UBUMI BWABO

Icalenga Ukuti Tube ne Nsansa sha Cine Cine

Abashimika ili lyashi ni ba Patricia Smith

ILYO fye umwana wandi umwaume Gary afyelwe mu 1958, nalimwene ukuti tali bwino. Lelo palipitile imyeshi 10 pa kuti badokota beshibe ubulwele alwele kabili palipitile imyaka 5 pa kuti abasambilila sana aba ku London basange ukuti ca cine ubulwele badokota basangile e bo alwele. Ilyo papitile imyaka 9, nalikwete umwana umwanakashi Louise. Ala nalyumfwile sana ububi ukumona ukuti na o alilwele ubulwele bumo bwine, lelo ena bwalicililemo.

Badokota banjebele ukuti “abana bobe balilwala ubulwele bwa LMBB, * kabili tabupola.” Pali ilya nshita, badokota tabaishibe ifingi pali ubu bulwele bwa kufyalwa nabo. Umuntu uwalwala ubu bulwele tamona bwino kabili mu kuya kwa nshita alapofula, alena sana, alakwata ifikondo nangu ifikumo ifingi, takula bwangu, alalwala shuga, ubulwele bwa mu mfyufyu, kabili imfyo tashibomba bwino. Kanshi ukusakamana abana bandi kwali no kwafya icine cine. Mu kufwailisha uko bacitile nomba line mu Britain basangile ukuti pa bantu 125,000 umuntu fye umo e ulwalako ubu bulwele, nangu ca kutila kulabako abengi aba kuti balabako eye filya.

YEHOVA ABA “ICUBO” CESU

Ilyo naupilwe fye, e lyo nalandilepo ne Nte sha kwa Yehova kabili ilyo line nalimwene ukuti balasambilisha icine. Lelo abena mwandi tabalefwaya ukusambilila Baibolo. Pa mulandu wa ncito balebomba, twalekuukakuuka, kanshi nshalelongana. Na lyo line nalitwalilile ukubelenga Baibolo no kupepa kuli Yehova. Ala nalyumfwile bwino ilyo nabelengele ukuti “Yehova akaba icubo kuli onse uwacushiwa, icubo mu nshita sha mafya,” no kuti ‘takatale asha abamufwaya’!—Amalu. 9:9, 10.

Gary talemona bwino, kanshi ilyo ali ne myaka 6, bamutumine kwi sukulu lya kukuuka uko basambilisha abana abalemana. Ili sukulu lyabelele ku kapinda ka ku kulyo aka England. Alentumina foni lyonse kabili alenjeba ifyalemusakamika, kabili na ine nalemusambilisha ifyo Baibolo ilanda. Ilyo papitile fye imyaka iinono ukutula apo Louise afyalilwe, na ine nalilwele ubulwele ubulenga imicincili ukukosa no kufimba, na mafupa yalakalipa sana. Ilyo Gary ali ne myaka 16 alibwelele ukufuma ku sukulu. Lelo asukile aleka ukumona ica kuti mu 1975 aba buteko balimulembeshe ukuti ni mpofu. Mu 1977, abena mwandi balitubutwike.

Tapakokwele ukutula apo Gary abweleele ukufuma ku sukulu, twatendeke ukubombela pamo na bamunyinefwe ba mu cilonganino abatutemenwe nga nshi kabili mu 1974, nalibatishiwe. Nalitemenwe sana pantu eluda umo alyafwile Gary ukwishiba ifya kucita ilyo alekula ukuba umulumendo. Ba Nte bambi balengafwako imilimo ya pa ng’anda kabili mu kuya kwa nshita, aba mu buteko basalilepo abali 5 ukuti baletusakamana kabili balebalipila. Ala tulatasha sana pali ifi fyonse!

Gary alilundulwike kabili mu 1982 alibatishiwe. Alefwaya sana ukubombako bupainiya bwa kwafwilisha, e ico napingwilepo ukuti ndebomba nankwe kabili natwalilile ukubomba nankwe pa myaka iingi. Gary alitemenwe sana ilyo kangalila  wa muputule amwipwishe ukuti, “Gary, mulandu nshi teti ulembeseshe fye bupainiya bwa nshita yonse?” Aya mashiwi yalimukoseleshe sana ica kuti mu 1990 alitendeke bupainiya bwa nshita yonse.

