THUTHA wa mũriũ wakwa Gary gũciarũo mwaka wa 1958, nĩ ndonire aarĩ na thĩna. O na kũrĩ ũguo, arigitani maamenyire mũrimũ wake thutha wa mĩeri ikũmi. Thutha wa mĩaka ĩngĩ ĩtano nĩguo arigitani a mũrimũ ũcio thĩinĩ wa London meekĩrire ũira biũ atĩ aarĩ naguo. Nĩ ndanyitirũo nĩ kĩeha mũno rĩrĩa kairĩtu gakwa Louise, karĩa matiganĩte na Gary na mĩaka kenda koonekire atĩ karĩ na ndariri njũru cia mũrimũ ũcio gũkĩra cia Gary.

Arigitani maanjĩrire na tha ũũ: “Ciana ciaku cierĩ irĩ na mũrimũ wa LMBB * na mũrimũ ũcio ndũhonagwo.” Hĩndĩ ĩyo nĩ maũndũ manini mũno mooĩkaine megiĩ mũrimũ ũcio wa gũtiganĩrũo. Ndariri imwe cia mũrimũ ũcio nĩ maitho kũũrũo nĩ hinya nginya mũndũ agatuĩka mũtumumu, gũtunguha mũno, gũkũra twara tũingĩ twa moko kana twa magũrũ, kũhoma, kũhĩngĩcanĩrũo nĩ meciria, mũrimũ wa cukari, mũrimũ wa marũngo na thĩna wa higo. Nĩ ũndũ ũcio, gũtungata ciana ciakwa ndwarĩ ũndũ mũhũthũ. Ũthuthuria wa ica ikuhĩ wonanĩtie atĩ mũndũ 1 harĩ andũ 125,000 bũrũri-inĩ wa Ngeretha nĩ makoragwo na mũrimũ ũcio, o na gũtuĩka angĩ aingĩ no makorũo naguo, ĩndĩ makaga kwĩhĩrũo mũno.

Kahinda kanini thutha wa kũhika, nĩ ndaaririe na Mũira ũmwe wa Jehova na ngĩkũũrana o na ihenya atĩ ũhoro ũrĩa aarutanaga nĩ wa ma. No mũthuri wakwa ndaakenagio o na hanini nĩ ũhoro ũcio. Nĩ ũndũ wa wĩra ũrĩa aarutaga, twaikaraga tũgĩthamaga na kwoguo ndingĩahotire kũnyitanĩra na kĩũngano o gĩothe. O na kũrĩ ũguo, ndiatigire gũthoma Bibilia na kũhoya Jehova. Nĩ ndahoreririo ngoro mũno rĩrĩa ndathomire atĩ, ‘mũndũ mũhinyĩrĩrie, Jehova atuĩkaga rĩangĩro rĩakĩtwo iraya na igũrũ, rĩa kũũrĩra hingo ya mĩnyamaro’ na atĩ ‘ndarĩ hĩndĩ angĩtiganĩria arĩa mamũrongoragia.’—Thab. 9:9, 10.

Tondũ Gary ndaarĩ na ũhoti mwega wa kuona, arĩ na mĩaka itandatũ nĩ aatwarirũo cukuru ya mwanya ya gũkoma mwena wa mũhuro wa Ngeretha. Nĩ aahũragĩra thimũ kaingĩ rĩrĩa arĩ na ũndũ ũramũthĩnia, na niĩ ngahũthĩra mweke ũcio kũmũteithia ataũkĩrũo nĩ morutani ma mũthingi ma Bibilia. Mĩaka mĩnini thutha wa Louise gũciarũo, na niĩ nĩ ndanyitirũo nĩ mũrimũ wa mũnyiginyigi (multiple sclerosis) na wa mĩkiha (fibromyalgia). Arĩ na mĩaka 16, Gary nĩ aacokire mũciĩ akiuma cukuru ĩyo ya gũkoma. Ĩndĩ, ũhoti wake wa kuona wathiaga ũthirĩte na mwaka wa 1975 agĩtuĩka mũtumumu. Mwaka wa 1977 mũthuri wakwa nĩ aatũtiganĩirie.

Kahinda kanini thutha wa Gary gũcoka mũciĩ, nĩ twambĩrĩirie kũnyitanĩra na kĩũngano kĩarĩ na wendo na ngĩbatithio mwaka wa 1974. Nĩ ndakenire mũno nĩ mũthuri ũmwe wa kĩũngano gũteithĩrĩria Gary kũhiũrania na mogarũrũku ma mwĩrĩ mĩaka-inĩ yake ya ũtinĩnja. Kũrĩ Aira a Jehova angĩ maandeithagĩrĩria mawĩra ma mũciĩ, na thutha-inĩ, thirikari ĩkĩandĩka atano harĩ acio matũteithagĩrĩrie wĩra mũciĩ. Ũndũ ũcio ũkoretwo ũrĩ kĩrathimo kĩnene harĩ ithuĩ!

Gary nĩ aathire na mbere gũkũra kĩĩroho na akĩbatithio mwaka wa 1982. Aarĩ na wendi mũnene wa gũtuĩka painia wa gũteithĩrĩria. Nĩ ũndũ ũcio, ngĩona arĩ wega o na niĩ nduĩke painia nĩ getha tũhunjagie nake na ngĩtungata mĩaka ĩigana ũna.  Gary nĩ aakenire mũno rĩrĩa thutha ũcio mũrori witũ wa mũthiũrũrũko aamũririe, “Na githĩ to ũtuĩke painia wa hĩndĩ ciothe?” Gary nĩ eekĩrirũo ngoro mũno nĩ ciugo icio na mwaka wa 1990 agĩtuĩka painia wa hĩndĩ ciothe.

