MAYOR kaq ollqu wamräqa 1958 watachömi yurikurqan, y Gary nishpam jutin churarqä, yuririnqampita patsëmi sanu mana kanqanta cuentata qokurirqä. Mëdicukunaqa chunka killakunaran demorayarqan imapita qeshyanqanta musyayänampaq, jina Londres markachö mëdicukunapis pitsqa watataran musyayarqan ima qeshyawan kanqanta. Tsëpita isqun watakuna pasariptinmi warmi wamrä Louise yuririrqan, y pëqa turin qeshyanqampitapis mas avanzädunam kanaq, ¡tsëmi alläpa llakikurqä!

Mëdicukunaqa shumaqllapam kënö niyämarqan: “Ishkan wamrëkikunam síndrome de Bardet-Biedl * nishqan qeshyawan kayan y mas llakikïpaqqa tsëpaq jampi mana kanqanmi”. Tsë witsankunaqa manam alläpa musyakaqraqtsu tsë qeshya imanir tsarikunqanta. Tsëwan qeshyaqkunaqa nawipita y riñonpitam sufriyan, alläpam wilayäyan, diabëtis y osteoartrítis nishqan qeshyayoqmi kayan; jina manam ras winayantsu, chakinkuna y makinkunapis manam alleqllaqa funcionantsu y höraqa mas dëdukunayoqmi kayan. Tsëmi wamräkunata cuidananqa alläpa sasaraq o ajaraq kanan karqan. Tsëwan ëkaq qeshyayanqanta musyapakoqkunam niyan, Gran Bretaña nacionchöqa cada 125.000 nunakunapita juk tsë qeshyawan kanqanta. Jina niyanmi wakinkunataqa mana alläpa tsarinqantapis.

Casakunqäpita ichik tiempullatam Jehoväpa testïgunwan parlarqä y rasmi cuentata qokurirqa rasumpa kaqta taririnqäta. Espösötaqa manam interesarqantsu. Trabäjunrëkurmi markan markan purirlla kayaq kayä, tsëmi congregacionchö reunionkunamanqa ëwëta puëdeqtsu kä. Tsënö karpis, Diosman mañakïta y Biblia leyïtaqa manam jaqirqätsu. Llakishqakunapaq y “alläpa llakikï tiempukunachö mana juchoq perqanö” Jehovä kanqanta musyëqa alläpa kushikïpaqmi karqan (Sal. 9:9, 10).

Gary mana alleq rikaptinmi, joqta watanta cumpliriptin Inglaterra nacionpa apayarqä juk especial escuëlaman, tsëchö yachatsiyänampaq. Yarpachakunqankunapita willamänampaqmi seguidu telëfunupa qayamaq, y noqanam Bibliapa musyatsikïnimpita parlapëta procuraq kä. Y Louise wamrä yuririnqampita ichik watakunallatam, noqatapis mëdicukuna niyämarqan esclerosis múltiple y fibromialgia nishqanwan qeshyanqäta. Garyqa 16 watayoq këkarmi escuëlampita kutikamurqan, y nawinqa masmi antsärirqan y 1975 watachönam wisku quedarirqan. Tsëpita ishkë watallatanam majäqa jaqirayämarni ëwakurqan.

Gary kutiramunqampita ichik tiempullatam juk kuyakoq congregacionwan ëllukar o qorikar qallayarqä, y 1974 watachönam bautizakurirqä. Alläpam agradecikurqä jövin këninman chëkaptin ollqu wamräta juk ancianu yanapanqampita. Y wakin Testïgukunanam wayichö rurapakïkunawan yanapayämarqan. Tsëpita tiempuwannam cuidayämänampaq pitsqaq cristiänukunata churayämurqan, y tsëqa noqakunapaq ¡juk jatun bendicionmi karqan!

Garyqa Diospa kaqchö masmi poqurqan y 1982 watachömi bautizakurqan. Pëqa precursor auxiliar këtam munarqan, tsëmi noqapis precursor auxiliar kanäpaq churakarqä, y atska watakunapam precursor kayarqä. Juk kutin congregacionkunata watukaq turi kënö tapurirqan: “Gary, ¿imanirtaq  precursor regular kankitsu?” nir, tsënö tapurinqanqa alläpam kushitsirqan. Tsënö niyänantam ministikarqan, y 1990 watapaqqa precursor regularmi tikrarirqan.

