ENDZHAKUNYANA ka loko Gary, n’wana wa mina wa jaha a velekiwile hi 1958, ndzi xiye leswaku a ku ri ni nchumu wo karhi lowu a wu nga fambi kahle. Hambiswiritano, swi teke tin’hweti ta khume leswaku madokodela ma tiva leswaku u khome hi yini ni malembe man’wana ya ntlhanu leswaku madokodela ya le London lama nga ni vutshila bya mavabyi yo karhi ma swi tiyisekisa. A ndzi ri ni gome swinene loko Louise, n’wana wa mina wa nhwanyana la velekiweke endzhaku ka malembe ya kaye Gary a velekiwile, a ve ni swikombiso swa mavabyi leswi tlulaka swa buti wa yena.

Madokodela ma ndzi byele hi moya wo rhula ma ku: “Vana va wena havambirhi va ni vuvabyi lebyi vuriwaka LMBB, * naswona khombo ra kona a byi tshunguleki.” Hi nkarhi wolowo, a ku nga tiviwi swo tala malunghana ni vuvabyi lebyi bya xitekela lebyi nga talangiki. Swikombiso swa byona swi katsa ku nga voni kahle laha u hetelelaka u ri bofu, ku nyuhela ngopfu, ku va ni tintiho kumbe swikunwana leswi engetelekeke, ku nga kuli hi mfanelo, ku nga tirhisani ka swirho swa miri hi nkarhi wun’we, vuvabyi bya chukele, ku pfimba ka mahlangano ni ku nga tirhi kahle ka tinso. Hikwalaho, a swi ta tika swinene ku khathalela vana va mina. Nkambisiso wa sweswinyana wu ringanyete leswaku munhu un’we eka vanhu va 125 000 le Britain u khomiwe hi vuvabyi lebyi, hambileswi vanhu vo tala va nga ha vaka va ri ni vuvabyi lebyi kambe lebyi nga tikangiki ngopfu.

Endzhakunyana ka loko ndzi tekiwile ndzi vulavule ni Mbhoni yin’wana ya Yehovha, hiloko ndzi namba ndzi swi vona leswaku ti dyondzisa ntiyiso. Kambe nuna wa mina a a nga wu tsakeli nikatsongo. A hi tshamela ku rhurha hikwalaho ka ntirho wa yena, hikwalaho a ndzi nga swi koti ku ya eminhlanganweni. Nilokoswiritano, ndzi ye emahlweni ndzi hlaya Bibele ndzi tlhela ndzi khongela eka Yehovha. A swi chavelela swinene ku hlaya leswaku “Yehovha u ta va xisirhelelo lexi tlakukeke eka un’wana ni un’wana la pfotlosiweke, xisirhelelo lexi tlakukeke hi minkarhi ya maxangu” ni leswaku a “nge va tshiki lava [n’wi] lavaka hakunene”!—Ps. 9:9, 10.

Gary a a nga voni kahle, hikwalaho loko a ri ni malembe ya tsevu, u yisiwe ku ya tshama ehositele ya xikolo leswaku a ta kuma dyondzo yo hlawuleka eribuweni ra le dzongeni wa Nghilandhi. A a tshamela ku ndzi bela riqingho a ndzi byela swilo leswi a swi n’wi karhata, naswona ndzi swi kotile ku n’wi pfuna leswaku a twisisa milawu ya le Bibeleni loko ndzi ri karhi ndzi vulavula na yena hi riqingho. Malembe ma nga ri mangani endzhaku ka loko ku velekiwe Louise, ndzi khomiwe hi vuvabyi lebyi lamataka miri ni vuvabyi bya ku oma ka misiha ni ku pandza ka yona. Gary u vuye ekaya loko a ri ni malembe ya 16. Hambiswiritano, mahlo ya yena ma lo nyanya naswona hi 1975 se a a ri bofu. Hi 1977 nuna wa mina u fambe a hi siya.

Endzhakunyana ka ku vuya ka Gary, hi sungule ku hlanganyela ni vandlha leri nga ni rirhandzu ni ku chumayela naswona ndzi khuvuriwe hi 1974. Ndzi tsake swinene loko nkulu un’wana a pfune Gary ku langutana ni ku cinca loku a ku va kona emirini wa yena loko a ri emalembeni ya kondlo-a-ndzi-dyi. Timbhoni tin’wana ti ndzi pfune hi mintirho ya le kaya, naswona eku heteleleni valawuri va kwalaho va hlawule ntlhanu wa tona leswaku ti hi pfuna kutani va ti hakela. Wolowo wu ve nkateko hakunene!

Gary u ye emahlweni a endla nhluvuko lowunene entiyisweni naswona u khuvuriwe hi 1982. A a swi lava swinene ku va phayona ra nkarhinyana. Hikwalaho, na mina ndzi teke vuphayona byolebyo leswaku ndzi ta famba na yena naswona hi phayone ku ringana malembe yo hlayanyana. N’wana wa mina wa jaha a a tsake swinene loko  endzhaku ka nkarhi mulanguteri wa hina wa xifundzha a n’wi vutisile a ku: “Gary ha yini u nga teki vuphayona bya nkarhi hinkwawo?” Xolexo a ku ri xikhutazo lexi Gary a a xi lava naswona u hlawuriwe ku va rona hi 1990.

