Sha ayange a tsuaa la, akuraior kpishi wuan aferaior agen sha u manden ve sha kon. Mbaromanu yange ve kange shin ve mande ambaaior la sha kon u i soo u wuan ve sha mi la. Nahan ashighe agen ve tsa sha kon ne ayange imôngo, zan zan mnyoonom man imura man ijen man ahumbe kua ura ve kar wuan ve. Mbaromanu nengen ku u sha kon ér ka gbenda u kunya tsung u tsahan aferaior a yange gba kwagh cuku ga yô.

Hide ikyurior i Iserael i sha ayange a tsuaa la di ye? Mbaiserael yange ve wuan aferaior sha u manden ve sha konoo? Tindi u Mose yange kaa ér: “Aluer or á er isholibo i i kom ku man á wua nan, man ú hambe nan sha kon yô, ikyom i nan i̱ de tse sha kon ga, kpa ii nan iyange la je.” (Dut. 21:22, 23) Ikyav tese wang ér sha shighe u i lu ngeren Ruamabera u ken zwa Heberu la, or yange nana kuma ku yô, i hii wuan nan cii ve i mase hamben nan sha kon ye.

Sha nahan yô, Levitiku 20:2 kaa ér: “Hanma or u ken Mbaiserael shin u ken ushirmbaiorov mba ve tse ken Iserael, u nana na Moleki wan u nan yô, i̱ wua nan kpee je; ior mba ken tar la je, ve̱ ta nan awen.” Mba yange vea lu “a jijingi u orkpen shin u tsenganpasen akaa” la kpa i gba u a wua ve. Kpa i wua ve nena? Yange i wua ve sha u ‘tan ve awen.’—Lev. 20:27.

Duteronomi 22:23, 24 kaa ér: “Aluer wankwase u a lu iniun u a tende zwa a nom man orgen nan gem nan zough a na ken gar, nan yav a na yô, due nen a ve uhar cii hen hundagar la, ta nen ve awen ve̱ kpe, un wankwase la yô, ka sha ci u a lu ken gar je, kpa a gbir vaa ga yô, man or la yô, ka sha ci u nan hee kwase u or u nan we ndor a nan yô.” Nahan gbenda u vesen u Mbaiserael mba sha ayange a tsuaa mbara wuan mba ve er kwaghbo u vihin tsung la yô, lu sha u tan ve awen. *

Duteronomi 21:23 kaa ér “or u i sende nan yô, Aôndo wa nan ifan.” Yange a hambe ikyom i iferor u ‘Aôndo a we nan ifan’ la sha kon, hanma or a nenge a mi yô, kwagh ne a hingir icintan hen Mbaiserael mbagenev.