Ogendini mang’eny e kinde machon ne nego jomahundu moko kuom gurogi e yath kata e siro mabor. Jo-Rumi ne tweyo jo mahundu kata gurogi gi msumal e yath, kae to giweyo jo mahundugo kanyo kapod ngima kuom odiechienge mogwaro mondo rem, kech, riyo gi gik machalo kamago ema oneggi. Jo-Rumi ne neno ni guro ng’ato e yath ne en kum mar wich kuot mitimone mana jomahundu ma ne ikwano kaka joma okuong’.

To nade oganda Jo-Israel machon? Be Jo-Israel ne nego jomahundu kuom gurogi e yath? Chik Musa nonyiso ayanga kama: “Kendo ka ng’ato otimo keth moromo gi buch tho, mit onege, migure e yath, kik we kitundune e yath kanyo otieno duto, to niyike mana chieng’no.” (Rapar 21:⁠22, 23) Omiyo e kinde ma ne ondikie Muma mag dho-Hibrania, nenore maler ni ng’at ma nowinjore gi tho ne ikwongo inego kae to eka ing’awe e wi yath kata e wi siro.

Kaluwore gi wachni, Tim Jo-Lawi 20:2 wacho kama: “Ng’a manade mag nyithind Israel, kata mag mwa ma jodak e Israel, momiyo kothe e Molek; nek to nonege: jopiny nochiele gi kite.” Jogo ma ne nigi ‘jachien kata ma jojuogi’ bende ne inego. E yo mane? Kuom ‘chielogi gi kite.’​​—⁠Lawi 20:27.

E Rapar mar Chik 22:⁠23, 24, wasomo niya: “To nyako mangili ma ng’ato nyuomo, ka ng’ato moro oyude e dala, monindo kode; nugolgi oko kargi jariyo nyaka dhoranga dalano, kendo nuchielgi gi kite mondo githo; nikech nyakono ok ogo koko, to gin ei dala; kendo dichwogno, nikech okuodo wi chi owadgi: kamano e kaka nigol richo oa e kindu.” Omiyo kuom Jo-Israel machon, chielo ng’ato gi kidi ema ne en yo maduong’ ma ne inegogo jogo ma ne otimo richo moko madongo. *

Rapar mar Chik 21:23 wacho ni, ng’at “mong’aw e yath Nyasaye okwede.” Kane ong’aw e yath kitundu mar ng’at ma ‘Nyasaye okwedo,’ mano ne bedo kaka siem ne Jo-Israel mamoko.