bondié, ti enn decision bien serieux. Nou decision ti basé lor enn l’etude profond Parole Bondié, pa zis lor enn ti connaissance deux-trois verset la Bible. Sa l’etude-la ti permette nou aprann beaucoup detail ki ti fortifié nou la foi concernant l’heritage ki Jéhovah inn donne bann ki ‘aprann pou konn Li ek celui ki Li finn envoyé, Jésus Christ.’​—Jean 17:3; Rom. 12:2.

² Pou nou contigne garde bann bon relation avek Jéhovah, nou bizin prend bann decision ki faire Li plaisir. Alors, dan sa lartik-la nou pou examine sa bann question important-la: Ki été nou l’heritage? Couma nou bizin considere sa l’heritage-la? Couma nou kapav faire sur ki nou gagne li? Ki pou aide nou pou prend bann bon decision?

3. Ki l’heritage pé attann (a) bann Chretien oint ek (b) bann “lezot brebis”?

³ Zis enn tigit Chretien pé attann pou gagne “enn l’heritage ki pa kapav pourri, ni vinn impur, ni fletri” setadir privilege pou regne avek Jésus Christ dan le ciel, enn privilege ki ena enn grand valeur. (1 Pierre 1:3, 4) Pou gagne sa l’heritage-la, sa bann Chretien-la pou bizin “né encore enn fois.” (Jean 3:1-3) Ki l’heritage plusieurs million “lezot brebis” ki travail ensam avek bann Chretien oint pou preche la bonne nouvelle lor Royaume Bondié, pou gagné? (Jean 10:16) Zot pou gagne l’heritage ki Adam ek Ève inn perdi a cause zot  peché​—la vie eternel dan enn paradis lor la terre kot pa pou ena souffrance, la mort ou-soit deuil. (Rév. 21:1-4) Jésus ti promette enn bandit ki ti lor enn poteau pré kot li: “Vrai-mem mo dire toi zordi: To pou avek moi dan Paradis.”​—Luc 23:43.

4. Ki bann benediction nou pé deja gagné?

⁴ Deja dan nou lepok, nou l’heritage faire nou gagne certain bienfait. Nou la foi dan la “ranson ki Christ Jésus inn payé” faire nou ena la paix au fond nou-mem ek bann bon relation avek Bondié. (Rom. 3:23-25) Nou bien comprend bann promesse ki trouve dan Parole Bondié. En plus, nou ena la joie pou forme partie dan enn famille international ki content nou. Enn grand privilege ki nou ena c’est ki nou enn parmi bann Témoins de Jéhovah. Pena doute ki nou accorde enn grand valeur ar nou l’heritage!

5. Ki Satan inn essaye faire ar peuple Bondié, ek ki kapav aide nou pou tini ferme kont so bann manigance?

⁵ Mais, pou nou kapav garde nou l’heritage, nou bizin faire bien attention pou pa tombe dan bann piege Satan. Satan finn touletan essaye tente peuple Bondié pou prend bann decision ki pou faire zot perdi zot l’heritage. (Nomb. 25:1-3, 9) Satan koné ki la fin pré, alors li pé faire plus zeffort pou detourne nou ar Jéhovah. (Lire Révélation 12:12, 17.) Si nou envie “tini ferme kont bann manigance Satan le Diable,” nou bizin contigne accorde enn grand valeur nou l’heritage. (Éph. 6:11) Nou kapav tire bann leson important ar fason ki Ésaü, garson Isaac, ti considere so l’heritage.

6, 7. Kisannla Ésaü ti été, ek ki l’heritage ti pé attann li?

⁶ Ena apepré 4,000 an, Isaac et Rébecca ti gagne bann jumeau, Ésaü ek Jacob. A mesure ki bann garson-la ti pé grandi, zot caractere ek bann l’activité ki zot ti choisir ti bien different. “Ésaü ti vinn enn zom ki ti konn la chasse, enn zom ki ti passe so le temps dehors,” alors ki “Jacob ti vinn enn zom ki personne pa ti kapav faire okenn reproche, ki ti reste dan bann la tente.” (Gen. 25:27) Dapré Robert Alter, enn traducteur la Bible, mot Hébreu ki’nn traduire par “pa kapav faire okenn reproche” “donne l’idée enn dimoune ki ena l’integrité ou-soit mem ki innocent.”

