1, 2. (a) Eaha tei tauturu ia outou ia maiti e tavini i te Atua? (b) Eaha te uiui no nia i ta tatou tufaa pae varua?

 E MIRIONI o tatou tei maiti ma te paari e tavini i te Atua ra o Iehova e e pee maite i te hiˈoraa o Iesu Mesia. (Mat. 16:24; Pet. 1, 2:21) Ua feruri maitai tatou e pûpû ia tatou i te Atua. Aita te reira i niuhia i nia i te tahi ite rii o te tahi mau irava. Ua haapii maite râ tatou i te Bibilia. Ua puaihia ïa to tatou faaroo i te tufaa ta Iehova i fafau i te feia tei ‘ite ia ˈna, e ia Iesu i te Mesia ta ˈna i tono mai.’—Ioa. 17:3; Roma 12:2.

² No te tapea i te taairaa maitai e o Iehova, e mea tia ia rave tatou i te mau maitiraa o te faaoaoa ia ˈna. E hiˈopoa teie tumu parau i teie mau uiraa faufaa: Eaha ta tatou tufaa? Ia haafaufaa anei tatou i te reira? E nafea ia papu e e noaa iho â ia tatou ta tatou tufaa? Eaha te tauturu mai ia rave i te mau maitiraa maitai?

3. Eaha te tufaa e tiai ra i (a) tei faatavaihia e (b) te mau “mamoe ê atu”?

³ Mea iti te Kerisetiano e tiaturi ra e fanaˈo i “te tufaa ino ore ra, e te viivii ore, e te maheahea ore.” Oia hoi te fanaˈoraa taa ê mau e faatere e te Mesia i nia i te raˈi. (Pet. 1, 1:3, 4) E mea tia râ ia ‘fanau-faahou-hia’ ratou. (Ioa. 3:1-3) Eaha te tufaa a e mirioni “mamoe ê atu” a Iesu, e turu ra i ta ˈna mau pǐpǐ faatavaihia i roto i te pororaa i te parau apî maitai o te Basileia o te Atua? (Ioa. 10:16) Te tufaa ïa ta Adamu raua Eva i ore i fanaˈo: te ora mure ore i roto  i te paradaiso i te fenua aita e mauiui, e pohe e e oto faahou. (Apo. 21:1-4) Ua tia ïa ia Iesu ia fafau i te taata ohipa ino o tei pohe e o ˈna: “Ei paradaiso ïa oe e o vau atoa . . . oia mau ta ˈu e parau atu ia oe nei.”—Luka 23:43.

4. Eaha ta tatou mau haamaitairaa i teie nei â?

⁴ Te fanaˈo nei tatou i teie nei â i te tahi mau tuhaa o ta tatou tufaa. No to tatou faaroo i te hoo aufauhia e te Mesia ra o Iesu, ua fanaˈo tatou i te hau o te aau e o te feruriraa. Oia atoa i te taairaa piri e te Atua. (Roma 3:23-25) Te maramarama maitai nei tatou i te mau parau fafau i roto i te Bibilia. E te oaoa rahi nei tatou i te fanaˈo i te hoê fetii taeae nunaa rau. E haamaitairaa rahi mau ia riro ei Ite no Iehova. E poihere anaˈe i ta tatou tufaa!

5. Eaha ta Satani e tamata nei i te rave i nia i te nunaa o te Atua? Eaha te tauturu mai ia patoi i ta ˈna mau ravea paari?

⁵ No te tapea maite i ta tatou tufaa faahiahia mau, e mea tia ia vai ara i te mau marei a Satani. Te tamata nei oia i te turai i te nunaa o te Atua ia rave i te mau maitiraa e ere ai ratou i ta ratou tufaa. (Num. 25:1-3, 9) Ua ite Satani e fatata o ˈna i te haamouhia. Te faaitoito rahi nei ïa o ˈna i te faahema ia tatou. (A taio i te Apokalupo 12:12, 17.) No te “patoi atu i te mau ravea paari a te diabolo,” e mea tia ia haafaufaa mau tatou i ta tatou tufaa. (Eph. 6:11) Mea maitai ia haamanaˈo i te mau haapiiraa faufaa te huti mai i te hiˈoraa o te tamaiti a Isaaka ra o Esau.

6, 7. O vai Esau, e eaha ta ˈna tufaa i te omuaraa?

