1, 2. (a) Akin et nandesisyon kan manlingkor ed Dios? (b) Anto ray nitepet tayo nipaakar ed espiritual ya tawir tayo?

MINILYON ed sikatayo so makabat a nandesisyon ya manlingkor ed si Jehova a Dios tan mangalig ed alimbawa nen Jesu-Kristo. (Mat. 16:24; 1 Ped. 2:21) Agtayo ibabaliwala so dedikasyon tayo ed Dios. Say desisyon tayo et aglabat akabased manunan bangat na Biblia, noag diad maalwar ya impanaral ed Salita to. Lapud satan, dakel so naaralan tayon makapabiskeg na pananisian detalye nipaakar ed tawir ya itatarya nen Jehova parad saray ‘mangakabat ed sikato tan ed samay imbaki to, si Jesu-Kristo.’—Juan 17:3; Roma 12:2.

² Pian napansiansia tayoy maong ya relasyon ed si Jehova, kaukolan tayoy manggawa na makabat iran desisyon ya mamaliket ed sikato. Pantongtongan ed sayan artikulo irayan importantin tepet: Anto so tawir tayo? Antoy pangipapasen tayod satan? Panon tayon naseguro ya naawat tayo itan? Antoy ontulong ed sikatayon manggawa na makabat iran desisyon?

3. Anto so tawir na (a) saray alanaan tan (b) ‘arum a karnero’?

³ Daiset labat ya Kristiano so walaay ilalon mangawat na “agnaderal tan agnarutakan tan ag-onkupas a tawir.” Walay espisyal ya pribilehyo dan manuley ed tawen kaibay Kristo. (1 Ped. 1:3, 4) Pian naawat da itan ya tawir, kaukolan ya ‘nianak ira lamet.’ (Juan 3:1-3) Panon to balet iray minilyon ya ‘arum a karnero’ nen Jesus, ya kaiba na saray alanaan a mangipupulong ed maong a balita na Panarian na Dios? (Juan 10:16) Awaten day tawir ya ag-inawat di Adan tan Eva, say  bilay ya andi-anggaan diad paraison dalin ya anggapo lay irap, patey, odino ermen. (Apo. 21:1-4) Oniay insipan nen Jesus ed kriminal ya kaabay to: “Tua ibagak ed sika natan, Nakaiba ta ka ed Paraiso.”—Luc. 23:43.

4. Anto ran bendisyon so naaawat tayo la?

⁴ Natan ni labat et naaawat ti lay pigaran bendisyon na tawir tayo. Lapud pananisia tayo ed “dondon a binayaran nen Kristo Jesus,” walay deen na nonot tan maapit ya relasyon tayod Dios. (Roma 3:23-25) Natatalosan tayon maong so isisipan na Salitay Dios. Ontan met, say panangaro na agagi ed interon mundo so mamapaliket ya maong ed sikatayo. Tan baleg ya kagalangan so pagmaliw ya Tasi nen Jehova. Kanian talagan papablien tayoy tawir tayo!

5. Antoy sasalien nen Satanas ya gawaen ed totoo na Dios, tan antoy makatulong ed sikatayo pian makatalindeg ed saray masilib a paraan to?

⁵ Balet pian agtayo nabalang so tawir tayo, kaukolan ya naynay itayon alerto ed saray pakana nen Satanas. Lanang ya tutuksoen nen Satanas iray totoo na Dios ya manggaway lingon desisyon pian agda naawat so tawir da. (Num. 25:1-3, 9) Amta nen Satanas ya asingger lay kaderal to, kanian gagawaen toy anggaay nayarian ton palikdoen itayo. (Basaen so Apocalipsis 12:12, 17.) Pian ‘makatalindeg itayo sumpad saray masilib a paraan na Diablo,’ kaukolan ya lawas tayon pabpablien so tawir tayo. (Efe. 6:11) Nipaakar ed saya, makaaral tayo na importantin leksion ed anak nen Isaac ya si Esau.

6, 7. Siopa si Esau, tan anto komoy tawiren to?

