GARY sutiyoq waway 1958 watapi naceruptillanmi musyakururqani mana allin kasqanta. Ichaqa, chunka killaraqmi pasanan karqa imawan onqosqanmanta doctorkuna qawanankupaq, chaymanta pichqa watamantañam Londres llaqtamanta kaq ancha yachayniyoq doctorkuna imawan onqosqanmanta willawarqaku. Isqon watamantañataqmi nacerurqa Louise sutiyoq warmi waway Garymantapas aswan onqoyniyoqraq, chaymi ancha llakisqa tarikurqani.

Doctorkunam sumaqllata niwarqa: “Iskaynin wawaykikunaqa Bardet-Biedl sutiyoq onqoywanmi kachkanku, chaypaqqa manam ima hampipas kanchu”, nispa. * Chay mana ancha reqsisqa onqoymantaqa manam ancha yacharqakuchu chay tiempopiqa. Chay onqoywan kaqkunaqa pisi-pisimantam hukmanyanku, anta-antallataña qawakunku, llumpayta poqonku, dedonkupas huk-iskay masmi, manam wiñayta atinkuchu, cuerponkupas manam allintachu kuyun, diabeteswanmi kanku, tullunkupim onqoy hapin hinaspa riñonninkupas manam allinchu. Chaymi wawaykunata uywayqa llumpay sasa karqa. Kay watakunallapi willakuyman hinaqa 125.000 runakunamantam 1 runa Gran Bretaña nacionpi chay onqoywan kachkanku, chaykunamanta hukkunam ichaqa mana chayna nisyu onqoywanchu kanku.

Casarakurusqay qepallamanmi huk testigowan rimarqani, chayllam cuentata qokururqani cheqap religionta tarirusqaymanta. Qosaymi ichaqa Bibliamanta yachaytaqa mana munarqachu. Llamkayninraykum sapa kuti huk lawkunaman astakuq kaniku, chaymi Salonpi huñunakuykunaman riyta mana atiqchu kani. Chayna kaptinpas, hinallam Jehova Diosta mañakuq kani hinaspa Bibliatapas leeq kani. Anchatam kallpanchawarqa Jehova Diosqa payta maskaqkunata mana haykapipas qonqasqanmanta hinaspa ñakariq runakunata sasachakuy tiempokunapipas amparaykuq kasqanmanta yachayqa (Sal. 9:9, 10).

Gary anta-antallataña qawakusqanraykum soqta watachayoq kachkaptin Inglaterra nacionpa sur lawninman kacharqaniku ñawsakunapaq hina yachachikuyta chaskinanpaq. Sapa kutim qayamuwaq ima llakinkunamantapas willawananpaq, chayna qayamuwaptinmi ñoqañataq Bibliapa wakin yachachikuyninkunamanta willaq kani. Waway Louise nacesqan qepallatam doctorkuna willawarqa esclerosis múltiple hinaspa fibromialgia nisqa sutiyoq onqoykunawan kasqaymanta. Garym kutiramurqa 16 watanpi kachkaspan, ñawinqa astawanmi manaña rikukurqachu, chaymi 1975 watapi ñawsa kasqanmantaña doctorkuna nirqaku. Chaymanta iskay wata qepallamanmi qosayqa saqeruwarqaku.

Gary kutiramusqan qepallamanmi congregacionpi huñunakuyta qallaykurqaniku, chaymi bautizakururqani 1974 watapi. Waway Garyta mozoyasqanpi congregacionpi anciano yanapasqanmantam ancha agradecesqa tarikurqani. Wakin Testigokunam wasiypi imapas ruwayniykunapi yanapawaqku. Chay qepamanmi yachasqayku llaqtapi kaq autoridadkuna churarqaku pichqa iñiqmasinchikkunata yanapawanankupaq, chayqa ancha kusikunapaqmá karqa.

Garyqa iñiyninpi hinalla ñawparispanmi 1982 watapi bautizakururqa. Payqa precursor auxiliar kaytam munarqa, chaymi achka watakuna paywan kuska precursor auxiliar karqaniku. Huk kutipim congregacionkunata  watukuq anciano nirqa: “Gary, atiwaqmi precursor regular kaytaqa”, nispa. Chaynata niptinmi ancha kusisqa tarikurqa chayta munasqanrayku, chaymi 1990 watapi precursor regular karqa.

