1, 2. (a) Ngerang a ngilsukau el mo melilt el mo mesiou er a Dios? (b) Ngera el ker el kirel a dikesed el mla er a Jehovah a mo monger?

 A REBETOK el miliol a mla rullii a ungil el omelilt er tir el mo mesiou er a Jehovah e dirrek el oukerebai er a Jesus Kristus. (Mt. 16:24; 1 Pe. 2:21) Me a telbilel a rengud el mo er a Dios a kmal klou el tekoi. Tia el omelilt er kid a dimlak di lultuil er a telkib el omesubed er a klemerang me a di kesai el bades. Ngbai mle blak a rengud el mesuub er a Biblia e dirrek el millisiich er a klaumerang er kid er a diukes el letilbir a Jehovah el me er kid. Tia el diukes a bo lebesterir tirke el rokui el chad el melemolem el mesuub el kirel ngii me a Jesus Kristus.​—Jn. 17:3; Rom 12:2.

² A lsekum ngsoad el lomelemii a ungil el deleuill er kid me a Jehovah e ngkmal kired el mo ungil el melilt a tekoi el lodeuir a rengul. Tia el suobel a meskid a nger er aika el meklou a ultutelel el ker el kmo: Ngerang a dikesed? E ua ngera klungel a ultutelel er kid? Kede mekerang e nguu tia el dikesed? Ngerang a ngosukid el mo ungil el melilt a tekoi el bo doruul?

3. (a) Ngera el diukes a bo lenguu a rengellitel? (b) E ngerang a dikesir tirke el ngodech el sib?

³ A kekerei el ildois er a Rekristiano a mo nguu a dikesir el ngii a diak lengemed el klengar el ngar er a eanged. Ngmo er ngii a ileakl el techellir el mo obengkel a Kristus el mengedereder er a Rengedel. (1 Pe. 1:3, 4) Tirke el mo nguu tia el diukes a tirke el ‘liluut el mechell.’ (Jn. 3:1-3) E ngerang a dikesir tirke el betok el miliol el ‘kuk bebil er a chermel a Jesus el sib,’ el tir a oureor el obengterir a rengellitel el omerk er a ungil chais el kirel a Rengedel a Dios? (Jn. 10:16) Te mo nguu a diukes el dimlak el sebechel a  Adam me a Eva el nguu, e tiang a diak a ulebengelel el klengar el ngar er a paradis el chutem el diak a ringel, kodall, me a klengiterreng er a chelsel. (Och. 21:1-4) Sera lekltekotel er a teluo el kerrekar a Jesus, e ngtilbir el mo er ngike el ta er a chad el kmo ngmo nguu tiaikid el diukes, e le ngdilu el kmo: “Ke mo obengkek el ngar a Baradis.”​—Lk. 23:43.

4. Ngera el klengeltengat a dolab er chelechang?

⁴ Engdi a dikesed a dirrek el uldimukl er a bebil el klengeltengat el dolab er chelechang. Kid el oumerang er a olubet el tengetengel a Kristus Jesus a uchul me ngar er ngii a budech er a rengud me a kmes el deleuill er kid el obengkel a Dios. (Rom 3:23-25) Ngar er ngii a ungil el klemedengei er kid er a telbiil el medung er a Biblia el kirel a ngar medad el klebesei. Me a bltikerreng el mocholt er a delongelir a rudam me a rudos el meliuekl er a beluulechad a dirrek el uchul a deuil a rengud. E dirrek el kmal klou el techall a dobang el mo ousioning el kirel a Jehovah. Me ngar er ngii a ungil el uchul me kede oba omereng el saul el kirel tia el dikesed!

5. Ngera ngmla melasem el meruul er ngii a Satan el mo er a rechedal a Dios? Ngera ngosukid el mo oleiub er kid er a bedeklel a Satan?

