MAKANI AABUUMI

Ikaambo Buumi Bwesu Ncobujisi Mpindu

Akaluulwa aba Patricia Smith

NOKWAKAINDA buyo ciindi cisyoonto kuzwa ciindi mwanaangu musankwa Gary naakazyalwa mu 1958, ndakabona kuti kwakali cakalubide kujatikizya nguwe. Nokuba boobo, cakatola myezi iili 10 kutegwa bamadokota bazyibe bulwazi bwakwe alimwi kwakainda myaka yosanwe kutegwa basilisi bacibwene baku London basinizye bulwazi oobo. Ciindi mwanaangu musimbi Louise naakazyalwa kakwiindide myaka iili fwuka kuzwa ciindi Gary naakazyalwa, ndakatyompwa kapati kubona kuti penzi ndyaakajisi Gary wakalilijisi awalo, alimwi walo penzi lyakwe lyakali lipati kwiinda lya Gary.

Calubomba, bamadokota bakandaambila kuti: “Bana banu boonse bobilo bajisi bulwazi bwiitwa kuti Laurence-Moon-Bardet-Biedl (LMBB) * (bulwazi ibuboola akaambo kakunyongana kwamaseelo aakazwa kubazyali), alimwi tabusilikiki.” Aciindi eeco, kunyina makani manji aakazyibidwe kujatikizya kunyongana kwamaseelo ooku. Zitondezyo zyabulwazi oobu zibikkilizya penzi lyakutalanga kabotu icipa koofwaala, kuneneya kapati, kuvwula kwatunwe, kumuka kukomena, bulwazi bwasyuga, bulwazi bulya nswaanganino zyamafuwa, alimwi akutabeleka kabotu kwansa. Aboobo, kulanganya bana bangu lyakali kuyakuba penzi lipati. Buvwuntauzyi bumwi ibwakacitwa caino-ino butondezya kuti muntu omwe akati kabantu bali 125,000 mucisi ca Britain ulijisi bulwazi oobu, nokuba kuti kubanabunji bulwazi tabuli bupati.

JEHOVA MBWAAKABA “MAYUBILO” EESU

Kakwiindide buyo ciindi cisyoonto kuzwa ciindi nondakakwatwa, Kamboni wa Jehova umwi wakandiyiisya kasimpe kamu Bbaibbele. Nokuba boobo balumi bangu kunyina nobakali kuzikkomanina eezyo. Akaambo kamulimo wabo, twakali kulonga-longa, aboobo tiindakali kucikonzya kuswaangana. Nokuba boobo, ndakazumanana kubala Bbaibbele akupaila kuli Jehova. Eelo kaka ndakaumbulizyigwa nondakabala kuti: “Jehova ngemayubilo aabapenzegwa, mayubilo kuziindi zyamapenzi” alimwi akuti ‘takabalekelezyi aabo bamuyandaula’!—Int. 9:9, 10.

Gary tanaakali kulanga kabotu, aboobo ciindi naakakkwanya myaka iili cisambomwe yakuzyalwa, wakaunka kuyakukkalila kucikolo nkobayiisya lwiiyo lwaalubazu, cikolo icakali kumbali aalwizi, cisi ca England nkocili kumusanza. Wakali kuvwula kunditumina fooni akundaambila makani aakali kumupenzya, alimwi kwiinda mukubelesya fooni ndakali kumwaambila makani amwi aamu Bbaibbele. Nokwakainda buyo myaka misyoonto kuzwa ciindi Louise naakazyalwa, ndakaciswa, nsinga amilambi zyakali kucisa. Gary wakazwa kucikolo naakakkwanya myaka iili 16 yakuzyalwa. Nokuba boobo, penzi lyakutalanga kabotu lyakali kukomena, mu 1975 bamadokota bakaamba kuti moofwu. Mu 1977 balumi bangu bakatutija.

Kakwiindide buyo ciindi cisyoonto kuzwa ciindi Gary naakapiluka, twakali kutola lubazu mumilimo yambungano, mpoonya mu 1974 ndakabbapatizyigwa. Ndakakkomana kapati ciindi mwaalu umwi naakagwasya Gary kutegwa alwane buyumuyumu mbwaakajisi ciindi naakali mukubusi. Bakamboni bamwi bakali kundigwasya milimo yaaŋanda, mukuya kwaciindi kabunga kabasikugwasyilizya kakatalika kubbadela Bakamboni bosanwe kutegwa kabatugwasya. Eeci cakali cilongezyo cipati!

Gary wakazumanana kuyaambele mukasimpe alimwi mu 1982 wakabbapatizyigwa. Wakakanzide kutalika bupainiya bwakugwasyilizya. Aboobo, ndakasala kuti ndimusangane mumulimo ooyu alimwi ndakazumanana kucita oobo kwamyaka iili mbwiibede. Mwanaangu wakakkomana kapati ciindi mulangizi wabbazu  naakamubuzya kuti: “Gary, nkaambo nzi ncotali mupainiya waciindi coonse?” Gary wakali kuyandika kukulwaizya kutalika bupainiya bwaciindi coonse. Mu 1990 wakasalwa kuba mupainiya waciindi coonse.