⁶ Ngalngali 4,000 taon lay apalabas, nananak si Rebeca na kambal, si Esau tan Jacob. Nandumaay ugali tan hilig na sarayan kambal. “Si Esau [et] sakey nensaman a maong ya umaanop, sakey a too ed saray um-uma; et si Jacob balet mareen a nanay-ayam ed saray abel ya abung-abung.” (Gen. 25:27) Unong ed si Robert Alter, sakey ya managpatalos na Biblia, say Hebreon salitan impatalos ya “mareen” et “nayarin mankabaliksan met na katooran odino inka-inosente ni ingen.”

⁷ Nen 15 años di Esau tan Jacob, inatey si laki ran Abraham. Balet ag-alingwanan nen Jehova so sipan tod si Abraham. Ag-abayag, inulit itan nen Jehova ed kinen Isaac. Insipan ton nabendisyonan so amin a pamilya diad dalin panamegley na kapolian nen Abraham. (Basaen so Gawa 3:25.) Nipaamtad satan a sipan ya say Mesias—say matoor ya “ilalak” ya abitlad Genesis 3:15—et manlapud kapolian nen Abraham. Lapud si Esau so panguloan ya anak nen Isaac, walay legal ya kanepegan tod satan ya sipan. Talagan marakdakep so tawiren nen Esau! Balet inapresya to kasi?

8, 9. (a) Antoy desisyon nen Esau nipaakar ed inkapanguloan to? (b) Kayari na pigaran taon, antoy amoria nen Esau ed ginawa ton desisyon, tan antoy reaksion to?

⁸ Aminsan, kasempet nen Esau a nanlapud uma, anengneng ton ‘manlulutoy’ Jacob. Imbaga nen Esau: “[“Apuram,” NW] pakan mo ak pa ed satan so luto ya ambalanga, pikasik ed sika; ta makapuy ak.” Et inmebat si Jacob: “Ilakom ed siak ni sirin so pankatunongan mo ed inkapanguloan mo.” Antoy desisyon nen Esau? Oniay imbaga to: “Anto ta kasi kaabigan a gawaen ed siak na . . . inkapanguloan ko?” Mas pinili nen Esau so sanyaong ya lentehas nen say inkapanguloan to! Pian magmaliw ya legal so pangilako, kinerew nen Jacob: “Sambaan mo ni ed siak.” Agla nanisip si Esau, inlako ton tampol so inkapanguloan  to. “Et si Jacob angiter ed satan na tinapay tan saman so ambalanga a luto a lentehas; et sikato so angan tan inminum, insan inmalagey, tan iman la. Onia so impanmudmora nen Esau na inkapanguloan to.”—Gen. 25:29-34.

⁹ Kayari na pigaran taon, sanen nalilikna nen Isaac ya magano lay ipatey to, nanggawa na paraan si Rebeca pian naseguron naawat nen Jacob so inkapanguloan ya inlako nen Esau. Sanen amoria lanlamang nen Esau ya kaambagelan so desisyon to, akikasi ed si Isaac: “Ikdan yo ak pa met na bendisyon yo, ama! . . . Anggapo ta lay inkera yon bendisyon a para siak?” Nen imbaga nen Isaac ya agto la nababawi so bendisyon ya inter tod si Jacob, inmaki-akis si Esau.—Gen. 27:30-38, Maung a Balita.

10. Antoy panmoria nen Jehova ed si Esau tan Jacob, tan akin?

¹⁰ Based sayan salaysay ed Biblia, antoy naaralan tayod ugali nen Esau? Impanengneng ton mas importantid sikatoy pilpilalek na laman nen saray bendisyon ya katekep na tawir to. Imbaliwala toy inkapanguloan to tan apaneknekan ed satan ya agton talaga inaroy Dios. Sakey ni, agto ninonot so epekto ed saray anak to na gawaen to. Duma balet si Jacob, talagan pinabli toy tawir to. Singa bilang, tinulok toy bilin na atateng to nipaakar ed panangasawa. (Gen. 27:46–28:3) Tua, sayan desisyon nen Jacob et mankaukolay anos tan sakripisyo, balet abendisyonan ta diad kapolian to so nanlapuan na Mesias. Antoy panmoria nen Jehova ed si Esau tan Jacob? Panamegley nen propeta Malaquias, imbaga nen Jehova: “Inarok si Jacob, balet ginulak si Esau.”—Mal. 1:2, 3.

