SMOLTAEM afta we boe blong mi Gary i bon, long 1958, mi luksave se wan samting i rong long hem. Nating se i olsem, i tekem ten manis blong ol dokta oli faenemaot samting we i rong long hem, mo i tekem faef yia moa, blong ol spesel dokta blong London oli talemaot sik blong hem. Naen yia afta, gel blong mi Louise i bon, mo mi mi harem nogud tumas taem mi luk sam saen we i soemaot se hem i kasem sem sik olsem Gary, be i moa nogud.

Dokta i talem long mi long kaen fasin, se: “Tufala pikinini blong yu, tufala tugeta i gat sik ya Laurence-Moon-Bardet-Biedl (LMBB), * mo mi sore tumas blong talem se sik ya i no gat meresin blong hem.” Long taem ya, ol man oli no gat tumas save long saed blong sik ya. Man we i gat sik ya, ae blong hem i stat blong kam nogud nao hem i save blaen, hem i fatfat tumas, sam narafala fingga blong leg no blong han blong hem oli gru, hem i gru slo, hem i no save yusum gud ol haf blong bodi blong hem, hem i gat sik blong suga, ol bun blong hem oli soa, mo kidni blong hem i no wok gud. Yes, i no isi nating blong lukaot long tufala pikinini blong mi. Wan stadi we oli mekem i no longtaem, i soemaot se long ol 125,000 man long Inglan, i gat 1 long olgeta i kasem sik ya. Nating se i olsem, i luk olsem se plante moa man oli stap kasem sik ya.

Smoltaem afta we mi mared, mi bin storian wetem wan Witnes blong Jehova, mo kwiktaem nomo, mi luksave se samting we ol Witnes oli tijim, hem i trutok. Be man blong mi i no intres nating. Hem i gat wok, mo wok blong hem i mekem se mifala i muv plante taem blong go long narafala ples. Samting ya i mekem se mi tu mi no save go long ol miting. Nating se i olsem, mi gohed blong ridim Baebol mo blong prea long Jehova. Mi mi harem gud tumas taem mi ridim se: “Hae God [Jehova]. Yu yu sefples blong olgeta ya we ol man oli stap spolem olgeta. Yu yu ples blong haed blong olgeta long taem blong trabol. . . . Olgeta we oli kam long yu, yu no save lego wan long olgeta.”—Sam 9:9, 10.

Gary i gat problem long ae, taswe taem hem i gat sikis yia, mi sanem hem i go long wan spesel skul long saot blong Inglan. Evritaem, hem i ring long mi blong tokbaot ol samting we oli mekem hem i wari, ale mi givhan long hem blong i kasem save long ol stamba tijing blong Baebol. Sam yia afta we Louise i bon, mi tu mi sik. Mi kasem sik ya multiple sclerosis, mo wan narafala sik we i mekem se mi no save stanap stret mo mi no save yusum ol leg mo han blong mi, mo tu ol bodi blong mi oli soa tumas. Long 1974, Gary i finisim skul blong hem taem hem i gat 16 yia. Ae blong hem i stap kam moa nogud. Long 1975, oli putum nem blong hem long lis blong ol man we oli blaen. Long 1977, man blong mi i lego mifala.

Smoltaem afta we Gary i finis skul, mi mi tekem baptaes mo mifala i joen long wan gudfala kongregesen we i keagud long mifala. Mi glad tumas we wan elda i givhan long Gary long yangtaem blong hem, blong hem i save wanem blong mekem taem hem i luk ol jenis we oli stap hapen long bodi blong hem. Sam long ol Witnes oli givhan long mi long ol wok blong haos. Biaen, wan ogenaesesen long ples blong mifala we i stap lukaot long ol handikap, oli jusum faef Witnes blong oli kam stap givhan long mifala. !Hemia wan nambawan blesing!

Gary i gohed gud long trutok, mo hem i baptaes long 1982. Hem i wantem tumas blong mekem haftaem paenia, ale mi tu mi wantem givhan long hem blong mekem wok ya. Mitufala i mekem haftaem paenia blong plante yia. Boe blong mi i glad tumas taem eria elda blong mifala i askem long hem se: “?Gary, yu no wantem mekem wok blong fultaem paenia?” Toktok ya i leftemap tingting blong Gary bigwan, mo long 1990, hem i kam wan fultaem paenia.