⁶ A fatata e 4 000 matahiti, ua fanau Isaaka raua Rebeka i te maehaa: Esau e Iakoba. A paari mai ai, mea taa ê mau raua. “E riro atura Esau, ei taata haharu paari, e taata no te aru; area o Iakoba, e taata mǎrû ïa, e te parahi noa i te tiahapa.” (Gen. 25:27) Ua parauhia e e taata mǎrû Iakoba no to ˈna haapao maitai e hapa ore.

⁷ I te 15raa o te matahiti o Esau raua Iakoba, pohe aˈenei to raua papa ruau ra o Aberahama. Ua haamanaˈo râ Iehova i ta ˈna i fafau ia Aberahama. I muri aˈe, ua faahiti faahou Iehova i te reira ia Isaaka ma te haapapu e e maitai te mau nunaa atoa o te fenua maoti te huaai o Aberahama. (A taio i te Genese 26:3-5.) Ua faaite tera parau fafau e e na roto mai te Mesia, te huaai aore ra Huero taiva ore o te Genese 3:15, i te tamarii a Aberahama. Ei tamaiti matahiapo a Isaaka, na Esau te tiaraa e fanaˈo i tera parau fafau. E huaai ïa te Mesia no Esau. Auê tufaa faahiahia mau! Ua haafaufaa anei o ˈna i te reira?

8, 9. (a) Eaha te maitiraa ta Esau i rave no nia i ta ˈna tufaa? (b) Eaha ta Esau i taa tau matahiti i muri aˈe no nia i te maitiraa ta ˈna i rave, e ua aha o ˈna?

⁸ I te hoê mahana, “te tunu ra Iakoba i te maa” a hoˈi mai ai Esau mai te aru mai. Parau atura o ˈna: “E faaamu mai oe ia ˈu i tena na maa uteute, ua pohe au.” Pahono aˈera Iakoba: “E hoo mai oe ia ˈu i to tufaa matahiapo na.” Eaha ta Esau i maiti? Ua parau atu o ˈna: “Eaha hoi ta ˈu faufaa i teie nei tufaa matahiapo?” Mea au aˈe na ˈna te hoê auˈa maa uteute i ta ˈna tufaa matahiapo! No te haamana i te reira, ua onoono Iakoba: “A tǎpǔ mai na i tena na.” Ma te ore e haamarirau, ua hoo Esau i ta ˈna tufaa matahiapo. “Ua hopoi atura Iakoba i te pane e te pipi tunu na Esau; e ua amu ihora oia e ua inu i te pape, tia aˈera hoi  i nia, haere atura. Faafaufaa ore atura Esau i te tufaa matahiapo na ˈna.”—Gen. 25:29-34.

⁹ Tau matahiti i muri aˈe, a manaˈo ai Isaaka e fatata o ˈna i te pohe, ua faanaho Rebeka e na Iakoba e fanaˈo i te tufaa matahiapo ta Esau i hoo atu. A taa ˈi ia Esau e e maitiraa maamaa mau ta ˈna i rave, ua taparu o ˈna ia Isaaka: “E haamaitai mai oe ia ˈu, o vau atoa nei, e tau metua e. . . . Aita anei oe i vaiiho i te tahi maitai no ˈu?” A parau ai Isaaka aita ta ˈna e nehenehe e taui i te haamaitairaa ta ˈna i horoa ê na ia Iakoba, “ua oto pii noa ˈtura Esau.”—Gen. 27:30-38.

10. Eaha to Iehova manaˈo ia Esau raua Iakoba, e no te aha?

¹⁰ Ia au i te mau Papai, mai te aha te huru o Esau? Ua faaite o ˈna e mea faufaa aˈe no ˈna ia haamâha i to ˈna mau hinaaro pae tino i te fanaˈo i te mau haamaitairaa e na roto mai i ta ˈna tufaa. Aita Esau i poihere i ta ˈna tufaa matahiapo e aita o ˈna i here mau i te Atua. Ua tâuˈa ore atoa o ˈna i te faahopearaa o te maitiraa ta ˈna i rave i nia i to ˈna huaai. Area o Iakoba, ua haafaufaa o ˈna i ta ˈna tufaa. Ei hiˈoraa, ua pee o ˈna i te mau faaueraa a to ˈna na metua a maiti ai i te hoê vahine. (Gen. 27:46–28:3) E ere i te mea ohie no ˈna. Ua faaite râ Iakoba i te faaoromai e te manaˈo haapae. E ua riro mai o ˈna ei tupuna o te Mesia. Eaha to te Atua manaˈo ia Esau raua Iakoba? Na roto i te peropheta Malaki, ua na ô Iehova: “I aroha râ vau ia Iakoba, e aore au i aroha ia Esau.”—Mal. 1:2, 3.

