OTÀN GBẸZAN TỌN

Mí Mọdọ Gbẹzan Mítọn Tindo Zẹẹmẹ

dile e yin didọ gbọn Patricia Smith dali

TLOLO he visunnu mítọn Gary yin jiji to 1958, n’mọdọ nude jẹdò to e go. Ṣigba, e yí osun ao to doto lẹ si nado yọ́n azọ̀n he jẹ e te podọ e yí owhe atọ́n to doto azọ́nyọnẹntọ lẹ si to Londres nado dohia dọ nuhe doto tintan lẹ dọ lọ sọgbe. N’sọ blawu taun to whenue n’ji viyọnnu mítọn Louise to whenue Gary tindo owhe ṣinẹnẹ, bọ azọ̀n etọn sọ sinyẹn hugan Gary tọn.

Doto lẹ dọna mi dọmọ: “Ovi towe awe lẹpo wẹ to azọ̀n LMBB a jẹ, podọ e ma tindo pọngbọ.” To ojlẹ enẹ mẹ, nudọnamẹ vude wẹ tin gando azọ̀n he mẹde nọ dugu etọn sọn mẹjitọ etọn lẹ dè ehe go. Ohia azọ̀n lọ tọn lẹ bẹ nukunzọ̀n he nọ wá dekọtọn do nukuntintọ́n mẹ, kiklo zẹjlẹgo, alọvi kavi afọvi lánkan tintindo, azọ̀n adọ́-vivi tọn po húdu-húdu po hẹn. Enẹwutu, nukunpipedo ovi ṣie lẹ go ma na bọawuna mi. Dodinnanu agọe tọn de dohia dọ to Grande-Bretagne, gbẹtọ 1 to 125 000 mẹ wẹ nọ jẹazọ̀n ehe, dile etlẹ yindọ mẹsusu devo lẹ tọn ma nọ sinyẹn sọmọ.

JEHOVAH LẸZUN “ATỌ̀HỌ̀ YIAGA” MÍTỌN

N’dọho hẹ dopo to Kunnudetọ Jehovah tọn lẹ mẹ to whenue n’wlealọ godo podọ to afọdopolọji, n’doayi e go dọ nugbo lọ die. Ṣigba, asu ṣie ma tindo ojlo to nugbo lọ mẹ paali. Na agbasazọ́n etọn wutu, mí nọ to tẹnsẹ whẹwhẹ, enẹwutu n’ma penugo nado kọnawudopọ hẹ agun de. Etomọṣo, n’zindonukọn nado nọ hia Biblu bosọ nọ hodẹ̀ hlan Jehovah. To whenue n’hia dọ “OKLUNỌ na yin atọ̀họ̀ he yiaga na mẹhe awú to sinsinyẹn lẹ, atọ̀họ̀ he yiaga to nukunbibia whenu” podọ ewọ ‘ma na gbẹ́ yé he dín in lẹ dai gba,’ enẹ miọnhomẹna mi taun!—Ps. 9:9, 10.

Gary ma nọ mọnú ganji, enẹwutu to whenue e tindo owhe ṣidopo, ewọ yin didohlan wehọmẹ he nọ wleawu núdùdù po adọtẹn po namẹ tọn to hùwaji Angleterre tọn. E nọ ylọ mi to gbesisọ mẹ nado dọhodo nuhe to ahunmẹduna ẹn lẹ ji podọ n’nọ gọalọna ẹn gbọn alokan ji nado mọnukunnujẹ nunọwhinnusẹ́n Biblu tọn lẹ mẹ. Owhe vude to whenue Louise yin jiji godo, yẹnlọsu bẹ azọ̀n. Gary lẹkọ sọn wehọmẹ wá whégbè to whenue e tindo owhe 16. Ṣigba, nukun-zọ̀n etọn to sinsinyẹn deji, bọ gandudu ze yinkọ etọn dai taidi nukuntọ́nnọ to 1975. Podọ to 1977, asu ṣie yì bo jo mí do.

To ojlẹ vude godo to whenue Gary lẹkọwa whégbè, mí jẹ mahẹ tindo to nuwiwa agun tọn lẹ mẹ ji, bọ n’yí baptẹm to 1974. Homẹ ṣie hùn taun to whenue mẹho agun tọn de gọalọna Gary nado pehẹ numọtolanmẹ he e tindo to owhe aflanmẹ tọn whenu lẹ. Kunnudetọ devo lẹ nọ gọalọna mi to whégbè-zọ́n lẹ mẹ podọ to godo mẹ, gandudu otò lọ tọn yí Kunnudetọ atọ́n to yé mẹ bo nọ sú akuẹ yé, na yé nido nọ gọalọna mí. Dona nankọ die!

Gary zindonukọn nado to dagbe wà to nugbo lọ mẹ bo wá yí baptẹm to 1982. Ewọ tindo ojlo nado bẹ gbehosọnalitọ alọgọ tọn jẹeji. Enẹwutu, yẹnlọsu basi dide nado kọnawudopọ hẹ ẹ to azọ́n enẹ mẹ bo wàmọ na owhe susu. Homẹ visunnu ṣie tọn hùn taun to whenue nugopọntọ lẹdo tọn mítọn kanbiọ ẹ dọ, “Gary, naegbọn hiẹ ma na lẹzun  gbehosọnalitọ whepoponu tọn?” Tudohomẹnamẹ he Gary tindo nuhudo etọn pẹpẹ niyẹn podọ to 1990, e lẹzun gbehosọnalitọ.