Garytaqa ishkë kutim cambiapuyashqa tseqllan kaqchö moqunta o cadëranta, juk kutim 1999 watachö y juk kutinam 2008 watachö, peru Louisepa qeshyanqa mas grävem kashqa. Pëqa wiskanam yurirqan, juk kaq chakinchö juk dedu mas kaptinmi cuentata qokurirqä pëpis síndrome de Bardet-Biedl nishqan qeshyayoq kanqanta. Tsëpita exämenkunata rurakunqanchömi yarqamurqan ruripaqa mana alli kanqanta. Mëtsika kutim operakushqa, y pitsqa kutim riñonpita. Y pëpis Garynömi diabëtesyoq.

Operayänan höra complicacion kananta musyarmi, Louiseqa operaqnin mëdicukunawan, anestesia churaqkunawan y wakinkunawan parlan yawarta mana churayänampaq. Tsënöpam mëdicukuna y wakin kaqkunapis shumaq atiendiyan y cuidayan.

Wayichöqa imëkatam rurayä, peru masqa Jehoväta adorayänäpaqmi. Unëqa manam kanannötsu CD, DVD ni Internetchö www.pr418.com nishqanchö grabacionkuna kaq, tsëmi publicacionkunataqa kikïraq wamräkunata leipaq kä. Kananqa Diosta Adorana Hörata ruranapaqqa imëka yanapakïkunata kan, tsënöpam reunionkunachöpis mas comentëta puëdintsik.

Höraqa, de memoria yachakurïkurmi Garyqa Yachatsikunapaq Diospa Escuëlan nishqan reunionchö discursan. 1995 watapita patsëmi siervu ministerialnö yanapakun, jina reunion höra salonman ëwaqkunatapis kushishqam chaskin y sonïduchöpis yanapakunmi.

Yachatsikoq ëwaptinqa wakin turikunam yanaqäyan, y artritis qeshyayoq kar purita mana puëdiptinmi, ruëdayoq sïllanta kumar yanapayan. Wamräqa Bibliapita yachakïta munaq nunatam estudiatsin, tsëmi yachatsikïchö yanapanampaq juk turi yanaqan. Jina Garyqa, 25 watapana reunionman mana ëwaq nanatam yanaparqan, kananqa kë nana y estudiatsinqan nunapis reunionkunaman ëwayanmi.

Louise isqun watayoq këkaptinmi mamänï awëta yachatsirqan y cuidaqninwan noqanam bordëta yachatsiyarqä. Y pëtaqa alläpam gustan, tsëmi frazadakunataqa atska colorwan bordan congregacionchö llullu wamrakunapaq y mayorkunapaqpis. Jinamampis recuerdupaq shumaq tarjëtakunatam ruran. Tarjëtankunata chaskeq kaqkunaqa alläpam kuyayan. Jövinllaraq këkarmi Louiseqa mäquinawan tantiëllapa qellqëta yachakurqan. Peru kananqa juk parlaq computadöran kaptinmi amïgunkunawan comunicäkun Internetpa. 17 watayoq këkarmi bautizakurqan, y tsëpita patsam Jehoväpa markan precursora auxiliar kayänampaq invitakamuptin ishkäkuna precursöra kayä. Louisewan Garyqa de memoriam yachakuyan Bibliapa textonkuna ima ninqanta y tsënöpam nunakunata parlapäyan “wiskukunapa nawinkunapis kichakärinqam” y “manam ni pï: ‘Qeshyämi’ ninqanatsu” neq awnikïkunaman markäkuyanqampita (Is. 33:24; 35:5).

Diospa Palabranchö rasumpa kaq yachatsikïninkunapitaqa alläpam agradecikuyä. Jina shonqökunapita patsëmi alläpa agradecikuyä cristiänu mayïkuna yanapayämanqampita, porqui mana tsënö karqa manachi llapan rurayanqäta rurëta puëdiyämantsu karqan. Rasumpëpam, Jehovä yanapayämaptinmi imarëkur kawayanqäta musyayä.