KAPEJANA ka morago ga gore morwa wa ka Gary a belegwe ka 1958, ke ile ka thoma go belaela gore go na le bothata bjo itšego ka yena. Lega go le bjalo, go tšere dikgwedi tše lesome gore dingaka di bolele bolwetši bja gagwe e bile go ile gwa tšea gape nywaga e mehlano pele ga ge ditsebi tša London di kgonthišetša gore o swerwe ke bolwetši bjoo. Ruri ke ile ka nyama le go feta ge morwedi wa ka Louise, yo a belegwego nywaga e senyane ka morago, a bontšha dika tša bolwetši bjoo go feta Gary.

Dingaka di ile tša mpotša ka botho gore: “Bana ba gago ka bobedi ba na le bolwetši bja LMBB, * le gona ka manyami ga bo alafege.” Ka nako yeo, bolwetši bjoo bja go se tlwaelege bja leabela bo be bo sa tsebje gabotse. Dika tša bjona di akaretša go se bone gabotse moo go feleletšago ka bofofu, go nona kudu, go ba le palo e sa tlwaelegago ya menwana ya maoto le ya matsogo, go gola ka go nanya, go se dirišane gabotse ga ditho tša mmele, bolwetši bja swikiri, bolwetši bja marapo le go se šome gabotse ga dipshio. Ka go re’alo, go hlokomela bana ba ka e be e tla ba morwalo o boima kudu. Dinyakišišo tša morago bjale di bontšhitše gore motho o tee go ba 125 000 kua Brithania o tla ba le bolwetši bjo, le ge e le gore ba sego kae ba tla ba le tekanyo e nyenyane ya bjona.

Ke ile ka boledišana le yo mongwe wa Dihlatse tša Jehofa gateetee ka morago ga gore ke nyalwe, gomme ke ile ka hlabelwa ke seetša se senyenyane sa therešo. Eupša monna wa ka o be a se na kgahlego le gatee. Ka lebaka la mošomo wa gagwe wa boiphedišo, re be re thotha kgafetšakgafetša, ka gona ke be ke sa kgone go ya dibokeng. Lega go le bjalo, ke ile ka tšwela pele ke bala Beibele le go rapela Jehofa. Ke ile ka kgothatšwa kudu ke go bala gore “Jehofa e tla ba sebo sa le ge e le mang yo a nyamilego o šoro, sebo dinakong tša tlalelo” le gore a ka se “tlogele bao ba [mo] tsomago”!—Ps. 9:9, 10.

Gary o be a bona ganyenyane, ka gona ge a be a na le nywaga e tshela, o ile a romelwa sekolong sa batho bao ba sa bonego gabotse seo se nago le bodulabarutwana kua lebopong la borwa bja Engelane. O be a nteletša mogala nako le nako ge go be go na le seo se mo tshwenyago, gomme ke be ke kgona go mo thuša ka mogala go kwešiša melao ya motheo ya Beibele. Nywaga e sego kae ka morago ga gore Louise a belegwe, ke ile ka babja, ka swarwa ke bolwetši bja go šarakana ga tshepedišo ya motheo ya dikwi (multiple sclerosis) le bolwetši bja go ruruga mešifa (fibromyalgia). Gary o ile a boa sekolong seo ge a na le nywaga e 16. Lega go le bjalo, go se bone gabotse ga gagwe go ile gwa mpefalela pele, gomme a foufala ka 1975. Ka 1977 monna wa ka o ile a re lahla.

Ka moragonyana ga gore Gary a boe, re ile ra thoma go tšea karolo medirong ya phuthego yeo e nago le lerato, gomme ka kolobetšwa ka 1974. Ke ile ka leboga kudu ge mogolo yo mongwe a thuša Gary go lebeletšana le diphetogo tša mmeleng tša nywaga ya gagwe ya mahlalagading. Dihlatse tše dingwe di ile tša nthuša ka mešongwana ya ka gae, gomme ge nako e dutše e eya Dihlatse tše hlano di be di lefša ke mmušo gore di re hlokomele. Yeo ruri e bile tšhegofatšo e kgolo!

Gary o ile a tšwela pele a gola gabotse therešong gomme a kolobetšwa ka 1982. O be a rata bobulamadibogo bja go thuša ka pelo ya gagwe ka moka. Ka baka leo, ke ile ka phetha ka go ya le yena modirong woo, gomme ka tšwela pele ke dira seo ka nywaga e mentši. Morwa wa ka o be a thabile kudu ge ka morago ga nywaga e sego kae, molebeledi wa rena wa tikologo  a mmotšiša gore: “Gary, ke ka lebaka la’ng o sa be mmulamadibogo wa ka mehla?” Ye e bile kgothatšo yeo Gary a bego a e nyaka, ka gona ka 1990 o ile a ba mmulamadibogo wa ka mehla.

