Раджы заманты бирӕ адӕмыхӕттытӕм уыд ахӕм ӕгъдау, ӕмӕ-иу иуӕй-иу фыдгӕнджыты хъӕдыл байтыгътой. Ромӕгтӕ-иу ахӕм адӕймаджы хъӕдыл кӕнӕ бӕтгӕ бакодтой, кӕнӕ-иу ӕй хъӕдмӕ зӕгӕлтӕй ныххуыдтой. Афтӕмӕй-иу цалдӕр боны уым фӕци, цалынмӕ-иу фыррыстӕй, дойныйӕ ӕмӕ ӕххормагӕй, стӕй фыртӕвдӕй кӕнӕ фыруазалӕй нӕ амард, уӕдмӕ. Ромӕгтӕ ахӕм ӕгады мардӕй мардтой, мӕгуыр адӕмӕй чи уыд, уыдоны.

Рагон израилӕгтӕй та цы зӕгъӕн ис? Уыдон дӕр-иу фыдгӕнджыты хъӕдыл байтыгътой? Моисейы закъоны фыст уыд: «Исчи, мӕлӕты тӕрхон цӕй тыххӕй ӕмбӕлы, ахӕм тӕригъӕд куы сараза ӕмӕ йӕ куы амарой ӕмӕ йӕ хъӕдыл куы ’рцауындзой, уӕд йӕ мард ӕхсӕвы хъӕдыл ма баззайӕд. Тӕккӕ уыцы бон ӕй баныгӕн» (Дык. з. 21:22, 23). Уӕдӕ цалынмӕ Моисейы закъон йӕ тыхы уыд, уӕдмӕ-иу, мӕлӕты аккаг чи уыд, уыцы адӕймаджы фыццаг маргӕ акодтой, уый фӕстӕ та-иу ӕй хъӕдыл кӕнӕ бӕласыл ӕрцауыгътой.

Левиты 20:2 стихы та фыст ис: «Израилы фырттӕй ӕмӕ, Израилы ӕрцӕуӕггаг чи у, уыдонӕй исчи йӕ сывӕллоны Молохӕн куы снывонд кӕна, уӕд уыцы адӕймаджы хъӕуы амарын. Адӕм ӕй хъуамӕ дуртӕй амарой». Мӕрдтимӕ-иу чи уынаффӕ кодта кӕнӕ дӕсны чи фарста, уый дӕр-иу хъуыд амарын. Куыд? Дуртӕй (Левит 20:27).

Дыккаг закъоны 22:23, 24 стихты та кӕсӕм: «Нӕлгоймаг, фидыд чи у, ахӕм чызгыл горӕты куы фембӕла ӕмӕ йемӕ ӕмуат куы ’рцӕуа, уӕд сӕ дыууӕйы дӕр ӕрбакӕнут горӕты кулдуары размӕ ӕмӕ сӕ дуртӕй фӕхойут. Хъуамӕ амӕлой: чызг, горӕты кӕй нӕ хъӕр кодта, уый тыххӕй, лӕг та, кӕйдӕр усы кӕй фӕхудинаг кодта, уый тыххӕй. Уе ’хсӕнӕй фыддзинад фесафут». Стыр фыдракӕнд-иу чи ракодта, уыдоны-иу раджы заманы израилӕгтӕ арӕхдӕр амардтой дуртӕй *.

Дыккаг закъоны 21:23 стихы фыст ис, зӕгъгӕ, «хъӕдыл кӕй ӕрцауындзой, уый Хуыцауӕй ӕлгъыст у». Израилӕгтӕ-иу «Хуыцауӕй ӕлгъыст» адӕймаджы мард ауыгъдӕй кӕй уыдтой, уый сын сӕ зӕрдыл лӕууын кодта, тӕригъӕдтӕ куы арӕзтаиккой, уӕд сӕм цы ’нхъӕлмӕ каст, уый.