⁵ Ngkmal kired el mo kerekikl el oleiub er kid er a bedeklel a Satan a lsekum ngsoad el melemolem el urrekodel er a dikesed. A Satan a mla mo betok el rak el lolasem el mengesuseu er a rechedal a Dios el mo mekngit el melilt a tekoi el uchul me te oriid a dikesir. (Ule. 25:1-3, 9) Ngmedengei el kmo ngdi kmedu el mo nguemed, me ngmla lmuut el mo blak a rengul el mengeuid er kid. (Monguiu er a Ocholt 12:12, 17.) Me a lsekum ngsoad el mo “dechor el mtok a ikel mekngit el chelebeldil a Diabelong,” e ngkmal kired el mo oba omereng el saul el kirel tia el dikesed. (Efe. 6:11) Ngsebeched el suub a meklou a ultutelel el tekoi el okiu a osengel a ngelekel a Isak el Esau el kirel a dikesel.

6, 7. Ngtecha Esau? Ngera el diukes a mle kirel el nguu?

⁶ Ngar er a bekord el 4,000 el rak er a mla me mong, e a Rebeka a milechelleterir a rekebtot el Esau me a Jakob. E tirkang a mlukeroul el kmal kakerous a blekerdelir. “A Esau a mlo meduch el chad er a balech er a charm me ng blechoel el di mlar a ked, e ngdi Jakob a mle chelellakl el chad me ng di kiliei er a blai.” (Gen. 25:27) A Biblia a mesaod er a Jakob el kmo ngmle chelellakl el chad e le ngmle melemalt a omerellel.

⁷ Sel taem er a lebo el 15 a rekil a Esau me a Jakob, e a demerir el rubak el Abraham a mlad. Engdi a Jehovah a dimlak lobes a telbilel el mo er ngii. Me a uriul e ngliluut el mesaod er tia el telbiil el mo er a Isak. Ngdilu el kmo a rokui el renged er a beluulechad a mo mukngeltengat el okiu a ‘uldidellel a rsechel’ me a lechub e ngklengelakel er a Abraham. (Monguiu er a Genesis 26:3-5.) Ngoeak tiang, e a Dios a ulechotii el mo er a Abraham el kmo a ta er a chedal a klengelakel er ngii a mo ‘uldidellel a rsechel a redil’ el medung er a Genesis 3:15, el ngii a mo Messias. Me a Esau el mle ketengel a Isak el sechal a uchul me ngmla er ngii a llemeltel el mo oudiukes er tia el telbiil. Me ngike el Messias a mle kirel el mei el okiu a klengelakel er a Esau. Tiang a mera el mle ungil dikesel a Esau, engdi nguleba omereng el saul el kirel?

8, 9. (a) Ngera el omelilt el kirel a diukes a lerirellii a Esau? (b) Me ngmlo ua ngera uldesuel er a uriul? Me ngmilekerang?

⁸ A ta er a klebesei e a Esau a merema remei el mla er a ked, e mesang a Jakob el ‘meruul er a sub.’ Me ngdilu er ngii el kmo, “Ak medku er a klengerenger; beskak a bebil er a ilechal bekerkard el sub me kkang.” Me a Jakob a dilu el kmo: “Ak meskau a lsekum ke meskak a llemeltel a kot el ngalek el sechal.” Me ngera el omelilt a lerirellii a Esau? Ngdilu el kmo a llemeltel a diak a ultutelel er ngii, me ngulterur e bai ngileltii a sub! Engdi a Jakob a mle soal el oterekeklii tia el tekoi, me ngdilu er a Esau el kmo: “A kot e  mrellii a telbilem el kmo ke mo meskak a llemeltel a kot el ngalek el mobang.” Me ngdi mle mereched a Esau el oterur a llemeltel el kot el ngalek. Me a Jakob a “milsa blauang ma bebil er a sub el mame. Me ng milengang e melim, e sola e mekiis el merael.” Me a Esau a ulechotii el kmo ngmle meterekakl er a llemeltel el kot el ngalek.​—Gen. 25:29-34.

