KE NDONDO oro Gary akpan nnyịn akamanade ke 1958, mma n̄kụt ke enye enyene udọn̄ọ. Edi akada ọfiọn̄ duop mbemiso mbiausọbọ ẹkefiọkde se enye ọkọdọn̄ọde, onyụn̄ ada isua ition ke oro ebede mbemiso nta mbiausọbọ ke London ẹkesọn̄ọde ke udọn̄ọ esie edi oro. Mma mfụhọ etieti ke ini Louise adiaha nnyịn akamanade ke isua usụkkiet ke Gary ama akamana, onyụn̄ enyene mme n̄kpọ emi ẹwụtde ke udọn̄ọ esie ọdiọk akan eke Gary.

Mbiausọbọ ẹma ẹdọhọ mi ẹte: “Akpan ye adiaha fo ẹnyene udọn̄ọ emi ẹkotde LMBB [Laurence-Moon-Bardet-Biedl syndrome], * ndien usọbọ idụhe.” Ini oro owo ikenen̄ekede ifiọk n̄kpọ iban̄a ndammana udọn̄ọ emi mîwakke mi. Ndusụk n̄kpọ emi ẹsidade ẹfiọk udọn̄ọ emi edi mfịna enyịn emi esinamde owo ọdọn̄ọ nnan, edikpon ubom n̄kaha, edinyene nnuenubọk m̀mê nnuenukot mbe ition, editre ndisọp n̄kọri, owo nditre ndinen̄ede mfiọk n̄kpọ, udọn̄ọ ikịm an̄wan n̄kụhọ, ewan̄kọ ọkpọ, ye mfịna ekpụt. Ke ntem, ikememke utom ndikama nditọ mi. Ndụn̄ọde oro ẹnamde ke ndondo emi owụt ke owo 1 ke otu owo 125,000 ke Britain ẹnyene udọn̄ọ emi, okposụkedi emi se iwakde ikan oro ẹkemede ndidọn̄ọ orụk udọn̄ọ emi, edi oro mîdiọkke nte eke nditọ mi.

Mma nnyene nneme ye Ntiense Jehovah kiet esisịt ini ke mma n̄kọdọ ebe, ndien mma mfiọk ke se mmọ ẹkpepde edi akpanikọ. Edi ebe mi ikenyeneke udọn̄. Nnyịn ikekemeke ndidụn̄ ebiet kiet ke ntak utom esie, ntre n̄kekemeke ndibuana ye esop. Edi mma n̄ka iso ndikot Bible nnyụn̄ mbọn̄ akam nnọ Jehovah. Ama enem mi tutu ndikot ke Bible nte ke “Jehovah ayakabade edi edikon̄ ebiet ubọhọ ọnọ owo ekededi emi ẹfịkde, edikon̄ ebiet ubọhọ ke ini nnanenyịn” ye nte ke enye ‘idikpọn̄ke mmọ eke ẹyomde enye.’—Ps. 9:9, 10.

Gary ikekemeke ndikụt usụn̄ ọfọn, ntre ke ini enye ekedide isua itiokiet, ẹma ẹnọ enye aka ufọkn̄wed emi ẹdụn̄de-dụn̄ ke edem usụk England. Enye ama esikot mi kpukpru ini emi n̄kpọ afịnade enye, ndien mma nsikpep enye mme akpan edumbet Bible ke telefon. Isua ifan̄ ke Louise ama akamana, ami ke idemmi mma ndọn̄ọ awak-n̄kukọhọ udọn̄ọ mfre emi esinamde owo ọdọn̄ọ akpauben̄ ye ewan̄kọ. Gary ama ọnyọn̄ edi ke ini enye ekedide isua 16. Edi enyịn eketetịm ekịm enye, ntre ukara ẹma ẹsịn enye enyịn̄ ke otu mme nnan ke 1975. Ke 1977 ebe mi ama efehe ọkpọn̄ nnyịn.

Esisịt ini ke Gary ama ọkọnyọn̄ edi, ima itọn̄ọ ndibuana ye esop ndien nditọete ẹma ẹnyene ima etieti. Mma nna baptism ke 1974. Mma nnen̄ede n̄kop idatesịt ke ini ebiowo akan̄wamde Gary ọfiọk nte ekpesede aban̄a mme ukpụhọde ini uyen esie. Mme Ntiense en̄wen ẹma ẹsin̄wam mi ke utom esịtufọk, ndien ke akpatre, ukara ẹma ẹkpe owo ition ke otu mmọ ẹsin̄wam nnyịn. Ata edidiọn̄ ke emi ekedi!

Gary ama aka iso anam n̄kọri ke n̄kan̄ eke spirit onyụn̄ ana baptism ke 1982. Ama enen̄ede ọdọn̄ enye ndinam utom usiakusụn̄ unọ un̄wam. Ntem, mma mbiere nditiene nnam utom oro, ndien ima  inam ntre ke ediwak isua. Esịt ama enen̄ede enem enye ke ini esenyịn circuit okobụpde enye ete, “Gary, nso inam mûdịghe asiakusụn̄ ofụri ini?” Oro ama esịn udọn̄ ọnọ enye, ndien ke 1990 ẹma ẹmek enye asiakusụn̄ ofụri ini.

