IHA tinan 1958 kuandu haʼu-nia oan-mane Gary moris, haʼu sente kedas katak nia iha problema ruma kona-ba saúde. Maibé liutiha fulan sanulu mak doutór sira foin hatene ninia moras, no depois tinan lima tan mak doutór espesialista sira iha sidade Londres hatene loloos katak nia iha moras neʼe. Kuandu Gary tinan sia, haʼu-nia oan-feto Louise moris, maibé haʼu triste tebes tanba haʼu haree nia iha moras boot liu fali Gary.

Doutór sira hatete ho kalma: “Ita-nia oan naʼin-rua iha moras síndroma LMBB, a no ita tenke tahan ho susar neʼe ba nafatin.” Iha tempu neʼebá, doutór sira ladún hatene kona-ba moras neʼe. Ema neʼebé iha moras hanesan neʼe la bele haree moos toʼo ikusmai sai matan-delek, isin sai bokur, iha liman-fuan ka ain-fuan neen, susar atu book liman-ain, iha diabete, artrite, no problema oioin iha rins. Tan neʼe, susar tebes ba haʼu atu tau matan ba haʼu-nia oan sira. Ohin loron, doutór sira fó sai katak iha rai-Bretaña, ema ida husi maizumenus ema naʼin-125.000 mak moris mai ho moras neʼe, maibé barak mak iha moras neʼebé ladún todan hanesan haʼu-nia oan sira.

Lakleur depois haʼu kaben, haʼu komesa estuda Bíblia ho Testemuña ba Jeová, no haʼu hatene kedas katak neʼe mak lia-loos. Maibé, haʼu-nia laʼen la interese kona-ba lia-loos. Tanba ninia serbisu, ami tenke muda beibeik ba fatin oioin, tan neʼe haʼu la bele tuir Testemuña sira-nia reuniaun. Maski nuneʼe, haʼu kontinua lee Bíblia no halo orasaun ba Jeová. Haʼu sente kontente tebes kuandu haʼu lee eskritura neʼebé dehan katak “Jeová sei sai fatin aas neʼebé seguru ba sé deʼit neʼebé laran-kraik, fatin aas neʼebé seguru iha tempu susar”, no katak nia “sei la husik hela ema neʼebé buka [nia]”!—Sal 9:9, 10.

Tanba Gary nia matan haree la moos, bainhira nia tinan neen, ami hatama nia ba asrama iha parte súl iha rai-Inglaterra atu nia bele hetan edukasaun espesiál. Nia telefone beibeik haʼu hodi koʼalia kona-ba buat neʼebé halo nia laran-susar, no liuhusi telefone, haʼu ajuda nia atu komprende lia-loos husi Bíblia. Liutiha tinan balu depois Louise moris, haʼu rasik mós hetan moras iha kakutak. Kuandu Gary tinan 16, nia fila fali ba uma. Maibé ninia matan sai aat ba beibeik, no iha tinan 1975, nia sai matan-delek ona. Iha tinan 1977, haʼu-nia laʼen husik ami.

Lakleur depois Gary fila ba uma, haʼu ho haʼu-nia oan sira komesa ransu ho irmaun-irmán sira iha kongregasaun, no haʼu hetan batizmu iha tinan 1974. Haʼu agradese tebes ba katuas kristaun ida neʼebé ajuda Gary atu hasoru mudansa isin nian durante ninia tempu joven. Irmaun-irmán seluk mós ajuda haʼu atu serbisu iha uma, no ikusmai, sira naʼin-lima komesa simu osan husi estadu tanba sira tau matan ba ami neʼebé moras. Ida-neʼe sai bensaun boot ida mai ami!

Gary kontinua laʼo ba oin iha lia-loos no hetan batizmu iha tinan 1982. Nia hakarak tebes atu foti pioneiru, tan neʼe haʼu deside atu serbí nuʼudar pioneiru estra hamutuk ho nia, no ami halo ida-neʼe ba tinan barak. Liutiha tinan balu, ami-nia katuas área nian hatete ba Gary: “Gary, oinsá se ó foti pioneiru regulár?” Liafuan neʼe halo Gary kontente tebes no laran-manas, no iha tinan 1990, nia komesa serbí nuʼudar pioneiru regulár.

