ERNERA Gary 1958-imi inunngormat arlaannik ajoquteqartoq ingerlaannaq malugaara. Nakorsalli aatsaat qaammatit qulit qaangiummata ernerma nappaataa suussusersivaat, tamannalu ukiut tallimat qaangiummata Londonimi nakorsanit immikkut ilisimasalinnit uppernarsarneqarpoq. Gary qulingiluanik ukioqartoq paniga Louise animinit suli nappaateqarnerorpasilluni inunngormat aliasungaalerpunga.

Nakorsat inussiarnersumik ima oqarfigaannga: “Meeqqatit LMBB syndromeqarput *, ajoraluartumillu arlaannik iliuuseqartoqarsinnaanngilaq.” Taamani nappaat kingornuttagaq qaqutigoortoq taanna pillugu ilisimasaqartoqarpallaanngilaq. Nappaatip ilisarnaataasa ilaat tassaapput isigiarsunneq tappiillissutaasinnaasoq, pualavallaarneq, assakkut isikkakkullu inussaqarpallaarneq, sianissutsikkut ineriartornermi kinguarsimaneq, timip aalariaasianik aqutsiuminaatsitsineq, sukkorneq, gigterluni naggussakkut nungujartortitsineq tartulunnerlu. Taamaattumik meeqqama isumaginissaat ajornakusoortorujussuussaaq. Qanittukkut misissueqqissaarnermi paasineqarpoq Tuluit Nunaanni inuit 125.000-iugaangata ataaseq taamaattumik nappaateqartartoq, inuillu amerlanerusut nappaammik tamatuminnga annikitsumik atuisimassasut ilimagineqarpoq.

Katernaajullunga Jehovap Nalunaajaasuisa ilaat oqaloqatigakku ingerlaannaq paasivara eqqartukkavut sallusuissutaasut. Uigali sallusuissummut soqutiginninngilluinnarpoq. Uima suliffia pissutigalugu nooqattaartarpugut, taamaattumillu ataatsimiinnernut najuussinnaaneq ajorpunga. Taamaakkaluartorli Biibilimik atuartarnera Jehovamullu qinusarnera unitsinngilakka. Allassimaffiit uku tuppallersaatigaakka: “Naalagaq tassaassaaq qunutitaasut pallittaalisaat, pallittaalisaq ulluni annikilliornartuni . . . qimannaviannginnakkit ilinnik ujarlersut, Naalagaq.” — Tuss 9:10, 11.

Garyp isigiarsuttuunera pissutigalugu arfinilinnik ukioqartoq immikkut ilinniartinneqarniassammat Tuluit Nunaata kujataanut atuarfimmi nerisoqarfiullunilu ineqarfiusumut nuutsinneqarpoq. Isumakuluutini pillugit sianerfigikulasarpaanga, oqaloqatigineranilu najoqqutassianik tunngaviusunik Biibilimiittunik paasinninnissaanut ikiortarpara. Louisep inunngornerata kingorna ukiualuit qaangiummata dissemineret sclerosemik (qaratsami nappaammik siaruartartumik) aamma fibromyalgimik (ujallukkut nukikkullu anniartarnermik) nappaateqalerpunga. Gary 16-inik ukioqarluni atuarfimmi nerisoqarfiullunilu ineqarfiusumeereerluni uagutsinnut uterpoq. Isigiarsunneruleraluttuinnarami 1975-imi tappiitsutut nalunaarsorneqarpoq. 1977-imi uima qimappaatigut.

Garyp uagutsinnut nooqqinnerata kinguninngua ilagiinnut inussiarnersunut asannittunullu ilaalerpugut, 1974-imilu kuisippunga. Garyp inuusuttuaraalluni timikkut allanngoriartornerminik akuersinissaanut utoqqaanertap ikiortarmagu qujamasuutigingaarpara. Nalunaajaasoqatima angerlarsimaffimmi suliassanut tunngatillugu ikiortarpaannga, allaallu qatanngutit taakkua ilaat tallimat isumaginninnermut ingerlatsivimmit angerlarsimaffitsinni ikiortitut atorfinitsinneqarput. Tamanna pilluaqqussutaangaarpoq!

Gary anersaakkut siuariartorluarpoq 1982-imilu kuisilluni. Ikiorti-pionerinngornissani aalajangiusimalluinnarmagu aalajangerpunga kiffartornermi tamatumani tapersersorniarlugu, ukiunilu arlalinni kiffartornermi tamatumani suleqatigiippugut. Tamatuma  kingorna ukiualuit qaangiuttut ernera ilagiinnik nakkutilliisumit pioneritut kiffartulerusunnersoq aperineqarami nuannaangaalerpoq. Gary kajumissaarneqareernermi kingorna 1990-imi pionerinngorpoq.

