PAKAPANGAKI ko ki Gary kan 1958, narisa ko tulos na igwa nin problema. Pero, inabot nin sampulong bulan bago nadiskobre kan mga doktor an kondisyon niya asin nin limang taon pa bago iyan nakumpirmar kan mga espesyalista sa London. Munduon ako kan an aki kong babayi na si Louise, na namundag siyam na taon pakapangaki ki Gary, nahilingan nin mga sintomas na mas grabe kisa saiya.

“An duwa mong aki parehong may LMBB syndrome, * asin dai iyan nin bulong,” an mabuot na sabi sa sako kan mga doktor. Kan panahon na iyan, dikiton pa sana an aram manungod sa bihirang hilang na ini sa gene. Sa parati, kabilang sa mga sintomas kaiyan an diperensiya sa paghiling na minaresulta sa pagkabuta, sobrang katabaan, sobrang muro sa kamot asin/o bitis, maluway na pag-uswag kan kakayahan na humiro asin mag-isip, problema sa koordinasyon kan mga parte kan hawak, diabetes mellitus, osteoarthritis, asin abnormalidad sa bato. Huli kaini, magigin dipisilon an pag-ataman sa sakong mga aki. Sa pagkarkulo nin sarong dai pa sana nahahaloy na pag-adal, 1 sa 125,000 na tawo sa Britania an igwa nin arog kaining hilang, pero dakul pa an tibaad igwa nin sarong klase kaiyan na bako gayong grabe.

Dai nahaloy pakaagom ko, nakaulay ko an saro sa Mga Saksi ni Jehova asin naaraman ko tulos na itinutukdo ninda an katotoohan. Pero mayo lamang nin interes an agom ko. Huli sa trabaho niya, paburubalyo kami nin istaran, kaya mayo akong naaatenderan na kongregasyon. Minsan siring, padagos akong nagbasa nin Bibliya asin namibi ki Jehova. Nakakaranga nanggad na mabasa na “si Jehova magigin sarong ligtas na kalangkawan para sa siisay man na biyong pinapangluyahan nin buot, sarong ligtas na kalangkawan sa panahon nin kasakitan” asin na “dai [niya] nanggad babayaan an mga naghahanap sa [saiya]”!—Sal. 9:9, 10, NW.

Maluya an paghiling ni Gary, kaya kan sais anyos siya, pinaadal mi siya nin espesyal na edukasyon sa sarong boarding school sa may baybayon sa timog na parte kan Inglatera. Pirmi siyang nag-aapod sa sako dangan sinasabi an mga ikinakahadit niya, asin paagi sa telepono natabangan ko siyang masabutan an pundamental na mga prinsipyo sa Bibliya. Mga pirang taon pakapangaki ko ki Louise, ako mismo nagkahilang man nin multiple sclerosis asin fibromyalgia. Nag-uli si Gary hali sa boarding school kan 16 anyos siya. Pero, lalo pang nagluya an paghiling niya, asin kan 1975, irinehistro siya na sarong buta. Kan 1977, binayaan kami kan agom ko.

Dai nahaloy pakabalik ni Gary, nag-iiba na kami sa mga aktibidad nin sarong mamumuton na kongregasyon, asin nabawtismuhan ako kan 1974. Nagpapasalamat nanggad ako na tinabangan si Gary nin sarong elder na maatubang an nangyayaring mga pagbabago sa saiyang hawak kan tin-edyer na siya. Tinatabangan man ako kan ibang mga Saksi sa mga gibuhon sa harong, asin paghaloy-haloy, an lima sa sainda inasignar kan lokal na gobyerno bilang opisyal na maasikaso sa samo. Dakulang bendisyon nanggad iyan!

Nagpadagos an pag-uswag ni Gary sa katotoohan asin nabawtismuhan siya kan 1982. Gustong-gusto niyang mag-auxiliary payunir. Kaya, nagdesisyon akong ibanan siya sa gibuhon na iyan asin padagos kong ginibo ini sa laog nin dakul na taon. Maugmahon an aki ko kan paghaloy-haloy hinapot siya kan paraataman nin sirkito, “Taano ta dai ka magregular payunir  Gary?” Iyan mismo an pamparigon sa buot na kaipuhan ni Gary, asin kan 1990 nagin regular payunir siya.