Gary wakaandulwa ziindi zyobilo kucinca tusolo, ciindi cakusaanguna mwakali mumwaka wa 1999, mpoonya kwaandulwa kwabili kwakali mumwaka wa 2008, pele penzi lya Louise lyakali lipati kwiinda lya Gary. Wakazyalwa kali moofwu, alimwi nondakabona kuti wakajisi tunwe tuli cisambomwe kukuulu kumwi, ndakazyiba kuti awalo wakajisi bulwazi ibuboola akaambo kakunyongana kwamaseelo aazwa kubazyali. Nobakamana kumulanga-langa bamadokota, kwakajanika kuti zizo zyakwe zyamumubili azyalo zyakalinyongene. Ciindi aciindi, Louise wali kwaandulwa, alimwi ziindi zyosanwe wakaandulwa insa. Mbubwenya mbuli Gary, awalo ujisi bulwazi bwasyuga.

Mbwaanga ulibuzyi buyumuyumu ibuboola akaambo kakwaandulwa, Louise ulabaambila basilisi boonse kakucili ciindi kusala kwakwe ikujatikizya ncatayandili kubikkwa bulowa. Akaambo kaceeco, ulamvwana kapati abaabo ibamusilika.

BUUMI BWESU BULIJISI MPINDU

Tulacita zyintu zinji muŋanda yesu kukomba Jehova. Ciindi mincini yamazuba aano noyatakaliko, ndakali kutola mawoola manji kubalila Gary a Louise. Pele mazuba aano, ma CD, ma DVD, alimwi azyakalekkoodwa izijanika a website ya www.pr418.com zilatugwasya toonse kutobelezya mulongo waciiyo ca Bbaibbele aziindi zisiyene-siyene, eeci cilatugwasya kutegwa katupa bwiinguzi bugwasya ciindi camiswaangano ya Bunakristo.

Zimwi ziindi Gary ulapa bwiinguzi kwiinda mukuyeeya nzyaakabala, alimwi ciindi napa makani mu Cikolo Camulimo Weendelezyegwa a Leza, ulacikonzya kwaamba mumajwi aakwe. Mu 1995 wakasalwa kuba mukutausi alimwi lyoonse inga ujisi bubi mumilimo ya Ŋanda ya Bwami, kutambula baabo ibaboola kumiswaangano alimwi akugwasyilizya kumincini yakwaambawida.

Bakamboninyina balaunka anguwe mumulimo wakukambauka, ziindi zinji balamugwasya kutonta kacinga kabalema nkeendela mbwaanga ujisi bulwazi bulya zifwuwa. Mukwesu umwi wakamugwasya kusololela ciiyo ca Bbaibbele amuntu umwi wakajisi luyandisisyo. Gary alimwi wakacikonzya kukulwaizya mucizyi umwi iwatakali musungu kwamyaka iili 25. Boonse balajanika kumiswaangano ya Bunakristo.

Louise naakajisi myaka yakuzyalwa iili fwuka, bakaapanyina bakamuyiisya kusuma, mebo alimwi amukaintu umwi iwakali kumulanganya twakamuyiisya mulimo wakubikka madeekko kuzisani. Mbwaanga ulauyanda kapati mulimo wakusuma, ulasuma mapayi aabana alimwi aabacembeede bamumbungano. Alimwi ulapanga makkaadi akunamatika zifwanikiso kulingawo. Makkaadi aaya balaakkomanina aabo ibaatambula. Naakaba buyo mukubusi, Louise wakaiya mulimo wakutaipa. Mazuba aano, kwiinda mukugwasyigwa amapulogilamu aakkompyuta aagwasya boofwu, ziindi zinji ulabandika abeenzyinyina kwiinda mukubatumina tugwalo twaakkompyuta (e-mail). Louise wakabbapatizyigwa ciindi naakajisi myaka yakuzyalwa iili 17. Ciindi notucita bukambausi bwaalubazu, tulakkomana kucita bupainiya bwakugwasyilizya antoomwe. Mbubwenya mbuli Gary, Louise ulaamba magwalo ngaakapeta mumutwe aatondezya zisyomezyo zya Leza kujatikizya nyika mwalo ‘meso aaboofwu mwayakujaluka’ alimwi mwalo mutakabi muntu “naba omwe akati kabantu banyika uuamba kuti, ndaciswa.”—Is. 33:24; 35:5.

Eelo kaka tulalumba akaambo kakasimpe ikajanika mu Jwi lya Jehova ilyakasololelwa amuuya! Tulalumba kapati kulugwasyo ndotutambula kuzwa kuli basimbungano, nkaambo notwatali kucikonzya kucita milimo minji tolikke. Pele akaambo kalugwasyo lwa Jehova, buumi bwesu bulijisi mpindu.

[Bupanduluzi buyungizidwe]

[Cifwanikiso icili apeeji 25]

[Majwi aakwelelezya sikubala aali apeeji 25]

Eelo kaka tulalumba akaambo kakasimpe ikajanika mu Jwi lya Jehova ilyakasololelwa amuuya!