MAPIYO bang’ nyuolo wuoda miluongo ni Gary e higa 1958, nafwenyo ni gimoro ne rach kode. Kata kamano nokawo dweche apar mondo lakteche ofweny gima ne chande kendo bang’ higini moko abich, lakteche molony ahinya mawuok London notimo nonro ma gifwenyo ni adier en tuwono. To mano kaka nabedo gi kuyo kane Louise nyathina manyako ma ne onyuol higini ochiko bang’ Gary, bende nochako bedo gi ranyisi mar tuwono, to mare ne rach ahinya.

Lakteche nonyisa e yo mamuol niya: “Nyithindi ariyogo nigi tuwo miluongo ni LMBB syndrome, * to biro chuno ni gidag gi tuwono nikech yadhe onge.” Kindego, ji ok nong’eyo mathoth kuom wach tuwoni ma yudo nyithindo kowuok kuom jonyuolgi. Ranyisi manenore kuom ng’at ma nigi tuwoni gin, wenge maok nen maber mamiyo bang’e ng’ato bedo muofu, chwe mokalo tong’, bedo gi lith lwedo kata lith tielo mokalo apar, thirno e dongo, fuondni maok ti malong’o, tuwo sukar, tuwo mar choke (arthritis), koda tuwoche mag nyiroke. Kuom mano, rito nyithindagi ne dhi bedo matek miwuoro. Nonro manyocha otim nyiso ni kuom ji 125,000 man Britain ng’ato 1 nigi tuwoni, to thothgi nyalo bedo ni nigi tuwono to pok onyisore ayanga.

Mapiyo bang’ kane osekenda nawuoyo gi achiel kuom Joneno mag Jehova, to nafwenyo ni gipuonjo adiera. Kata kamano, chwora to ok norwako adiera kata matin. Nikech tich ma chwora ne tiyo, ne wasiko wadar to mano nomiyo ok wadhi e chokruoge mag kanyakla. Kata kamano, ne ajasomo Muma kendo wuoyo gi Jehova e lamo. Mano kaka nayudo hoch kane asomo e Muma ni: “Jehova bende nobedi kar konyruok ni jogo duto misando, kar konyruok e ndalo mag chandrwok,” kendo ni ‘ok nojwang’ jogo ma dware.’​​—⁠Zab. 9:⁠9, 10.

Gary ne nyalo neno mana matin, omiyo kane en jahigini auchiel, ne otere skul makende mar boding’ yo milambo mar piny England. Kinde ka kinde ne ojagoyona simo konyisa weche machande, kendo ne ajakonye mondo owinj tiend puonj mag Muma ka wawuoyo e simo. Higini matin bang’ nyuolo Louise, tuwoche moko mag leche miluongo ni multiple sclerosis kod fibromyalgia nogoya. Gary ne jahigini 16 ka noduogo koa e skul. Kata kamano, wengene ne medo mana kethore, omiyo kanochopo higa mar 1975, koro nobedo mwofu chuth. E higa mar 1977 chwora noringo oweyowa.

Mapiyo bang’ kane Gary oseduogo, ne wachako tudore gi kanyakla moro ma nigi hera ahinya, kae to nobatisa e higa 1974. Nadwoko erokamano ahinya kane jaduong’ kanyakla ochiwore konyo Gary onyagre gi lokruok mahinyo bedoe e higini mag bedo rawera. Joneno moko bende ne jakonya timo tije moko mag dala, kae to bang’e sirkal nondiko abich kuomgi mondo okonywa to sirkal chulogi. Mano kaka ne en gweth maduong’!

Gary ne odhi nyime timo dongruok maber e adiera, ma obatise e higa 1982. Noseketo chunye mar timo tij painia makonyo. Omiyo, nang’ado mar riwe lwedo e tijno kendo ne walendo kode kuom higini mang’eny. Wuoda nobedo mamor ahinya kane chieng’ moro jarit alwora marwa openje  kama, “Gary, donge inyalo bedo painia mapile? ” Mano e jip ma Gary ne rito. Omiyo e higa mar 1990 ne okete painia mapile.