⁹ Ngbetok el rak er a uriul e a Isak a ulemdasu el kmo ngmedkung, me a Rebeka a kiltmeklii me bo el sebechel a Jakob el nguu a dikesel a kot el ngalek el lulterur a Esau. Me sera bo lodengei a Esau el kmo ngmle mekngit a omelilt el lerirellii, e ngullengit er a Isak el kmo: “Chedam, dirrek el beskak a klengeltengat er kau! . . . Ng dimlak a cho becherei el klengeltengat el kirek?” Me sera lesbedii a Esau el kmo ngdikea el sebechel el ngodechii a klengeltengat el bla lebsa Jakob, e ngkmal lilangel a Esau.​—Gen. 27:30-38.

10. Ngmlo ua ngera uldesuel a Jehovah el bedul a Esau me a Jakob, e ngera uchul?

¹⁰ Me ngera sebeched el suubii er a blekerdelel a Esau? Ngulechotii el kmo a ngelbesel a rengul a mle klou a ultutelel er ngii er a bai lenguu a klengeltengat el Jehovah a mla tibir el kirel a dikesel. A Esau a dimlak lemera el betik a rengul er a Dios e dimlak loba omereng el saul el kirel a llemeltel el kot el ngalek. Ngdirrek el dimlak lolatk el kmo, a tekoi el lolilt el mo meruul a ngar er ngii a bo letemellii er a klengelakel er ngii. A Jakob a kuk mle ngodech e le nguleba omereng el saul el kirel a dikesel e mle ungil el melilt a tekoi el mo omekerreu er ngii el diukes. El ua tiang, ngdimlak lebeot er ngii el oltirakl a ulekrael er a demal me a delal er sera lolilt er a mo bechil, engdi ngkilengei el olengesenges er tir. (Gen. 27:46–28:3) Me a Jehovah a ulemekngeltengat er ngii el kirel a blekongesenges er ngii, me ngulekiu a klengelakel er ngii e ngmle duum a Messias. Ngmle ua ngerang a uldesuel a Dios el bedul a Esau me a Jakob? A Jehovah a dilu el kmo: “Ngak a betik a renguk er a Jakob . . . e ouketui er a Esau.”​—Mal. 1:2, 3.

11. (a) Ngera uchul me kid el Kristiano a sebeched el ngmai a klubeled er a cheldecheduch el kirel a Esau? (b) Ngera uchul me a Paulus a milsaod el kirel a deleboes el omeruul er sera losaod er a omerellel a Esau?

¹¹ Ngsebeched el ngmai a klubeled er a cheldecheduch el kirel a Esau. A apostol el Paulus a milengelechel er a Rekristiano el mo kerekikl er a ledu el kmo: “Lak bor a deleboes ma lechub e bo mua Esau el dimlak longull er a Dios, me ng di mle kirel a teleblengur e ng oterur a llemeltel el kot el ngalek.” (Heb. 12:16) Ngdirrek el kired el orrenges er tia el uleklatk. Ngkmal kired el omes er a deleuill er kid me a Dios el klou a ultutelel me bo el sebeched el oltngakl a omengesuseu e domekerreu er a dikesed. Ngera uchul me a Paulus a dirrek el milsaod el kirel a deleboes el omeruul er sera losaod er a omerellel a Esau? E le lsekum kede mo ua Esau el mechei a ngelbesel a rengud me ngomekrael er kid, e ngmo beot er kid el mo er a klengit el ua deleboes el omeruul e oridii a dikesed.

12. (a) Ngmekerang a Satan a lolasem el mengesuseu er kid? (b) Ngera el kerebai er a Biblia a sebechel el ngosukid sel dechelebangel a omengesuseu?

