MEKƐ mɔɔ menwole me ra nrenya Gary wɔ 1958 ne anu ala la yɛɛ menwunle kɛ ɔlɛ ngyegyelɛ a. Noko akee, ɔlile siane bulu kolaa na ayileyɛlɛma anwu ye ewule ne, yɛɛ ɔlile ɛvolɛ nnu kolaa na ayileyɛlɛma mɔɔ ɛbe kpalɛ mɔɔ bɛwɔ London la alie ado nu. Na mekɛ mɔɔ menwole me ra raalɛ Louise wɔ ɛvolɛ ngɔnla anzi na menwunle kɛ ɔlɛ ngyegyelɛ mɔɔ tɛla Gary ɛdeɛ ne la, me adwenle zɛkyele bɔkɔɔ.

Dɔketama ne hanle kɛ: “Ɛ mra nwiɔ ne lɛ LMBB nwo ngyegyelɛ, * noko ɛnrɛhola ɛnrɛyɛ nwolɛ ɛhwee.” Wɔ zɔhane mekɛ ne, ɛnee bɛnze ewule ɛhye anwo edwɛkɛ dɔɔnwo. Ye ngyegyelɛ ne bie a le ewule mɔɔ maa bɛ nye si, kpole molozo, bɛ sa nee/anzɛɛ bɛ gyakɛ mrɛlɛsɛka mɔɔ bo zo, adwenle mɔɔ wɔ aze, asikyɛlɛwule, adwelielilɛ nwo ngyegyelɛ, mbowule nee kilenzia nu ewule. Yemɔti, ɛnee me mra ne mɔ ɛnleanlɛ bayɛ se kpalɛ. Neɛnleanu bie mɔɔ bɛyɛ ye kenlensa ye la ɛmaa yela ali kɛ ɛye menli mɔɔ bɛwɔ Britain la anu 125,000 ɛsie ahane a, bɛ nuhua 1 lɛ ewule ɛhye bie. Bɛ nuhua dɔɔnwo lɛ mɔɔ anu ɛnyɛ se kpalɛ la.

Mɔɔ mengyale la yeangyɛ me nee Gyihova Alasevolɛ ne mɔ ko dendɛle, na ɛkɛ ne ala menwunle kɛ mɔɔ ɔlɛka la le nɔhalɛ. Noko ɛnee me hu anye ɛnlie nwo fee. Ɔlua ye gyima ne ati ɛnee yɛta yɛtu adenle, yemɔti meangola meandɛnla asafo bie anu. Noko akee, mendoale zo mengengale Baebolo ne na menzɛlɛle Gyihova. Mekɛ mɔɔ mengengale edwɛkɛ ɛhye la me nye liele kpalɛ: ‘Gyihova le ɛvealeka maa mɔɔ bɛsisi ye la, ɔle ɛvealeka wɔ ngyegyelɛ mekɛ nu.’ Na ‘ɔnrɛkpo menli mɔɔ sonle ye la.’—Edw. 9:9, 10.

Ɛnee Gary ɛnnwu debie kpalɛ yemɔti mekɛ mɔɔ ɔlile ɛvolɛ nsia la, bɛvale ye bɛhɔle sukulu bie anu wɔ England ɛnwea nloa wɔ nyiakɛ afoa nu kɛ bɛkamaa ye ndetelɛ titile bie. Ɛnee ɔta ɔfɛlɛ me ɔka ye ngyegyelɛ ɔkile me, yemɔti menluale fonu zo memanle ɔnwunle Baebolo ngyinlazo bie mɔ. Menwole Louise la, yeangyɛ ewule bie hanle medame mumua ne. Mekɛ mɔɔ Gary lile ɛvolɛ 16 la ɔvile sukulu ɔrale sua nu. Noko akee, ɔ nye ne hɔle zo gyegyele ye, yemɔti bɛbule ye kɛ awie mɔɔ anye ɛzi la wɔ 1975 ne anu. Wɔ ɛvolɛ 1977 ne anu me hu dule gyakyile yɛ.

Mɔɔ Gary ziale rale la, yeangyɛ yɛhɔle asafo bie anu, yemɔti bɛzɔnenle me wɔ ɛvolɛ 1974 ne anu. Mekɛ mɔɔ kpanyinli bie boale Gary manle ɔlile nzenzaleɛ mɔɔ ɛnee ɛlɛba ye sonlabaka ne anu anwo gyima la, me nye liele. Alasevolɛ gyɛne boale me wɔ me sua nu gyimayɛlɛ nu, na awieleɛ bɔkɔɔ ne, arane mgbanyima yele menli nnu manle yɛ mɔɔ ɛnee bɛnea yɛ wɔ sua nu a. Nea kɛzi ɛhye ɛyɛ nyilalɛ ɛmaa yɛ a!

Gary bɔle mɔdenle wɔ asafo ne anu yemɔti bɛzɔnenle ye wɔ 1982. Ɛnee ɔkulo kɛ ɔyɛ adekpakyelɛ boavolɛ. Yemɔti me nee ye yɛle na yɛdoa zo yɛyɛ ye ɛvolɛ dɔɔnwo. Mekɛ bie anzi mɔɔ yɛ maanzinli zo neavolɛ ne hanle kɛ, “Gary, duzu ati a ɛnyɛ dahuu adekpakyelɛ ɛ?” la, me ra ne anye liele kpalɛ. Ɛnee yemɔ ala a le anwosesebɛmanlɛ  mɔɔ Gary hyia nwo a, yemɔti bɛkpale ye wɔ ɛvolɛ 1990 ne anu.