 Dokta i katem Gary tu taem blong jenisim bun we i stap long ples blong strap, faswan long 1999 mo narawan long 2008. Be sik blong Louise i moa nogud, from we taem hem i bon, hem i blaen finis. Mo taem mi luk se hem i gat wan moa fingga long leg blong hem, mi luksave se hem tu i gat sem sik olsem Gary. Taem oli jekem hem long hospital, oli faenemaot se hem i gat plante problem insaed long bodi blong hem. Ol dokta oli katem hem plante taem. Mo faef taem oli katem kidni blong hem. Hem tu i gat sik blong suga olsem Gary.

Louise i save se bambae i gat sam trabol i kamaot taem oli katem hem. From samting ya, hem i storian wetem dokta blong katem man, mo wetem ol narafala dokta mo ol nes long hospital. Hem i eksplenem from wanem hem i no wantem se oli putum blad long hem. Samting we i kamaot se, hem i fren gud wetem olgeta we oli lukaot long hem.

Mifala i mekem plante samting long haos blong mifala blong wosip long Jehova. Fastaem, taem ol niu teknoloji oli no kam yet, mi stap spenem plante aoa blong rid long Gary mo Louise. Be naoia i gat ol CD, mo ol DVD, mo ol rikoding we yumi save karemaot long Websaet ya www.pr418.com. Ol samting ya oli givhan long mifala evriwan blong harem gud long ol defren program blong stadi Baebol evri wik, mo mifala i save givim ol gudfala ansa long ol Kristin miting.

Samtaem, Gary i lanem baehat ol ansa blong hem, mo sipos hem i gat wan tok long Tiokratik Skul, hem i naf blong mekem tok ya long prapa toktok blong hem. Long 1995, hem i kam wan man blong givhan. Hem i bisi oltaem blong welkamem ol brata mo sista long Haos Kingdom, mo hem i givhan tu long brata we i lukaot long saon long taem blong miting.

Ol Kristin brata oli joen wetem Gary long wok blong prij. Plante taem oli pusum hem long wiljea, from we ol joen blong bodi blong hem oli solap mo oli soa. Wan brata i givhan long hem blong mekem Baebol stadi long wan man we i wantem save trutok. Mo Gary i givhan long wan Witnes we i no moa prij blong 25 yia. Naoia, tufala man ya tufala i stap kam long ol miting.

Taem Louise i gat naen yia, bubu woman blong hem i lanem hem blong somap, ale mi mo wan long ol sista we oli stap lukaot long hem, mitufala i tijim hem blong somap ol pija long kaliko. Hem i laekem tumas blong somap. Ale, hem i mekem plante naes blangket blong ol bebi, mo blong ol olfala brata mo sista long kongregesen. Hem i mekem ol kad tu mo i putum ol pija long hem. Biaen hem i sanem long ol narafala. Olgeta we oli kasem ol kad ya oli glad tumas. Taem Louise i yangfala yet, hem i lanem olsem wanem blong yusum masin blong raet. Naoia, hem i gat wan kompiuta, mo hem i save raet long ol fren blong hem oltaem. Louise i baptaes taem hem i gat 17 yia. Long taem blong seremaot ol spesel traket, mitufala i glad blong mekem wok blong haftaem paenia tugeta. Louise i mekem olsem Gary. Hem i rimemba ol vas. Ale taem hem i prij, hem i save tokbaot bilif we hem i gat long ol promes we God bambae i mekem i kamtru long wol ya. Hemia ol promes ya se “ae blong ol blaen man bambae i open,” mo “bambae i no gat wan man ples we i save talem se: ‘Mi mi sik.’”—Aes. 33:24; 35:5.

!Mifala i harem gud tumas from ol gudfala trutok ya we oli stap long Tok blong Jehova! Hat blong mifala i fulap long glad, mo mifala i wantem tumas blong talem tangkiu long ol brata mo sista long kongregesen blong mifala, from ol samting we oli mekem blong givhan long mifala. Sipos i no olgeta, bambae mifala i no save mekem ol wok olsem. Mo from we Jehova i stap givhan long mifala, laef blong mifala i no blong nating nomo.