ER M MAR wan wam u nomso u i yer un ér Gary la ken inyom i 1958 la je, m kav er lu dedoo ga yô. Nahan kpa, yange tôô mbatwerev iwer pue u fan angev nav, shi anyom kar ataan cii ve mbatwerev mba ken gar u London, mba sôron angev mbura mase zuan un a angev mbu shon ye. Anyom nga kar ataankaranyiin yô, shi m mar cirin na u kwase, Louise. Un kpa due a akav a tesen ér angev nav hemba taver a mbu Gary. Kwagh la vihim kpen kpen.

Mbatwerev kende teghelee kaa a mo ér, “ônov ou mban cii mba a angev mbu i yer ér LMBB syndrome la, * man angev mbun mbu a icigh ga.” Sha shighe la, i lu a fa kwagh u angev mbun kpishi ga. Akav a i fe or a angev mbun sha mi yô, ka zayol u ashee, u ka a na or nan va hingir u pirin ashe la, man u kehen karen ikyaa inya, man u lun a ahôaveegh shin ahôangahar hemban ataan, man u vesen fefa ga, man u eren kwagh sha hwange ga, man angev mbu shugar man mbu sha uijuan man angev mbu sha ahi. Nahan lu u me ya ican kpishi u nengen sha ônov av mban. Semberee ne, kwaghtôvon tese ér ken tar u Ingila yô, ken atô u iorov 125,000 di tsô yô, or môm ker ka nan lu a angev mbun keng, kpa mbu taver ken ior mbagenev kpishi yum ga.

Er m er nom ica lu a gba ga la je, m lam a Orshiada u Yehova ugen, nahan her ave ave je m kav er ve lu tesen mimi u Bibilo yô. Kpa mayange nomom tese isharen ga. Er eren tom u i musan un fele fele yô, hanma shighe i gba u se mough se yem ape i musan un i yem a mi la, nahan m faantyô u zan mbamkombo hen ma tiônnongo ga. Kpa m za hemen u ôron Bibilo shi eren msen hen Yehova. Yange m er ijiir igen ken Bibilo yô, yôhôr mo iyol teghelee. Ijiir la kaa ér: “TER Una hingir ijiir i yeren sha ci u mba i kighir ve a ican yô, ijiir i yeren sha ayange a ican i tsung la,” shi una “kende mbakeren [Un] la, dang mayange ga.”—Ps. 9:9, 10.

Gary yange nengen tsembelee ga, nahan shighe u lu anyom ataratar la, i za wa un makeranta u mbaapirashe, u u lu ken imbusutariyan i tar u Ingila vegher u shin kpe ityeku la, lu tsan sha makeranta. Hanma shighe u kwagh a za un iyol yô, a yilam sha telefon se lam, nahan m wase un u kaven atindiakaa a Bibilo a yange gba u una hii fan la. M mar Louise anyom nga kar kpuaa yô, angev kôrom, igbila yam kera lu nalegh tsembelee ga, shi iyol yam cii wa amôndo. Gary va lun anyom 16 yô, a de u tsan sha makeranta, hide tsaan hen ya. Kpa ashe na er sooki ga, nahan i nger un iti ken mbaapirashe mba ken tar la, ken inyom i 1975. Ken inyom i 1977 la, nomom undu se yem kwagh na.

Gary yange hide hen ya ica lu a gba ga je maa, mo vea na se hingir u eren ityom hen tiônnongo u anmgbianev soo ayol a ve her kpishi yô. Nahan ken inyom i 1974 la, i erem batisema. Ortamen ugen yange wase Gary u nôngon a akaa a a lu zan un iyol la, hii shighe u lu a nyôr anyom ikyundu ga la, nahan kwagh ne doom kpishi. Mbashiada mbagenev lu wasen mo u eren ityom i hen ya, ken masejime yô, eniel u se lu her la va tôô anmgbianev mba nomso man mba kasev mbagenev utaan tom u nengen sha a vese hen ya. Kwagh ne lu iveren i kiriki ga!

Gary yange za hemen u vesen ken jijingi, nahan i er un batisema ken inyom i 1982 la. Er soo u hiin ishuen pania yum yô, mo kpa m kohol un, nahan se er tom la anyom imôngo. Shighe kar yô, ortamen u sôron atôônanongo va pine un ér, “Gary, er nan u hingir pania u keke ga?” Kwagh la yange doo wan wam kpen kpen. Lu ishimataver i Gary yange soo u zuan a mi vough je la. Nahan ken inyom i 1990 la, a hingir pania u keke.

