GARY wawajajj 1958 maran nasjje ukhatpachwa wawajan mayjätap amuyjjayäta. Ukampis tunka phajjsinak pasjjän uka qhepatwa doctoranakajj wawajan usutätap yatiyasipkitäna. Ukat phesqa maranak qhepatarakwa Londres markankir uka toqet yatjjatat doctoranakajj cheqapun usutäskatap yatiyapjjetäna. Ukat Louise phuchhajan jukʼamp usutätap yatisajja, walpun llakisiyäta, jupajj Gary wawajat llätunka maranak sullkawa.

Doctoranakajj suma arumpiw akham sapjjetu: “Panpach wawamajj Bardet-Biedl * sat usunïpjjewa, ukat janiw qollanïkiti” sasa. Ukhanakajja janiw uka usojj uñtʼatäkänti. Ukham usuninakajj juykhuptapjjewa, wal likʼintapjje, janiw jankʼas jiltapkiti, reumatismonïpjjewa, diabetinïpjjewa ukat yaqha toqenakatwa tʼaqhesipjje. Cheqas wawanakajar uñjañajj wali chʼamäniwa. Gran Bretaña markanjja, uka usu toqet jichhak yatjjatatarjamajj sapa 125.000 jaqenakat mayniw uka usuni. Ukat inas waljanejj uka usump mä jukʼa usutäpjjarakchi.

Casarasta uka qhepatjja, Jehová Diosan mä Qhanañchiripampiw parlta ukat cheqa yatichäwi jikjjatatajwa amuyasta. Ukampis chachajajj janiw kuns yatiñ munkänti. Trabajop laykojja janiw mä cheqankapkakïyätti, ukatwa tantachäwinakar jan sarirjamäkayätti. Ukhamäkchïnsa, Diosarojj oración mayisiskakiyätwa ukat Biblsa liyiskakiyätwa. Jehová Diosajj janipuniw Jupar thaqhapki ukanakar jaytanukkiti. Ukat Juparakiw “tʼaqhesiyat jaqenakarojj arjjataski [...] llakisiñ pachanakan imaski” siski uk liytʼañajj wal chʼamachtʼawayitu (Sal. 9:9, 10).

Niyakejjay Gary wawajajj nayrat usutächïnjja, sojjta maranïkän ukhaw kawkintï ukham usutanakar yatichapki uka utar jaytanipjjta, ukajj Inglaterra marka aynach toqenkänwa, lamar qota jakʼana. Jupajj llakinakap yatiyañatak sapa kuti jawsankitän ukhaw Biblian wakiskir cheqa yatichäwinakap mä jukʼa yatichayäta. Louise wawajajj nasjjäna ukhat mä qhawqha maranak pasatatjja, esclerosis múltiple ukat fibromialgia sat usunakanïtaw sasaw doctorajj sitäna. Gary wawajajja, 16 maranëjjän ukhaw kawkirutï jaytanipkayät ukhat kuttʼanjjäna. Ukat nayrat jukʼampiw juykhuptjjäna ukatwa 1975 maran juykhut uñtʼatäjjäna. Ukat 1977 maranjja chachajajj jaytanukuwayjjapjjarakituwa.

Gary wawajan utar kuttʼanjjän ukat mä qhawqha tiempotjja, mä tamanwa tantachasjjapjjayäta, ukankir jilat kullakanakajj wali munasirïpjjänwa, ukatjja 1974 maranwa bautisasjjta. Niyakejjay yoqajajj qʼajjo waynitöjjchïnjja, cuerpopajj mayjtʼaskänwa, ukanakar saykatañapatakejj mä irpir chuymaniw yanaptʼäna, ukham yanaptʼatapat walpun yuspärta. Ukat yaqhep jilat kullakanakajja, utan lurañanakampiw yanaptʼapjjarakitäna. Ukat mä qhawqha tiempotjja, uka cheqankir autoridadanakajj phesqa jilat kullakanakaruw nanakar uñjapjjañapatakejj pagapjjäna.

Yoqajajj ajay toqet jiltaskakïnwa ukat 1982 maranwa bautisasjjäna. Jupajj precursor auxiliaräñ wal munäna ukatwa jupamp chik precursorjam irnaqañ qalltta, walja maranakaw precursorjam irnaqapjjta. Mä urojja, tamanak tumptʼir jilataw akham sasin jisktʼi: “Gary ¿janit precursor regularjam irnaqkasma?” sasa. Uka arunak istʼasajj wali kusisita ukat chʼamachtʼataw jikjjatasïna, ukat 1990 maranwa precursor regularäjjäna.

