Long taim bipo, planti kantri i save nilim ol raskol long pos o diwai na kilim ol i dai. Ol Rom i save pasim o nilim raskolman long pos na em inap stap laip long sampela de, tasol bihain em bai dai, long wanem, bikpela pen i daunim em, em i no gat kaikai na wara, na em i kisim hevi long win, ren, na san. Ol Rom i pilim olsem pasin bilong nilim man long pos em strafe bilong semim tru ol man husat i mekim bikpela rong tru.

Olsem wanem long lain Israel bilong bipo? Yu ting ol i bin hangamapim ol raskol long pos na kilim ol i dai? Lo Bilong Moses i tok: “Sapos wanpela man i bin mekim bikpela rong na long dispela as ol i kilim em i dai na hangamapim bodi bilong em long wanpela pos, orait i tambu long larim bodi bilong en i hangamap i stap inap long moningtaim. . . . Olsem na yupela i mas planim bodi bilong dispela man long de em i dai tasol.” (Lo 21:22, 23) Dispela i soim olsem long taim ol i raitim Ol Skripsa Hibru, ol i save kilim i dai raskolman paslain long ol i hangamapim em long pos o diwai.

Wok Pris 20:2 i tok: “Sapos wanpela bilong yupela Israel o wanpela bilong ol arapela lain i stap wantaim yupela, em i givim pikinini bilong en olsem ofa long giaman god Molek, orait yupela i mas kilim dispela man i dai. Olgeta manmeri i mas tromoi ston long em inap em i dai pinis.” Na tu, ol i mas kilim i dai ol man husat i “toktok wantaim tewel bilong ol man i dai pinis bilong kisim tingting bilong ol.” Ol i mas kilim ol olsem wanem? Ol i mas “tromoi ston” long ol na kilim ol i dai.—Wkp. 20:27.

Lo 22:23, 24 i tok: “Sapos yupela i painim wanpela man i pilai wantaim wanpela meri ol i bin makim pinis long narapela man, orait yupela i mas kisim tupela i go ausait long taun na tromoi ston long tupela bai tupela i dai. Meri i bin i stap long taun we ol man inap harim krai bilong em, tasol em i no singaut long ol i helpim em. Olsem na em i mas i dai. Dispela man tu i mas i dai, long wanem, em i bin pilai wantaim wanpela meri ol i bin makim long wantok bilong en. Olsem tasol bai yupela inap long pinisim dispela pasin nogut.” Olsem na long Israel bilong bipo, pasin bilong tromoi ston long man em namba 1 rot bilong kilim i dai ol man husat i mekim bikpela rong tru. a

Lo 21:23 i tok, “bodi i hangamap i stap long diwai em i samting nogut long ai bilong God.” Dispela pasin i givim skul long lain Israel, olsem ol i no ken bihainim wankain pasin olsem dispela bikhetman i bin mekim.