11. (a) No te aha e faufaahia ˈi tatou ei Kerisetiano i te hiˈoraa o Esau? (b) No te aha Paulo i faahiti atoa ˈi i te faaturi a faataa ˈi i ta Esau i rave?

¹¹ E faufaahia anei te mau Kerisetiano i teie mahana i ta te Bibilia e parau ra no nia ia Esau? E. Ua aˈo te aposetolo Paulo i te mau Kerisetiano ia ara ia “tupu noa ˈˈe te tahi faaturi, e te taata paieti ore, mai ia Esau ra, o tei hoo i ta ˈna ra tufaa matahiapo i te amuraa maa hoê.” (Heb. 12:16) Te tano noa ra teie faaararaa no te mau Kerisetiano. E mea tia ia haafaufaa noa tatou i te mau mea moˈa no te ore e hema i te mau hinaaro tia ore a ere atu ai i ta tatou tufaa pae varua. No te aha râ Paulo i faahiti atoa ˈi i te faaturi a faataa ˈi i ta Esau i rave? No te mea ia haa tatou mai ia Esau ma te vaiiho i to tatou mau hinaaro pae tino ia faatere ia tatou, mea ohie ia rave i te hara mai te faaturi. E nehenehe tatou e ere i ta tatou tufaa.

12. (a) E nafea Satani e tamata ˈi i te faahema ia tatou taitahi? (b) A horoa i te mau hiˈoraa Bibilia o te tauturu mai a rave ai i te mau maitiraa fifi.

¹² Ei tavini a Iehova, e ape tatou i te mau tupuraa e hema ˈi tatou i te taatiraa morare ore. Ia faahema mai te hoê taata, e pure anaˈe ia Iehova ia tauturu mai ia ore e hema. (Mat. 6:13) Te faaitoito nei tatou i te tapea i to tatou taiva ore i roto i teie nei ao ino. Te tamata noa nei râ Satani i te faaino i to tatou mau taairaa e o Iehova. (Eph. 6:12) O Satani te atua o teie nei ao ino. E ua ite o ˈna e nafea ia faahema i te taata ia pee ratou i to ratou mau hinaaro tia ore. (Kor. 1, 10:8, 13) Te na reira nei oia i nia ia tatou taitahi. Eaha te rave tei roto anaˈe oe i te hoê tupuraa e nehenehe ai ta oe e haamâha i to oe mau hinaaro ma te tano ore? Eaha ta oe e maiti? E riro anei oe mai ia Esau o tei hema oioi? Aore ra e patoi anei oe i te faahemaraa a horo ê atu ai mai te tamaiti a Iakoba ra o Iosepha tei faahemahia e te vahine a Potiphara?—A taio i te Genese 39:10-12.

13. (a) I teie mahana, mea nafea e rave rahi i te haaraa mai ia Iosepha? Mea nafea vetahi i te haaraa mai ia Esau? (b) Ia aha no te ore e haa mai ia Esau?

¹³ I mua i te faahemaraa, i titauhia na ia maiti e rave rahi o to tatou mau taeae e tuahine ia haa mai ia Esau aore ra mai ia Iosepha. Ua haa te rahiraa ma te paari e ua faaoaoa i to Iehova aau. (Mas. 27:11) Ua maiti râ te tahi atu ia haa mai ia Esau e aita i paruru i ta ratou tufaa. Mea rahi te Kerisetiano e aˈohia ra e e tiavaruhia ra i te matahiti taitahi no te faaturiraa. Mea faufaa mau â ia faaineine i to tatou aau i teie nei â, hou tatou a faahemahia ˈi! (Sal. 78:8) E piti aˈe ohipa te nehenehe e rave. E riro te reira ei patu o te paruru ia tatou i te faahemaraa e o te tauturu mai ia rave i te mau maitiraa maitai.