 Yange i dugh Gary akuhe a hen ikyooso, i musan i wa agen kuma kwa har, ken inyom i 1999 man ken inyom i 2008 la, kpa angev mbu Louise mbura yange mbu hemba taver. Yange due a ashe a pirin ken uya je, shi er m nenge nguhar nagh kugenegh lu a ahôangahar ataratar yô, m kav er un kpa lu a angev mbu LMBB syndrome mbura yô. Akaa a yange i kar un la tese ér ikyav nav mbi ken atô kpa mbi a zayol. I pav un ipaven i vesen kuma anyom imôngo, i pav un ahi tseegh kuma kwa taan. Shi ngu a angev mbu shugar, er Gary nahan.

Er Louise a fe mbamtaver mba ka a gba u a pav or ve nan tagher a mi la yô, ngu a vande lamen a mbatwerev mba paven ior kua mba humen ior man mbahemenev mba nengen sha iyouci zum u i gbe u a pav un yô, sha er una pase ve er i hii ve un vende twer u tan awambe yô. Sha nahan yô, lun a zayol vea mba ve nengen sha kwagh u mkpeyol na ga.

Se mba eren akaa hen ya wase kpishi, man akaa ne cica cii har sha mcivir u Yehova. Shighe u mbaanar mba buter mba ainge ne lu a lu ga la, m tôô ahwa imôngo m ôr Gary man Louise takerada ve ungwa. Hegen icer i CD man i DVD kua akaa a i kor sha Intanet hen ijiir i www.pr418.com la nga wasen hanma wase u henen Bibilo sha aaven a i ver ken hanma kasua la sha ashighe kposo kposo, shi se fatyô u wan zwa ken mbamkombo mba Mbakristu sha gbenda u maan mbagenev.

Ashighe agen ka i gba u Gary una kôr mbamlumun ken ityough ve una fatyô u wan zwa ken mkombo ye, shi ka una lu a kwaghôron ken Makeranta u Henen Tom u Hemen u Aôndo yô, a kôrcio u nan kwaghôron la ken mkaanem nam. Ken inyom i 1995 la, i na un diakon, nahan hanma shighe yô, ka a lu a ityom ave hen Iyou i Tartor, a tesen anmgbianev akaateman shi a nengen sha mbaanar mba samber a iliam.

Mbashiada mbagenev ka ve dondo Gary ve due kwaghpasen, ashighe kpishi ka ve tuur un shin ikyekye i mbaawanev i a zenden shimi sha ci u angev nav mbu sha uijuan la. Anmgbian ugen yange wase un hen Bibilo a orgen u sar nan u fan mimi yô. Gary shi lam a kwase ugen u de kwaghpasen kuma anyom 25 yô, nahan kwase la zua a ishimataver. Iorov mba uhar mban cii mba zan mbamkombo mba Mbakristu hegen.

Shighe u Louise lu anyom ataankaranyiin la, a hen u tumen akondo sha ikyev i ngô na u tamen, shi mo kua anmgbian ugen ken mba gomoti a tee ve tom u nengen sha a vese hen ya la, se tese un u eren hwe sha akondo. Er a ze ikyura sha kwagh u akondo a tumen kpishi yô, ngu a tume ugile mba doon ashe sha ci u ankyundanev kua mbabeenyol kpaa ken tiônnongo. Shi ngu a er kaade mba tindin ior a ishughun, a var ufoto sha mi i doo u nengen. Ka a̱ na or kaade ne nahan i doo nan kpen kpen. Shighe u Louise lu a nyôr anyom ikyundu ga la, a hen u gberen ikyekye. Hegen ne, ngu a kômputa u lamen u i er sha ci u ambaaior la yô, nahan kômputa shon ka a wase un u lamen a mbaaboki nav shin tindin ve a ilyoho sha Intanet. Yange i er Louise batisema shighe u lu anyom 17 la. Ka a va lu shighe u yôôn angwe u M-umbur yô, mo man un se tôô ishuen pania imôngo. Louise kpa ngu a kôr avur a Bibilo ken ityough, er Gary nahan, sha er una pase jighjigh u nan na ken ityendezwa i Aôndo a er sha kwagh u tar u he, u a va “bugh mbaapirashe ashe,” shi ‘ma or u nan tem ker kpaa nana kera kaa ér: Kwagh nyoon mo ga’ la yô.—Yes. 33:24; 35:5.

Akaa a mimi a doon tsung, a a lu ken Mkaanem ma Yehova a ne i nger la nga se a inja kpishi! Asema a ase iv a iwuese sha iwasen i tiônnongo wase a ne se sha dooshima la. A iwasen la shio yô, akaa kpishi ma a hembe se u eren. Shi kwagh u hemban cii yô, Yehova ngu wasen se, nahan uma wase ngu se a inja.