KATUPA kakese meme mumane kulela Gary muananyi wa balume mu 1958, ngakamona ne: kavua anu bimpe to. Kadi, kuakapita ngondo dikumi bua munganga kushishaye kumanya disama diende, ne kuakapita kabidi bidimu bipite pa bitanu bua baminganga bapiluke ba mu Londres kujadikabu bualu ebu. Biakantonda bikole pavua muananyi wa bakaji Louise umvua mulele bidimu tshitema panyima pa Gary muikale pende ne bimanyinu bia disama edi kadi biende bikale bikole menemene kupita bia tutuende.

Munganga wakangambila ne: “Bana bebe bonso babidi badi ne disama didibu babikila ne: LMBB. * Bia dibungama, disama edi kadiena ne buanga to. Tshikondo atshi disama edi kadivua dianji kumanyika bimpe to. Bimanyinu biadi binene bidi ne: didi difikisha muntu ku dilua mpofo, didiundakana bikole, kuikala ne minu ya bianza anyi ya makasa ya bungi, dibenga kukola, dipanga kunyungusha mubidi wonso bimpe, kuikala ne nsukadi wa bungi mu mubidi, binyoka ne disama dia tuonyi. Nunku, bivua lutatu lua bungi bua meme kulama bana banyi aba. Matuku adi panshi aa badi batshinka ne: pa bantu 125 000 ba mu Grande-Bretagne, muntu umue udi ne disama edi, kadi bantu ba bungi menemene badi nadi kadi dishadile.

Katupa kakese panyima pa bobu bamane kunsela, ngakayukila ne Ntemu wa Yehowa mukuabu ne diakamue ngakalua kumona ne: malu a mu Bible atubu balongesha mmalelela. Kadi bayanyi kavua ubiangata ne mushinga to. Bu muvua mudimu uvuaye wenza umulomba bua kuikala kuenza ngendu, tshivua ne mushindu wa kubuela mu bisangilu to. Nansha nanku, ngakatungunuka ne kubala Bible ne kusambila Yehowa. Biakankolesha bikole pangakabala mu Musambu wa 9:9, 10 udi wamba ne: ‘Yehowa neikale tshibumba tshile kudi bantu badi bakengeshibua. Neikale tshibumba tshile kudi bantu mu tshikondo tshia ntatu. Katu muanji kulekela bantu badi bamukeba’!

Gary kavua umona bimpe to, nunku pakakumbajaye bidimu bisambombo tuakamutuma bua kusombela mu nzubu ya mu tulasa tua bantu badi kabayi bamona bimpe ivua ku Sud kua ditunga dia Angleterre. Uvua anu umbikila ku telefone ne undeja malu avua amutonda, mvua mmuambuluisha bua kumvua malongesha a mushinga a mu Bible. Bidimu bikese pashishe ngakalela Louise, meme kutuadija kusama disama divua ditekesha mifuba ne disama dikuabu didi difuanangane ne binyoka. Pakakumbaja Gary bidimu 16, wakumbuka mu tshilongelu amu, kupinganaye kumbelu. Kadi lumonu luende luvua anu luenda lunyanguka ne bakamuteka mu mulongo wa bampofo mu 1975. Mu 1977 bayanyi wakatulekela.

Matuku makese panyima pa Gary mumane kupingana, tuakaditua mu midimu ya mu tshisumbu tshietu tshituvua banange bikole, meme kutambula mu 1974. Mvua ne dianyisha dia bungi pavua mukulu kampanda muambuluishe Gary bua kutantamena lutatu lua bumpofo luakapetaye mu bidimu biende bia bunsonga. Bantemu bakuabu bavua batuambuluisha bua kuenza midimu ya kumbelu, ne ndekelu wa bionso mbulamatadi wa muaba utuvua wakabanga kufuta bantu batanu ba kudibu bua kuikalabu batuambuluisha kumbelu. Tshivua dibenesha dinene be.

Gary uvua ulubuluka bimpe mu bulelela ne kutambulaye mu 1982. Uvua musue kuikala mpanda-njila muambuluishi. Nanku, ngakangata panyi dipangadika dia kuwenza pamue nende, tuakenza mudimu eu bidimu ndambu. Muananyi eu uvua ne disanka dia bungi pavua mutangidi wa tshijengu mumukonke panyima pa matuku ne: “Gary, bua tshinyi kuena mua kulua mpanda-njila wa pa tshibidilu?” Bualu ebu buvua dikankamija divua Gary nadi dijinga  ne mu 1990 wakalua mpanda-njila wa pa tshibidilu.

