ONASEMÍRE che memby Gary áño 1958-pe ahechakuaa nahesãiriha. Péro diez mése rire ae umi doktór opilla mbaʼépa oreko, ha cinco áño haguépe umi espesialísta Londresgua okonfirma chéve imbaʼasy. Ambyasyeterei ningo che membykuñaʼi hérava Louise, onaséva nueve áño Gary onase rire, osẽ haguére avei upe mbaʼasýre, péro isituasión ijetuʼuve.

Umi doktór heʼi porãnte chéve: “Mokõivéva ne memby ningo oreko pe mbaʼasy hérava Bardet-Biedl, ha ñambyasýramo jepe, upéva naipohãi”. * Upe tiémpope, ko mbaʼasy ndojekuaaguasúi vaʼekue. Ha umi orekóva, saʼi saʼípe ndohechavéi ohóvo ha opyta siégo, ikyra vaipa, oreko polidactilia (ikuã térã ipysã hetave), ndokakuaaporãi, noñemanehaporãi, huguyasuka, oreko osteoartritis (iñúdo rasypa) ha irriñón nombaʼapoporãi. Ahechakuaa ijetuʼuetereitaha añangareko che membykuérare. Peteĩ estúdio ojejapo vaʼekue ndaʼaréi Gran Bretáñape, ohechauka 125.000 tapicha apytégui, peteĩ orekoha ko mbaʼasy, péro ikatuha hetave oĩ orekóva ndahaʼéiramo jepe igravetereíva.

Amenda riremi añeʼẽ vaʼekue peteĩ testígo de Jehová ndive, ha upepete ahechakuaa atopa hague pe añetegua. Péro che ména ni michĩmi noñeinteresái la Bíbliare. Hiʼarive, ikatu hag̃uáicha okumpli itraváho, tekotevẽ vaʼekue rova pyʼỹi, upévare ndaikatúi añerreuni ni peteĩ kongregasiónpe. Upéicharõ jepe, añemboʼe meme ha akóinte alee Ñandejára Ñeʼẽ. Chemokyreʼỹeterei aikuaávo Jehová ndohejareimoʼãiha pe ohekávape chupe ha ‘oñangareko ha oipytyvõha’ umi ohasa asývape ojejopy vai jave (Sal. 9:9, 10).

Gary ningo ndohechaporãvéi ohóvo, upévare, okumpli rire seis áño romondo chupe peteĩ eskuéla espesiálpe opytáva sur gotyo Inglatérrape, ikatu hag̃uáicha oñehekomboʼe haʼe oikotevẽháicha. Pyʼỹinte cherenóimi omombeʼu hag̃ua chéve umi mbaʼe oipyʼapýva chupe, ha che aaprovecha amombeʼu hag̃ua chupe la Biblia omboʼéva. Onase rire che memby Louise, ojeʼe chéve cherasyha, arekoha esclerosis múltiple ha avei fibromialgia. Gary ou jey pe eskuélagui orekópe 16 áño, péro saʼíma ohecha ha 1975-pe g̃uarã katu opytáma siégo. Dos áño haguépe, che ména orereja.

Gary ou riremi pe eskuélagui, roñepyrũ roho rreunionhápe ha umi ermáno ipyʼaporãiterei orendive. Che katu ajevautisa áño 1974-pe. Avyʼaiterei ningo peteĩ ansiáno oipytyvõ haguére Gárype ombohovái hag̃ua umi kámbio ohasáva mitãsurukuéra. Ambue ermanokuéra katu chepytyvõ jepi ajapo hag̃ua umi tembiapo ogapypegua. Tiémpo riremi, pe servísio sosiál oĩva ore puévlope omoĩ cinco ermánope oñangareko hag̃ua orerehe, ha upéva orembovyʼaiterei.

Gary oñakãrapuʼã ohóvo ha ojevautisa áño 1982-pe. Haʼe ojaposeterei iprekursorádo auxiliár, upémarõ rojapo oñondive heta tiémpore. Peteĩ árape ore superintendénte de sirkuíto oporandu chupe: “Gary, ¿mbaʼére piko nderejapói nde prekursorádo rregulár?”. Upéva ombovyʼa chupe ha  ikyreʼỹeterei opytávo. Upéi, áño 1990-pe oiko chugui prekursór rregulár.