Ẹkpụhọ Gary ekikoi ikaba, akpa ekedi ke 1999 ndien ọyọhọ iba ekedi ke 2008, edi Louise eketetịm ọdọn̄ọ. Enye akamana nnan, ndien ke ini n̄kokụtde ke enye enyene nnuenukot itiokiet ke ukot kiet, mma mfiọk ke enye n̄ko enyene udọn̄ọ LMBB. Ndụn̄ọde ama owụt ke ediwak ndido esịtidem esie ẹnyene mfịna n̄ko. Ẹsiak enye idem ediwak ini, emi esịnede edisiak enye ekpụt ikotion. Enye enyene ikịm an̄wan n̄kụhọ n̄ko nte Gary.

Sia Louise ọfiọkde mfịna oro ekemede ndidu ke ntak usiakidem, enye esinyene nneme ye mme asiak-owo-idem, mme ọnọ-ibọk usụhọde ubiak, ye mme akamautom ufọkibọk man asian mmọ ntak emi imọ mîyomke ẹsịn imọ iyịp ke idem. Emi esinam enye edi ufan ye mbon oro ẹsinọde enye usọbọ.

Imesinam ekese n̄kpọ ke ufọk nnyịn man ituak ibuot inọ Jehovah. Mbemiso mme n̄kpọ ilektrọnik eyomfịn ẹwọrọde ẹdi, mma nsida ediwak hour n̄kot n̄wed nnọ Gary ye Louise. Idahaemi CD, DVD, ye mme n̄kpọ oro ẹmụmde ẹdọn̄ ke www.pr418.com ẹnam nnyịn ikeme ndisikpep Bible kpukpru urua ke nsio nsio ini, imesinyụn̄ inen̄ede ibọrọ mbụme ke mme mbono esop.

Gary esimomụm ibọrọ esie ọdọn̄ ke ibuot ndusụk ini, ndien edieke enye enyenede n̄kpọ ndinam ke Ufọkn̄wed Utom Ukara Abasi, enye esitịn̄ ke ikọ idemesie. Ẹma ẹmek enye asan̄autom unamutom ke 1995, ndien enye esinam ekese ke Ufọkmbono Obio Ubọn̄, adara mbon oro ẹdide onyụn̄ an̄wam etịm ukwak utịn̄ikọ.

Mme Ntiense ẹsisan̄a ye Gary ke an̄wautom ẹnyụn̄ ẹkpat n̄kpọitie mbon n̄kpọnnam emi enye esitiede ke ntak ewan̄kọ. Ntiense kiet an̄wam enye enịm ukpepn̄kpọ Bible ye owo. Gary esịn udọn̄ n̄ko ọnọ eyenete emi mîkọwọrọke an̄wautom aba ke isua 25. Eyen ukpepn̄kpọ esie oro ye Ntiense emi ẹsidụk mbono esop idahaemi.

Eka mi ama ekpep Louise ndidọk ọfọn̄ ke ini enye ekedide isua usụkkiet, ndien ami ye kiet ke otu mbon oro ukara ẹkekpede ẹsin̄wam nnyịn ima ikpep enye ndisịn fansi ke ọfọn̄. Sia enye enen̄erede ama ndidọk nnyụn̄ n̄kịm ọfọn̄, enye esidọk ndiye abran̄kịn ọnọ nseknditọ ye ikpọ owo ke esop. Enye esinam n̄ko n̄kpri kad ọnọ mme owo onyụn̄ ada ndise adian. Mbon oro enye esinọde kad emi ẹsinen̄ede ẹma mmọ. Louise ama ekpep nditaip n̄kpọ ke ini enye mîkesịmke isua 15. Idahaemi enye esida kọmputa emi edide ama otụk n̄kpọ enye osioro uyo ọnọ e-mail ẹsọk mme ufan esie. Louise akana baptism ke ini ekedide isua 17. Imesinam utom usiakusụn̄ unọ un̄wam ke san̄asan̄a ini ukwọrọikọ. Ukem nte Gary, Louise esimụm mme itie N̄wed Abasi ọdọn̄ ke ibuot ada eneme ye mbon en̄wen aban̄a ererimbot emi Abasi ọn̄wọn̄ọde ke “enyịn ẹyen̄wan̄a mme nnan,” “baba andidụn̄ kiet [mîdinyụn̄ idọhọke] ite: ‘Ndọdọn̄ọ.’”—Isa. 33:24; 35:5.

Imenen̄ede iwụt esịtekọm iban̄a akpanikọ emi odude ke Ikọ Jehovah eke odudu spirit. Imonyụn̄ iwụt esịtekọm iban̄a un̄wam oro nditọete ke esop ẹsinọde nnyịn, sia mîkpedịghe mmọ nnyịn ikpekemeke ndinam ofụri se nnyịn inamde. Edi un̄wam Jehovah enen̄ede anam uwem nnyịn enyene se ọwọrọde.