NỌ MẸ nwani yẹ ọmọzae mai Gary no evaọ ukpe 1958, mẹ tẹ ruẹ nọ o wọhọ nọ oware jọ o thọ. Rekọ o rehọ emerae ikpe taure edọkita a te ti vuhu oghẹrẹ ẹyao nọ ọ rrọ ọmọ na oma, yọ o rehọ ikpe isoi efa taure egba-eriariẹ imu obọ London a tẹ te kẹ imuẹro nọ ginọ ẹyao yena. Ikpe izii nọ i lele i rie me te yẹ ọmọtẹ mai nọ a re se Louise, rekọ o kẹ omẹ idhọvẹ gaga inọ Louise o wo oghẹrẹ ẹyao nọ Gary o wo na, yọ ọriẹ ọ tubẹ ga vi ọrọ Gary dede.

Edọkita na a tẹ ta kẹ omẹ nọ, “Emọ ivẹ ra a wo ẹyao nọ a re se LMBB, * koyehọ Laurence-Moon-Bardet-Biedl, yọ ẹyao na o wo umu hu. Evaọ oke yena, umutho eware jọ ọvo a riẹ kpahe ẹyao oghẹrẹsa nana nọ ọmọ o re wo no oma ọsẹgboni ze na. Ẹyao nana o re ru nọ ohwo ọ gbẹ rọ ruẹ ude tere he, ukuhọ riẹ o ve tuaro, o re ru ohwo fu fihọ ruaro, wo iziabọ hayo iziawọ vrẹ isoi, ru ohwo jọ kuako, ru ohwo jọ waha waha, ru ohwo wo ẹyao-evẹ, te ọnyokpa-enwa gbe ẹyao ibieku. Mẹ tẹ ruẹ nọ uye o te bẹ omẹ gaga re mẹ rẹrote emọ na. Ekiakiẹ jọ nọ a ru evaọ obọ Britain kẹle na u dhesẹ nọ a rẹ ruẹ omọvo nọ o wo ẹyao na evaọ oria nọ ahwo idu udhozeza gbe isoi (125,000) a rrọ, dede na, ahwo nọ a bu vi unu nana a wo ẹyao na, rekọ ọgaga riẹ hẹ.

Aye jọ nọ ọ rrọ Osẹri Jihova ọ ta usiuwoma kẹ omẹ nọ mẹ nwane rọo no, mẹ tẹ ruẹ nọ a bi gine wuhrẹ uzẹme Ebaibol na. Rekọ ọzae mẹ o wo isiuru vievie he. Ma jẹ hae kwa no oria ruo oria n’oke t’oke fiki oghẹrẹ iruo nọ ọzae mẹ o je ru, fikiere mẹ jẹ sai kpohọ iwuhrẹ ukoko ho. Dede na, mẹ jẹ hai se Ebaibol na n’oke t’oke jẹ lẹ se Jihova. O jọ oware omosasọ kẹ omẹ gaga nọ me se oria nọ o ta nọ, “ỌNOWO họ oria omofọwẹ rọ kẹ enọ a re kienyẹ; oria adhẹzọ eva oke uye.” Yọ ‘Ọ rẹ se enọ e be gwọlọ iẹe ba ha.’—Ol. 9:9, 10.

Gary ọ rẹ ruẹ ude tere he, fikiere okenọ ọ jọ ikpe ezeza ma te fi ei họ isukulu nọ a re jo wuhrẹ emọ itieye evaọ England. Ọ jẹ hae rọ ifonu se omẹ kẹse kẹse kpahe eware nọ e be kẹe uye, yọ mẹ jọ ifonu fi obọ họ kẹe wo otoriẹ ugogo iwuhrẹ Ebaibol jọ. Nọ ikpe jọ e vrẹ no nọ mẹ nwani yẹ Louise no, me te wo ẹyao nọ oma ohwo u re ro vre-ibi evaọ obeva gbe ọnyokpa ọgaga. Ọmọzae mai Gary o te no isukulu ziọ obọ uwou nọ ọ jọ ikpe ikpegbezeza. Ẹbẹbẹ ibiaro riẹ na o te je dhe ẹgẹga te epanọ edọkita a te rọ kiẹ via nọ o tuaro no riẹriẹriẹ evaọ ukpe 1975. Evaọ ukpe 1977, ọzae mẹ ọ tẹ dhẹ siọ omai ba.

Nọ Gary o kpozi no, ma te je wobọ ziezi evaọ iruẹru ukoko, mẹ tẹ họ-ame evaọ ukpe 1974. Me yere Ọghẹnẹ gaga nọ ọkpako jọ o fi obọ họ kẹ Gary thihakọ ebẹbẹ ẹyao riẹ okenọ ọ jọ ikpe ikpegbọ. Inievo efa a je fi obọ họ kẹ omẹ ru iruo uwou mai, uwhremu na egọmeti ọ tẹ jẹ hae hwosa kẹ imasoi evaọ usu inievo nana re a rẹrote omai. A rẹ ruẹ unu gbiku oware nọ Jihova o ru k’omai hi.

Gary o te je wo ẹnyaharo evaọ ukoko na jẹ họ-ame evaọ ukpe 1982. O wo isiuru kẹ iruo ọkobaro obufihọ gaga, fikiere me te kuomagbei evaọ iruo nana unu ikpe jọ. Eva e were riẹ gaga okenọ ọsẹro ọnyawariẹ mai ọ nọe okejọ nọ, “Gary, kọ  who gbe fi obe họ kẹ iruo ọkobaro oke-kpobi?” Onọ yena o kẹ riẹ uduotahawọ nọ ọ gwọlọ, a tẹ rehọ iẹe mu ọkobaro oke-kpobi evaọ ukpe 1990.

