DESUITE couma mo garson Gary ti né en 1958, mo ti senti ki ti ena enn kitsoz ki pa ti pé marche bien. Selman, bann docteur inn prend dix mois pou decouvert so maladie ek encore cinq an pou bann specialiste dan Londres confirme sa. Mo ti bien triste kan Louise, mo tifi ki’nn né neuf an apré Gary, ti ena bann symptome ki ti beaucoup pli grave ki so frere.

Docteur ti dire moi avek gentillesse: “Ou toulé-deux zenfant ena syndrome LMBB, a ek ou pou bizin vive avek sa.” Dan sa lepok-la, pa ti konn beaucoup kitsoz lor sa maladie genetik rare-la. Sa maladie-la kapav faire enn dimoune vinn aveugle, vinn gros, ena bann lé-doigt en plus, tardé pou developpé, ena difficulté pou controle so bann mouvement, gagne diabete, l’arthrite, ek probleme lé-rein. Alors, li ti pou bien difficile pou mo prend soin mo bann zenfant. Pa trop longtemps, enn l’etude inn montré ki apepré 1 lor 125,000 dimoune dan Grande-Bretagne ena sa maladie-la, mem si ena beaucoup lezot dimoune ki gagne li dan enn forme moins grave.

Mo ti koz avek enn Témoin de Jéhovah kan mo ti fek marié, ek desuite mo ti decouvert ki zot enseigne la verité lor la Bible. Mais mo mari pa ti interessé ditou. Li ti ena enn travail ki ti faire nou souvent demenagé, alors mo pa ti kapav forme partie dan okenn congregation. Mem sa, mo ti contigne lire la Bible ek prié Jéhovah. Li ti bien encourageant pou lire ki “Jéhovah pou vinn enn protection pou bann ki maltraité, oui enn protection pou bann ki dan detresse” ek ki Li “pa pou quitte bann ki rod [Li]”!​—Ps. 9:9, 10.

Gary pa ti trop trouve clair, alors kan li ti gagne six an, nou ti envoye li dan enn lekol kot li ti gagne enn l’education special ek li ti reste la-bas. Sa lekol-la ti trouve dan la cote sud l’Angleterre. Souvent li ti telephone moi kan ti ena bann kitsoz ki ti tracasse-li ek lerla mo ti aide li pou comprend bann principe la Bible. Deux-trois l’année apré ki Louise ti né, mo ti tombe malade. Mo ti gagne sclérose en plaques ek fibromyalgie. Kan Gary ti gagne 16 an, li ti retourne lakaz. Selman, pli allé li pa ti trouve clair ek en 1975, gouvernement ti considere li couma enn dimoune aveugle. En 1977 mo mari ti quitte nou.

Pa trop longtemps apré ki Gary ti retourné, nou ti participe dan bann activité enn congregation kot ti ena beaucoup l’amour, ek mo ti prend bapteme en 1974. Mo ti bien reconnaissant envers enn ancien ki ti aide Gary kan li ti faire croissance pendant so l’adolescence. Lezot Témoins ti aide moi dan mo bann l’ouvrage lakaz, ek finalement, l’assistance social ti employe cinq parmi zot pou aide nou. Sa ti vrai-mem enn benediction!

Gary ti contigne faire bann bon progré dan la verité ek li ti prend bapteme en 1982. Li ti bien envie faire pionnier auxiliaire. Alors mo ti decidé pou accompagne li dan so service ek mo ti contigne faire sa pendant plusieurs l’année. Mo garson ti bien content kan plitar nou surveillant circonscription ti demann li: “Gary, to pa ti pou content faire pionnier permanent?” Sa ti exactement l’encouragement ki Gary ti bizin, ek en 1990 li ti nommé pionnier permanent.

 Deux fois Gary ti bizin faire l’operation pou so la hanche, premier fois en 1999 ek enn deuxieme fois en 2008, mais probleme la santé Louise ti pli grave. Li ti né aveugle, ek kan mo ti trouve enn lé-doigt en plus dan so lipié, mo ti comprend ki li aussi li ti ena maladie LMBB. Bann l’examen medical pa ti tardé pou montré ki li ti aussi ena plusieurs organe ki ti bien affecté. Pendant plusieurs l’année, li finn faire bann grand l’operation, cinq ladan pou so lé-rein. Pareil couma Gary, li ena diabete.

Louise koné ki kapav ena bann difficulté si jamais li bizin faire bann l’operation, alors li koz avek bann docteur, bann anesthesiste, ek l’administration l’hopital pou explik zot pou ki raison li refuse pou mette di-sang. Alors, li ena bann bon relation avek tou bann ki prend li bien soin a cause so bann probleme la santé.

Ena touletan bann activité dan nou lakaz, tou kitsoz ena enn rapport avek l’adoration Jéhovah. Avant-mem ki ti ena bann l’appareil electronik, mo ti ena l’habitude pou passe beaucoup le temps pou lire avek Gary ek Louise. Asterla, grace a bann CD, DVD, ek bann enregistrement ki ena lor www.pr418.com, nou tou nou kapav etudié la Bible chaque semaine dan different moment, ek faire bann bon commentaire dan bann reunion.

Parfois Gary aprann so bann reponse par coeur, ek si li ena enn participation dan Lekol Ministere Theocratik, li faire li dan so prop mot. Li ti nommé assistant ministeriel en 1995 ek li touletan bien occupé dan la Salle du Royaume pou accueillir bann membre congregation ek pou aidé dan service sonorisation.

Bann Temoins accompagne Gary dan predication, souvent zot pousse so fauteuil roulant ki li servi a cause so probleme l’arthrite. Enn Témoin ti aide li pou conduire enn l’etude la Bible avek enn dimoune interessé. Gary finn aussi encourage enn soeur ki ti inactif depuis 25 an. Asterla, toulé-deux, sa dimoune interessé-la ek sa soeur-la pé assisté reunion.

Kan li ti ena neuf an, Louise ti aprann tricoté avek so grand-mere, ek enn parmi bann garde-malade ek mo-mem, nou ti montré li brodé. Li bien content faire sa, alors li faire bann joli molton different couleur pou bann tibaba ek aussi pou bann frere ek soeur agé dan congregation. Li faire aussi bann carte ek li colle bann ti dessin lor-la. Bann ki gagne sa bann carte-la, bien apprecié. Kan Louise ti enn jeune adolescent, li ti aprann tipé. Zordi avek l’aide enn ordinateur special, souvent li gagne contact avek bann camarade par e-mail. Louise ti prend bapteme l’age 17 an. Kan ena bann campagne predication special, nou content faire pionnier auxiliaire ensam. Pareil couma Gary, Louise aussi aprann bann texte la Bible par coeur pou li exprime so la foi dan bann promesse Bondié concernant enn le monde kot “lizié bann aveugle pou ouvert” ek kot “okenn habitant pa pou dire: ‘Mo malade.’”​—Is. 33:24; 35:5

Nou bien reconnaissant pou bann verité ki ena beaucoup valeur ek ki trouve dan Parole ki Jéhovah inn inspiré! Nou leker rempli ar reconnaissance pou soutien ki nou congregation donne nou avek amour, parski sans sa soutien-la, nou pa ti pou kapav faire la plupart nou bann activité. Ek surtout avek l’aide Jéhovah, nou la vie ena vrai-mem enn sens.