⁷ Kan Ésaü ek Jacob ti ena 15 an, Abraham zot grand-pere ti mort, mais Jéhovah ti rappel promesse ki Li ti faire avek Abraham. Plitar, Jéhovah ti repete sa promesse-la ar Isaac. Bondié ti dire ki tou bann nation lor la terre pou attire benediction lor zot-mem par moyen descendance Abraham. (Lire Genèse 26:3-5.) Sa promesse-la ti montré ki le Messie​—“descendance” ki mentionné dan Genèse 3:15​—ti pou enn parmi bann descendant Abraham. Alors, Ésaü, en tant ki garson premier-né Isaac ti ena droit legal pou gagne sa promesse-la. Enn grand l’heritage ti pé attann Ésaü, pa vrai? Eski li ti apprecié sa?

8, 9. (a) Ki decision Ésaü ti prend concernant so l’heritage? (b) Plusieurs l’année plitar, ki Ésaü ti realisé concernant so decision, ek couma li ti reagir?

⁸ Enn jour kan Ésaü ti sorti la campagne, li ti trouve Jacob “pé cuit enn mangé.” Ésaü ti dire li: “S’il te plait, degazé donne moi sa la soupe rouge-la pou mo mangé, sa la soupe rouge-la, parski mo fatigué!” Jacob ti dire li: “Avant, vann to droit premier-né ar moi!” Ki decision Ésaü ti prend? Li ti dire Jacob: “Mo pé al mort-mem-la; sa droit premier-né-la, ki sa pou servi moi sa?” Oui, Ésaü ti choisir enn bol lentille au lieu ki so droit premier-né! Pou ki zot l’arrangement vinn legal, Jacob ti dire Ésaü: “Faire serment ar moi avant!” Sans okenn hesitation, Ésaü ti renonce so droit premier-né. Apré sa, “Jacob ti donne Ésaü di-pain ek enn bol lentille, ek li ti mangé ek li ti boire. Apré sa, li ti levé ek li ti allé. C’est coumsa ki Ésaü  ti meprise so droit premier-né.”​—Gen. 25:29-34.

⁹ Plusieurs l’année plitar, kan Isaac ti pensé ki li ti pré pou mort, Rébecca ti faire bann l’arrangement pou ki Jacob kapav gagne droit premier-né ki Ésaü ti vann avek li. Kan Ésaü ti realisé ki li ti’nn prend enn mauvais decision, li ti suppliye Isaac: “Papa, beni moi, oui mo aussi! . . . Eski enn benediction aussi to pa’nn garde pou moi ?” Kan Isaac ti dire ki li pa pou kapav change benediction ki li ti’nn deja donne Jacob, “Ésaü ti criyé fort ek ti ploré.”​—Gen. 27:30-38.

10. Ki Jéhovah ti pensé lor Ésaü ek lor Jacob, ek kifer?

¹⁰ Ki nou kapav aprann ar l’attitude Ésaü dapré sa recit-la? Ésaü ti montré ki seki ti pli important pou li, c’est satisfaire so bann prop desir au lieu ki gagne bann benediction ki Jéhovah ti promette ek ki ti forme partie dan so l’heritage. Ésaü pa ti accorde enn grand l’importance ar so droit premier-né ek sa ti montré ki li pa ti vrai-mem content Bondié. En plus, Ésaü pa ti pense bann consequence ki so choix ti pou ena lor so bann descendant. Par kont, Jacob li, li ti bien apprecié so l’heritage. Par exemple, li ti agir en accord avek bann instruction so parent kan li ti choisir enn femme pou li marié. (Gen. 27:46–28:3) Jacob ti faire enn choix ki ti demann li pou ena patience ek pou faire bann sacrifice, a cause sa, li ti vinn enn ancetre le Messie. Ki Bondié ti pensé lor Ésaü ek Jacob? Par l’intermediaire prophete Malaki, Jéhovah ti dire: “Mo ti content Jacob ek mo ti ena la haine pou Ésaü?”​—Mal. 1:2, 3.