Duwang beses sinalidahan an pagsukmulan kan tulang sa piad ni Gary, an inot kan 1999 asin an ikaduwa kan 2008, pero mas grabe pa an mga problema ni Louise sa salud. Ipinangaki siya na biyong buta, asin kan mahiling ko na may sobrang muro an sarong bitis niya, naisip kong igwa man siya nin LMBB syndrome. Dai nahaloy, nadiskobre sa mga pag-eksamin na igwa man nin grabeng mga depekto an dakul sa mga organo sa laog kan hawak niya. Sa nag-aging mga taon, uminagi siya nin mayor na mga operasyon, kaiba na an limang operasyon sa saiyang mga bato. Arog ni Gary, igwa man siya nin diabetes.

Huling aram ni Louise na posibleng magkaproblema kun kaipuhan nin operasyon, nakikipag-ulay nguna siya sa mga siruhano, anestesyologo, asin miyembro kan administrasyon kan ospital para ipaliwanag an saiyang desisyon mapadapit sa medikal na mga prosedimiyento sa pagbulong na dai naggagamit nin dugo. Bilang resulta, marahay an relasyon niya sa gabos na nag-aasikaso sa saiyang mga problema sa salud.

Dakul an ginigibo mi sa harong, an gabos nakasentro sa pagsamba ki Jehova. Kan mayo pa an modernong mga pantabang na elektroniko, dakul na oras an ginagamit ko tanganing basahan si Gary asin Louise. Ngunyan, sa tabang nin mga CD, DVD, asin recording sa www.pr418.com, nagigibo ming tulo an semanal na iskedyul nin pag-adal sa Bibliya sa iba-ibang oras, asin nakakapagtao kami nin makahulugan na mga komento sa Kristiyanong mga pagtiripon.

Kun minsan, tinutuom ni Gary an mga simbag niya, asin kun may kabtang siya sa Teokratikong Paadalan sa Pagmiministro, nagigibo niya iyan sa ekstemporanyong paagi. Kan 1995 ninombrahan siya bilang ministeryal na lingkod asin pirmi siyang sibot sa Kingdom Hall, na maugmang inaako an mga tugang sa kongregasyon asin nagtatabang sa pag-asikaso kan sound system.

Pag naghuhulit, pig-iibahan si Gary kan mga kapwa Saksi, na sa parati nagbubusol kan saiyang silyang de ruweda huli sa saiyang arthritis. Tinabangan siya nin sarong Saksi na magkondukta nin pag-adal sa Bibliya sa sarong interesado. Naparigon man ni Gary an buot nin sarong Kristiyano na inaktibo sa laog nin 25 taon. An duwang iyan pareho nang nag-aatender sa Kristiyanong mga pagtiripon.

Kan nuwebe anyos si Louise, nakanuod siyang maggansilyo sa lola niya, asin ako saka an saro sa mga nag-aasikaso sa saiya nagtukdo sa saiya kun paano magburda. Huling nawiwilihan niyang marhay iyan, naggagansilyo siya nin makulor na mga tamong para sa mga umboy asin may edad nang mga tugang sa kongregasyon. Naggigibo man siya nin mga greeting card gamit an saradit na ritrato na dinudukot. Pinapahalagahan iyan kan mga nakakaresibi. Kan tin-edyer na si Louise, nakanuod siyang magmakinilya. Ngunyan, sa tabang nin nagtataram na kompyuter, pirmi niyang kinokontak an mga amiga niya paagi sa e-mail. Nabawtismuhan si Louise kan 17 anyos siya. Durante nin espesyal na mga kampanya sa paghuhulit, magkaibanan kaming nag-o-auxiliary payunir. Arog ni Gary, nagtutuom si Louise nin mga teksto tanganing ipahayag an pagtubod niya sa mga panuga nin Diyos dapit sa sarong kinaban kun sain “an mga mata kan mga buta magkakaburuklat” asin “mayo nin residente na masabi: ‘May hilang ako.’”—Isa. 33:24; 35:5, NW.

Dakula an pasalamat mi sa mahahalagang marhay na katotoohan sa ipinasabong na Tataramon ni Jehova! Nagpapasalamat kami nin lubos sa mamumuton na suporta kan samong kongregasyon, huli ta kun mayo iyan dai magigin posible an kadaklan sa mga bagay na nagigibo mi. Asin nangurugna huli sa tabang ni Jehova, nagin makahulugan an buhay mi.