Evaọ ukpe 1999 a nwene onwa-ọthọ Gary jọ, kẹsena evaọ ukpe 2008 a te nwene ọnọ o kiọkọ, dede na ẹyao Louise oniọvo riẹ ọ mae ga. Louise o tuaro no eva ze, yọ okenọ mẹ ruẹ nọ iziawọ ezeza o wo, mẹ tẹ riẹ nọ ọkpọ ẹyao Gary o wo re na. Nọ edọkita a kiẹe riwi, a tẹ ruẹ nọ eware buobu e jọ oma riẹ thọ. Anwọ ikpe jọ ze na, a ru ebẹrọ ilogbo sa-sa kẹe no, yọ isia isoi soso a bẹre ibieku riẹ no. O wo ẹyao-evẹ re wọhọ Gary.

Fikinọ ọ riẹ nọ ebẹbẹ ilogbo e rẹ sae romavia evaọ etoke obẹrọ, taure a te mu obẹrọ họ, Louise ọ rẹ kake vuẹ edọkita gbe ahwo nọ a wo ẹsipito na inọ a re se azẹ fihọ iẹe oma ha, yọ ọ rẹ vuẹ ae oware nọ o soriẹ. Fikiere ọyomariẹ avọ ahwo nọ a be rẹrote ei kpobi a jẹ hae ta ẹme kugbe ziezi.

Ma rẹ jọ uwou mai ru eware buobu nọ i wobọ kugbe egagọ Jihova. Mẹ jẹ hae rọ euwa buobu se obe kẹ Gary avọ Louise taure ekwakwa ikporakporo ọgbọna gbe ekọmputa e tẹ lahwe. Enẹna, eware nọ ukoko na u ru fihọ CD, DVD, gbe oria evuẹ www.pr418.com mai i bi fi obọ họ kẹ omai omomọvo ruẹrẹ oma kpahe ziezi jẹ kpahe ẹme sasasa nọ ma te kpohọ iwuhrẹ ukoko.

Ẹsejọ Gary ọ rẹ ruẹrẹ iyo nọ ọ te kẹ fihọ uzou, yọ o te wo ẹme evaọ Isukulu Odibọgba Esuo-Ọghẹnẹ na, o re rri obe he nọ o te bi ru ẹme na. A rehọ Gary mu odibo-oriruo evaọ ukpe 1995, yọ o re fi obọ họ gaga evaọ etoke iwuhrẹ, dede ahwo rehọ ziọ Ọgwa Uvie jẹ rẹrote ekwakwa ikporakporo.

Ẹsibuobu inievo na a rẹ rọ akaba-ọmo Gary ghelie i kpohọ usiuwoma ota fiki ẹyao ọnyokpa-enwa na. Oniọvo-ọmọzae jọ o fi obọ họ kẹe wuhrẹ obe kugbe ọmọ-uwuhrẹ Ebaibol riẹ jọ. Gary o te je fi obọ họ kẹ oniọvo-ọmọtẹ jọ nọ ọ siọ iruo Uvie na ba te ikpe udhegbisoi no. Imava nana a be hae ziọ iwuhrẹ enẹna.

Okenọ Louise ọ jọ ikpe izii, oni ologbo riẹ gbe oniọvo-ọmọtẹ jọ evaọ usu ahwo nọ a jẹ rẹrote ei na a te wuhrẹ iẹe epanọ a rẹ rọ olulu zuo eware, kẹsena me te wuhrẹ iẹe epanọ a rẹ rọ olulu ru onaa fihọ ehọ. Fikinọ iruo nana e rẹ were iẹe gaga, ọ rẹ rọ olulu zuo eblankẹte nọ i wo ekọlọ sa-sa kẹ emaha gbe ekpako nọ e rrọ ukoko riẹ. Ọ rẹ jẹ ta iwoho esese mu ohwohwo ro ru ekade nọ a re ro vi uyere se ahwo. Ekade na e rẹ were ahwo nọ a rehọ e rai vi uyere se gaga. Evaọ okenọ Louise ọ jọ ikpe ikpegbọ, o wuhrẹ epanọ a rẹ rọ ekọmputa kere eware. Enẹna, o wo ekọmputa jọ nọ u re fi obọ họ kẹe lele egbẹnyusu riẹ ta ẹme, o re vi uwou se ai ẹsikpobi. Louise ọ họ-ame okenọ ọ jọ ikpe ikpegbihrẹ. Me re lele ie ru iruo ọkobaro obufihọ evaọ etoke usiuwoma ota obọdẹ. Wọhọ Gary, Louise o wuhrẹ eria ikere jọ fihọ uzou nọ ọ rẹ rọ ta usiuwoma ziezi kpahe eyaa akpọ ọkpokpọ, okenọ “aro enọ itu” i ti ro rovie, nọ “ohwo ọvo nọ ọ be ria eva riẹ nọ ọ rẹte ta nọ, ‘Mẹ be mọ’, ọ [te jọ] họ.”—Aiz. 33:24; 35:5.

Eva e be were omai gaga fiki uzẹme Ebaibol na nọ ma riẹ. Obufihọ inievo nọ e rrọ ukoko mai o da omai ẹro fia, ababọ rai ma hẹ sai ru eware nana kpobi hi. Yọ Jihova ma be mai yere, keme ababọ obufihọ riẹ ma hẹ sai yeri emamọ uzuazọ họ.