Osetimne Gary yeng’o diriyo kiwilone chogo manie nungone. Mokwongo ne otim e higa 1999, to mar ariyo e higa 2008. Kata kamano ngima Louise to ne rachie moloyo. Ne onyuol Louise kaok onen kata matin, kendo kane aneno lith tielo machielo mar auchiel, nafwenyo ni en bende ne en gi tuwo mar LMBB syndrome. Kane lakteche onone maber, ne giyudo ni fuondni ma iye mag dende ok ti kare. Kuom higini mogwaro, osetimne Louise yeng’o madongo, ka abich kuomgi ne otimne e nyirokene. Mana kaka Gary, en bende en gi tuwo mar sukar.

To nikech Louise ong’eyo pek moko manyalo betie sama itimone yeng’o, ojawuoyo motelo gi lakteche koda jogo duto mabiro konyore gi laktechego, koleronegi kende owuon yiero mare e wi thieth mitimo maonge remo. Mano osemiyo obedo gi winjruok maber ahinya gi jogo duto marite kendo dewo chal mare.

Odwa odich gi weche mag lamo Jehova. Ne ajatiyo gi seche mang’eny kasomo buge ne Gary kod Louise kane pok masinde masani mag teknoloji owuok. Gie sani CD, DVD, koda weche mamoko momaki mayudore e websait marwa mar www.pr418.com konyowa waduto mondo watim puonjruok mar Muma ma juma ka juma, kendo konyowa timo ikruok ne chiwo paro e chokruoge mag kanyakla.

Dwoko ma Gary seche moko jachiwo gin momako e wiye, to ka omiye twak e Skul mar Tij Nyasaye, ogolo twagno maok oti gi weche mondiki. Ne okete jakony tich e higa 1995 kendo odich ahinya e Od Romo, korwako joma obiro e chokruok kendo konyo e migawo mar gige kowo duol.

Joneno mamoko bende hinyo konyo Gary e tij lendo, ka gidhirone ndike mobetie nikech tuwo ma en-go mar choke (arthritis). Nitie Janeno moro mosekonye puonjruok Muma gi ng’at ma norwako wach. Gary bende osejiwo Janeno moro ma nodok chien moweyo tij lendo kuom higini 25. Japuonjre Gary kaachiel gi Janeno ma nokonyono, sani biro e chokruoge mag Jokristo.

Kane Louise ochopo higini ochiko, dagi nopuonje tij tweng’o, to an ka wakonyore gi achiel kuom joma ne ondik mondo orite, ne wapuonje kaka iduso lewni. To nikech ohero tije mar tweng’ono ahinya, otwang’o ongede mabeyo ne nyithindo koda ne joma oti e kanyakla. Bende ojaloso kadi moko mag kowo mos kotiyo gi piche matindo. Jogo duto mayudo kadigo bedoga mamor ahinya. Kane en rawera, Louise nopuonjore ndiko kotiyo gi kompyuta. Sani kotiyo gi kompyuta moro makende manyalo wuoyo kode, ojatudore gi osiepene kotiyo gi e-mail. Louise ne obatisi ka en jahigini 17. Kinde ma wan gi kampen makende, wajotiyo kode kaka jopainia makonyo. Mana kaka Gary, Louise bende jamako ndiko moko mondo okonye lero yie ma en-go kuom piny ma Nyasaye osingo kama “wang’ mwofini noyepi” kendo “japiny ok nowachi, Atuwo.”​​—⁠Isa. 33:24; 35:5.

Wadwoko erokamano ahinya ne Jehova kuom adiera mayudore e Muma! Wadwoko erokamano bende ne kony ma kanyaklawa osemiyowa manyiso kaka giherowa, nikech ka dine gionge dine ok watimo thoth gik ma watimo sani. To ahinya wuon, nikech kony ma Jehova osemiyowa, sani wadak e ngima ma nigi geno.