14. O te feruriraa i teihea mau uiraa te tauturu mai ia “riaria i te ino” e ia “ati atu i te maitai”?

¹⁴ Teie te taahiraa matamua: te feruriraa i te mau faahopearaa o te hara. E haafaufaa roa ˈtu â tatou i ta tatou tufaa pae varua ia here roa ˈtu â tatou ia Iehova. Ia here tatou i te hoê taata, eita tatou e hinaaro e haamauiui ia ˈna, ia oaoa râ o ˈna. Mea maitai ïa ia rave maa taime no te feruri i te mau faahopearaa o ta tatou hara i nia ia tatou e ia vetahi ê. E uiui anaˈe: ‘Eaha te faahopearaa o to ˈu haerea miimii i nia i to ˈu mau taairaa e o Iehova? Eaha te faahopearaa o ta ˈu hara i nia i to ˈu utuafare? E haamauiui anei te reira i to ˈu mau taeae e tuahine i roto i te amuiraa? E faaturori anei au ia vetahi ê?’ (Phil. 1:10) E uiui atoa anaˈe: ‘Mea hoona anei ia mauiui no maa taime navenave tia ore? Te hinaaro mau ra anei au e riro mai ia Esau o tei oto mau a taa ˈi ia ˈna i ta ˈna i rave?’ (Heb. 12:17) E feruri anaˈe i teie mau uiraa. E tauturu mai te reira ia “riaria i te ino” e ia “ati atu i te maitai.” (Roma 12:9) E turai mai to tatou here ia Iehova ia ati i ta tatou tufaa.—Sal. 73:28.

15. Eaha te tauturu mai ia faaineine ia tatou ia patoi i te mau faahemaraa e ino ai to tatou mau taairaa e te Atua?

¹⁵ Teie te piti o te taahiraa: te faaineineraa ia tatou ia patoi i te faahemaraa. Mea rahi te faanahoraa ta Iehova i rave no te faaineine ia tatou ia patoi i te faahemaraa o teie nei ao e fifi ai to tatou mau taairaa e o ˈna. Ei hiˈoraa, te haapiiraa Bibilia, te mau putuputuraa, te  pororaa e te pure. (Kor. 1, 15:58) E haamahora anaˈe i to tatou aau ia Iehova na roto i te pure e e apiti anaˈe ma te itoito rahi i te taviniraa. I te mau taime atoa e na reira ˈi tatou, te haapaari nei tatou i ta tatou patu o te paruru mai i te faahemaraa. (A taio i te Timoteo 1, 6:12, 19.) Ia faaitoito atoa tatou i te faaineine ia tatou ia patoi i te faahemaraa e tia ˈi. (Gal. 6:7) O ta te Maseli pene piti ïa e faataa maitai ra.

16, 17. E nafea tatou e aravihi ai i te rave i te mau maitiraa maitai?

¹⁶ Te faaitoito maira te Maseli pene 2 ia noaa i te paari e te feruriraa maitai. E tauturu mai te reira ia maiti i rotopu i te mea maitai e te ino. Oia atoa ia haavî i to tatou mau hinaaro, eiaha râ ia haamâha i te reira ma te tano ore. E na reira noa râ tatou ia ineine tatou i te faaitoito. Ta te Bibilia ïa e haapapu ra: “E tau tamaiti, ia farii mai oe i ta ˈu nei parau, e ia vaiiho maite i ta ˈu parau i pihai iho ia oe; ia fariu mai i to tariˈa i te paari; e ia imi to aau i te ite ra; ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna mai te ario ra, e ia paheru hua oe ia ˈna, mai te taoˈa hunahia ra; e ite ïa oe i te mǎtaˈu ia Iehova, e noaa ïa ia oe te ite i te Atua. O Iehova hoi tei horoa mai i te paari, e no roto i to ˈna vaha te parau e te ite.”—Mas. 2:1-6.

¹⁷ Papu maitai ïa e e aravihi tatou i te rave i te mau maitiraa maitai ia pee tatou i tei faahitihia i roto i te Maseli. E tia ia tatou ia patoi i te faahemaraa ia vaiiho tatou i ta Iehova mau parau e taui i to tatou aau, ia pure tamau tatou no te ani i ta te Atua aratairaa, e ia imi noa tatou i te ite o te Atua mai te ofai taoˈa hunahia.

18. Eaha ta oe i faaoti papu i te rave noa, e no te aha?

¹⁸ Te horoa ra Iehova i te ite, te maramarama, te haroaroaraa e te paari i te feia e faaitoito ra i te imi i te reira. Hau atu â tatou i te imi e i te faaohipa i te reira, hau atu â tatou i te haafatata ˈtu ia Iehova. E paruru mai ïa to tatou taairaa piri e te Atua tei mua anaˈe tatou i te hoê faahemaraa. E paruru mai te vai-piri-raa ia Iehova e te mǎtaˈu faatura ia ˈna ia ore e rave i te hara. (Sal. 25:14; Iak. 4:8) E tauturu mai to tatou auhoaraa e o Iehova e te faaohiparaa i te paari no ǒ mai ia ˈna ra ia rave i te mau maitiraa o te faaoaoa i to ˈna aau e o te paruru i ta tatou tufaa.