Gary athĩnjĩtwo njohero maita merĩ, mwaka wa 1999 na wa 2008, no Louise nĩwe warĩ na mathĩna manene ma mwĩrĩ. Agĩciarũo aarĩ mũtumumu biũ, na rĩrĩa ndonire kũgũrũ gwake kũmwe gũgĩkũra kaara ga gatandatũ ngĩmenya o nake arĩ na mũrimũ wa LMBB. Thutha wa gũthimwo akĩmenyeka atĩ aarĩ na mathĩna mangĩ thĩinĩ wa ciĩga ciake nyingĩ cia thĩinĩ. Gũkinyĩria rĩu nĩ athĩnjĩtwo maita maingĩ, matano mamo agathĩnjwo higo. Ningĩ nĩ akoragwo na mũrimũ wa cukari o ta Gary.

Tondũ nĩ amenyaga mathĩna marĩa mangiumĩra hĩndĩ ya gũthĩnjwo, Louise ambaga kwaria na arigitani na arũgamĩrĩri a thibitarĩ akamataarĩria itua rĩake rĩa gũthondekwo ategwĩkĩrũo thakame. Nĩ ũndũ wa ũguo, nĩ agĩte ũrata na arigitani aingĩ nao nĩ mamũthondekaga wega.

Nĩ twĩkaga maũndũ maingĩ famĩlĩ-inĩ itũ ma gũthathaiya Jehova. Gũtanagĩa indo cia kĩĩrĩu, ndahũthagĩra mathaa maingĩ ngĩthomera Gary na Louise mabuku. Ũmũthĩ indo ta CD, DVD na ũhoro wa gũthikĩrĩria kuuma rĩarĩro-inĩ rĩa www.pr418.com nĩ itũhotithagia ithuothe gũkorũo na wĩruti wa Bibilia wa o kiumia mahinda matiganĩte, na nĩ tũhotaga gũcokia ciũria mĩcemanio-inĩ ya Gĩkristiano.

Rĩmwe na rĩmwe Gary ambaga gũcoka cokera macokio nginya makaingĩra meciria-inĩ, na rĩrĩa arĩ na mĩario thĩinĩ wa Cukuru ya Ũtungata wa Gĩtheokrasi, nĩ ahotaga kũmĩruta akĩhũthĩra ciugo ciake. Mwaka wa 1995 nĩ aatuĩkire mũteithia wa ũtungata na hingo ciothe Nyũmba-inĩ ya Ũthamaki nĩ akoragwo na kĩyo gĩa kũnyita andũ ũgeni na gũteithĩrĩria rũhonge-inĩ rwa mũgambo.

Aarĩ na ariũ a Ithe witũ nĩ mateithagĩrĩria Gary ũtungata-inĩ, kaingĩ gũtindĩka gakaari karĩa ahũthagĩra nĩ ũndũ wa wathe wake. Mũrũ wa Ithe witũ ũmwe nĩ amũteithĩtie kwĩruta na mũrutwo ũmwe wake wa Bibilia. Ningĩ Gary nĩ ahotete gwĩkĩra ngoro mwarĩ wa Ithe witũ ũmwe watigĩte kũhunjia ihinda rĩa mĩaka 25. Andũ acio erĩ rĩu nĩ mathiaga mĩcemanio ya Gĩkristiano.

Arĩ na mĩaka kenda, Louise nĩ aarutirũo nĩ cũcũ wao gũtuma, na niĩ tũrĩ na ũmwe wa arĩa matũteithagia tũkĩmũruta kũgemia nguo. Tondũ nĩ akenagĩra mũno wĩra wa gũtuma, nĩ atumagĩra twana na andũ arĩa akũrũ thĩinĩ wa kĩũngano mĩrengeti mĩthaka. Ningĩ nĩ athondekaga kandi cia ngeithi akĩhũthĩra tũbica twa kũnyitithania na ngamu. Andũ arĩa matũmagĩrũo kandi icio nĩ macikenagĩra mũno. Rĩrĩa aarĩ tinĩnja, Louise nĩ eerutĩte gũcaba. Rĩu, agĩteithĩrĩrio nĩ gakompiuta ga kũruta mũgambo, nĩ andĩkagĩra arata ake imĩrũ. Louise aabatithirio arĩ na mĩaka 17. Hĩndĩ ya kambĩ-ini cia mwanya cia kũhunjia, tũrĩ nake tũtungataga tũrĩ mapainia a gũteithĩrĩria. O ta Gary, Louise nĩ aigaga maandĩko meciria-inĩ nĩguo erage andũ ũhoro wa ciĩranĩro cia Ngai ciĩgiĩ thĩ ĩrĩa ‘maitho ma atumumu makahingũrũo na hĩndĩ ĩrĩa gũtarĩ mũndũ ũgacoka kuuga, ndĩ mũrũaru.’—Isa. 33:24; 35:5.

Nĩ tũcokagia ngatho mũno nĩ ũndũ wa ma cia bata cia Kiugo kĩa Ngai kĩrĩa gĩtongoretio nĩ roho! Nĩ tũkenaga mũno nĩ ũndũ wa ũteithio ũrĩa kĩũngano gĩtũheaga, tondũ tiga nĩguo tũtingĩhota gwĩka maũndũ maingĩ. Na makĩria tondũ wa ũteithio wa Jehova, ũtũũro witũ nĩ ũgĩte na muoroto.