¹² Kid el mesiungel a Jehovah a mo er a tkurrebab el sebeched el oleiub er kid er a blekeradel el sebechel el mengesuseu er kid el mo er a deleboes. Me a lsekum a ta er a chad a mengesuseu er kid e kede meluluuch me bo el sebechel a Jehovah el Dios el ngosukid el mtekengelii a omengesuseu. (Mt. 6:13) Ngblak a rengud el olengesenges er a Jehovah er a chelsel tia el mekngit el beluulechad, engdi a Satan a di blechoel el melasem el mengitechut er a deleuill er kid me a Jehovah. (Efe. 6:12) A Satan a chelid er tia el mekngit el blekeradel me ngmeduch el mengesuseu er a rechad el mo oltirakl a ngelbesel a rengrir. (1 Ko. 10:8, 13) Me ngmelasem el meruul er tia el tekoi el me er kid el rokui. Ke mo mekerang a lsekum ke mekesuseu el mo oltirakl er a ngelbesel a rengum? Ke mo ua Esau el di mle mereched el mo oltirakl er a ngelbesel a rengul? Me a lechub e ke otngeklii a omengesuseu e chemiis, el ua ngelekel a Jakob el Josef er sera lolasem a bechil a Potifar el mengesuseu er ngii?​—Monguiu er a Genesis 39:10-12.

13. (a) Te mekerang a rebetok er chelechang e mo ua omerellel a Josef? E mekerang a rebebil e mo ua omerellel a Esau? (b) Ngkired el mekerang me lak bo deua Esau?

¹³ A rebetok el rudam me a rudos er kid a mla mo chelebangel a omengesuseu el rulleterir el mo kirir el melilt el kmo te mo ua Esau me a lechub a Josef. A rebetok er tir a mlo ungil el melilt a tekoi el loruul me te uleldeu er a rengul a Jehovah. (Osi. 27:11) Engdi a rebebil a ngileltii el mo ua omerellel a Esau e mlo diak lomekerreu er a dikesir. A deleboes el omeruul a uchul me a rebetok a nguu a omellach me a lechub e ngmesuld a ngklir er a ongdibel er a bek el rak. Me ngkmal kired el oterekeklii a rengud er chelechang me bo el sebeched el mesisiich el oltngakl a ngii di el omengesuseu el bo dechelebangel! (Dan. 1:8) Kede mo mesaod a eru el rolel e kede kutmeklid me bo el sebeched el oltngakl a omengesuseu e mo ungil el melilt a tekoi el doruul.

14. Ngera el ker a sebechel el ngosukid el mo betik a rengud er a ungil e ouketui a mekngit?

¹⁴ A kot, e ngkired el mo melatk er a tellemall el mo duubech a lsekum kede mo er a klengit. Sel lemukeroul a bltkil a rengud el mo er a Jehovah e kede lmuut el mo omes er tia el dikesed el mekreos. Sel lebetik a rengud er a chad e ngchetid el tomellii a rengul, e kede bai melasem el di oldeu er a rengul. Me ngkired el mo ungil el omdasu er a telemall el mo duubech a lsekum kede mo mechitechut er a omengesuseu. Ngkired el di kid el oker el kmo: ‘A lsekum ak lomelemii a ngelbesel a renguk e ngera ngmo tomellii er a deleuill er ngak me a Jehovah? Ngera ngmo rullii er a telungalek er ngak? Ngera ngmo rullii er a rudam me a rudos er ngak er a ongdibel? Me a omerellek ngmo melibas er a rechad?’ (Fil. 1:10) Ngdirrek el kired el oker el kmo: ‘Ak kongei a telemall el mo er ngii el di tedeb el deurreng er ngak a uchul? Ngmera el soak el mo ua Esau el mlo lmangel el ouuchel er a rengul er a bo lodengelii a telemellel a kngtil?’ (Heb. 12:17) A bo dungil el omdasu aika el ker, e ngmo ngosukid el mo betik a rengud er a ungil e ouketui a mekngit. (Rom 12:9) A lsekum ngmera el betik a rengud er a Jehovah, e ngmo blak a rengud el omekerreu er a dikesed.​—Psa. 73:28.