 Iha tinan 1999 no 2008, Gary hetan operasaun atu troka ruin iha ninia knotak. Maibé Louise nia moras todan liu fali Gary nian. Louise moris mai ho matan-delek ona, no kuandu haʼu haree ninia ain sorin iha ain-fuan neen, haʼu hatene kedas katak nia mós iha síndroma LMBB. Lakleur, doutór hatete katak Louise iha moras oioin iha ninia laran. Toʼo ohin loron, Louise hetan operasaun beibeik, inklui operasaun dala lima iha ninia rins. No nia mós iha moras diabete, hanesan ho Gary.

Tanba Louise hatene buat neʼebé bele akontese durante operasaun, nia koʼalia antes ba doutór sira neʼebé halo operasaun, halo anestezia ka bius, no diretór sira iha ospitál hodi esplika ninia desizaun atu la simu tratamentu neʼebé uza raan. Rezultadu mak nia iha relasaun diʼak ho sira hotu neʼebé tau matan ba nia.

Iha uma, ami halo buat barak hodi adora Jeová. Uluk kuandu seidauk iha sasán modernu oioin, haʼu uza oras barak atu lee Bíblia no ita-nia livru sira ba Gary no Louise. Maibé ohin loron, ami kontente tanba ami bele uza CD, DVD, no download husi www.pr418.com hodi tuir ami-nia programa atu estuda Bíblia, no ami bele hola parte iha reuniaun sira hodi fó komentáriu.

Gary fó komentáriu hodi koʼalia husi buat neʼebé nia hanoin-hetan, no iha Eskola Serbisu Kristaun, nia hatoʼo diskursu hodi koʼalia ho ninia liafuan rasik. Iha tinan 1995, Gary hetan knaar atu serbí nuʼudar atan ba kongregasaun, no nia sempre iha buat barak atu halo iha Reuniaun-Fatin, hanesan fó benvindu ba irmaun-irmán sira no ajuda irmaun sira neʼebé tau matan ba ekipamentu lian nian.

Gary bá haklaken hamutuk ho ninia maluk sira, no baibain, sira mak dudu nia iha kadeira-roda tanba nia iha moras artrite. Irmaun ida ajuda nia atu halaʼo estudu Bíblia ho ema ida neʼebé hakarak hatene lia-loos. Gary mós fó laran-manas ba irmán ida neʼebé la hola parte iha atividade kristaun nian durante tinan 25. Sira naʼin-rua neʼe agora tuir reuniaun sira beibeik.

Kuandu Louise tinan sia, ninia avo-feto hanorin nia atu suku kroxé, no haʼu ho irmán ida hanorin borda ba nia. Tanba Louise gosta buat hirak-neʼe, nia halo manta ho kór oioin hodi fó ba bebé sira no ba maluk sira neʼebé idade ona iha kongregasaun. Nia mós gosta atu halo karta ho dezeñu kiʼik oioin, no sira neʼebé simu ninia karta hafolin tebes ida-neʼe. Kuandu Louise sei joven, nia mós aprende uza mákina-hakerek. Ohin loron, nia uza komputadór espesiál no kontaktu ho ninia kolega sira liuhusi internét. Louise hetan batizmu kuandu nia tinan 17, no iha tempu kampaña espesiál, ami serbí nuʼudar pioneiru estra hamutuk. Hanesan ho Gary, Louise mós dekór eskritura sira hodi fó sai ninia fiar ba Maromak nia promesa, katak “matan-delek sira-nia matan sei nakloke” no “la iha ema ida neʼebé sei dehan: ‘Haʼu moras’”.—Isa 33:24; 35:5.

Ami agradese tebes ba lia-loos husi Jeová nia Liafuan! Ami mós agradese ba irmaun-irmán sira iha kongregasaun neʼebé apoia ami ho domin, tanba se ami la hetan sira-nia ajuda, ami la bele halo buat barak neʼebé ami halo ohin loron. No liuliu tanba Jeová nia ajuda, ami halaʼo ami-nia moris neʼebé iha folin duni.