Gary balimufumya intungu shonse shibili no kumubikamo isha cela, lumo balufumishe mu 1999 e lyo lumbi mu 2008, na lyo line amafya Louise akwata yena yalicilapo ukubipa. Afyelwe impofu, kabili ilyo namwene ukuti alikwete icikondo na cimbi, nalishibe ukuti na o wine alilwele ubulwele bwa LMBB. Ilyo bamupimine basangile ukuti ifilundwa ifingi mu mubili na fyo tafyali bwino. Balimulepula imiku iingi, ne mfyo na sho balishilepulapo imiku 5. Na o wine alilwala shuga.

Apo Louise alishiba ukuti ilingi pa kulepulwa kulaba amafya aya kufwaya ukubikamo umulopa, alalanshanishisha libela na badokota ukubalondolwela umulandu akaanina ukumubikamo umulopa. Ici calenga ukuti aleumfwana bwino na badokota e lyo na bambi abamusakamana.

TWALIBA NE NSANSA

Tulacita ifintu ifingi pa ng’anda ifyakuma ukupepa Yehova. Nalepoosa inshita iikalamba ukubelengela Gary na Louise ilyo kushilaba ama CD, ama DVD e lyo ne fyebo babika pa Intaneti. Nomba ifi twakwata ifi fintu, cila mulungu tulaisambilisha Baibolo pa nshita shalekanalekana kabili tulasukapo bwino pa kulongana.

Limo Gary asungila fye ifyasuko ku mutwe, kabili nga nakwata ilyashi mu Sukulu lya Butumikishi Ilya Bulesa alalanda fye mu mashiwi yakwe. Mu 1995 e lyo bamusontele ukuba umubomfi atumikila kabili alabombako imilimo iingi pa Ng’anda ya Bufumu, ukupokelela abaleisa mu kulongana kabili alabombelako na ku fisoselo.

Bamunyinefwe balaya na Gary mu kushimikila, kabili ilingi e bamukunkulusha pa ncinga endelapo pa mulandu wa bulwele alwala ubwa mu mfyufyu. Munyinefwe umo alimwafwa ukutungulula isambililo lya Baibolo ku muntu uufwaya sana ukusambilila. Na kabili, Gary alikoseleshapo nkashi uwalekele ukushimikila no kulongana pa myaka 25. Aba bonse babili nomba balalongana.

Ilyo Louise ali ne myaka 9, banakulu balimusambilishe ukupikula, na ine no walemutensha twamusambilishe ukubila. Apo alitemwa sana ukupikula, alapikula amalangeti ya bana ayasuma e lyo na ya bakoloci ba mu cilonganino. Kabili alapanga na makardi ukubomfya utukope utwakwata gulu. Abapokelela aya amakardi balatemwa icine cine. Louise alisambilile no kutaipa ilyo acilileko fye imyaka 13. Pali ino nshita, alalanshanya na banankwe ukubomfya kompyuta iyaibela. Nga alanda ifyebo iyi kompyuta ilalemba ifyo alanda no kufituma. Louise abatishiwe ilyo ali ne myaka 17. Nga kwaba imyeshi yaibela iya kushimikila sana, tulabombela pamo bupainiya bwa kwafwilisha. Nga filya ficita Gary, Louise na o alasungila amalembo ku mutwe ayo abomfya nga alelanda pa fyo acetekela amalayo ya kwa Lesa aya kuti mu calo cipya “amenso ya mpofu yakamona” no ‘mwikashi takatile “Nindwala.”’—Esa. 33:24; 35:5.

Ala tulatasha nga nshi pa cine icacindama icaba mu Cebo ca kwa Yehova! Tulatasha na pa fyo aba mu cilonganino batusakamana, pantu akubula bena nga tapaba ne fyo tucita. Kabili pa mulandu wa kuti Yehova alatwafwa, twaliba ne nsansa sha cine cine.

[Futunoti]