Garyp siffiaata aappaa 1999-imi aappaalu 2008-mi taarserneqarput, Louiseli perulunnerungaarpoq. Tappiitsuulluni inunngorpoq, takugakkulu isikkamigut inuaqarpallaartoq paasivara aamma paniga LMBB syndromeqartoq. Misissorneqaqqissaarmat paasinarsivoq erlavii arlallit aamma ajoquteqartut. Ukiut ingerlanerini arlaleriarluni, tartukkut suliaritinnerit tallimat saniatigut, pilatserujussuartarpoq. Animisut sukkortuuvoq.

Louisep pilatsinnermi ajornartoorutaasinnaasut ilisimalluaramigit pilatsinnginnermini nammineerluni pilattaasartut, nakorsat ilisimajunnaarsitsisartut napparsimmavimmilu pisortat aalersortikkusunnginnini pillugu oqaloqatigisarpai. Tamatuma kingunerisaanik nakorsat peqqissaasullu isumassuilluartartut attaveqarfigilluartarpai.

Jehovamut pallorfiginninnermi aallussilluartaratta angerlarsimaffitsinni sammisassaqartuaannarpoq. Atortut elektroniskiusut suli atugaalinngikkallarmata Gary Louiselu akunnerpassuit atorlugit atuffattarnikuuakka. Maanna www.pr418.com-imi cd-it, dvd-it immiussallu aasimasavut iluaqutigalugit piffissani assigiinngitsuni sapaatip-akunnerata ingerlanerani ataatsimiigiarnissatsinnut piareersartarlutalu akissutissavut piareersartarpavut.

Ilaannikkut Garyp alanngaarsinnaasani akissutigisarpai, Teokratiimillu Ilinniarfimmi pisassaqaraangami malaatiinnarlugu oqalugiarsinnaasarpoq. 1995-imi ilagiinni kiffartortunngorpoq naalagaaffilersaarfimmilu qatanngutiminik tikilluaqqusiniarluni nipilerinermillu suleqataaniarluni ulapputeqartuaannarpoq.

Qatanngutit ilagiinneersut Gary oqaluusseqatigisarpaat gigteqarneralu pissutigalugu amerlanertigut issiavimmi kaassuartakkamiittoq ajattartariaqartarpaat. Qatanngutip angutip angummik soqutiginnittumik Biibilimik atuaqqissaaqateqarnissaanik ikiornikuuaa. Garyp aamma qatanngut arnaq ukiuni 25-ni unittooqqasimasoq kajumissaarnikuua. Maanna ikiorsimasai taakku marluk ataatsimeeqataasarput.

Louise qulingiluanik ukioqarluni aanaminit nuersaanermik ilinniartinneqarpoq, aamma angerlarsimaffimmi ikiortilu marluulluta allapalaagaliornermik ilinniartinnikuuarput. Assassorneq nuannareqigamiuk naalungissat utoqqaallu ilagiinniittut nuersaalluni qalipaatigissaartunik tippiliuuttarpai. Aamma qujassutinik nipitittakkanik assiliartalinnik allakkiortarpoq. Inuit qujassutinik allakkianik tunineqarnertik qujamasuutigingaartarpaat. Louisep qarasaasiaq pattaffissioqqaarnagu allassinnaaneq inuusuttuaraalluni ilinniarnikuua. Maanna qarasaasiaq immikkut ittoq oqaluttartoq iluaqutigalugu ikinngutini e-mailikkut attaveqarfigisarpai. Louise 17-inik ukioqarluni kuisippoq. Oqaluussinermi immikkut suliniarnermi ikiorti-pionerioqatigiittarpugut. Louisep Garytut Guutip silarsuassaq pillugu neriorsuutai uku alanngaarsinnaavai: “Tappiitsut isaat uisitaassapput” aamma “innuttaasoq kinaluunniit oqassanngilaq: ‘Napparsimavunga!’” — Es 33:24; 35:5.

Sallusuissutit naleqangaartut Jehovap oqaasianit isumassarsiarititaasuneersut qujamasuutigingaarpavut! Ilagiinnit asannittumik tapersersorneqarnerput qujamasuutigingaarparput, tapersersorneqanngikkaluaruttami maanna sammisartakkavut iliuuserisinnaasimassanngikkaluaratsigit. Jehovap ikiuineratigut inuunitta siunertaqarlualersimanera qujamasuutigingaarparput.