Juta kwati kirabe nämene nitre ni mada murie ketaka jäke kribätä murie ketakäre. Nitre Roma nämene nitre ye mäkete, aune mete kribätä. Köbö nämene niken ta yete ni ye nämene ja tare nike; tomana nike, mrö nike aune jondron mada mada nämene niara murie kete. Nire murie keta nämene ye erere ye ñaka nämene tuin kwin, aune mräkätre kwe nämene nemen jakaire, ye medenbätä nitre ni mada murie ketaka ye aibe murie keta nämene ye erere.

Akwa, ¿juta Israel nämene ye erere nuainne? Kukwe biani Moisés ie yete niebare: “Gata ñäkädre ni brare kräke ja mikani ngite kwe yebätä, aune niara murie ketadre, biti jäkädre kribätä, ye ngwane ngwaka ye ñaka tuanemetre dibire kribätä; ñakare aune doboi mikadre bengwairebe köbö yete” (Deut. 21:22, 23). Kukwe Hebreore tika nämene ye ngwane nie raba nitre murie keta nämene käne, ye bitikäre jäkä nämene kribätä.

Levítico 20:2 tä niere: “Israel monsoitre aune nitre menteni tä nüne juta Israel yete käkwe monsotre kwe biain Mólek ie angwane niara ye murie ketadre. Nitre nünanka yete rabadre niara kwata mete nememe murie ketadre”. Nire nämene ja mike “kwrare o ja mäke chokabe” ye täkä nämene jäbiti nemen murie ketakäre arato (Lev. 20:27).

Arato, Deuteronomio 22:23, 24 tä mike gare: “Meri deme ja kukwei kitaninkä ni brare ie, aune ni brare mada meri ye mikadre jabe angwane nitre nibu ye diandrekä jukwete ta, aune niaratre kwata metadre, bätä murie ketadre, ñobätä ñan aune meri ye ñaka ngwänänkäbare, aune ni brare ye meri ni madakwe ngwani jakaire yebätä. Kukwe käme nuainbare ye diandrekä mun ngätäite”. Nitre ja mikaka ngite o kukwe käme nuainkä ye täkä nämene jäbiti o kwata meta nämene murie ketakäre. *

Deuteronomio 21:23 tä niere: “Nire jäkä nämene kribätä ye kräke Ngöbö nämene kukwe käme ñäke”. Ye medenbätä, nitre käme ngwaka jäkä nämene kribätä mikakäre tuare nitre madai ye “Ngöbö nämene kukwe käme ñäke”, aune ye nämene nitre Israel töi mike ñaka ja mike ngite.