11. (a) Kifer l’exemple Ésaü concerne nou en tant ki Chretien? (b) Kifer Paul ti associé fornication avek seki Ésaü ti faire?

¹¹ Eski seki la Bible dire lor Ésaü concerne bann Chretien zordi? Oui, bien sur. L’apotre Paul ti averti bann Chretien pou zot faire attention ki “pena okenn fornicateur, ni enn kikenn ki pena respé pou bann kitsoz sacré, couma Ésaü ki’nn change so droit premier-né pou enn sel l’assiette mangé.” (Héb. 12:16) Sa l’avertissement-la encore applik ar bann Chretien zordi. Nou bizin contigne accorde enn grand l’importance ar bann kitsoz sacré pou ki nou bann mauvais desir pa controle nou ek faire nou perdi nou l’heritage spirituel. Kifer eski Paul ti associé fornication avek seki Ésaü ti faire? Parski si nou agir pareil couma Ésaü, nou riské meprise bann kitsoz sacré ek laisse nou bann mauvais desir controle nou, ek commette enn peché couma fornication.

12. (a) Couma Satan mette bann tentation devant nou? (b) Donne bann l’exemple biblik ki kapav aide nou kan nou tenté pou faire le mal.

¹² En tant ki bann serviteur Jéhovah,  pena doute ki nou faire tou pou evite bann situation ki kapav tente nou pou commette l’immoralité sexuel. Au contraire, nou prié pou ki Jéhovah aide nou pou resisté kan enn kikenn tente nou pou desobeir Li. (Mat. 6:13) Mais Satan touletan essaye affaibli nou spiritualité alors ki nou pé faire zeffort pou garde nou l’integrité dan sa mauvais le monde-la. (Éph. 6:12) Satan le Diable li-mem bondié sa mauvais le monde-la, alors li koné couma pou exploite nou bann mauvais desir pou tente nou pou faire le mal. (1 Cor. 10:8, 13) Par exemple, supposé ki ou dan enn situation kot ou tenté pou faire enn kitsoz immoral. Ki ou pou decidé pou faire? Eski ou pou faire pareil couma Ésaü ek ou pou rod gagne vite seki ou envie? Ou-soit eski ou pou resisté ar sa tentation-la ek ou pou sauvé, pareil couma Joseph, garson Jacob ti faire kan femme Potiphar ti tente li?​—Lire Genèse 39:10-12.

13. (a) Zordi, couma beaucoup finn agir pareil couma Joseph, mais couma certain finn agir pareil couma Ésaü? (b) Ki li bien important pou nou faire pou ki nou pa agir pareil couma Ésaü?

¹³ Beaucoup parmi nou bann frere ek soeur finn trouve-zot dan bann situation kot zot ti bizin choisir soit pou agir couma Ésaü soit couma Joseph. La plupart finn agir avek sagesse ek finn faire leker Jéhovah plaisir. (Prov. 27:11) Selman, certain ti choisir pou agir pareil couma Ésaü kan zot ti tenté pou faire le mal, zot ti mette zot l’heritage spirituel en danger. En realité, la plupart comité judiciaire ek exclusion ki ena chaque l’année concerne bann cas kot finn ena l’immoralité sexuel. Alors, li vrai-mem bien important ki nou prepare nou leker asterla-mem​—bien avant ki nou dan bann situation ki testé nou l’integrité! (Ps. 78:8) Nou kapav faire au moins deux kitsoz ki pou protege nou kont bann tentation ek pou aide nou prend bann bon decision plitar.