Gary o ile a buiwa gore a lokišwe malokololo a dinoka; o builwe ka lekga la pele ka 1999 gomme la bobedi ka 2008, eupša ge e le boemo bja Louise bo ile bja mpefala le go feta. Yena o belegwe e le sefofu, gomme ge ke bona a na le monwana wa botshelela leotong, ke ile ka lemoga gore le yena o na le bolwetši bja LMBB. Ditlhahlobo di ile tša tšweletša gore ditho tša gagwe tše dintši tša ka teng di be di se sa šoma gabotse. Go theoša le nywaga, o ile a buiwa ka makga a mmalwa, go akaretša le go buiwa dipshio ka makga a mahlano. Go swana le Gary, le yena o na le bolwetši bja swikiri.

Ka go lemoga mathata ao a ka tšwelelago nakong ya go buiwa, Louise o boledišana le dingaka tša go bua, tša go hwiša bogogoma le balaodi ba sepetlele e le gore a ba hlalosetše diphetho tša gagwe mabapi le tšhelo ya madi. Ka lebaka la seo, o thabela go ba le tswalano e botse le bohle bao ba mo hlokomelago.

Legaeng la rena re dira dilo tše dintši tšeo di tswalanago le borapedi bja rena go Jehofa. Ke be ke fetša nako e ntši ke balela Gary le Louise pele ga ge didirišwa tša sebjalebjale tša thekinolotši di ka ba gona. Ga bjale di-CD, di-DVD le dilo tše dingwe tšeo di ka taoneloutwago Wepesaeteng ya www.pr418.com di re thuša gore ka moka ga rena re thabele lenaneo la go ithuta Beibele la beke le beke ka dinako tše fapafapanego, e bile re kgona le go araba dibokeng tša Bokriste.

Gary ka dinako tše dingwe o swara dikarabo tša gagwe ka hlogo, gomme ge a na le polelo Sekolong sa Bodiredi sa Pušo ya Modimo, o kgona go e bea ka mantšu a gagwe. Ka 1995 o ile a kgethwa go ba mohlanka wa bodiredi e bile ka mehla o dula a swaregile Holong ya Mmušo ka go amogela ditho tša phuthego le go thuša ka tshepedišo ya tša medumo.

Dihlatse tše dingwe di sepela le Gary go ya bodireding, di mo kgorometša ka setulo sa digole ka lebaka la bolwetši bja gagwe bja marapo. Hlatse e nngwe e ile ya mo thuša go swara thuto ya Beibele le motho yo a bontšhitšego kgahlego. Le gona Gary o ile a kgothatša Mokriste yo mongwe yo a bego a tapile ka nywaga e 25. Ga bjale batho bao ka bobedi ba ba gona dibokeng tša Bokriste.

Ge Louise a na le nywaga e senyane, makgoloagwe o ile a mo ruta go loga, gomme nna gotee le yo mongwe wa bahlokomedi ba gagwe re ile ra mo ruta go roka ka mokgwa wa mokgabišo. Ka ge a tšwela pele a thabela kudu go roka le go loga, o loga mapayana a mebalabala a bana gotee le a batho ba bagolo ka phuthegong. E bile o dira le dikarata tša go romela madume tšeo di kgomareditšwego diswantšho. Dikarata tše di ratwa kudu ke bao ba di amogelago. Ge a be a tsena nywageng ya mahlalagading, Louise o ile a ithuta go tlanya. Ga bjale, a thušwa ke khomphutha yeo e dirilwego gore e bolele, ka mehla o dula a bolela le bagwera ba gagwe ka e-mail. Louise o ile a kolobetšwa a na le nywaga e 17. Nakong ya masolo a kgethegilego a boboledi, re thabela go tšea bobulamadibogo bja go thuša re le gotee. Go swana le Gary, Louise o swara mangwalo ka hlogo gore a kgone go bolela tumelo ya gagwe ka ditšhegofatšo tša Modimo tša lefaseng leo “mahlo a difofu a [tlago go] buduloga” e bile ‘go se na modudi yo a tla rego: “Ke a babja.”’—Jes. 33:24; 35:5.

Re leboga kudu ditherešo tše bohlokwa tšeo di hwetšwago ka Lentšung la Jehofa le buduletšwego! Dipelo tša rena di tletše tebogo ka lebaka la thekgo e lerato ya phuthego ya gabo rena, ka gobane ntle le yona re be re ka se kgone go dira dilo tše ntši. Maphelo a rena a na le morero wa kgonthe, kudukudu ka lebaka la thušo ya Jehofa.