11. (a) Antoy naaralan na saray Kristiano ed istorya nen Esau? (b) Akin ya inkonekta nen Pablo so pilalawanan ed ginawa nen Esau?

¹¹ Wala kasi naaralan na saray Kristiano natan ed istorya nen Esau? On wala. Binilin nen apostol Pablo iray kapananisiaan ya manalwar “pian anggapoy managlawan odino siopaman ya agmamapabli ed sagrado iran bengatla, a singa si Esau, ya insalat to ed sakey a naakan iray kanepegan to bilang panguloan.” (Heb. 12:16) Onaplika nin siansia iyan pasakbay. Kaukolan a lawas tayon pablien iray sagradon bengatla pian ag-itayo nadaeg na pilpilalek na laman a manresultad pakabalang ed espiritual ya tawir tayo. Balet, akin ya inkonekta nen Pablo so pilalawanan ed ginawa nen Esau? Lapud no singa si Esau et manpadaeg tayod pilpilalek na laman, mainomay tayon isalat iray sagradon bengatla para labat ed imoral ya panlikliket, a singa say pilalawanan.

12. (a) Panon itayon papatitan nen Satanas? (b) Anto ray alimbawad Biblia ya makatulong ed sikatayo sano natutukson manggaway mauges?

¹² Bilang lingkor nen Jehova, seguradon agtayo gagalaen ya ipeligroy sarili tayo ed situasyon ya mangitonton ed panggaway imoral. Imbes, ipipikasi ti ni ingen ya agkomon iyabuloy nen Jehova ya napelag itayod panutukso na arum. (Mat. 6:13) Balet legan tayon panggugunaetan ya pansiansiaey katooran tayo ed sayan mauges a mundo, agmet tutundaan nen Satanas ya pakapuyey espiritualidad tayo. (Efe. 6:12) Bilang dios na sayan sistema na bengabengatla, amta na Diablo no panon ton itapang iray makapatukso ed sikatayo pian gawaen iray mauges ya pilalek na laman. (1 Cor. 10:8, 13) Singa bilang, panon to no wala kad situasyon ya mainomay moy makagawa na imoral? Antoy gawaen mo? Kasin aligen moy Esau tan ibagan: ‘Apuram! Ikdan mo ak!’ Odino ipulisay tan ibatikan moy tukso, a singa ginawa na anak nen Jacob a si Jose, ya tinukso na asawa nen Potifar?—Basaen so Genesis 39:10-12.

13. (a) Diad panaon tayo, panon ya inalig na dakel si Jose, balet panon ya inalig na arum si Esau? (b) Antoy gawaen tayo pian agtayo naalig si Esau?

¹³ Dakel ed saray agagi tayo so nipaarap ed situasyon ya kaukolan day manpili no kasin aligen day Esau odino si Jose. Maslak ed sikara et pinaliket day puso nen Jehova diad makabat ya impandesisyon da. (Uli. 27:11) Balet wala ray pigaran agagi ya angalig ed si Esau, tan impeligro day espiritual ya tawir da. Diad tua, dakel ed saray nadidisiplina odino nadidispelosip kada taon et lapud seksual ya imoralidad. Talagan importante sirin ya iparaan tayo lay puso tayo natan, antis tayon nipaarap ed situasyon ya pakasubokay katooran tayo! (Sal. 78:8) Pantongtongan tayoy duaran paraan ya ontulong pian nalabanay tukso tan makapanggaway makabat iran desisyon.