14. Ki bann question pou aide nou pou “ena degout pou seki mauvais” ek pou “reste attaché ar seki bon”?

¹⁴ Premier kitsoz ki nou bizin faire c’est reflechi lor consequence nou bann action. Plus nou content Jéhovah, plus nou pou apprecié nou l’heritage spirituel. Kan nou content enn dimoune, nou pa pou envie blesse li. Au contraire, nou faire tou pou gagne so faveur. Alors, nou bizin prend le temps pou reflechi lor consequence ki nou bann action pou ena lor nou ek lor lezot, si nou faire enn kitsoz immoral. Nou bizin demann-nou-mem: ‘Couma enn conduite egoïste kapav affecté mo relation avek Jéhovah? Ki l’effet sa mauvais action-la pou ena lor mo famille? Couma sa pou affecté bann membre dan mo congregation? Eski sa kapav faire lezot tombé lor plan spirituel?’ (Phil. 1:10) Nou kapav aussi demann-nou-mem: ‘Eski enn tipé plaisir immoral vaut sa prix ki mo pou bizin payé apré-la? Eski vrai-mem mo envie fini pareil couma Ésaü, ki ti bien ploré kan li ti realisé seki li ti’nn faire?’ (Héb. 12:17) Si nou reflechi lor sa bann question-la, sa pou aide nou pou “ena degout pou seki mauvais,” ek pou “reste attaché ar seki bon.” (Rom. 12:9) Mais c’est surtout nou l’amour pou Jéhovah ki pou pousse nou pou reste attaché ar nou l’heritage.​—Ps. 73:28.

15. Couma nou kapav prepare-nou pou resisté kont bann tentation ki mette nou spiritualité en danger?

¹⁵ Deuxieme kitsoz ki nou bizin faire c’est prepare-nou pou resisté kont bann tentation. Jéhovah finn prend beaucoup disposition pou aide nou resisté kont bann tentation ki ena dan le monde ek ki kapav mette en danger nou spiritualité. Parmi ena l’etude la Bible, bann reunion, predication, ek la priere. (1 Cor. 15:58) Chaque fois ki nou ouvert nou leker ar Jéhovah ek chaque fois ki nou participe avek zele dan  predication, c’est coumadir nou pé fortifié nou protection kont bann tentation. (Lire 1 Timothée 6:12, 19.) Nou bizin contigne faire zeffort pou faire sa bann kitsoz-la si nou envie bien prepare-nou pou resisté kont bann tentation. (Gal. 6:7) C’est seki nou trouvé dan Proverbes chapitre deux.

16, 17. Ki pou aide nou pou prend bann bon decision?

¹⁶ Proverbes chapitre 2 encourage nou pou gagne la sagesse ek capacité pou reflechi. Sa bann qualité-la permette nou pou choisir entre le bien ek le mal. Zot aussi aide nou pou controle nou bann desir au lieu ki nou laisse zot pousse nou pou faire le mal. Mais nou pou reussi faire sa selman si nou disposé pou faire zeffort. La Bible dire: “Mo garson, si to ecoute mo bann parole, ek to garde bien dan to leker mo bann commandement, pou ecoute bien la sagesse, pou ki to kapav ouvert to leker pou gagne discernement; si, en plus to appel l’intelligence, ek to criyé pou gagne discernement, si to contigne rod sa coumadir to pé rod l’argent ek si to contigne rod sa couma bann tresor ki finn cachiette, lerla, to pou comprend la crainte pou Jéhovah, ek to pou trouve connaissance Bondié. Parski Jéhovah Li-mem donne la sagesse; connaissance ek bon jugement sorti dan so la bouche.”​—Prov. 2:1-6.

¹⁷ Alors, li clair ki pou nou kapav prend bann bon decision sa depann lor bann zeffort ki nou faire pou mette en pratik seki’nn ecrire dan Proverbes. Nou pou reussi resisté kont bann tentation si nou laisse bann parole Jéhovah change nou personnalité, si nou contigne prié pou gagne direction Bondié, ek si nou contigne rod connaissance coumadir nou pé rod bann tresor ki finn cachiette.

18. Ki ou bien decidé pou contigne faire, ek kifer?

¹⁸ Jéhovah donne connaissance, l’intelligence, discernement ek sagesse bann ki faire zeffort pou gagne sa bann qualité-la. Plus nou rod gagne sa bann qualité-la ek nou servi zot, plus nou pou vinn proche avek Jéhovah. En retour, nou bann bon relation avek Jéhovah pou protege nou kan nou devant enn tentation. Kan nou proche avek Jéhovah ek kan nou ena enn grand la crainte pou Li, sa pou protege nou ek pou empeche nou faire le mal. (Ps. 25:14; Jacq. 4:8) Nou l’amitié avek Jéhovah ek sagesse ki Li donne nou pou aide nou prend bann bon decision ki pou faire Li plaisir ek ki pou protege nou l’heritage.