15. Ngerang a ngosukid el mo kltmokl el oltngakl a omengesuseu e omekerreu er a deleuill er kid me a Dios?

¹⁵ A ongerung, e ngkired el mo ungil el kutmeklid el mo oltngakl a omengesuseu. A Jehovah a mla meskid a betok el rolel e kede kutmeklid el oltngakl a omengesuseu er tia el beluulechad e dirrek el omekerreu er a deleuill er kid me ngii. El ua tiang, ngmla ochotii a rolel e kede ngmai a klungioled er a omesubed er a Biblia, miting, odingel a obliil, me a nglunguuch. (1 Ko. 15:58) Bek el taem el doluluuch el mo er a Jehovah e douchais a dmolech el uldesued, me a bek el taem el leblak a rengud el oldingel  a obliil, e kede mengetmokl er kid el mo oltngakl a omengesuseu. (Monguiu er a 1 Timothy 6:12.) A lsoad el mo mesisiich er a ongetikaik, e ngkmal kired el melemolem el meruul aika el tekoi. (Gal. 6:7) Tiang a ngar er ngii a omesodel el ngar er a ongeru el klou el bliongel er a babier er a Osisechakl.

“MOSIIK ER A LLOMESERRENG”

16, 17. Ngmekerang e mo sebeched el ungil el melilt a tekoi?

¹⁶ A 2 el klou el bliongel er a Osisechakl a melisiich er kid el mo blak a rengud el omekeroul er a llomeserreng me a sekutaberreng. Aika el blekeradel el lomeskid a Jehovah a mo ngosukid el mo ungil el melilt a tekoi e dirrek el mo kilmeklii a rengud er a bai di dolemolem a ngelbesel a rengud. E tiang a mo sebechel el meketmokl a lsekum ngblak a rengud el meruul a tekoi el losaod er ngii aika el bades. A Biblia a kmo: “Rungalek, mngai a tekingek, e lak mobes a llechuk. Morrenges a tekoi er a llomeserreng, e molasem el mo ungil el omtab er ngii. Choi, mosiik er a klemedengei e molengit er a sekutaberreng. Mosiik er a llomeserreng el ua cho mosiik a silber ma lechub e kosiik a berrotel el mekreos el klalo. Seikid e ke mo medengelii a omeluu er a RUBAK e metik er a klemedengei er a Dios. Le ng RUBAK a meskid a llomeserreng; a klemedengei ma sekutaberreng a ngar ngii el mei.”​—Osi. 2:1-6.

¹⁷ Me ngbleketakl el kmo, a lsoad el mo ungil el melilt a tekoi e ngkired el mo meruul aika el tekoi el losaod er ngii a babier er a Osisechakl. A di ta el rolel e ngmo sebeched el oltngakl a omengesuseu a sel debecherei a tekingel a Jehovah me lengedechii a blekerdeled, e dolemolem el meluluuch el kirel a ulekrael er a Dios e dolemolem el osiik er a klemedengei er a Dios el ua dosiik a mekreos el klalo.

18. Ke mla tibir el mo mekerang, e ngera uchul?

¹⁸ A Jehovah a mesterir a klemedengei, sekutaberreng me a llomeserreng tirke el melasem el osiik aika el tekoi. Me a bek el taem el dosiik e dousbech aika el tekoi e nglmuut el mekurulii a deleuill er kid me a Jehovah. Me tiakid el kmes el deleuill er kid el obengkel a mo ngosukid sel bo dechelebangel a omengesuseu. A lsekum kede meluu er a Jehovah e melemolem el kmeed er ngii, e kede mo er aike el sebeched el oleiub er kid er a klengit. (Psa. 25:14; Jak. 4:8) A deleuill er kid me a Jehovah me a llomeserreng el lomeskid a ngosukid el mo ungil el melilt a tekoi el mo odeuir a rengul e dirrek el omekerreu er a dikesed.