Ifuxi iavulu m’ukulu akexile mu jibha o ifumbe mu ku a phaphela ku taka. O akua Loma akexile mu phaphela o athu ku kima phala ku a jibha, o muthu ua tokalele ku kala ku kima kiki, kate kia uila ni ndolo, ni dinhota, nzala ni mbambi mba muanha. O akua Loma, a monene kuila o ku phaphela o muthu ku kima ki kuatesa jisonhi, kia tokalele ngó o ifumbe mba o jingadiama.

Kiebhi kia kexile mu bhanga akua Izalaiele kioso kia kexile mu balakala o ifumbe m’ukulu? O kuila ene akexile mu jibha o ifumbe mu ku a phaphela ku taka? O Kitumu kia Mozé kiambele: “O kioso ki bhu kala muthu uate mulônga u bhinga sendesa ia kalunga, exi afue anga a mu nhenga ku muxi, o kimbi kiê ki ki xalele bhulu dia muxi, kana; kale lelu muene mu kifunda.” (Mate. 21:22, 23) Mu Itumu ia Hebalaiku, o muthu a mu balakala o kufuá, a diangela o ku mu jibha, kiene ngó kia mu nhenganeka ku taka mba ku muxi.

Mukonda dia kiki o divulu dia Ijila 20:2 diamba: “Muthu oso ku an’a Izalaiele, mba ku jinzuángiza oso ene kunhunganena mua Izalaiele, uoso u bhakula mon’ê mu sata ku dihamba dia Mulôko, afue muene, sé phata; athu oso atungu-ne. A tokala m’oxi’omo, ene muene a mu bûba ni matadi.” Oso ua kexile ni “nzumbi ia ku xingila kilundu kia ngômbo-a-nhange mba kituta kia kuzambula ni kubhanga iphata,” a tokalele ué kufuá. Kiebhi? Mu ‘ku a bûba ni matadi.’—Iji. 20:27.

Mu divulu dia Matendelelu 22:23, 24, tu tanga: “O ki bhu kala mon’a kilumba, a mu solo ngó kuala diiala, anga bhu kala diiala diengi mu sanzala u mu endesa, hé u ta-nê kituxi, mu a kuata kiiadi kiâ, anga muia-nâ bhu muelu ua mbonge ienhoio, anga mu a bûba ni matadi, katé kiafua; o kilumba, mukonda nguê kudikola mu sanzala; o diiala, mukonda dia sebulula mukaji’a mukua; o ki mu zubha kubhanga kiki, mu kaxi kenu mua zelesa-mu.” Phala o akua Izalaiele a dianga, o ku bûba uene uexile o ukexilu ua ku jibha o muthu ua iibha bhu kaxi kâ. *

O divulu dia Matendelelu 21:23 dizuela: “Mbata uoso a mu nhenga ku muxi a mu te mázui kua Jihova.” O kulondekesa o mukutu ua kifumbe, “a mu te mazui kua Nzambi,” sé phata kieji longa akua Izalaiele. Sé phata o ku nhenganeka o mukutu ua muthu ku taka mba ku muxi, a ki kidika ku athu a mukuá.