Bakashintulula tshimonu tshia Gary misangu ibidi ku lupitadi, musangu wa kumpala mu 1999 ne musangu muibidi mu 2008; kadi kusama kua Louise kuvua kuoku kubi menemene. Uvua yeye muledibue mpofo ne pangakamumona ne minu isambombo ku dikasa, ngakamanya ne: yeye pende udi ne disama dia LMBB. Mateta akenzabu akaleja muvua bitupa bia mubidi wende bia bungi bia munda bikale binyanguke bikole menemene. Mu bule bua bidimu, bakamupanda masama makole, kumupandabu kabidi ne tuonyi misangu itanu. Uvua pende ne disama dia nsukadi anu bu Gary.

Pakamanya Louise ntatu itu dipandibua mua kukebesha, wakumvuija baminganga bonso batupu padibu bapanda muntu bua tshinyi uvua ubenga bua kabamuedi mashi. Bua bualu abu, wakashala nabu mu malanda mimpe ne kumuondopabu bimpe.

Ku nzubu kuetu ke kutu kuenzekela malu a bungi adi atangila ntendelelu wa Yehowa. Kumpala kua matadi a kuteleja kaayi manji kupatuka mvua mpitshisha mêba a bungi mu dibadila Gary ne Louise mikanda. Mpindieu kudi matadi a CD ne a DVD ne bintu bia kuteleja bidi mu adrese wa www.pr418.com mutudi tuetu bonso tumanyina programe wa lumingu luonso wa dilonga dia Bible ne tudi mua kuandamuna mu bisangilu bia bena Kristo bimpe.

Imue misangu Gary utu ufila mandamuna makuata mu mutu, ne patuye ne mudimu mu Kalasa ka Nzambi utu mua kuwenza mu ende mêyi. Wakalua musadidi wa mudimu 1995 ne utu anu wenza midimu ya ku Nzubu wa Bukalenge, wakidila bena mu tshisumbu ne wambuluisha ku bisanji.

Bana betu Bantemu batu bafila Gary mu buambi ne misangu ya bungi batu bamupusa mu kakalu ka balema katuye ubanda bua disama diende dia binyoka. Ntemu mukuabu uvua mumuambuluishe bua kulongesha muntu udi uleja dijinga dia kulonga Bible. Gary mmuambuluishe kabidi muena Kristo mukuabu ukavua mulekele malu a mu nyuma munkatshi mua bidimu 25. Bana betu babidi aba badi babuela mpindieu mu bisangilu.

Pakakumbaja Louise bidimu tshitema, kakuende muntu mukaji wakamulongesha bua kulamakaja bintu, ne umue wa ku bantu bavua babalama wakamulongesha mudimu wa kuluka manda. Bu muvuabu batungunuka ne kumulongesha midimu ya diluka manda, utu wenzela bana ne bantu bakulumpe ba mu tshisumbu mbulanketa ya mekala. Utu wenza kabidi tukarte tuimpe tua dijingilangana malu mimpe tulamika tufoto. Bantu batuye utumina tufoto atu batu batuanyisha bikole. Patshivua Louise utshikumbajilaku bidimu bu 13 wakalonga bua kututa ku mashinyi a mikanda. Mpindieu ku diambuluisha dia mushindu wa pa buawu wa diakula ku Enternete, utu ne tshibidilu tshia kuyukila ne kufundilangana ne balunda bende. Louise wakatambula pavuaye ne bidimu 17. Patuku kampanye ka mudimu wa buambi ka pa buaku, tutu tuangata nende mudimu wa bumpanda-njila buambuluishi. Anu bu Gary, Louise mmukuate mvese bua kuleja ditabuja diende mu malu adi Nzambi mulaye enzeka mu bulongolodi muikala ‘mêsu a mufofo ne bua kutabala’ ne ‘muena musoko kayi wamba ne: Ndi nsama.’​—Yesh. 33:24; 35:5.

Tudi ne dianyisha dia bungi bua malu malelela a mushinga adi mu Dîyi dia Yehowa difundisha ku nyuma wende. Tudi ne disanka dia bungi mu mioyo yetu bua mudi bena mu tshisumbu tshietu batuambuluisha ne dinanga, bualu bu kabuyi bua diambuluisha diabu, katuvua ne tshituvua mua kuenza to. Tudi kabidi ne dianyisha nangananga bualu ku diambuluisha dia Yehowa, mioyo yetu idi ne tshipatshila tshinene.