Bɛyɛ Gary apelehyɛne fane nwiɔ wɔ ɔ nvenle. Mɔɔ ɔlumua la wɔ 1999 yɛɛ mɔɔ ɔtɔ zo nwiɔ la wɔ 2008. Noko ɛnee Louise kpɔkɛdelɛ ɛdeɛ ne ɛnle kpalɛ fee. Menwole ye la ɛnee ɔnnwu debie fee, na mekɛ mɔɔ menwunle kɛ ɔ gyakɛ mrɛlɛsɛka le nsia la, menwunle kɛ ɔlɛ LMBB ngyegyelɛ ne bie. Neɛnleanu manle bɛnwunle kɛ ɔ kunlu ninyɛne ne dɔɔnwo ɛnle kpalɛ. Bɛyɛ ye apelehyɛne mgbole dɔɔnwo, bie a le ye kilenzia ne mɔɔ bɛyɛ ye apelehyɛne fane nnu la. Ɔ nee Gary bɛ mu nwiɔ, biala lɛ asikyɛlɛwule.

Kɛmɔ Louise ze kɛ bɛlɛyɛ ye apelehyɛne a ngyegyelɛ kpole bahola ara la ati, ɔdumua ɔ nee ayileyɛlɛma nee mgbanyima mɔɔ wɔ ɛkɛ la ka mogya mɔɔ saa ɔngola tendɛ bɔbɔ a ɔnrɛlie la anwo edwɛkɛ. Ɛhye ati, menli mɔɔ nea ye la kɔsɔɔti ka ɔ nwo edwɛkɛ kpalɛ.

Gyimalilɛ dɔɔnwo kɔ zo wɔ yɛ awuke nu, ye kɔsɔɔti gyi Gyihova ɛzonlenlɛ zo. Kolaa na adwuleso ɛlɛtɔlɔnek ninyɛne ara, ɛnee mefa mekɛ dɔɔnwo mekenga debie mekile Gary nee Louise. Ɛnɛ CD, DVD, nee ninyɛne mɔɔ bɛhye mɔɔ ɔwɔ www.pr418.com ɛleka ne la boa maa yɛdi Baebolo ɛzukoalɛ nwo ngyehyɛleɛ ne anzi dapɛne biala na yɛkola yɛmaa mualɛ wɔ Keleseɛnema ayia bo.

Gary ɛnnea buluku nu na yeamaa mualɛ yɛɛ ɔnnea kɛlata zo ɔngenga ye Teokelase Ɛzonlenlɛ Sukulu nu gyimalilɛ. Bɛkpale ye asafo nu sonvolɛ wɔ 1995 ne anu na mekɛ biala ɔmaa ɔ nye bolo ɔyɛ gyima ɛsesebɛ wɔ Belemgbunlililɛ Asalo, ɔdie mediema ne mɔ kɛnlɛma yɛɛ ɔboa mediema mɔɔ nea milahyinli ne mɔɔ bɛfa bɛbɔ edwɛne ne la azo.

Mediema pia Gary wɔ ebia nu na yeahɔ daselɛlilɛ. Dasevolɛ ko ɛboa ye yemaa ɔ nee anyelielɛnli bie sukoa Baebolo ne. Gary ɛboa Keleseɛnenli bie mɔɔ yɛle bɛtɛɛ ɛvolɛ 25 la yemaa ɔ nwo ɛyɛ se bieko. Menli nwiɔ ɛhye mɔ kɔ debiezukoalɛ.

Mekɛ mɔɔ Louise lile ɛvolɛ ngɔnla la, me mame hilele ye kɛzi bɛnwo ninyɛne la yɛɛ me nee menli mɔɔ nea ye la ko hilele ye ninyɛne ɛkpomgbalɛ. Kɛmɔ ɔ nye die ninyɛne mɔɔ bɛfa aguyia bɛnwo nwo la ati, ɔnwo kundu ngɛnlɛma ɔmaa ngakula nee asafo ne anu amra mɔɔ bɛnyi la. Eza ɔfa nvoninli ngɛnlɛma ɔbetɛbeta ngɛlata zo ɔmaa awie mɔ. Menli mɔɔ ɔvale ɔmanle bɛ la anye liele nwolɛ kpalɛ. Louise zukoale taepe ɛbɔlɛ wɔ ye ngakula nu. Kɛkala ɔkola ɔdua kɔmputa titile bie azo ɔ nee ɔ gɔnwo mɔ dua kɛlata mɔɔ bɛdua kɔmputa zo bɛkɛlɛ la azo bɛdi adwelie dahuu. Louise zɔnenle wɔ mekɛ mɔɔ ɔlile ɛvolɛ 17 la. Wɔ nolobɔlɛ titile bie mɔ anu, yɛyɛle adekpakyelɛ boavolɛ. Louise noko ɛnnea Baebolo ne anu kɛ Gary la, noko ɔkola ɔka ye diedi mɔɔ ɔlɛ ye wɔ Nyamenle ɛwɔkɛ mɔɔ yebɔ kɛ ɔbava ewiade fofolɛ yeara mɔɔ “anyenzinlirama anye badukue” na “awie biala mɔɔ wɔ sua ne azo la ɛnrɛha kɛ, ‘Me nwo ɛdo me’” la anwo edwɛkɛ.—Aye. 33:24; 35:5.

Nea kɛzi yɛ nye die nwolɛ kpalɛ kɛ yɛnwu nɔhalɛ mɔɔ wɔ Gyihova Edwɛkɛ ne anu la a! Ɔlua moalɛ mɔɔ yɛnyia ye wɔ asafo ne anu la ati, anyelielɛ ɛyi yɛ ahonle tɛkɛɛ, ɔluakɛ anrɛɛ yɛnrɛhola ninyɛne mɔɔ yɛyɛ la anu dɔɔnwo yɛ. Na ɔlua Gyihova moalɛ zo titile, yɛ ɛbɛlabɔlɛ gyi bodane zo.