Gary u endliwe vuhandzuri bya nyonga kambirhi, byo sungula hi 1999 naswona bya vumbirhi hi 2008, kambe swiphiqo swa rihanyo swa Louise a swi tike ngopfu. U velekiwe a ri bofu, naswona loko ndzi vona a ri ni xikunwana lexi engetelekeke enengeni wa yena, ndzi swi xiyile leswaku na yena a a ri ni vuvabyi lebyi vuriwaka LMBB. Ku nga ri khale minkambisiso yi kombise leswaku swirho swa yena swo tala swa le ndzeni na swona a swi nga tirhi kahle. Emalembeni lama hundzeke u endliwe vuhandzuri byo tala lebyikulu, ku katsa ni ntlhanu wa byona eka tinso ta yena. Na yena u ni vuvabyi bya chukele ku fana na Gary.

Leswi Louise a swi tivaka swiphiqo leswi nga ha vaka kona loko a fanele a endliwa vuhandzuri, u vulavurisana ni vativi va vuhandzuri, va ku titivarisa ni vakongomisi va xibedlhele ka ha ri emahlweni a va hlamusela leswaku ha yini a ala ku pomperiwa ngati. Hikwalaho u ni vuxaka lebyinene ni vanhu hinkwavo lava n’wi pfunaka eka swiphiqo swa yena swa rihanyo.

Hi endla swilo swo tala ekaya ra hina leswaku hi gandzela Yehovha. Loko switirhisiwa swa manguva lawa swa elektroniki swi nga si va kona a ndzi tala ku heta tiawara to tala ndzi hlayela Gary na Louise. Sweswi ti-CD, ti-DVD ni rungula leri rhekhodiweke leri kumekaka eka www.pr418.com swi endla leswaku hinkwerhu ka hina hi kota ku landzela xiyimiso xa vhiki na vhiki xa ku dyondza Bibele hi minkarhi yo hambana-hambana, naswona hi nga kota ku hlamula eminhlanganweni ya Vukreste.

Minkarhi yin’wana Gary wo tinhlokohata tinhlamulo ta yena, naswona loko a ri ni nkulumo eXikolweni xa Vutirheli bya le Tilweni, wa swi kota ku yi nyikela hi marito ya yena. U hlawuriwe ku va nandza wa vutirheli hi 1995 naswona minkarhi hinkwayo u va a khomekile eHolweni ya Mfumo, a amukela swirho swa vandlha a tlhela a pfuneta eka muchini wo lawula mpfumawulo.

Timbhoni-kulorhi ti famba na Gary ensin’wini, hakanyingi ti n’wi chovha hi xitulu xa mavhilwa lexi a fambaka ha xona hileswi a nga ni vuvabyi bya mahlangano ya marhambu. Yin’wana yi n’wi pfunile leswaku a fambisa dyondzo ya Bibele ni munhu la tsakelaka. Gary u tlhele a khutaza Mukreste un’wana loyi a ri ni malembe ya 25 a horile. Vanhu lava havambirhi va va kona sweswi eminhlanganweni ya Vukreste.

Loko Louise a ri ni malembe ya kaye, kokwa wa yena wa xisati la ndzi velekeke u n’wi dyondzise ku rhunga, naswona mina ni un’wana wa Timbhoni leti hi khathalelaka hi n’wi dyondzise ku khavisa swilo endzhaku ka loko a swi rhungile. Leswi a yaka emahlweni a tsakela ku rhunga swinene, u rhunga swinkumbana swa mivalavala a rhungela vana swin’we ni vanhu lavakulu va le vandlheni. U tlhela a endla makhadi a ma namarheta swifaniso leswitsongo. Vanhu lava nyikiwaka makhadi wolawo va ma tlangela swinene. Louise u dyondze ku thayipa loko a ha ri emalembeni ya kondlo-a-ndzi-dyi. Sweswi u kota ku vulavurisana ni vanghana vakwe hi ku va rhumela ti-e-mail hi ku pfuniwa hi khompyuta yakwe yo hlawuleka leyi kotaka ku n’wi hlayela ti-e-mail. Louise u khuvuriwe loko a ri ni malembe ya 17. Loko ku ri ni matsima yo hlawuleka yo chumayela, hi tiphina hi vuphayona bya nkarhinyana hi ri swin’we. Ku fana na Gary, Louise u nhlokohata matsalwa leswaku a phofula ripfumelo ra yena eka switshembiso swa Xikwembu swa misava leyi “mahlo ya lava nga voniki ma [nga] ta pfuriwa” naswona “ku hava munhu la tshamaka kona la nga ta ku: ‘Ndza vabya.’”—Esa. 33:24; 35:5.

Hi wu tlangela swinene ntiyiso wa risima lowu kumekaka eRitweni ra Yehovha leri huhuteriweke! Timbilu ta hina ti wu tlangela swinene nseketelo wa rirhandzu lowu hi wu kumaka evandlheni ra ka hina, hikuva a hi nga ta kota ku endla swilo swo tala handle ka wona. Naswona ngopfu-ngopfu hikwalaho ka mpfuno wa Yehovha, vutomi bya hina byi ni xikongomelo.