KIOSO ki nga vuala mon’ami Gary ku muvu ua 1958, eme nga monene kuila muéne uexile haxi. Maji kua bhitile dikuinhi dia mbeji phala o ji dotolo ku mona kuila muéne ua kexile muene ni uhaxi, mu ku bhita mivu itanu, o ji dotolo ja ixi ia Londres ejidile kiambote o uhaxi iú, a tu tangela se uhaxi uahi. Kua bhitile divua dia mivu, kioso ki nga vuala Gary, nga vuala dingi mon’ami Louise, eme nga luualele kiavulu kioso ki nga mono kuila Louise ua kexile ué ni uhaxi iú, maji o uhaxi uê ua betele-kota.

O dotolo ua ngi ambela: “O tuana tuê tu iiadi, ala ni uhaxi LMBB, * eie ua-nda di bhana ni ibhidi íii ku muenhu uê.” Mu kithangana kieniókio o ji dotolo kejidile kiambote o uhaxi iú. O athu ala ni uhaxi iú, ka mono kiambote, mu ku suka-ku a kituka ifofo, a neta kiavulu, a kala ni milembu iavulu ku makanda, ni ku maku, a kituka iou’a, kia a bhonza kuenda ni kuzuela ni ku soneka, a kala ni uhaxi ua ku kala ni sukidi iavulu mu manhinga, a kala ni osteoartrite, o ana sonhi a kata. Mu kiki, kieji bhonza kiavulu ku tambula konda ia tuana tuami. O jingijiie a zuela kuila mu ixi ia Gran-Bretanha bhu kaxi ka 125.000, muthu 1 ngó uala ni uhaxi iú, sumbala avulu ka kate kiavulu.

Mu ku bhita kithangana kioso ki nga kazala, nga zuela ni Mbangi ia Jihova, nga mono kuila muéne ua kexile mu zuela o kidi. Maji o muadi uami ka mesenene ku di longa o Bibidia. Mukonda dia salu iê, tua kexile múia mu tunga mu ididi iavulu, mukonda dia kiki, ki ngi tenene kuia mu kilunga. Maji né kiki nga kexile mu tanga o Bibidia ni ku samba kua Jihova. Kima kiambote kuijiia kuila “Jihova muene o mbonge ia matala, mu lengela ió oso a a tatesa; muene kididi kiakondama mu thembu ia jiphaxi,” ni kuila muéne ki ‘muthu uehela oso a mu kana!’—Jisá. 9:9, 10.

Gary ka kexile mu mona kiambote, mu kiki kioso kia tenesa mivu isamanu a mu tumikisa mu xikola ia athu ala ni uhaxi iú, ku sulu ia ixi ia Inglaterra. Muéne ua kexile mu ngi ixana mu ithangana ioso phala ku ngi tangela o ima ia kexile ku mu thandanganhesa, eme nga mu kuatekesa ku tendela o itendelesu ia Bibidia bhu kaxi ka mutelembe ua kafuetele. Mu ku bhita mivu kioso ki nga vuala Louise, eme ué nga katele, nga kexile ni esclerose ni fibromialgia. Gary ua zubha o xikola kioso kia tenesa 16 ia mivu, iú ua vutuka ku bhata. Maji muéne ka kexile dingi mu mona kiambote, mu kiki, ku muvu ua 1975 muéne uafú o mesu. Ku muvu ua 1977 o muadi uami ua tu xisa.

Mu ku bhita kithangana kioso kia vutuka Gary ku bhata, etu tua kexile mu kuatekesa o kilunga, a ngi batizala ku muvu ua 1974. Nga sanguluka kiavulu kioso o kafunga kia kuatekesa Gary ku di bhana ni maka a moneka mu kitala kia kikumbi. O jiphange ja mukua ja ngi kuatekesa ku iudika o ima bhu bhata, o dimixi dia nguvulu ua solo kitanu kia athu phala kuíza ku bhata mu ku tu kuatekesa. Kiki kiexile dibesá dia dikota!

Gary ua kulu mu nzumbi iu a mu batizala ku muvu ua 1982. Muéne uexile muboki ua ithangana ni ithangana. Eme nga solo ku mu kuatekesa mu kikalakalu kiki mu mivu iavulu. Mon’ami ua sanguluka kiavulu kioso o kafunga ka ilunga ua mu ebhula, “Gary, mukonda diahi eie ku kale u muboki ua thembu ioso?” Kiki kiene o kikuatekesu kia mesenene, mu kiki ku muvu ua 1990  Gary ua mateka o sidivisu ia thembu ioso.