Gary ojopera ikadéragui dos vése, 1999-pe ha 2008-pe, péro Louise hasyeteve chugui. Haʼe ningo onaséma voi siéga, ha ahechávo seis ipysãha peteĩ ipýpe, aikuaáma orekoha avei síndrome de Bardet-Biedl. Ojejapo rire chupe heta estúdio, ojepilla noĩporãiha heta mbaʼe hetepýpe. Ohasávo pe tiémpo, tekotevẽ kuri ojopera heta vése, por ehémplo cinco vése irriñóngui. Avei huguyasuka iñermánoicha.

Louise oikuaa ikatuha oreko provléma ojopera jave. Upévare, voi porã oñeʼẽ jepi umi doktór ndive ha opavave oñatendétavandi hese omombeʼu hag̃ua chupekuéra mbaʼépa opensa pe tuguýre ha mbaʼeichagua tratamiéntopa oipota. Upéicha rupi, ojegueraha porã entéro oñangarekóvandi hese hekoitépe.

Ore rógape koʼẽ koʼẽre roñehaʼã romombaʼeguasu Jehovápe. Yma ndaipóri vaʼekue umi aparáto elektróniko, ha upévare ahasámi heta óra aleehápe che membykuérape. Koʼág̃a tuichaiterei chepytyvõ umi gravasión ojejapóva CD ha DVD-pe ha pe direksión www.pr418.com oĩva Internétpe. Upéicha rupi entéro ikatu rosegi káda semána peteĩ prográma rostudia hag̃ua la Biblia pe óra opyta porãvévape oréve, ha rojeprepara rokomenta hag̃ua rreunionhápe.

Sapyʼánte Gary omemorisa umi mbaʼe okomentátava ha iñeʼẽtépe ojapo diskúrso Eskuéla Jaiporukuaa Hag̃ua La Bíbliape. Áño 1995-pe oiko chugui siérvo ministeriál ha omomaitei umi ermáno og̃uahẽvape oúvo Salónpe. Avei oipytyvõ oñeñatende hag̃ua pe sonído oiko jave rreunión.

Umi ermáno omoirũ chupe opredika hag̃ua ha pyʼỹinte ogueraha chupe isílla de rruédape oreko rupi artritis. Peteĩ ermáno oipytyvõ chupe ojapo hag̃ua estúdio vívliko peteĩ kuimbaʼépe. Gary omokyreʼỹ vaʼekue avei peteĩ ermánape 25 áñore ndopredikavéi ha ndohovéiva rreunionhápe. Koʼág̃a pe kuimbaʼe ostudiáva Gary ndive ha pe ermána oho meme rreunionhápe.

Che sy omboʼe vaʼekue Lóuisepe otehe hag̃ua orekórõ guare nueve áño, ha che ha peteĩ ermána oñangarekóva hese, romboʼe chupe ovorda hag̃ua. Lóuisepe ogustaiterei voi koʼã mbaʼe, upévare ojapo jepi frasáda orekóva diferénte kolór umi mitãme g̃uarã ha umi ermáno ha ermána ijedavévape g̃uarã. Avei ojapo tarhéta oporomomaitei térã oagradese hag̃ua ha omboja hese divúho. Umi orresivíva koʼã tarhéta oguerohoryeterei chupe. Imitãvépe, Louise oaprende vaʼekue oskrivi hag̃ua mákina de eskrivírpe, ndohecháiramo jepe. Koʼág̃a oiporu peteĩ komputadóra oñeʼẽva omondo hag̃ua mensáhe iñamigokuérape. Haʼe ojevautisa orekórõ guare 17 áño, ha upe guive rojapo jepi oñondive ore prekursorádo auxiliár oĩ jave umi arréglo espesiál káda áño. Louise ha Gary omemorisa umi téxto oñeʼẽva Ñandejára promesakuérare ha heʼíva: “Avave ndeʼimoʼãi: ‘Cherasy hína’”, ha: “Upérõ umi ohechaʼỹva, ohecháta” (Is. 33:24; 35:5).

Romombaʼeterei ningo umi mbaʼe porãita oĩva Ñandejára Ñeʼẽme. Roagradese ore pyʼaite guive umi ermáno orepytyvõ haguére, roikuaa rupi ndaikatumoʼãiha rojapo heta mbaʼe hesekueraʼỹ. Añetehápe, Jehová orepytyvõ rupi, rovyʼa rombohováiramo jepe heta mbaʼe ijetuʼúva.