Whla awe wẹ doto lẹ zẹ̀ Gary nado diọ ohú he to alìn etọn mẹ, tintan to 1999 podọ awetọ to 2008, ṣigba agbasalilo Louise tọn fọ́n bo to yinylan deji. Ewọ yin jiji taidi nukuntọ́nnọ tlọlọ, podọ to whenue n’mọ afọvi po alọvi lánkan etọn lẹ po, n’mọdọ ewọ lọsu tindo azọ̀n LMBB ga. Dodinnanu dohia dọ azọ̀n ehe ko yinuwado awutugonu homẹ tọn etọn susu ji. Dile owhe lẹ to yìyì, doto lẹ wazọ́n mẹzizẹ tọn sinsinyẹn delẹ na ẹn, bọ atọ́n to yé mẹ gando ayi etọn go. Taidi Gary, ewọ lọsu tindo azọ̀n adọ́-vivi tọn.

Na Louise yọ́n nuhahun he sọgan fọ́n to mẹzizẹ enẹlẹ whenu wutu, e nọ dọho hẹ doto po mẹhe nọ wazọ́n hẹ yé lẹ po gando nudide etọn ma nado do ohùn go. Taidi kọdetọn de, e nọ duvivi haṣinṣan dagbe de tọn hẹ mẹhe nọ penukundego lẹpo.

GBẸZAN MÍTỌN TINDO LẸNDAI

Nususu wẹ mí nọ wà to owhé mítọn gbè nado sẹ̀n Jehovah. N’nọ yí gànhiho susu zan nado hiawe na Gary po Louise po whẹpo nuyizan he lẹnunnuyọnẹn detọ́n to agọe lẹ do wá tin. Todin, CD lẹ po DVD lẹ po gọna hoyidokanji lẹ sọn nọtẹn Intẹnẹt tọn www.pr418.com ji nọ gọalọna mí nado duvivi Biblu pinplọn sẹmẹsẹmẹ tọn to ojlẹ depope mẹ, podọ ehe nọ hẹn mí penugo nado na gblọndo dagbe lẹ to opli Klistiani tọn lẹ ji.

To whedelẹnu Gary nọ plọn gblọndo etọn lẹ do tamẹ, podọ eyin e tindo azọ́n to Wehọmẹ Lizọnyizọn Yẹwhehọluduta tọn, e nọ penugo nado na hodidọ lọ to hogbe etọn titi mẹ. Ewọ yin pipà taidi devizọnwatọ lizọnyizọnwiwa tọn to 1995, podọ to Plitẹnhọ Ahọluduta tọn mẹ, e nọ dokuavọna hagbẹ agun lọ tọn lẹ, bosọ nọ gọalọna mẹhe nọ penukundo zomọ gbèzeyiaga tọn go lẹ.

Kunnudetọ hatọ lẹ nọ tọ́n na lizọnyizọn kunnudegbe tọn hẹ Gary bo nọ to kẹkẹvi etọn sisẹ́, na e ma gán zinzọnlin wutu. Kunnudetọ de gọalọna ẹn nado nọ deanana plọnmẹ Biblu mẹhe do ojlo hia de tọn. Gary sọ na tuli Klistiani de he ko gbọjọ sọn owhe 25 die. Todin, omẹ awe enẹlẹ nọ wá opli Klistiani tọn lẹ.

To whenue Louise tindo owhe ṣinẹnẹ, e plọn avọ̀ linlọ̀n to onọ̀-daho etọn dè podọ yẹn po nukunpedomẹgotọ etọn dopo po plọn ẹn avọ̀ kikó. Na e yiwanna avọ̀ linlọ̀n wutu, e nọ lọ̀n avọ̀ kleunkleun lẹ na viyẹyẹ lẹ podọ na mẹhomẹ he tin to agun lọ mẹ lẹ. E sọ nọ basi kalti nudọdomẹ tọn he tindo yẹdide whanpẹnọ lẹ. Mẹhe e na kalti lọ lẹ yọ́n pinpẹn yetọn tọn taun. To bẹjẹeji owhe aflanmẹ tọn etọn, Louise plọn lehe yè nọ yí maṣinu do kanwe do. Todin, po alọgọ ọdinatẹẹ vonọtaun he nọ dọnú de tọn po, ewọ nọ kanwehlan họntọn etọn lẹ. Louise yí baptẹm to whenue e tindo owhe 17. To nujijla vonọtaun lẹ whenu, mí nọ duvivi gbehosọnalitọ alọgọtọ bibasi tọn. Taidi Gary, Louise nọ hẹn wefọ lẹ do tamẹ nado nọ do yise etọn hia to opagbe Jiwheyẹwhe tọn gando aihọn yọyọ he mẹ “nukun nukuntọ́nnọ lẹ tọn na hùn” bọ “finẹnu lẹ ma to na dọmọ, yẹn to azọ̀njẹ” te go mẹ.—Isa. 33:24; 35:5.

Lehe mí dopẹ́ dọ Ohó gbọdo Jehovah tọn bẹ nugbo họakuẹ enẹlẹ hẹn do sọ! Mí yọ́n pinpẹn etọn taun dọ mí mọ godonọnamẹ agun mítọn tọn, na matin alọgọ enẹ, nususu tin he mí ma na ko penugo nado wà. Podọ na taun tọn, alọgọ Jehovah tọn wẹ zọ́n bọ gbẹzan mítọn do tindo zẹẹmẹ.

[Nudọnamẹ odò tọn]

[Nudọnamẹ tangan lẹ to weda 25]

Lehe mí dopẹ́ dọ Ohó gbọdo Jehovah tọn bẹ nugbo họakuẹ enẹlẹ hẹn do sọ!