Mukonda dia uhaxi uê, Gary a mu iudika mu veji jiiadi o bacia, kia dianga ku muvu ua 1999, kaiiadi ku muvu ua 2008, maji o uhaxi ua Louise ua betele-o-kota. Kioso ki nga mu vuala muéne uexile kiá kifofo, o ki nga mono kuila ua kexile ni milembu isamanu ku dikanda, eme ngejidile kiá kuila muéne ua kexile ué ni uhaxi ua LMBB. Kioso kia mu zaminala, o ji dotolo ja mono kuila o ima moxi ki i kexile kiambote. Ku mivu iavulu a mu bhange pelasá javulu, mu kifika a mu bhange pelasá ku ana sonhi mu veji jitanu. Muéne uala ni uhaxi ua ku kala ni sukidi iavulu mu manhinga, o uhaxi uala nau Gary.

Mukonda Louise uejiia o maka a moneka kioso ki ku bhinga pelasá muéne u zuela ni ji dotolo phala ku mu saka sé manhinga. Mu kiki, muéne uala ni ukamba uambote ni ji dotolo joso ji mu saka.

Tuene mu bhanga ikalakalu iavulu ia lungu ni ubhezelu ua Jihova kubhata dietu. Mu ukulu nga kexile mu tanga o Bibidia phala Gary ni Louise. Maji kindala kiki ni kikuatekesu kia Malonga ni kijimbuete kia www.pr418.com etu enioso tu tena ku di longa o Bibidia mu veji javulu mu semana, ni ku tambuijila o ibhuidisu mu iônge.

Gary u di longa kiambote o itambuijilu iê, se muéne uala ni diskursu mu Xikola ia Ukunji ua Nzambi, muéne u di bhanga kiambote. A mu bhana o ujitu ua ku kala múkuatekexi a tufunga ku muvu ua 1995, muéne uene mu kuatekesa o Kilunga mu ku tanesa o athu ni ku kuatekesa o jiphange ku sokejeka o mimbu mu kilunga.

O jiphange a kuatekesa Gary mu ukunji mu ku xinjika o dikalu diê dia unema mukonda dia uhaxi ué ua ifuba, muéne ka tena kuenda. Saí Mbangi ia Jihova ua mu kuatekesa ku longa o Bibidia ku muthu ua mesenene ku di longa. Gary ua kuatekesa ué o Kidistá ka kexile dingi mu ia mu iônge mu 25 a mivu. Kindala, o athu enhá ene múia kiá mu iônge.

Kioso Louise kiexile ni divua dia mivu, kuk’uê n’eme, ni muthu ua kexile mu ku tu kuatekesa ni uhaxi ku bhata, tua mu longo ku tunga izuatu. Mukonda muéne ua uabhele o kikalakalu kia ku tunga izuatu, muéne ua kexile mu tunga malasola phala tu buetele ni adiakimi mu kilunga. Muéne ua kexile mu iudika ué ji kalatá ja iuka ni ifikula, iu ua kexile mu tu bhana ku athu. O athu akexile mu ku tu tambula, akexile mu ku tu bhaka mukonda tua uikele. Kioso kiexile mona ndenge Louise ua di longo ku soneka ku makina. Kindala kiki ni kikuatekesu kia komputadolo muéne u zuela ni makamba mê mu ola joso, mu ku a tumikisa njimbu. Louise a mu batizala kioso kia tenesa 17 dia mivu. Mu kithangana kia tokala etu tu bhanga o sidivisu ia ithangana ni ithangana kumoxi. Kála ki bhanga Gary, Louise u di longa ué kiambote o Bibidia, phala ku dielela mu kikanenu kia Nzambi kia kuila, “o mesu a ifofo a kà jikuka,” ni kuila ‘ki bhua ka kala mukua dibhata uila nga kata.’—Iza. 33:24; 35:5.

Tua sanguluka kiavulu ni kidi ki tu sanga mu Mak’â Jihova! Tua sakidila kiavulu o kikuatekesu kia jiphange jetu mu kilunga, mukonda sé ene, etu ki tueji tena ku bhanga o kikalakalu kietu mu nzumbi. Mukonda dia kikuatekesu kia Jihova, o mienhu ietu iala ni valolo.