Garytam iskay kutikama weqawninta operarqaku, huktam 1999 watapi huktañataqmi 2008 watapi, Louisepa onqoyninmi ichaqa aswan masraq karqa. Payqa ñawsam nacerqa, chakinpi soqta dedoyoq naceruptinmi musyakururqani paypas Bardet-Biedl nisqa onqoywan kasqanta. Chay qepamanmi doctorkuna niwarqa ukunpi llumpay mana allinkunawan kasqanmanta. Watakuna risqanman hinam achka kutikama operachikurqa, pichqa kutikamam riñonninta operarqaku. Gary hinam paypas diabetes nisqawan onqon.

Operaptinku sasachakuykuna kananta yachasqanraykum Louiseqa yawarta mana churachikuspalla operanankumanta doctorkunawan, anestesia churaqkunawan chaynataq hospitalpi llamkaqkunawan riman. Chaynata ruwasqanraykum hospitalpi payta atiendeqkunawan allin amistad kanku.

Wasiykupiqa Jehova Diosta servinaykupaqmi tukuy imata ruwaniku. Kunan tiempopi hina aparatokuna manaraq kachkaptinqa, wawaykunapaq imatapas leepuspaymi achka horata pasaq kani. Kunanqa CD, DVD hinaspa Internetpi www.pr418.com nisqapi tukuy ima uyarinapaq kasqanraykum, imay horapas sapa huñunakuypaq preparakuyta atiniku, hinaspaykum huñunakuykunapi rimariniku.

Garyqa wakinpim huñunakuypi rimarin umallanmanta hinaspapas atinmi Diosmanta Yachachinapaq Escuelapi mana leespalla discurso qoytapas. Siervo ministerialmi 1995 watamanta hinaspanmi huñunakuykunaman hamuqkunata kusikuywan chaskin, yanapakuntaqmi takikunata churaypipas.

Diosmanta willakuq lloqsiptinmi iñiqmasinchikkuna sapa kuti ruedayoq sillanta tanqanku tullu nanaywan onqosqanrayku. Huk iñiqmasinchikmi yanapan Bibliamanta yachay munaqman yachachinanpaq. Garyqa kallpancharqataqmi 25 wataña iñiyninpi chiriyasqa huk cristianatapas. Paykunaqa huñunakuykunamanmi rinku.

Mamaymi Louiseta isqon watachayoq kachkaptin tejeyta yachachirqa, ñoqañataqmi huk kaqnin cuidaqninwan bordayta yachachirqaniku. Louisetaqa gustanmi chay ruwayqa, chaymi ruwan wawachakunapaqwan yuyaqkunapaq sumaq-sumaq frazadakunata. Ruwantaqmi laqanapaq dibujochayoq tarjetachakunatapas. Chay ruwasqanta chaskiqkunaqa anchatam chaninchanku. Sipaschallaraq kachkaspanmi Louiseqa mana qawaspalla maquinapi qellqayta yacharurqa. Kunanqa computadorapa yanapakuyninwanmi Internetnintakama amistadninkunawan parlayta atin. 17 watanpim bautizakurqa, chaymantapacham iskayniyku precursor auxiliar karqaniku wakin killakunapi. Louisewan Garyqa predicanankupaqmi Bibliapi textokunata umallamanta yacharunku, allintam yuyanku Diospa prometesqanman hina ‘ñawsakuna qawarikunankumanta’ hinaspa “manañam mayqannikichikpas ninkichikñachu: ‘Onqochkanim’” nispa Bibliapa willakusqantapas (Is. 33:24; 35:5).

Anchatam agradecekuniku Jehova Diospa Palabranpi sumaq yachachikuykuna kasqanmanta. Sonqomantam agradecekuniku iñiqmasinchikkuna yanapawasqankumanta, paykuna mana yanapawaptinkuqa manam ima ruwaytapas atiymankuchu. Jehova Dios yanapawasqankuraykum vidaykuqa mana yanqapaqchu.