Unayqa ashkha llajtaspi, wañuchisqa kanankupaj jina juchayoj kajkunata uj kʼaspiman chayri kurkuman warkhuykuspa wañuchej kanku. Romanospis ajina runasta kʼaspiman warkhuykoj chayri clavaykoj kanku, chaypitaj chay runaqa wañunankama ashkha pʼunchaykunata ñakʼarej, yaku chʼakiywan, yarqhaywan chʼayñaj chantapis ruphaytataj chiritataj muchoj. Chayta ruwaj kanku aswan sajra runas pʼenqaypi rikhurichisqa kanankupaj.

Israelitasrí, ¿kikillantatajchu sajra runasta wañuchinankupaj warkhuykoj kanku? Moisespa Leyninpi kayta nerqa: “Sichus pipis wañuchisqa kanampaj jina juchata ruwanman, [wañuchisqa kanqa, hinaspa sachʼaman warkusqa kanqa chayqa, Diospa Simin Qelqa] chay ayantaqa ama tutantinta warkhurayashajta saqenkichejchu. Manachayqa chay pʼunchaypacha pʼampankichej”, nispa (Deu. 21:22, 23). Rikunchej jina, Hebreopi Qhelqasqasta qhelqakushasqan tiempopi, wañuchisqa kananpaj jina juchallikoj runataqa wañuchisparaj uj kurkuman chayri uj sachʼaman warkhuykoj kanku.

Chaymanta parlaspa Levítico 20:2 versiculopi nin: “Sichus mayqen israelitallapis, chayri qankuna ukhupi tiyakoj forasteropis wawanta Moloc diosman jaywanqa chayqa, paypa llajta masisnenqa rumiswan chʼanqaykuspa, payta wañuchenqanku”, nispa. ¿Pikunapiwantaj ajina wañuchisqa kaj kanku? Waj texto nin: “Sichus pipis aysiri kanman, chayri layqa kanman chayqa, rumiswan chʼanqasqa wañuchisqa kanqa”, nispa (Lev. 20:27).

Deuteronomio 22:23, 24 versiculospi nillantaj: “Uj sipas casarakunampaj uj qhariwan parlapayasqaña kashajtin, sichus waj qhari llajtapi taripaspa, paywan puñuykunman chayqa, paykunata llajtamanta jawaman orqhoytawan, rumiswan chʼanqaykuspa, iskayninkuta wañuchinkichej. Chay sipasqa wañuchisqa kanqa llajta ukhupi kashaspa mana qhaparikusqanrayku. Qharitaj wañuchisqa kanqa qhari masimpa warmimpa honranta tʼakasqanrayku. Ajinamanta qankuna ukhupi chay jina millay juchata chinkachinkichej”, nispa. Rikunchej jina, ñaupa israelitasqa sinchʼi juchayoj runasta rumiswan chʼanqaykuspa wañuchej kanku. *

Deuteronomio 21:23 versiculopi nisqanman jina, “warkhusqa runaqa Diosmanta maldecisqa” karqa. Israelitasqa “Diosmanta maldecisqa” runaj ayanta warkhusqata rikuspa, mana ajina runa kanankuta reparaj kanku.