 Yoqajarojj pay kutiw thejjni chʼakhap yaqha uchapjjäna, mayjja 1999 marana ukat maysti 2008 maranaraki. Ukampis Louise wawajajj jukʼamp jan walinakanwa uñjasïna. Jupajj juykhuw nasïna, ukat maynïr kayupan sojjta lukʼananïtap uñjasajj Bardet-Biedl sat usunirakïtapwa amuyayäta. Ukat qhepatjja, doctoranakajj cuerpo manqhapan kunayman jan walïtapwa amuyapjjäna. Walja maranakanjja, walja kutiw operayasïna, phesqa kutejj riñonatwa operayasïna. Jupajj Gary jilapjamarakiw diabétis usuni.

Operayaskani ukhajj kuna jan waltʼäwis utjaspa uk amuyasajja, janïr operayaskasaw operir doctoranakampi, anestesia uchirinakampi ukat ukan irnaqapki ukanakampejj wila jan uchayasiñ toqet kuntï amtki uk parltʼi. Ukatwa ukan irnaqerinakampejj sum apasi ukat juparojj sumarak uñjapjje.

Jehová Diosar yupaychañanjja familiajan wal irnaqtʼapjjta. Nayrajja, janiw televisionasa, computadorasa ukat ukar uñtasit yaqhanakas jichhjamajj utjkänti, ukhajj walja horanakaw wawanakajatak liyirïyäta. Jichhajj CD, DVD ukanakasa ukat Internetan www.pr418.com cheqansa grabacionanakajj utj-jjarakiwa. Uka yanaptʼanakampejj semanatak Biblia liyiñatak wakichatäki uksa kuna horaruy sapa maynejj munapjjsta ukarjamaw yatjjatapjjta ukat tantachäwinakansa sumarak arstʼapjjta.

Gary wawajajja, awisajj pʼeqeparuw tantachäwin arstʼañatakejj yatsu ukat Diosan Arunakap Yatiyañatak Escuelansa pachpa arupat arstʼaraki. Jupajj 1995 maratwa irpir chuymaninakan yanapiripjam loqtaski ukat Tantachasiñ Utanjja, jilat kullakanakar katoqtʼasa ukat sonidon yanaptʼasaw jan tiempon irnaqtʼi.

Jilat kullakanakaw yatiyir sarki ukhajj yanaptʼapjje ukat reumatismo usunïtapatjja, silla de ruedapatsa jupanakaw nuknaqapjje. Ukat mä jilataw Bibliat yateqañ munki ukar yatichañapatakejj yanaptʼaraki. Ukat 25 maranak yatiyir jan mistjje uka kullakarus Gary wawajajj chʼamañchtʼarakïnwa. Jichhajj uka kullakasa ukat Bibliat yatichki ukasa tantachäwirojj sarjjapjjewa.

Louise wawajarojj llätunka maranïkän ukhaw mamitajajja, pʼitañ yatichäna ukat jupar uñjki ukamp nayampiw bordañ yatichapjjarakta. Uk lurañjja jupajj wal muni, ukatwa tamankir jiskʼa wawanakatakisa ukat chuymankipstat jilat kullakanakatakis kunayman colorani suma ikiñanak lurarapi. Ukat chʼamañchtʼañataki jan ukajj yuspärañatakiw tarjetanak lipʼkatir dibujunakan luraraki. Uka tarjeta katoqerinakajj walpun jupar munasipjje. Ukat tawaqetäkän ukhaw maquinan qellqañ yateqäna. Jichhajja, parlir mä computadorap toqew Internetnam amigonakapamp parli. Jupajj 17 maranïkän ukhaw bautisasjje, ukhatjja yatiyañatak campañanakajj utjki ukhajj panpachaniw precursor auxiliarjam irnaqtʼapjjta. Ukatjja, jaqenakar yatiyañatakejj ‘juykhunakajj uñj-jjapjjaniwa’ janiw khitis “usutätwa” sisjjaniti sasin Diosan Arupajj qhanañchki uka jiskʼa tʼaqanakwa Louise ukat Gary wawanakajajj pʼeqepar yatsupjje (Isa. 33:24; 35:5).

Biblian jikjjataski uka suma yatichäwinakatjja Jehová Diosar walpun yuspärapjjta. Ukat tamankir jilat kullakanakan yanaptʼatapatsa walpun yuspärapjjta, jupanakan jan yanaptʼapampejj janiw taqe ukanak lurapkiristti. Cheqas Jehová Diosan yanaptʼapampikiw kusisit jakasiñ jikjjatapjjta.