14. Anto ran tepet so ontulong ed sikatayon ‘nabusol so mauges tan ompeket ed maong’?

¹⁴ Say unonan paraan et say pannodnonot ed pansumpalan na gawaen tayo. Napatnagay kaaralem na panamabli ti’d espiritual ya tawir tayo diad kaaralem na panangaro tayod si Jehova, say Manangiter ed satan a tawir. No inaro tayoy sakey ya indibidual, agtayo labay ya nasakitan. Imbes, gawaen tayoy anggaay nayarian tayon sikatoy napaliket. Kanian, ipanaon ti’n nodnonoten so epektod sikatayo tan ed arum no manpadaeg tayod marutak ya pilpilalek. Oniay nepeg tayon itepet ed sarili tayo: ‘Anto kasi epektod relasyon kod si Jehova na makasarilin konduktak? Antoy epekto na satan ed pamilyak? Panon ya naapektoan iray agagid kongregasyon? Wala kasi nigapol ko?’ (Fil. 1:10) Nia ni nepeg tayon itepet: ‘Makabat kasi so magangganon seksual ya panliket no say kasalat to et pirmin ermen? Talaga kasin labay koy magmaliw ya singa si Esau, ya inmaki-akis sanen amoria toy ginawa to?’ (Heb. 12:17) Makatulong so pandalepdep ed saratan ya tepet pian ‘nabusol tayo so mauges, tan ompeket ed maong.’ (Roma 12:9) Say panangaro tayod si Jehova so mamakiwas ed sikatayon protektaay tawir tayo.—Sal. 73:28.

15. Antoy ontulong ed sikatayo pian nalabanay tukso tan naprotektaay espiritualidad tayo?

¹⁵ Say komadua et iparaan so sarili tayo pian nalabanay tukso. Dakel so intarya nen Jehova ed sikatayo pian nalabanan iray tukson mameligrod espiritualidad tayo. Kaibad saratan so panagaral na Biblia, pipiaral, panagpulong,  tan pikakasi. (1 Cor. 15:58) Kapagno ibebesngaw tayod si Jehova so nalilikna tayo tan kapagno makulikuli itayon manpupulong, ipaparaan tayoy sarili tayo pian nalabanay tukso. (Basaen so 1 Timoteo 6:12, 19.) Baleg so nagawaan na pansagpot pian magmaliw itayon mapekder ya mangidepensa. (Gal. 6:7) Saya so indanet ed komaduan kapitulo na Uliran.

16, 17. Antoy makatulong pian makapanggawa tayo na makabat iran desisyon?

¹⁶ Papasesegen itayo na Uliran kapitulo 2 ya gawaen so anggaay nayarian tayo pian nawalaay kakabatan tan abilidad ya mannonot. Ontulong irayan regalo pian nibiig tayo so duga tan aliwa, tan kontrolen so mauges a pilpilalek imbes ya peneken iratan. Balet pian ontalona tayo, kaukolan ya mabulos itayon mansagpot. Oniay impaliwawa na Biblia: “Ana’ko no awaten mo so saray salitak, tan yatol mo so saray ganggan ko ed sika; a singa pangikiling mo na layag mo ed kakabatan [“karunongan,” NW], tan ipeket mo so pusom ed pakatalos [“pakatebek,” NW]; on, no kelyawan mo so kaisipan, tan itagey mo so boses mo nipaakar ed pakatalos; no sikato so anapen mo a singa pilak, tan sikato so usisaen mo a singa saray inyamot a kayamanan, diad ontan natalosan mo so takot ed Jehova, tan naromog mo so pikakabat ed Dios. Ta si Jehova mangiter na kakabatan; ompaway ed sangi to so pikakabat tan pakatalos.”—Uli. 2:1-6.

¹⁷ Kanian pian makabat itayon makapandesisyon, kaukolan ya unoren tayo so simbawa na Uliran. Nalabanan tayo ray tukso no abuloyan tayoy salita nen Jehova a manguman ed inkatoo tayo, no maseet tayon kerewen so panangigiya to, tan no itultuloy tayon anapen so kakabatan to a singa inyamot a kayamanan.

18. Antoy itultuloy mon gawaen, tan akin?

¹⁸ Iikdan nen Jehova na kakabatan, pakatalos, pakatebek, tan karunongan iray mansasagpot ya mananap ed sarayan regalo. No panseetan tayon anapen tan usaren iraya, lalo itayon napaapit ed Manangiter, si Jehova. Diad ontan, say maapit ya relasyon tayod sikato so manalimbeng ed sikatayo sano wala ray tukso. Protektaan itayo met na maapit a relasyon tan takot ed si Jehova pian ag-itayo makapanggaway mauges. (Sal. 25:14; Sant. 4:8) Komon ta natulongan itayo na pikakaaro ed sikato tan na karunongan ya iiter to pian amin tayo et makapanggaway desisyon ya mamaliket ed sikato tan naprotektaay tawir tayo.